(1)

An 31 Iúil 2014, ghlac an Chomhairle Cinneadh 2014/512/CBES (1).

(2)

Tá an tAontas fós diongbháilte agus tacaíocht á tabhairt aige do cheannasacht agus d’iomláine chríochach na hÚcráine.

(3)

An 24 Feabhra 2022, d’fhógair Uachtarán Chónaidhm na Rúise oibríocht mhíleata san Úcráin, agus chuir fórsaí armtha na Rúise tús le hionsaí ar an Úcráin. Is sárú follasach é an t-ionsaí sin ar iomláine chríochach, ar cheannasacht agus ar neamhspleáchas na hÚcráine.

(4)

Sna conclúidí uaithi an 24 Feabhra 2022, cháin an Chomhairle Eorpach go géar an fogha míleata gan chúis gan údar a thug Cónaidhm na Rúise faoin Úcráin. Leis na gníomhaíochtaí mídhleathacha míleata atá ar siúl aici, tá an dlí idirnáisiúnta agus prionsabail Chairt na Náisiún Aontaithe á sárú go trom ag an Rúis agus tá an bonn á bhaint aici de shlándáil agus de chobhsaíocht na hEorpa agus an domhain. D’iarr an Chomhairle Eorpach go ndéanfaí pacáiste smachtbhannaí aonair agus eacnamaíocha breise a ullmhú agus a ghlacadh go práinneach.

(5)

Sna conclúidí uaithi an 24 Márta 2022, chuir an Chomhairle Eorpach in iúl go bhfuil an tAontas réidh i gcónaí chun aon lúb ar lár a dhúnadh agus díriú ar aon teacht timpeall atá á dhéanamh nó a d'fhéadfaí a dhéanamh agus smachtbhannaí láidre breise a chur gan mhoill ar an Rúis agus ar an mBealarúis chun cumas na Rúise leanúint den fhogha a chur ó mhaith.

(6)

Sna conclúidí uaithi an 23 agus an 24 Meitheamh 2022, dúirt an Chomhairle Eorpach go leanfaí den obair ar smachtbhannaí, lena n-áirítear chun a gcur chun feidhme a neartú agus cosc a chur ar aon dul timpeall orthu.

(7)

I bhfianaise thromchúis na staide, agus mar fhreagairt ar an bhfogha a thug an Rúis faoin Úcráin, is iomchuí tuilleadh bearta sriantacha a thabhairt isteach.

(8)

Go háirithe, is iomchuí toirmeasc a chur ar allmhairiú, ceannach nó aistriú, díreach nó indíreach an óir, arb é an t-onnmhairiú is suntasaí atá ag an Rúis é, seachas an fuinneamh. Baineann an toirmeasc seo le hór de thionscnamh na Rúise a onnmhairítear ón Rúis tar éis theacht i bhfeidhm na Treorach.

(9)

Is iomchuí freisin an cosc ar rochtain ar chalafoirt a leathnú go loic chun a áirithiú go gcuirfear an beart chun feidhme go hiomlán agus chun aon dul timpeall air a sheachaint.

(10)

Thairis sin, is iomchuí raon feidhme an toirmisc ar ghlacadh taiscí a leathnú chun go n-áireofar taiscí ó dhaoine dlítheanacha, ó eintitis nó ó chomhlachtaí atá bunaithe i dtríú tíortha agus atá faoi úinéireacht tromlaigh náisiúnach Rúiseach nó daoine nádúrtha atá ina gcónaí sa Rúis. Is iomchuí freisin glacadh taiscí le haghaidh trádáil trasteorann neamhthoirmiscthe a chur faoi réir réamhúdarú ó na húdaráis inniúla náisiúnta.

(11)

Is iomchuí freisin iontrálacha áirithe a chur le liostaí na ndaoine dlítheanacha, na n-eintiteas agus na gcomhlachtaí a leagtar amach in Iarscríbhinn IV a ghabhann le Cinneadh 2014/512/CBES.

(12)

Ina theannta sin, is iomchuí raon feidhme an toirmisc ar sholáthar poiblí a shoiléiriú.

(13)

Chun próiséas na hEagraíochta Eitlíochta Sibhialta Idirnáisiúnta (ICAO) lena leagtar síos caighdeáin tionsclaíocha theicniúla a choimirciú, is iomchuí cead a thabhairt cúnamh teicniúil a chomhroinnt leis an Rúis i ndáil le hearraí agus teicneolaíocht eitlíochta sa chreat sonrach seo.

(14)

Chun rochtain ar an gceartas a áirithiú, is iomchuí freisin díolúine a thabhairt isteach ón toirmeasc ar aon idirbhearta a dhéanamh le heintitis phoiblí na Rúise is gá chun rochtain ar imeachtaí breithiúnacha, riaracháin nó eadrána a áirithiú.

(15)

I bhfianaise sheasamh diongbháilte an Aontais maidir le neamhshlándáil an tsoláthair bia agus fuinnimh ar fud an domhain a chomhrac, agus chun aon iarmhairtí diúltacha a d’fhéadfadh a bheith ann ina leith a sheachaint, is iomchuí síneadh a chur leis an díolúine ón toirmeasc ar idirbhearta a dhéanamh le heintitis áirithe atá faoi úinéireacht an Stáit a mhéid a bhaineann le hidirbhearta le haghaidh táirgí talmhaíochta agus soláthair ola agus táirgí peitriliam chuig tríú tíortha.

(16)

Ar bhonn níos ginearálta, tá an tAontas tiomanta gach beart a sheachaint a d’fhéadfadh a bheith ina chúis le neamhshlándáil an tsoláthair bia ar fud an domhain. Dá bhrí sin, níl aon cheann de na bearta sa Chinneadh seo ná aon cheann díobh sin a glacadh níos luaithe i bhfianaise ghníomhaíochtaí na Rúise i ndíchobhsú staid na hÚcráine dírithe ar bhealach ar bith ar an trádáil i dtáirgí talmhaíochta agus bia, lena n-áirítear cruithneacht agus leasacháin, idir tríú tíortha agus an Rúis.

(17)

Ar an gcaoi chéanna, ní chuireann bearta an Aontais cosc ar thríú tíortha agus ar a náisiúnaigh atá ag oibriú lasmuigh den Aontas táirgí cógaisíochta nó táirgí leighis a cheannach ón Rúis.

(18)

Tá gníomhaíocht bhreise ón Aontas ag teastáil chun bearta áirithe a chur chun feidhme.

(19)

Ba cheart, dá bhrí sin, Cinneadh 2014/512/CBES a leasú dá réir,