(1)

I gcomhréir le hAirteagal 12 de Threoir 2014/34/AE ó Pharlaimint na hEorpa agus ón gComhairle (2), táirgí atá i gcomhréir le caighdeáin chomhchuibhithe nó le codanna de chaighdeáin chomhchuibhithe, caighdeáin ar foilsíodh na tagairtí dóibh in Iris Oifigiúil an Aontais Eorpaigh, glactar leis go bhfuil siad i gcomhréir leis na buncheanglais sláinte agus sábháilteachta a leagtar amach in Iarscríbhinn II a ghabhann leis an Treoir sin, ceanglais a chumhdaítear leis na caighdeáin sin nó na codanna sin díobh.

(2)

Le litir BC/CEN/46-92 – BC/CLC/05-92 an 12 Nollaig 1994, rinne an Coimisiún iarraidh ar an gCoiste Eorpach um Chaighdeánú (CEN) agus ar Choiste Eorpach na gCaighdeán Leictriteicniúil (Cenelec) caighdeáin chomhchuibhithe a dhréachtú agus a athbhreithniú chun tacú le Treoir 94/9/CE ó Pharlaimint na hEorpa agus ón gComhairle (3). Cuireadh Treoir 2014/34/AE in ionad na Treorach sin gan athrú a dhéanamh ar na buncheanglais sláinte agus sábháilteachta a leagtar amach in Iarscríbhinn II a ghabhann le Treoir 94/9/CE.

(3)

Go háirithe, iarradh ar CEN agus Cenelec na caighdeáin seo a leanas a dhréachtú maidir le táirgí a úsáidtear i stáisiúin pheitril: Tógáil agus feidhmíocht buinní uathoibríocha lena n-úsáid ar dháileoirí breosla, Ceanglais sábháilteachta maidir le tógáil agus feidhmíocht caidéal méadraithe, dáileoirí agus aonad caidéalaithe cianda, Ceanglais sábháilteachta maidir le tógáil agus feidhmíocht bristeacha sábháilteachta lena n-úsáid ar chaidéil mhéadraithe agus ar dháileoirí, Ceanglais sábháilteachta maidir le tógáil agus feidhmíocht comhlaí fiartha agus Ceanglais sábháilteachta maidir le tógáil agus feidhmíocht sclóinte lena n-úsáid ar chaidéil mhéadraithe agus ar dháileoirí. Cuireadh an obair chaighdeánúcháin sin in iúl i gCaibidil I den chlár um chaighdeánú a comhaontaíodh idir CEN, Cenelec agus an Coimisiún agus a cuireadh i gceangal le hiarraidh BC/CEN/46-92 – BC/CLC/05-92. Ina theannta sin, iarradh ar CEN agus Cenelec na caighdeáin atá ann cheana a athbhreithniú d’fhonn iad a ailíniú le buncheanglais sláinte agus sábháilteachta Threoir 94/9/CE.

(4)

Ar bhonn iarraidh BC/CEN/46-92 – BC/CLC/05-92, dhréachtaigh CEN na caighdeáin chomhchuibhithe seo a leanas maidir le táirgí a úsáidtear i stáisiúin pheitril: EN 13012:2021 Tógáil agus feidhmíocht buinní uathoibríocha lena n-úsáid ar dháileoirí breosla, EN 13617-1:2021 Ceanglais sábháilteachta maidir le tógáil agus feidhmíocht caidéal méadraithe, dáileoirí agus aonad caidéalaithe cianda, EN 13617-2:2021 Ceanglais sábháilteachta maidir le tógáil agus feidhmíocht bristeacha sábháilteachta lena n-úsáid ar chaidéil mhéadraithe agus ar dháileoirí, EN 13617-3:2021 Ceanglais sábháilteachta maidir le tógáil agus feidhmíocht comhlaí fiartha agus EN 13617-4:2021. Ceanglais sábháilteachta maidir le tógáil agus feidhmíocht sclóinte lena n-úsáid ar chaidéil mhéadraithe agus ar dháileoirí.

