TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2015/1843 ó Pharlaimint na hEorpa agus ón gComhairle an 6 Deireadh Fómhair 2015 lena leagtar síos nósanna imeachta an Aontais i réimse an chomhbheartais tráchtála chun feidhmiú chearta an Aontais faoi rialacha trádála idirnáisiúnta a áirithiú, go háirithe na cearta a bunaíodh faoi choimirce na hEagraíochta Domhanda Trádála (1), agus go háirithe Airteagal 5(2) agus Airteagal 12 (1) de,

De bharr an mhéid seo a leanas:

1. NÓS IMEACHTA

(1)

An 23 Iúil 2020, trí fhógra tionscnaimh a fhoilsiú in Iris Oifigiúil an Aontais Eorpaigh (2), thionscain an Coimisiún Eorpach nós imeachta scrúdúcháin a bhaineann le constaicí ar thrádáil arna gcur i bhfeidhm ag Stáit Aontaithe Mheicsiceo, constaicí arb é atá i gceist leo diúltú deimhnithe onnmhairiúcháin i leith Tequila a dheonú.

(2)	Thionscain an Coimisiún an t-imscrúdú tar éis do Chomhlachas Ghrúdairí na hEorpa gearán a dhéanamh thar ceann thionscal an Aontais. Ba leor an fhianaise a bhí sa ghearán i leith srianta trádála agus i leith na díobhála is toradh air sin chun údar cuí a thabhairt le tionscnamh an imscrúdaithe.

(3)

An 16 Aibreán 2021, chuir seirbhísí an Choimisiún an Coiste arna bhunú le hAirteagal 7(1) de Rialachán (AE) 2015/1843 ar an eolas faoin nós imeachta scrúdúcháin. Thángthas ar an gconclúid sa tuarascáil, cé nach raibh sé chun leas láithreach an Aontais dul i mbun réiteach díospóidí, gur cheart an nós imeachta a fhágáil ar oscailt agus gur cheart faireachán a dhéanamh ar fhorbairtí i Stáit Aontaithe Mheicsiceo.

2. TARRAINGT SIAR AN GHEARÁIN AGUS FOIRCEANNADH AN IMEACHTA

(4)	An 6 Deireadh Fómhair 2021, chuir Comhlachas Ghrúdairí na hEorpa in iúl don Choimisiún gur mian leis an gearán a tharraingt siar.

(5)

Faoi Airteagal 5(2) de Rialachán (AE) 2015/1843, is féidir imeachtaí a fhoirceannadh i gcás ina ndéanfar an gearán a tharraingt siar, ach amháin mura mbeadh an foirceannadh sin chun leas an Aontais. Faoi Airteagal 12(1) de Rialachán (AE) 2015/1843, déanfar imeachtaí a fhoirceannadh i gcás nach gá aon ghníomhaíocht a dhéanamh ar son leas an Aontais.

(6)

Níor tháinig aon tásca chun cinn le linn an imscrúdaithe a léirigh nach mbeadh sé chun leas an Aontais imeachtaí a fhoirceannadh. Go háirithe, cuireadh tús athuair le honnmhairí Tequila chuig an ngrúdaire Eorpach lena mbaineann agus níl iarmhairt shistéamach ag an mbeart líomhnaithe ar chuideachtaí eile an Aontais.

(7)

Dá bhrí sin, maidir leis an nós imeachta scrúdúcháin a bhaineann le constaicí ar thrádáil arna gcur i bhfeidhm ag Stáit Aontaithe Mheicsiceo, constaicí arb é atá i gceist leo diúltú deimhnithe onnmhairiúcháin i leith na biotáille “Tequila” a dheonú, tháinig an Coimisiún ar an gconclúid gur cheart an nós imeachta sin a fhoirceannadh.

(8)	Tá an Cinneadh seo i gcomhréir leis an tuairim ón gCoiste arna bhunú le hAirteagal 7(1) de Rialachán (AE) 2015/1843,

TAR ÉIS AN CINNEADH SEO A GHLACADH: