(1)

De bhun Airteagal 1(11) de Threoir (AE) 2020/1057, d’fhéadfadh sé go gceanglófaí ar oibreoirí iompair de bhóthar dearbhú maidir le postú nó doiciméid eile a chur faoi bhráid údaráis inniúla an Bhallstáit ina bhfuil nó ina raibh tiománaí ar postú, agus úsáid á baint as foirm chaighdeánach ilteangach den chomhéadan poiblí atá nasctha le Córas Faisnéise an Mhargaidh Inmheánaigh (“IMI”), arna bhunú le hAirteagal 2 de Rialachán (AE) Uimh. 1024/2012 ó Pharlaimint na hEorpa agus ón gComhairle (2).

(2)

Ba cheart an comhéadan poiblí atá nasctha le IMI a rochtain trí chuntas slán a chruthú lena ligtear d’úsáideoirí údaraithe na dearbhuithe maidir le postú agus na hiarrataí ar dhoiciméid a dhéanann údaráis inniúla Ballstáit a bhainistiú. Ba cheart úsáideoirí údaraithe a bheith in ann na mionsonraí maidir leis an oibreoir, an bainisteoir iompair agus na tiománaithe ar postú a thaifeadadh. Is éard is úsáideoir údaraithe ann duine atá ag gníomhú thar ceann an oibreora chun dearbhuithe maidir le postú a bhainistiú agus chun freagra a thabhairt ar iarrataí ar dhoiciméid ón mBallstát is óstach.

(3)

Ba cheart dearbhuithe maidir le postú a chur isteach ar an gcomhéadan poiblí ar feadh tréimhse 6 mhí ar a mhéad.

(4)

Chun Airteagal 1(12) de Threoir (AE) 2020/1057 a chomhlíonadh agus na dearbhuithe maidir le postú a choimeád cothrom le dáta, ba cheart go bhféadfaí an fhaisnéis sa dearbhú maidir le postú a leasú.

(5)

Ba cheart go mbeadh sé éasca an dearbhú a athnuachan chomh maith, ionas nach mbeidh ualach riaracháin róthrom ar na hoibreoirí.

(6)

Ionas go bhféadfaidh oibreoirí an oibleagáid a leagtar amach in Airteagal 1(11)(b)(i) de Threoir (AE) 2020/1057 a chomhlíonadh, ba cheart don chomhéadan poiblí atá nasctha le IMI an dearbhú a chur ar fáil i bhfoirm páipéir agus i bhfoirm leictreonach.

(7)

Má tharlaíonn nach ndéanann an t-oibreoir doiciméid a sholáthar de bhun Airteagal 1(11), pointe (c), ba cheart go bhfeicfeadh an t-oibreoir ar an gcomhéadan poiblí atá nasctha le IMI cathain a sholáthair an Ballstát bunaíochta na doiciméid sin tar éis iarraidh ar chúnamh ón mBallstát is óstach ar IMI.

(8)

Leis an gcomhéadan poiblí atá nasctha le IMI, ba cheart údarás náisiúnta amháin nó níos mó a bheith in ann dearbhuithe maidir le postú agus na doiciméid a fháil in IMI, doiciméid a sheolann oibreoirí arna iarraidh sin don údarás náisiúnta.

(9)

Chun a áirithiú go ndéantar na rialacha sonracha i dtaca le tiománaithe a phostú a fhorfheidhmiú go héifeachtúil agus chun nach mbeidh ualach riaracháin róthrom ann, is tábhachtach go ndéanfadh na húdaráis náisiúnta inniúla sa Bhallstát is óstach comhordú lena chéile chun nach bhfaighidh oibreoirí iarrataí a chumhdaíonn an tréimhse chéanna ar postú nach bhfuil gá leo ón mBallstát sin sa chomhéadan poiblí atá nasctha le IMI.

(10)

Chun gur féidir leis na húdaráis náisiúnta comhlíonadh na rialacha maidir le postú a sheiceáil, is ríthábhachtach rochtain a bheith ag na húdaráis náisiúnta inniúla ar bhileoga taifid tacagraif an tiománaí ar a léirítear cóid tíre na mBallstát a thrasnaigh an tiománaí.

(11)

Ós rud é nach gceanglaítear ar oibreoirí bileoga taifid, asphriontaí agus sonraí tacagraif a íoslódáiltear i bhfoirm inléite a choimeád ach ar feadh bliain amháin ar a laghad tar éis a n-úsáide, ba cheart don chomhéadan poiblí atá nasctha le IMI ligean don oibreoir freagra a thabhairt ar iarrataí ar dhoiciméid ó údaráis inniúla an Bhallstáit inar tharla an postú le haghaidh tréimhse 12 mhí roimh dháta na hiarrata, i gcomhréir le hAirteagal 10(5) de Rialachán (CE) Uimh. 561/2006 ó Pharlaimint na hEorpa agus ón gComhairle (3).

(12)

Chun gur féidir le hoibreoirí na doiciméid uile is gá a bhailiú laistigh de 8 seachtaine, ba cheart ligean d’oibreoirí na doiciméid a iarradh a sholáthar de chéim amháin nó níos mó.

(13)

Ba cheart an t-oibreoir a chur ar an eolas tríd an gcomhéadan poiblí atá nasctha le IMI i gcás ina n-iarrann an Ballstát is óstach cúnamh an Bhallstáit bunaíochta.

(14)

Chun nach bhfanfaidh iarrataí ar dhoiciméid ar oscailt go ceann tréimhse éiginnte, ba cheart d’údarás inniúil an Bhallstáit is óstach iad a dhúnadh nuair a chuirtear an measúnú ar chomhlíonadh na rialacha i gcrích maidir le postú ag an oibreoir agus ba cheart don údarás inniúil an t-oibreoir a chur ar an eolas maidir le toradh na hiarrata. I gcás nach ndúnann údaráis inniúla an Bhallstáit is óstach an iarraidh ar dhoiciméid, ba cheart í a dhúnadh go huathoibríoch i ndiaidh 24 mhí.

(15)

Ós rud é gur sonraí íogaire iad na sonraí pearsanta a chomhroinntear tríd an gcomhéadan poiblí atá nasctha le IMI, is gá go gceadófaí na sonraí uile a stóráiltear ar an gcomhéadan sin mar aon leis na sonraí i gcuntais na n-oibreoirí a scriosadh nuair nach bhfuil gá leis na sonraí sin a thuilleadh chun comhlíonadh na rialacha maidir le tiománaithe a phostú in earnáil an iompair de bhóthar a sheiceáil. Ba cheart feidhm a bheith ag oibleagáid maidir le scriosadh uathoibríoch freisin i gcás na ndoiciméad a chuireann an t-oibreoir isteach tríd an gcomhéadan poiblí atá nasctha le IMI i ndiaidh iarrataí ar dhoiciméid ó na húdaráis inniúla.

(16)

I gcás inar gá sonraí pearsanta a phróiseáil, chun críocha an Rialacháin seo, is i gcomhréir le dlí an Aontais maidir le cosaint sonraí pearsanta ba cheart é sin a dhéanamh. Aon phróiseáil a dhéantar ar shonraí pearsanta atá bunaithe ar an Rialachán seo, is próiseáil í atá faoi réir Rialacháin (AE) 2018/1725 ó Pharlaimint na hEorpa agus ón gComhairle (4).

(17)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé a thuairim uaidh an 7 Iúil 2021.

(18)

Tá na bearta dá bhforáiltear sa Rialachán seo i gcomhréir leis an tuairim ón gCoiste dá dtagraítear in Airteagal 4(1) de Threoir (AE) 2020/1057.