(1)

I gcomhréir le Rialachán (AE) Uimh. 1386/2011 ón gComhairle (3), tá an fionraí dleachta le haghaidh earraí caipitiúla áirithe le haghaidh úsáid tráchtála nó thionsclaíoch, arna n-allmhairiú isteach sna hOileáin Chanáracha, le dul in éag an 31 Nollaig 2021.

(2)

In Aibreán 2021, d’iarr Rialtas na Spáinne go gcuirfí síneadh leis an bhfionraí ar na dleachtanna Comhtharaife Custaim uathrialaitheacha i gcás roinnt táirgí i gcomhréir le hAirteagal 349 den Chonradh. Leis na bearta a bunaíodh le Rialachán (AE) Uimh. 1386/2011, cuireadh le forbairt gheilleagar na nOileán Canárach ar bhealach dearfach, go háirithe san earnáil tionsclaíochta agus san earnáil tógála, agus dá bhrí sin, laghdaíodh an tionchar tromchúiseach a bhíonn ag míbhuntáistí eacnamaíocha agus tráchtála a bhíonn ann i ngeall ar iargúltacht, oileánachas agus beagmhéid na n-oileán sin.

(3)

Bíonn tionchar diúltach ar gheilleagar na nOileán Canárach fós i ngeall ar bheagmhéid mhargadh na n-oileán, ilroinnt agus iargúltacht na n-oileán ó mhór-roinn na hÉorpa, ráta an-ard dífhostaíochta ar leith agus na costais táirgthe agus na costais dáileacháin a bhíonn níos airde ná na costais oibreoirí eacnamaíocha ar mhór-roinn na hEorpa. Cé gur léiríodh dul chun cinn áirithe i ráta dífhostaíochta na nOileán Canárach suas go dtí 2019, tháinig méadú ar an dífhostaíocht ó 20,5 % in 2019 go dtí 22,6 % in 2020, atá i bhfad os cionn meánráta dífhostaíochta in 2020 de 15,5 % sa Spáinn agus de 7,1 % sna Ballstáit i dteannta a chéile (Eurostat, 2021).

(4)

Thairis sin, chuir paindéim COVID-19 stop leis an ngníomhaíocht turasóireachta sna hOileáin Chanáracha, rud a d’fhág go raibh laghdú a measadh a bheith thart ar 20 % san OTI in 2020. Ina theannta sin, rinneadh crapadh sa ghníomhaíocht tógála agus thionsclaíoch nuair a tháinig laghdú a measadh a bheith 13 % i gcomparáid le 2019.

(5)

Dá bhrí sin, is iomchuí síneadh a chur le cur ar fionraí na ndleachtanna Comhtharaife Custaim i gcás earraí áirithe mar a liostaítear in Iarscríbhinn I agus Iarscríbhinn II a ghabhann le Rialachán (AE) Uimh. 1386/2011 chun inbhuanaitheacht éifeachtaí dearfacha Rialachán (AE) Uimh. 1386/2011 a áirithiú, rannchuidiú le héagsúlú an gheilleagair, fás leanúnach agus cruthú post san earnáil tionsclaíochta agus san earnáil tógála a áirithiú, an nuálaíocht a fheabhsú, spleáchas an gheilleagair áitiúil ar an earnáil seirbhísí a laghdú, bearta eile a chomhlánú atá tiomanta don timpeallacht eacnamaíoch agus sóisialta sna hOileáin Chanáracha a chobhsú.

(6)

I dteannta na gcatagóirí táirgí a chumhdaítear le Rialachán (AE) Uimh. 1386/2011, d’iarr Rialtas na Spáinne go gcuirfí na dleachtanna Comhtharaife Custaim ar fionraí i gcás seacht gcinn de chatagóirí táirgí nua a thagann faoi chóid AC 3903 19, 5603 94, 5604 10, 7326 90, 7607 20, 8441 40 agus 8479 90. Ba cheart glacadh leis an iarraidh sin toisc go neartódh na fionraíochtaí sin, lena n-áirítear fionraíochtaí le haghaidh meaisíní chun críoch tionsclaíoch agus amhábhair, geilleagar na nOileán Canárach.

(7)

Chun a áirithiú nach mbainfidh ach oibreoirí eacnamaíocha atá lonnaithe ar chríoch na nOileán Canárach tairbhe as na bearta taraife sin, ba cheart na fionraíochtaí a dhéanamh coinníollach ar úsáid deiridh na dtáirgí, i gcomhréir le Rialachán (AE) Uimh. 952/2013 ó Pharlaimint na hEorpa agus ón gComhairle (4) agus Rialachán Cur Chun Feidhme (AE) 2015/2447 ón gCoimisiún (5).

(8)

I gcás sraonadh trádála agus chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún ionas gur féidir leis an gCoimisiún an fionraí a tharraingt siar. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (6).

(9)

Chun comhleanúnachas a áirithiú tar éis dhul in éag fhorálacha Rialachán (AE) Uimh. 1386/2011, is iomchuí na bearta dá bhforáiltear sa Rialachán seo a chur i bhfeidhm ón 1 Eanáir 2022 go dtí an 31 Nollaig 2031,