(1)

Le pointe 4.2.2.1.3.2 den Iarscríbhinn a ghabhann le Rialachán Cur Chun Feidhme (AE) 2019/773 (2) leagtar amach sprioc-amanna ar ina ndiaidh a bheidh sé de cheangal ar údaráis náisiúnta gach Ballstáit, gan eisceacht, glacadh le gach traein lasta a bheidh feistithe le comhartha cúil i bhfoirm dhá phláta fhrithchaiteacha, agus gan aon chineál eile comhartha cúil a éileamh a thuilleadh le haghaidh na dtraenacha lasta.

(2)

I bpointe 4.2.2.1.3.2 leagtar amach cásanna sonracha roinnt Ballstát, lena n-áirítear an Bheilg, an Fhrainc, an Phortaingéil agus an Spáinn, a údaraíodh le rialacha náisiúnta faoina dtugtar fógra a chur i bhfeidhm, ar rialacha iad lena gceanglaítear an coinníoll dhá sholas dhearga sheasta a bheith feistithe ar thraenacha lasta chun dul ar stráicí dá ngréasán. Ba cheart deireadh a chur de réir a chéile leis na cásanna sonracha sin.

(3)

Chun a áirithiú go bhfuil na Ballstáit ag déanamh na mbeart uile is gá le gur féidir lánchomhchuibhiú a dhéanamh ar chomharthaí cúil na dtraenacha lasta ar leibhéal an Aontais faoin 1 Eanáir 2026, ba cheart dóibh tuairisc a thabhairt go tréimhsiúil ar chur chun feidhme na mbeart maolaithe atá molta, agus bearta práinneacha a dhéanamh más léir nach bhfuiltear ag cloí leis an bplean atá ceaptha.

(4)

Chuir an Bheilg, an Fhrainc, an Phortaingéil agus an Spáinn tuarascálacha faoi bhráid an Choimisiúin maidir leis an úsáid a bhaineann siad as plátaí frithchaiteacha agus sainaithníodh sna tuarascálacha sin baic mhóra ar dheireadh a chur, faoin 1 Eanáir 2022 mar a bhí beartaithe, le rialacha náisiúnta feadh na ndorchlaí lasta iarnróid a shonraítear i gcomhréir le Rialachán (AE) Uimh. 913/2010 ó Pharlaimint na hEorpa agus ón gCoimisiún (3).

(5)

An 29 Meitheamh 2021 chuir Gníomhaireacht Iarnróid an Aontais Eorpaigh isteach an moladh “REC TSI OPE 422132” lena moltar pointe 4.2.2.1.3.2 den Iarscríbhinn a ghabhann le Rialachán Cur Chun Feidhme (AE) 2019/773 a leasú. Ar bhonn an mholta sin, rinne an Coimisiúin, agus torthaí thuarascálacha na mBallstát á gcur san áireamh aige, athbhreithniú ar na dátaí le haghaidh chomhchuibhiú na bplátaí frithchaiteacha san Aontas. Ina theannta sin, tháinig an Coimisiún ar an gconclúid nach gá, faoi láthair, athbhreithniú a dhéanamh ar an tsonraíocht a shonraítear faoi Fhoscríbhinn E a ghabhann le Rialachán (AE) Uimh. 321/2013 (4) ón gCoimisiún. Thug an Coimisiún aird chuí ar cheisteanna maidir leis an tsábháilteacht agus an toilleadh, agus ar an tionchar ar chostais a bhaineann leis an aistriú chuig comhchuibhiú úsáid na bplátaí frithchaiteacha.

(6)

I bhfianaise thorthaí na dtuarascálacha ón mBeilg, ón bhFrainc, ón bPortaingéil agus ón Spáinn, agus i bhfianaise an athbhreithnithe a rinne an Coimisiún ar na torthaí sin, an sprioc-am chun glacadh le traenacha lasta atá feistithe le dhá phláta fhrithchaiteacha feadh na ndorchlaí lasta iarnróid a shonraítear i gcomhréir le Rialachán (AE) Uimh. 913/2010, mar atá an 1 Eanáir 2022, ba cheart an sprioc-am sin a chur siar i gcás na mBallstát sin.

(7)

Tá an cinneadh sin gan dochar don obair leanúnach atá ar bun ag Gníomhaireacht Iarnróid an Aontais Eorpaigh d’fhonn an comhartha cúil a chomhchuibhiú a thuilleadh ná d’aon athbhreithniú a dhéanfar amach anseo ar Fhoscríbhinn E a ghabhann le Rialachán (AE) Uimh. 321/2013, athbhreithniú a bhféadfadh an Coimisiún é a ghlacadh ach aird chuí a thabhairt ar a thionchar ar an tsábháilteacht, ar an toilleadh agus ar an gcostas.

(8)

Tá na bearta dá bhforáiltear sa Rialachán seo i gcomhréir le tuairim an Choiste a bunaíodh i gcomhréir le hAirteagal 51(1) de Threoir (AE) 2016/797,