(1)

Leagtar amach i dTreoir (AE) 2018/2001 roinnt sásraí comhair chun gnóthú spriocanna an Aontais maidir le fuinneamh inathnuaite a éascú ar bhealach costéifeachtach, lena n-áirítear aistrithe staidreamhacha fuinnimh ó fhoinsí inathnuaite idir na Ballstáit. Le haistrithe staidreamhacha a dhéantar de bhun Airteagal 6 de Threoir 2009/28/CE ó Pharlaimint na hEorpa agus ón gComhairle (2) agus de bhun Airteagal 8 de Threoir (AE) 2018/2001, ceadaítear do Bhallstáit nach nach mbaineann amach an sprioc atá acu maidir le foinsí inathnuaite, a leagtar amach i dTreoir 2009/28/CE, ná an rannchuidiú atá acu maidir le foinsí inathnuaite dá dtagraítear in Airteagal 3 de Threoir (AE) 2018/2001, staidreamh fuinnimh inathnuaite a cheannach ó Bhallstáit a sháraíonn an sprioc agus an rannchuidiú atá acu maidir le foinsí inathnuaite. Féadfaidh na Ballstáit aistrithe staidreamhacha a úsáid chun pointí tagartha na conaire táscaí a chomhlíonadh de bhun Airteagal 32(3), pointe (e) de Rialachán (AE) 2018/1999 ó Pharlaimint na hEorpa agus ón gComhairle (3).

(2)

De bhun Airteagal 3(6) de Threoir (AE) 2018/2001, tá an Coimisiún le hardán éascaitheach a bhunú chun tacú leis na Ballstáit a úsáideann sásraí comhair rannchuidiú le sprioc cheangailteach fhoriomlán an Aontais maidir le fuinneamh inathnuaite.

(3)

Chun aistrithe staidreamhacha idir na Ballstáit a éascú, tugtar de chumhacht don Choimisiún ardán an Aontais um Fhorbairt inathnuaite (“URDP”) a bhunú. Ba cheart do URDP forléargas a thabhairt ar an méid a bhaineann sé amach maidir lena spriocanna agus rannchuidithe sna Ballstáit, agus faisnéis a chur san áireamh ann arna soláthar ag na Ballstáit maidir le soláthar aistrithe staidreamhacha fuinnimh inathnuaite agus an t-éileamh atá ar na haistrithe sin, agus cur ar chumas na mBallstát a dtoilteanas léiriú maidir le dul i mbun aistrithe staidreamhacha agus cur síos a dhéanamh ar na dálaí a d’fhéadfadh a bheith ann le haghaidh aistrithe, comhpháirtithe aistrithe ionchasacha a shainaithint trí shásra meaitseála agus na pointí teagmhála atá i gceannas ar aistrithe staidreamhacha sna Ballstáit a chur ar fáil. Ba cheart stór ina mbeidh treoirdhoiciméid agus forléargas ar an bhfaisnéis atá ar fáil maidir le socruithe aistrithe staidreamhacha atá tugtha i gcrích a bheith san áireamh in URDP freisin. Ba cheart úsáid URDP a bheith ar bhonn deonach.

(4)

Ba cheart go n-éascófaí le URDP comhaontuithe maidir le haistrithe staidreamhacha. Níor cheart aistrithe a d’fhéadfadh a bheith ann agus atá sainaitheanta trí bhíthin an tsásra meaitseála a bheith ceangailteach ó thaobh dlí.

(5)

Maidir leis na sonraí ar chainníochtaí fuinnimh comhiomlánaithe atá ar fáil d’aistrithe staidreamhacha arna n-úsáid do URDP, ba cheart go dtiocfadh na sonraí sin ó mheasúnuithe tríú páirtí, agus ó na pleananna comhtháite náisiúnta fuinnimh agus aeráide, ó na pleananna comhtháite náisiúnta nuashonraithe fuinnimh agus aeráide, agus ó na tuarascálacha comhtháite maidir le dul chun cinn náisiúnta fuinnimh agus aeráide, de réir mar is iomchuí, arna dtíolacadh ag na Ballstáit de bhun Rialachán (AE) 2018/1999. Ba cheart don Choimisiún na sonraí sin a chur san áireamh ar an ardán. Ina theannta sin, ba cheart go mbeadh Ballstáit in ann méid na n-aistrithe staidreamhacha a bhfuil suim acu iontu a chur in iúl, mar cheannaitheoirí nó mar dhíoltóirí, agus aon choinníoll ar leith maidir leis an aistriú staidreamhach a bhfuil suim acu a chur san áireamh.

