IARSCRÍBHINN

Teimpléad chun faisnéis a sholáthar do náisiúnaigh tríú tíortha faoi phróiseáil sonraí pearsanta sa Chóras Dul Isteach/Imeachta

Tá taifid sonraí pearsanta sa Chóras Dul Isteach/Imeachta (1) ar náisiúnaigh tríú tíortha a thagann go críoch na mBallstát (2) ar feadh gearrfhanachta (90 lá ar a mhéad in aon tréimhse 180 lá). Tháinig an córas i bhfeidhm ar [dáta]. Ón dáta sin i leith, tá faisnéis faoi do chuid iontrálacha isteach agus amach as críoch na mBallstát, agus, más infheidhme, faisnéis maidir le cibé ar diúltaíodh cead isteach duit, cláraithe sa Chóras Dul Isteach/Imeachta.

Chuige sin, bailítear agus próiseáiltear do shonraí thar ceann [Údarás an Bhallstáit atá freagrach as an bpróiseáil] (rialaitheoir(í)). Féach thíos na sonraí teagmhála. Próiseáiltear do shonraí pearsanta chun críoch bainistithe teorann, chun inimirce neamhrialta a chosc agus chun bainistiú sreabha imirce a éascú. Ceanglaítear é seo i gcomhréir le Rialachán (AE) 2017/2226 (3), go háirithe Airteagail 14, 16 go 19 agus 23 de Chaibidil II agus Caibidil III den Rialachán

Cad iad na sonraí a bhailítear, a thaifeadtar agus a phróiseáiltear?

Le linn seiceálacha ag teorainneacha seachtracha na mBallstát, tá sé éigeantach do shonraí pearsanta a bhailiú chun coinníollacha iontrála a scrúdú. Bailítear agus taifeadtar na sonraí pearsanta seo a leanas:

(1)	sonraí atá liostaithe i do dhoiciméad taistil; agus

(2)	sonraí bithmhéadracha: ó d’íomhá aghaidhe agus do mhéarloirg (4).

Bailítear sonraí fút ó fhoinsí eile freisin, ag brath ar do chás:

(1)	An Córas Faisnéise Víosaí; sonraí atá i do chomhad pearsanta; agus

(2)	an Córas Eorpach um Fhaisnéis agus um Údarú Taistil, go háirithe stádas d’údaraithe taistil agus do stádas mar bhall teaghlaigh, más infheidhme.

Cad a tharlóidh mura gcuireann tú na sonraí bithmhéadracha a iarrtar ar fáil?

Mura gcuireann tú na sonraí bithmhéadracha a iarrtar ar fáil le haghaidh clárúcháin, fíoraithe nó aitheantais sa Chóras Dul Isteach/Imeachta, diúltófar cead isteach duit ag na teorainneacha seachtracha.

Cé atá in ann rochtain a fháil ar do shonraí?

Is féidir leis na Ballstáit rochtain a fháil ar do shonraí chun críoch bainistithe teorann, trasnú teorann a éascú, inimirce agus chun fhorghníomhú an dlí. Féadfaidh Europol rochtain a fháil ar do shonraí freisin chun críocha fhorghníomhú an dlí. Faoi choinníollacha dochta, féadfar do shonraí a aistriú chuig Ballstát, tríú tír nó eagraíocht idirnáisiúnta atá liostaithe in Iarscríbhinn I de Rialachán (AE) 2017/2226 (5) chun críocha (6) an fhillte nó fhorghníomhú an dlí (7).

Stórálfar do shonraí sa Chóras Dul Isteach/Imeachta ar feadh na tréimhse seo a leanas, agus scriosfar go huathoibríoch iad ina dhiaidh sin  (8):

(1)	déantar taifid ar gach dul isteach, imeacht nó cead isteach a diúltaíodh a stóráil ar feadh 3 bliana ag tosú ar dháta an taifid ar an dul isteach, imeacht nó cead isteach a diúltaíodh; (9)

(2)	déantar an comhad aonair ina bhfuil do chuid sonraí pearsanta a stóráil ar feadh 3 bliana agus lá amháin ag tosú ó dháta an taifid scoir dheireanaigh nó ón taifead ar dhiúltú cead isteach i gcás nach bhfuil aon iontráil taifeadta le linn na tréimhse sin;

(3)	mura bhfuil aon taifead imeachta ann, stóráiltear do chuid sonraí ar feadh 5 bliana ag tosú ar dháta éagtha d’fhanachta údaraithe.

