(1)

I gcomhréir le hAirteagal 7(1) de Rialachán (CE) Uimh. 1107/2009 chuir Probelte S.A. iarratas faoi bhráid na hÍsiltíre an 1 Meitheamh 2015 ar fhormheas na substainte gníomhaí tréithchineál AH2 Bacillus amyloliquefaciens.

(2)

I gcomhréir le hAirteagal 9(3) den Rialachán sin, an 25 Deireadh Fómhair 2015 thug an Ísiltír, ina cáil mar Bhallstát is rapóirtéir, fógra don iarratasóir, do na Ballstáit eile, don Choimisiún agus don Údarás Eorpach um Shábháilteacht Bia (“an tÚdarás”) faoi inghlacthacht an iarratais.

(3)

An 21 Nollaig 2017, chuir an Ballstát is rapóirtéir dréacht-tuarascáil maidir le measúnú faoi bhráid an Choimisiúin agus cóip di faoi bhráid an Údaráis, le féachaint an féidir coinne a bheith leis go gcomhlíonfaidh an tsubstaint ghníomhach sin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(4)

Chomhlíon an tÚdarás Airteagal 12(1) de Rialachán (CE) Uimh. 1107/2009. I gcomhréir le hAirteagal 12(3) de Rialachán (CE) Uimh. 1107/2009, d’iarr sé ar an iarratasóir faisnéis bhreise a sholáthar do na Ballstáit, don Choimisiún agus don Údarás. Mí na Nollag 2018, chuir an Ballstát is rapóirtéir a mheasúnú ar an bhfaisnéis bhreise faoi bhráid an Údaráis i ndréacht-tuarascáil nuashonraithe maidir le measúnú.

(5)

An 26 Bealtaine 2020, rinne an tÚdarás a chonclúid (2) i dtaobh an féidir coinne a bheith leis go gcomhlíonfaidh an tsubstaint ghníomhach tréithchineál AH2 Bacillus amyloliquefaciens na critéir formheasa dá bhforáiltear in Airteagal 4 de Rialachán (CE) Uimh. 1107/2009 a chur in iúl don iarratasóir, do na Ballstáit agus don Choimisiún. Chuir an tÚdarás a chonclúid ar fáil don phobal.

(6)

An 22 Deireadh Fómhair 2020, chuir an Coimisiún tuarascáil athbhreithnithe agus dréacht-Rialachán maidir le tréithchineál AH2 Bacillus amyloliquefaciens faoi bhráid an Bhuanchoiste um Plandaí, Ainmhithe, Bia agus Beatha.

(7)

Tugadh deis don iarratasóir a bharúil a chur isteach maidir leis an tuarascáil athbhreithnithe.

(8)

Maidir le húsáid ionadaíoch amháin a bhaintear as táirge cosanta plandaí amháin ar a laghad ina bhfuil an tsubstaint ghníomhach a scrúdaíodh agus a sonraíodh sa tuarascáil athbhreithnithe, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Ina theannta sin, measann an Coimisiún gur substaint ghníomhach ísealriosca é tréithchineál AH2 Bacillus amyloliquefaciens de bhun Airteagal 22 de Rialachán (CE) Uimh. 1107/2009. Is miocrorgánach é tréithchineál AH2 Bacillus amyloliquefaciens, rud a chomhlíonann na coinníollacha a leagtar amach i bpointe 5.2. d’Iarscríbhinn II a ghabhann le Rialachán (CE) Uimh. 1107/2009. Níor sainaithníodh aon ábhar mór imní don duine, d’ainmhithe ná don chomhshaol.

(10)

Dá bhrí sin, is iomchuí tréithchineál AH2 Bacillus amyloliquefaciens a fhormheas mar shubstaint ísealriosca.

(11)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá coinníollacha áirithe a chur san áireamh.

(12)

I gcomhréir le hAirteagal 13(4) de Rialachán (CE) Uimh. 1107/2009, ba cheart Rialachán Cur Chun Feidhme (AE) Uimh. 540/2011 ón gCoimisiún (3) a leasú dá réir.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,