(6)

D’fhonn cosaint sonraí íogaire is ábhartha d’aistrithe idir Ballstáit a áirithiú, ba cheart rochtain ar URDP a theorannú do phointí teagmhála sonracha arna sainaithint ag na Ballstáit. Dá bhrí sin, ba cheart feidhm a bheith ag Rialachán (AE) 2016/679 ó Pharlaimint na hEorpa agus ón gComhairle (4) i gcás inarb ábhartha.

(7)

Chun cabhrú leis na Ballstáit aistrithe staidreamhacha fuinnimh ó fhoinsí inathnuaite a thabhairt i gcrích, ba cheart don Choimisiún ábhar treorach maidir le URDP a sholáthar, lena n-áirítear lámhleabhar úsáideora agus teimpléid chomh maith le faisnéis ábhartha maidir le comhaontuithe ar aistrithe staidreamhacha.

(8)

Chun go bhféadfar na bearta dá bhforáiltear sa Rialachán seo a chur i bhfeidhm go pras, ba cheart an Rialachán seo a theacht i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh,

(1)

Ciallaíonn “aistriú staidreamhach” an luach staidrimh a aistriú, gan gá a bheith le haistriú fisiceach, ar mhéid sonraithe fuinnimh (5) ó fhoinsí inathnuaite arna thuairisciú faoi phointe 5 d’iarscríbhinn B a ghabhann le Rialachán (CE) Uimh. 1099/2008 ó Pharlaimint na hEorpa agus ón gComhairle maidir le staidreamh fuinnimh ó Bhallstát amháin go Ballstát eile, ar méid é a asbhaintear ón méid fuinnimh ó fhoinsí inathnuaite a chuirtear san áireamh agus sciar fuinnimh inathnuaite an Bhallstáit atá ag déanamh an aistrithe á ríomh agus chuirtear leis an méid fuinnimh ó fhoinsí inathnuaite a chuirtear san áireamh agus sciar fuinnimh inathnuaite an Bhallstáit á ríomh;

(2)

Ciallaíonn “an Ballstát is ceannaitheoir” Ballstát a dhéanann comhaontú ar aistrithe staidreamhacha chun cainníocht áirithe staidrimh d’fhuinneamh inathnuaite a cheannach ó Bhallstát eile, ar cainníocht í a chuirtear leis an méid fuinnimh ó fhoinsí inathnuaite a chuirtear san áireamh agus sciar fuinnimh inathnuaite an chéad Bhallstáit á ríomh de bhun Airteagal 8(1) de Threoir (AE) 2018/2001;

(3)

Ciallaíonn “an Ballstát is díoltóir” Ballstát a dhéanann comhaontú ar aistrithe staidreamhacha chun cainníocht áirithe staidrimh d’fhuinneamh inathnuaite a dhíol le Ballstát eile, ar cainníocht í a bhaintear den mhéid fuinnimh ó fhoinsí inathnuaite a chuirtear san áireamh agus sciar fuinnimh inathnuaite an chéad Bhallstáit á ríomh de bhun Airteagal 8(1) de Threoir (AE) 2018/2001;

(4)

Ciallaíonn “coinníollacha breise” critéir eile, thar thráthú, praghas agus méid aistrithe staidreamhacha a fhéadfaidh na Ballstáit a roghnú chun a cheangal le comhaontú aistrithe staidreamhacha;

(5)

ciallaíonn “fuinneamh ó fhoinsí in-athnuaite” nó “fuinneamh in-athnuaite” fuinneamh ó fhoinsí in-athnuaite nó fuinneamh in-athnuaite mar a shainmhínítear in Airteagal 2(1) de Threoir (AE) 2018/2001;

(6)

Ciallaíonn “méid an aistrithe staidreamhaig” nó “méid” an méid fuinnimh in-athnuaite atá aistrithe agus atá le hasbhaint ó chuntais staidreamhacha an Bhallstáit is díoltóir agus le cur le cuntais staidreamhacha an Bhallstáit is ceannaitheoir de bhun Airteagal 8(1) de Threoir (AE) 2018/2001.