(1)

Is é is aidhm don tSaoráid Téarnaimh agus Athléimneachta (“an tSaoráid”) tacaíocht airgeadais éifeachtach shuntasach a sholáthar chun dlús a chur le cur chun feidhme athchóirithe inbhuanaithe agus infheistíochtaí poiblí gaolmhara sna Ballstáit. Is ionstraim thiomnaithe í an tSaoráid atá ceaptha dul i ngleic le héifeachtaí agus iarmhairtí díobhálacha sóisialta agus eacnamaíocha ghéarchéim COVID-19 san Aontas.

(2)

Leis an tSaoráid, tacaítear le téarnamh eacnamaíoch agus sóisialta agus rannchuidítear léi, i measc nithe eile, leis an mbochtaineacht agus an neamhionannas a chomhrac, le dul i ngleic leis an dífhostaíocht, le poist ardcháilíochta agus sheasmhacha a chruthú, agus le feabhas a chur ar bheartais don chéad ghlúin eile, lena n-áirítear beartais i dtaca le hoideachas agus oiliúint.

(3)

Leis an tSaoráid, tacófar, go háirithe, leis na Ballstáit na bearta a chur chun feidhme i gcomhréir le tionscnaimh Cholún Eorpach na gCeart Sóisialta agus an Aontais sa réimse fostaíochta, oideachais, sláinte agus sóisialta, go háirithe Plean Gníomhaíochta Cholún Eorpach na gCeart Sóisialta (2) agus an Moladh maidir le tacaíocht ghníomhach éifeachtach don fhostaíocht tar éis ghéarchéim COVID-19 (EASE) (3), an Teachtaireacht ar Thacaíocht Fostaíochta don Aos Óg (4) agus an Moladh maidir le Nasc chuig Poist – An Ráthaíocht don Aos Óg a Neartú (5), an Moladh maidir leis an ngairmoideachas agus leis an ngairmoiliúint (VET) ar mhaithe leis an iomaíochas inbhuanaithe, an chothroime shóisialta, agus an athléimneacht (6), an Moladh maidir leis an Ráthaíocht Eorpach don Leanbh a bhunú (7), an Straitéis um Chearta Daoine faoi Mhíchumas 2021-2030 (8), an Clár Oibre Scileanna don Eoraip don iomaíochas inbhuanaithe, don chothroime shóisialta agus don athléimneacht (9), an Limistéar Eorpach Oideachais (10) agus an Plean Gníomhaíochta don Oideachas Digiteach (11), Plean Gníomhaíochta an Aontais maidir le Frithchiníochas 2020-2025 (12), creat straitéiseach an Aontais Eorpaigh maidir le comhionannas, cuimsiú agus rannpháirtíocht na Romach (13), an Straitéis um Chomhionannas Inscne 2020-2025 (14), an Straitéis um Chomhionannas LGBTIQ 2020-2025 (15), an teachtaireacht maidir le hAontas Sláinte de chuid na hEorpa a chur ar bun (16), an Straitéis Chógaisíochta don Eoraip (17), agus Plean na hEorpa chun an Ailse a Chomhrac (18).

(4)

Sa chomhthéacs sin, tá sé tábhachtach go mbeifí in ann tuairisciú a dhéanamh ar na hathchóirithe agus ar na hinfheistíochtaí, arna maoiniú ag an tSaoráid, a bhfuil gné shóisialta ag baint leo. De bhun Airteagal 29(4), pointe (b) de Rialachán (AE) 2021/241, sainmhíneoidh an Coimisiún modheolaíocht chun tuairisciú a dhéanamh ar chaiteachas sóisialta, lena n-áirítear caiteachas i dtaca le leanaí agus an t-aos óg, faoin tSaoráid.

(5)

De bhun Airteagal 31(3), pointe (c) de Rialachán (AE) 2021/241, ba cheart go n-áireofaí sa tuarascáil bhliantúil ón gCoimisiún chuig Parlaimint na hEorpa agus chuig an gComhairle faisnéis ar chaiteachas arna maoiniú ag an tSaoráid faoi na sé colúin dá dtagraítear in Airteagal 3 di, lena gcuimsítear caiteachas sóisialta, lena n-áirítear caiteachas i dtaca le leanaí agus an t-aos óg.

(6)

Ba cheart dhá chéim a bheith sa mhodheolaíocht: ar an gcéad dul síos, maidir le gach athchóiriú agus infheistíocht, a bhfuil príomhghné shóisialta ag baint leis agus a áirítear i bplean téarnaimh agus athléimneachta Ballstáit, ba cheart don Choimisiún é a cheangal, i gcomhairle leis an mBallstát sin i gcás inar gá, le ceann amháin de na naoi gcinn de réimsí beartais shóisialta a chuimsítear faoi cheithre chatagóir shóisialta níos leithne a leagtar amach san Iarscríbhinn; ar an dara dul síos, ba cheart clibeáil a dhéanamh ar gach beart de chineál sóisialta lena ndírítear ar leanaí agus an t-aos óg, agus ar an gcomhionannas inscne freisin, de bhrí go leagtar béim ar chomhionannas inscne i Rialachán (AE) 2021/241, rud a éascóidh tuairisciú sonrach ar chaiteachas atá dírithe ar leanaí agus an t-aos óg agus ar an gcomhionannas inscne chomh maith.

(7)

De bhrí gur cheart don mhodheolaíocht chaiteachais phoiblí a bheith ag feidhmiú faoi 31 Nollaig 2021 agus ionas go bhféadfar na bearta dá bhforáiltear sa Rialachán seo a chur i bhfeidhm go pras, ba cheart don Rialachán seo teacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.