(1)

Na comhairliúcháin le Poblacht na Burúine faoi Airteagal 96 den Chomhaontú Comhpháirtíochta idir comhaltaí Ghrúpa Stát na hAfraice, Mhuir Chairib agus an Aigéin Chiúin, de pháirt, agus an Comhphobal Eorpach agus a Bhallstáit, den pháirt eile, arna shíniú in Cotonou an 23 Meitheamh 2000, arna leasú go deireanach, tugadh i gcrích iad trí bhíthin Chinneadh (AE) 2016/394 ón gComhairle (3). Glacadh bearta iomchuí, mar a shonraítear san Iarscríbhinn a ghabhann leis an gCinneadh sin, tar éis togra ón gCoimisiún i gcomhaontú le hArdionadaí an Aontais do Ghnóthaí Eachtracha agus don Bheartas Slándála (“an tArdionadaí”).

(2)

Ar an iomlán, leis an bpróiseas síochánta polaitiúil a bhí ann mar gheall ar olltoghchán mhí na Bealtaine 2020, cuireadh tús le ré nua dóchais do phobal na Burúine agus deiseanna don Bhurúin agus dá caidreamh lena comhpháirtithe.

(3)

Ó shin i leith, tá aitheantas tugtha ag an Aontas don dul chun cinn dearfach a rinne Rialtas na Burúine maidir le cearta an duine, an dea-rialachas agus an smacht reachta, chomh maith leis na gealltanais a tugadh ina threochlár (‘feuille de route’) i dtreo tuilleadh feabhsuithe sna réimsí sin.

(4)

Bunaíodh rialtas atá tiomanta do na hathchóirithe a bheidh riachtanach le haghaidh forbairt agus cobhsaíocht na tíre a chur chun feidhme, agus rinneadh dul chun cinn i dtreo chur chun feidhme na ngealltanas a leagtar síos i gCinneadh (AE) 2016/394.

(5)

I gcomhréir leis an measúnú ón gCoimisiún, i gcomhaontú leis an Ardionadaí, níl na cúiseanna ar glacadh Cinneadh (AE) 2016/394, mar a leagtar amach sa chinneadh sin, iomchuí a thuilleadh. Ba cheart, dá bhrí sin, an Cinneadh sin a aisghairm thar ceann Ionadaithe Rialtais na mBallstát, ag teacht le chéile dóibh i dtionól na Comhairle, maidir le hábhair a thagann faoi inniúlacht na mBallstát.

(6)

Tá dúshláin fós le sárú i réimsí chearta an duine, an dea-rialachais agus an smachta reachta, agus tá gá le tuilleadh dul chun cinn ó údaráis na Burúine, lena n-áirítear tríd an treochlár a chur chun feidhme, faoi chuimsiú an idirphlé pholaitiúil leanúnach idir an tAontas agus an Bhurúin.

(7)

Tá an Bhurúin leochaileach i gcónaí agus tá tacaíocht na gcomhpháirtithe idirnáisiúnta de dhíth ar na húdaráis chun clár athchóirithe agus clár forbartha na tíre a chur chun feidhme.

(8)

Ba cheart don Aontas agus do na Ballstáit, in éineacht le comhpháirtithe idirnáisiúnta eile, tacú le hiarrachtaí leanúnacha údarás na Burúine na hinstitiúidí daonlathacha a chobhsú agus a chomhdhlúthú, cearta an duine, an dea-rialachas agus an smacht reachta a chur chun cinn, agus na gealltanais a tugadh ina threochlár i dtreo tuilleadh feabhsuithe sna réimsí sin a chur chun feidhme,