Fanacht údaraithe fágtha agus rófhanacht

Tá sé de cheart agat faisnéis a fháil ón ngarda teorann maidir leis an uastréimhse atá fágtha de d’fhanacht údaraithe ar chríoch na mBallstát. Is féidir leat féachaint ar an suíomh Gréasáin seo a leanas freisin [nasc chuig suíomh greásáin poiblí EES]nó, nuair atá sé ar fáil, an trealamh atá suiteáilte ag teorainneacha chun an fanacht údaraithe atá fágtha agat a fhíorú tú féin.

Má fhanann tú níos faide ná an tréimhse fanachta údaraithe, cuirfear do shonraí go huathoibríoch le liosta daoine aitheanta (liosta de rófhantóirí). Féadfaidh údaráis inniúla náisiúnta rochtain a fháil ar an liosta. Má tá tú ar an liosta sin de rófhantóirí [iarmhairtí ó bheith i do rófhantóir le cur leis ag na Ballstáit]. (10) Mar sin féin, más féidir leat fianaise inchreidte a sholáthar do na húdaráis inniúla gur sháraigh tú achar údaraithe do chuairte mar gheall ar theagmhais thromchúiseacha nárbh fhéidir a thuar, is féidir do shonraí pearsanta a cheartú nó a chomhlánú sa Córas Dul Isteach/Imeachta agus is féidir tú a bhaint de liosta na rófhantóirí.

Do chearta i ndáil le próiseáil sonraí pearsanta

Tá na cearta seo a leanas agat:

(1)	rochtain ar shonraí a bhaineann leat a iarraidh ar an rialaitheoir;

(2)	a iarraidh go gceartófar nó go gcomhlánófar sonraí míchruinne nó neamhiomlána a bhaineann leat; agus

(3)	a iarraidh go scriosfar sonraí pearsanta a bhaineann leat agus a próiseáladh go neamhdhleathach, sin nó go gcuirfear srian lena bpróiseáil.

Más mian leat aon cheann de na cearta sin a liostaítear i bpointí (1) go (3) a fheidhmiú, ní mór duit dul i dteagmháil leis an rialaitheoir sonraí nó leis an oifigeach cosanta sonraí a shonraítear thíos.

Sonraí teagmhála

Rialaitheoir(í) sonraí: [seoladh agus sonraí teagmhála le líonadh ag na Ballstáit – rialaitheoir sonraí].

Oifigeach(oifigigh) cosanta sonraí: [seoladh agus sonraí teagmhála le líonadh ag na Ballstáit].

I gcomhréir le roinnt na gcúraimí idir údaráis na mBallstát agus na gníomhaireachtaí Eorpacha lena mbaineann, is féidir leat gearán a dhéanamh le:

Údarás maoirseachta [an Ballstát] atá i gceannas ar do shonraí a phróiseáil (e.g. má líomhnaíonn tú gur thaifead siad do shonraí go mícheart): [Faisnéis a bhaineann go sonrach leis an mBallstát le sonrú – seoladh agus sonraí teagmhála]

An Maoirseoir Eorpach um Chosaint Sonraí maidir le ceisteanna próiseála sonraí ag Gníomhaireachtaí Eorpacha: [sonraí teagmhála le sonrú – seoladh agus sonraí teagmhála]

[Tuilleadh faisnéise ó na Ballstáit faoi chearta na ndaoine is ábhar sonraí nó faoin bhféidearthacht cúnamh a fháil ó na húdaráis mhaoirseachta]. Le haghaidh tuilleadh faisnéise féach, le do thoil, ar shuíomh gréasáin poiblí an Chórais Dul Isteach/Imeachta [cuir nasc/ainm leis].

---

(1)  Rialachán (AE) 2017/2226 lena mbunaítear Córas Dul Isteach/Imeachta (EES) chun sonraí faoi dhul isteach agus imeacht a chlárú agus sonraí faoi dhiúltú cead isteach do náisiúnaigh tríú tír agus iad ag trasnú theorainneacha seachtracha na mBallstát agus lena gcinntear na coinníollacha ar a dtabharfar rochtain ar EES chun críocha fhorghníomhú an dlí, agus lena leasaítear an Coinbhinsiún lena ndéantar Comhaontú Schengen a chur chun feidhme agus Rialachán (CE) Uimh. 767/2008 agus Rialachán (AE) Uimh. 1077/2011.

