(1)

Éilítear in Airteagal 55(2), an chéad fhomhír, de Threoir 2014/59/AE go n-áirithíonn na Ballstáit i gcás ina gcinneann institiúid nó eintiteas dá dtagraítear in Airteagal 1(1), pointí (b), (c) agus (d) den Treoir sin, go bhfuil sé neamhphraiticiúil ar chúiseanna dlíthiúla nó cúiseanna eile an téarma conarthach dá dtagraítear in Airteagal 55(1) de Threoir 2014/59/AE (“an téarma conarthach”) a chur san áireamh sna forálacha conarthacha lena rialaítear dliteanas ábhartha, go dtabharfaidh an institiúid nó an t-eintiteas sin fógra don údarás réitigh faoina chinneadh.

(2)

Maidir leis na coinníollacha faoina mbeadh sé neamhphraiticiúil, go dlíthiúil nó ar chúiseanna eile d’institiúid nó d’eintiteas an téarma conarthach a chur san áireamh i gcatagóirí dliteanas áirithe, ba cheart na coinníollacha sin a shainiú ar bhealach a ligeann do leibhéal iomchuí cóineasaithe, agus a chuireann ar chumas údarás réitigh difríochtaí i margaí ábhartha a chur san áireamh an tráth céanna.

(3)

Níor cheart a éileamh ar institiúidí ná ar eintitis, sna forálacha conarthacha lena rialaítear dliteanas ábhartha, an téarma conarthach a chur san áireamh, i gcás ina mbeadh cuimsiú den sórt sin neamhdhleathach sa tríú tír ábhartha. D’fhéadfadh nach gceadaítear téarmaí den sórt sin sna dlíthe nó sna treoracha ó údaráis an tríú tír i gcásanna mar sin, mar shampla. Ba cheart a mheas freisin go bhfuil sé neamhphraiticiúil d’institiúid nó eintiteas an téarma conarthach a chur san áireamh i gcomhaontú nó in ionstraim i gcás nach bhfuil an institiúid ná an t-eintiteas sin in ann na forálacha conarthacha sin a leasú. Is minic is amhlaidh an cás ina dtugtar comhaontuithe nó ionstraimí i gcrích i gcomhréir le téarmaí nó prótacail chaighdeánaithe idirnáisiúnta lena leagtar amach téarmaí agus coinníollacha aonfhoirmeacha le haghaidh comhaontuithe nó ionstraimí den sórt sin. Is iondúil a eisítear táirgí maoinithe trádála, amhail ráthaíochtaí, frithráthaíochtaí, litreacha creidmheasa nó ionstraimí eile a úsáidtear i gcomhthéacs tacú le hidirbhearta trádála nó iad a chistiú faoi réir téarmaí nó rialacha caighdeánaithe a aithnítear go hidirnáisiúnta agus a shocraíonn eagraíocht tionscail a aithnítear go hidirnáisiúnta nó a forbraíodh bunaithe ar nósmhaireachtaí déthaobhacha caighdeánacha. D’fhéadfadh neamhphraiticiúlacht a theacht chun cinn freisin i gcás ina dtugann an institiúid nó an t-eintiteas conarthaí soláthair seirbhísí airgeadais i gcrích le comhlachtaí nach bhfuil san Aontas, lena n-áirítear soláthraithe seirbhíse airgeadais, ionaid trádála, bonneagar an mhargaidh airgeadais nó caomhnóirí a úsáideann téarmaí caighdeánacha nach féidir leis an institiúid ná an t-eintiteas a idirbheartú.

(4)

Ar aon chuma, níor cheart doicheall an chontrapháirtí amháin na téarmaí conarthacha a chur san áireamh ná méadú i bpraghas na hionstraime nó an chomhaontaithe amháin a mheas mar choinníoll de neamhphraiticiúlacht maidir le cuimsiú an téarma chonarthaigh.

(5)

I gcomhréir le hAirteagal 55(2), an tríú fomhír, de Threoir 2014/59/AE, fiú in éagmais coinníollacha neamhphraiticiúlachta, féadfaidh údarás réitigh a chinneadh gan éileamh ar an institiúid ná ar an eintiteas ábhartha an téarma conarthach a chur san áireamh i gcás ina measann sé nach gá an cuimsiú sin chun inréiteacht na hinstitiúide nó an eintitis a áirithiú. Ba cheart do chonclúidí na hanailíse ar an tionchar ar inréiteacht chun críocha Airteagal 55 de Threoir 2014/59/AE, a bheith comhsheasmhach leo siúd faoin measúnú inréiteachta mar a leagtar síos i dTeideal II, Caibidil II, den Treoir sin. Chun críocha an mheasúnaithe ar an tionchar ar inréiteacht i gcomhréir le hAirteagal 55(2), an tríú fomhír, de Threoir 2014/59/AE, áfach, maidir le comhaontuithe nó ionstraimí lena gcruthaítear dliteanais ag a bhfuil aibíocht fhada nó luachanna arda ainmniúla, ba cheart iad a mheas mar nithe is gá chun inréiteacht a áirithiú. Níor cheart cuimsiú téarmaí conarthacha den sórt sin a tharscaoileadh, dá bhrí sin, nuair nach gcomhlíonann cuimsiú den sórt sin na coinníollacha neamhphraiticiúlachta. Maidir le comhaontuithe nó ionstraimí eile lena gcruthaítear dliteanais, nuair a dhéantar measúnú ar a dtionchar ar inréiteacht, ba cheart d’údaráis réitigh aird chuí a thabhairt ar roinnt gnéithe áirithe ach ba cheart iad a cheadú, de réir mar is iomchuí ag brath ar imthosca sonracha, chun measúnú a dhéanamh ar aon ghné bhreise eile a mheasann siad a bhfuil gá léi.

(6)

Tar éis fógra iomlán inréiteachta a fháil, ba cheart tréimhse réasúnta a bheith ag an údarás réitigh chun meastóireacht a dhéanamh air. Is éagsúil an chastacht a d’fhéadfadh a bheith i gceist sna fógraí. Is iomchuí dá bhrí sin go bhfuil cead ag údarás réitigh síneadh a chur leis an tréimhse chun cuimsiú an téarma chonarthaigh a éileamh ar feadh tréimhse réamhchinntithe a mhéid a bhaineann le fógraí casta. Ba cheart fógra cuí a thabhairt don institiúid nó don eintiteas ábhartha faoi shíneadh den sórt sin. I bhfianaise chineál nua an fhógra agus a mheasúnaithe, ba cheart go mbeadh cead ag údaráis réitigh síneadh 6 mhí bhreise a chur leis an tréimhse chun measúnú a dhéanamh ar fhógraí casta le linn na chéad bhliana tar éis theacht i bhfeidhm an Rialacháin seo. Tar éis na tréimhse sin, ba cheart cead a bheith ag na húdaráis réitigh síneadh 3 mhí a chur leis an tréimhse measúnaithe le haghaidh fógraí casta.

(7)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Baincéireachta Eorpach faoi bhráid an Choimisiúin.

(8)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (2),