(5)

Caighdeáin 13012:2021, EN 13617-1:2021, EN 13617-2:2021, EN 13617-3:2021, EN 13617-4:2021 a dhréachtaigh CEN, rinne an Coimisiún measúnú i gcomhar le CEN féachaint an gcomhlíonann na caighdeáin sin iarraidh BC/CEN/46-92 – BC/CLC/05-92.

(6)

Comhlíonann caighdeáin EN 13012:2021, EN 13617-1:2021, EN 13617-2:2021, EN 13617-3:2021 agus EN 13617-4:2021 na ceanglais is aidhm dóibh a chumhdach, ceanglais a leagtar amach in Iarscríbhinn II a ghabhann le Treoir 2014/34/AE. Dá bhrí sin, is iomchuí na tagairtí do na caighdeáin sin a fhoilsiú in Iris Oifigiúil an Aontais Eorpaigh.

(7)

Cuirtear caighdeán EN 13012:2021 in ionad chaighdeán EN 13012:2012. Cuirtear caighdeán EN 13617-1:2021 in ionad chaighdeán EN 13617-1:2012. Cuirtear caighdeán EN 13617-2:2021 in ionad chaighdeán EN 13617-2:2012. Cuirtear caighdeán EN 13617-3:2021 in ionad chaighdeán EN 13617-3:2012. Cuirtear caighdeán EN 13617-4:2021 in ionad chaighdeán EN 13617-4:2012. Dá bhrí sin, na tagairtí do chaighdeáin EN 13012:2012, EN 13617-1:2012, EN 13617-2:2012, EN 13617-3:2012, agus EN 13617-4:2012, tagairtí a foilsíodh i dTeachtaireacht (2018/C 371/01) ón gCoimisiún (4), is gá iad a tharraingt siar ó Iris Oifigiúil an Aontais Eorpaigh.

(8)

Chun a ndóthain ama a thabhairt do mhonaróirí a gcuid táirgí a oiriúnú do leaganacha athbhreithnithe chaighdeáin EN 13012:2012, EN 13617-1:2012, EN 13617-2:2012, EN 13617-3:2012, agus EN 13617-4:2012, is gá tarraingt siar na dtagairtí do na caighdeáin sin a chur siar.

(9)

In Iarscríbhinn I a ghabhann le Cinneadh Cur Chun Feidhme (AE) 2019/1202 ón gCoimisiún (5), liostaítear na tagairtí do na caighdeáin chomhchuibhithe a dréachtaíodh chun tacú le Treoir 2014/34/AE. Maidir leis na tagairtí do na caighdeáin chomhchuibhithe a dréachtaíodh chun tacú le Treoir 2014/34/AE, chun a áirithiú go ndéanfar iad uile a liostú in aon ghníomh amháin, ba cheart na tagairtí do chaighdeáin chomhchuibhithe EN 13012:2021, EN 13617-1:2021, EN 13617-2:2021, EN 13617-3:2021 agus EN 13617-4:2021 a chuimsiú san Iarscríbhinn sin.

(10)

In Iarscríbhinn II a ghabhann le Cinneadh Cur Chun Feidhme (AE) 2019/1202, liostaítear na tagairtí do na caighdeáin chomhchuibhithe a dréachtaíodh chun tacú le Treoir 2014/34/AE, tagairtí a tarraingíodh siar as sraith C d’Iris Oifigiúil an Aontais Eorpaigh. Maidir leis na tagairtí do chaighdeáin chomhchuibhithe EN 13012:2012, EN 13617-1:2012, EN 13617-2:2012, EN 13617-3:2012 agus EN 13617-4:2012, ba cheart iad a chuimsiú san Iarscríbhinn sin.

(11)

Dá bhrí sin, ba cheart Cinneadh Cur Chun Feidhme (AE) 2019/1202 a leasú dá réir.

(12)

Is éard a thugtar le fios le caighdeán comhchuibhithe a chomhlíonadh go nglactar leis go bhfuil comhréireacht ann leis na ceanglais riachtanacha chomhfhreagracha a leagtar amach i reachtaíocht chomhchuibhithe an Aontais ón dáta a fhoilsítear an tagairt don chaighdeán sin in Iris Oifigiúil an Aontais Eorpaigh. Dá bhrí sin, ba cheart an Cinneadh seo a theacht i bhfeidhm lá a fhoilsithe,