(2)  An Ostair, an Bheilg, an Bhulgáir, Poblacht na Seice, an Danmhairg, an Eastóin, an Fhionlainn, an Fhrainc, an Ghearmáin, an Ghréig, an Ungáir, an Íoslainn, an Iodáil, an Laitvia, Lichtinstéin, an Liotuáin, Lucsamburg, Málta, an Ísiltír, an Iorua, an Pholainn, an Phortaingéil, an Rómáin, an tSlóvaic, an tSlóivéin, an Spáinn, an tSualainn agus an Eilvéis.

(3)  Rialachán (AE) 2017/2226 ó Pharlaimint na hEorpa agus ón gComhairle an 30 Samhain 2017 maidir le Córas Dul Isteach/Imeachta (EES) a bhunú chun sonraí faoi dhul isteach agus imeacht a chlárú agus sonraí faoi dhiúltú cead isteach do náisiúnaigh tríú tíortha agus iad ag trasnú theorainneacha seachtracha na mBallstát agus lena gcinntear na coinníollacha ar a dtabharfar rochtain ar EES chun críocha fhorghníomhú an dlí, agus lena leasaítear an Coinbhinsiún lena ndéantar Comhaontú Schengen a chur chun feidhme agus Rialachán (CE) Uimh. 767/2008 agus Rialachán (AE) Uimh. 1077/2011 (IO L 327 9.12.2017, lch. 20).

(4)  Tabhair faoi deara le do thoil go stórálfar sonraí méarloirg náisiúnach tríú tíortha nach bhfuil víosa de dhíth orthu chun dul isteach i limistéar Schengen agus sealbhóirí Doiciméad Idirthurais Éascaithe sa Chóras Dul Isteach/Imeachta. Má theastaíonn víosa uait chun dul isteach i limistéar Schengen, stórálfar do mhéarloirg sa Chóras Faisnéise Víosaí mar chuid de do chomhad ansin agus ní stórálfar arís iad sa Chóras Dul Isteach/Imeachta.

(5)  Eagraíocht na NA, an Eagraíocht Idirnáisiúnta um Imirce (EII) nó Coiste Idirnáisiúnta na Croise Deirge.

(6)  Airteagal 41 (1) agus (2) agus Airteagal 42.

(7)  Airteagal 41 (6).

(8)  Má tá tú faoi réir ceanglas víosa, ní stórálfar do mhéarloirg sa Chóras Dul Isteach/Imeachta mar go bhfuil siad stóráilte cheana féin sa Chóras Faisnéise Víosaí.

(9)  I gcás náisiúnaigh tríú tíortha ar baill teaghlaigh iad le saoránaigh shoghluaiste den Aontas, de LEE nó den Eilvéis (i.e. saoránaigh den Aontas, de LEE nó den Eilvéis a thaistealaíonn chuig Stát seachas an Stát ina bhfuil náisiúntacht acu, sin nó a bhfuil cónaí orthu cheana féin sa Stát sin), agus atá ag tionlacan nó ag dul chun bheith in éineacht leis an saoránach den Aontas, de LEE nó den Eilvéis, stórálfar gach taifead ar dhul isteach, ar imeacht nó ar chead isteach a diúltaíodh ar feadh bliana tar éis dháta an taifid ar imeacht nó an taifid ar dhiúltú cead isteach.

(10)  Ní bhaineann ríomh fhad an fhanachta údaraithe agus giniúint foláireamh do Bhallstáit nuair a bheidh an tréimhse fanachta údaraithe imithe in éag le náisiúnaigh tríú tíortha ar daoine de theaghlaigh shaoránaigh shoghluaiste AE, an LEE nó na hEilvéise iad (i.e. de shaoránaigh de chuid AE de chuid an LEE nó na hEilvéise a thaistealaíonn chuig Stát seachas an Stát ina bhfuil náisiúntacht acu nó a chónaíonn ann cheana) agus atá ag tionlacan an tsaoránaigh de chuid AE, an LEE nó na hEilvéise nó ag dul in éineacht leis an saoránach sin.