(1)

Le Rialachán Cur Chun Feidhme (AE) 2017/1795 (2), (“an Rialachán bunaidh”), rinne an Coimisiún Eorpach (“an Coimisiún”) dleacht chinntitheach frithdhumpála a fhorchur ar allmhairí táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad, bíodh siad i gcornaí nó ná bíodh (lena n-áirítear táirgí “gearrtha san fhad iomchuí” agus “stiallacha cúnga”) gan oibriú breise déanta orthu seachas a bheith teorollta, gan bheith cumhdaithe, plátáilte ná brataithe (“HRF”) de thionscnamh, inter alia, na Rúise (“an táirge faoi athbhreithniú”).

(2)

Fuair an Coimisiún iarratas ar pháirt-athbhreithniú eatramhach de bhun Airteagal 11(3) de Rialachán (AE) 2016/1036 (“an bun-Rialachán”). Rinne Eurofer (“an t-iarratasóir”) iarratas ar athbhreithniú thar ceann tháirgeoirí an Aontais agus bhí sé teoranta ina raon feidhme don imscrúdú ar dhumpáil a mhéid a bhaineann le táirgeoir onnmhairiúcháin amháin de chuid na Rúise, PAO Severstal (“Severstal”).

(3)

An dleacht arna forchur ag an Rialachán bunaidh, is dleacht sheasta í idir EUR 17,6 in aghaidh an tona agus EUR 96,5 in aghaidh an tona ar allmhairí ó tháirgeoirí onnmhairiúcháin sa Rúis a ainmnítear ina n-aonair, le ráta dleacht iarmharach EUR 96,5 in aghaidh an tona ar allmhairí ó gach cuideachta eile sa Rúis. Is é EUR 17,6 in aghaidh an tona atá sa dleacht chinntitheach frithdhumpála a fhorchuirtear ar allmhairí ó Severstal.

(4)

Chinn an Coimisiún páirt-athbhreithniú eatramhach a thionscnamh i gcomhréir le hAirteagal 11(3) den bhun-Rialachán, teoranta ina raon feidhme don imscrúdú ar dhumpáil a mhéid a bhaineann le Severstal. D’fhoilsigh an Coimisiún, an 18 Eanáir 2021, fógra in Iris Oifigiúil an Aontais Eorpaigh (3) (“an Fógra Tionscnaimh”).

(5)

Mhair tréimhse an imscrúdaithe athbhreithniúcháin ón 1 Eanáir go dtí an 31 Nollaig 2020.

(6)

San Fhógra Tionscnaimh, d’iarr an Coimisiún ar Severstal agus a chuideachtaí gaolmhara freagra ar an gCeistneoir a chur isteach laistigh de spriocdháta sonraithe. Chuir sé an t-iarratasóir agus údaráis na tíre is onnmhaireoir ar an eolas go sonrach maidir le tionscnamh an imscrúdaithe agus d’iarr sé orthu a bheith rannpháirteach. D’iarr an Coimisiún freisin ar pháirtithe eile iad féin a chur in aithne agus a dtuairimí a chur in iúl ar choinníoll gur ann do nasc oibiachtúil idir a gcuid gníomhaíochtaí agus an táirge faoi athbhreithniú.

(7)

An 18 Márta 2022, chuir an t-iarratasóir in iúl don Choimisiún go raibh sé ag tarraingt an iarratais ar pháirt-athbhreithniú eatramhach siar.

(8)

I gcomhréir le hAirteagal 9(1) den bhun-Rialachán, is féidir imeachtaí a fhoirceannadh i gcás ina ndéanfar an t-iarratas a tharraingt siar, ach amháin mura mbeadh an foirceannadh sin chun leas an Aontais.

(9)

Níor tháinig aon chúinse chun cinn le linn an imscrúdaithe a léirigh nach mbeadh foirceannadh an imscrúdaithe athbhreithniúcháin chun leas an Aontais.

(10)

Tháinig an Coimisiún ar an gconclúid gur cheart an páirt-athbhreithniú eatramhach atá teoranta ina raon feidhme don imscrúdú ar dhumpáil a mhéid a bhaineann le Severstal a fhoirceannadh gan leasú a dhéanamh ar na bearta atá i bhfeidhm.

(11)

Chuir an Coimisiún na páirtithe leasmhara ar an eolas faoina rún an t-athbhreithniú a fhoirceannadh mar gur tarraingíodh siar an t-iarratas agus d’iarr sé ar pháirtithe leasmhara a mbarúlacha a thabhairt ina leith sin. Níor chuir aon pháirtí leasmhar in aghaidh an fhoirceanta.

(12)

Tá an Cinneadh seo i gcomhréir leis an tuairim ón gCoiste arna bhunú le hAirteagal 15(1) den bhun-Rialachán,