(1)

Tá an t-aistriú chuig geilleagar ísealcharbóin atá níos inbhuanaithe, níos tíosaí ar acmhainní agus níos ciorclaí i gcomhréir leis na Spriocanna Forbartha Inbhuanaithe ríthábhachtach chun iomaíochas fadtéarmach gheilleagar an Aontais a áirithiú. In 2016, thug an tAontas Comhaontú Pháras i gcrích (2). Faoi Airteagal 2(1), pointe (c) de Chomhaontú Pháras, leagtar síos an cuspóir chun freagairt ar an athrú aeráide a neartú, i measc modhanna eile, trína áirithiú go mbeidh sreafaí airgeadais comhsheasmhach le bealach i dtreo astaíochtaí ísle gás ceaptha teasa agus le forbairt atá seasmhach ó thaobh na haeráide de.

(2)

Ag aithint dó an dúshláin sin, thíolaic an Coimisiún an Comhaontú Glas don Eoraip (3) i mí na Nollag 2019. Is straitéis nua fáis é an Comhaontú Glas don Eoraip arb é is aidhm dó an tAontas a chlaochlú ina shochaí chóir agus rathúil, ina mbeidh geilleagar nua-aimseartha agus iomaíoch, atá tíosach ó thaobh acmhainní de, nach mbeidh aon ghlan-astaíochtaí gás ceaptha teasa ann feasta faoi 2050, agus ina mbeidh an fás eacnamaíoch díchúpláilte ó úsáid acmhainní. Éilítear leis an gcuspóir sin go dtabharfar comharthaí soiléire d’infheisteoirí maidir lena n-infheistíochtaí chun sócmhainní tréigthe a sheachaint agus maoiniú inbhuanaithe a thiomsú.

(3)

I mí an Mhárta 2018, d’fhoilsigh an Coimisiún a Phlean Gníomhaíochta i dtaca le “Fás Inbhuanaithe a Mhaoiniú” (4) lena gcuirtear straitéis uaillmhianach chuimsitheach ar bun maidir le maoiniú inbhuanaithe. Ceann de na cuspóirí a leagtar amach sa Phlean Gníomhaíochta sin is ea sreafaí caipitil a atreorú chuig infheistíocht inbhuanaithe chun fás inbhuanaithe cuimsitheach a bhaint amach.

(4)

Trí chur chun feidhme cuí an Phlean Gníomhaíochta, spreagtar éileamh na n-infheisteoirí ar infheistíochtaí inbhuanaithe. Is gá dá bhrí sin a shoiléiriú gur cheart tosca inbhuanaitheachta agus cuspóirí a bhaineann le hinbhuanaitheacht a bhreithniú de réir na gceanglas rialachais táirgí atá leagtha síos i Rialachán Tarmligthe (AE) 2017/2358 ón gCoimisiún (5).

(5)

Ba cheart do ghnólachtaí árachais agus d’idirghabhálaithe árachais a mhonaraíonn táirgí árachais tosca inbhuanaitheachta a chur san áireamh sa phróiseas chun táirgí a fhormheas i gcás gach táirge árachais agus sna socruithe eile maidir le rialachas agus maoirseacht táirgí le haghaidh gach táirge árachais atá beartaithe le bheith á dháileadh ar chliaint atá ag lorg ionstraimí airgeadais a bhfuil próifíl a bhaineann leis an inbhuanaitheacht acu.

(6)

Ós rud é gur cheart an spriocmhargadh a shocrú ar leibhéal mionsonraithe leordhóthanach, níor cheart gur leor ráiteas ginearálta go bhfuil próifíl a bhaineann le hinbhuanaitheacht ag táirge árachais. Ina ionad sin, ba cheart go sonródh an gnóthas árachais nó idirghabhálaí árachais a mhonaraíonn an táirge árachais an grúpa custaiméirí a bhfuil cuspóirí sonracha a bhaineann le hinbhuanaitheacht acu agus a bhfuil an táirge árachais ceaptha le bheith dáilte orthu.

(7)

Chun a áirithiú gur féidir le custaiméirí nach bhfuil sainroghanna inbhuanaitheachta acu teacht go réidh freisin ar ionstraimí airgeadais lena mbaineann tosca inbhuanaitheachta, níor cheart a cheangal ar ghnólachtaí árachais agus ar idirghabhálaithe árachais a mhonaraíonn táirgí árachais grúpaí custaiméirí a shainaithint a bhfuil an táirge árachais lena mbaineann tosca inbhuanaitheachta neamhoiriúnach dá riachtanais, dá saintréithe ná dá gcuspóirí.

(8)

Ba cheart tosca inbhuanaitheachta táirge árachais a chur i láthair ar bhealach trédhearcach chun a chur ar chumas dáileoirí árachais an fhaisnéis ábhartha a chur ar fáil dá gcustaiméirí nó dá gcustaiméirí ionchasacha.

(9)

Léiríodh sa mheasúnú tionchair atá mar bhonn taca ag tionscnaimh reachtacha ina dhiaidh sin a foilsíodh i mBealtaine 2018 (6) gur gá a shoiléiriú gur cheart d’idirghabhálaithe árachais agus do ghnóthais árachais a dháileann táirgí infheistíochta árachas-bhunaithe mar chuid dá ndualgais i leith a gcustaiméirí agus a gcustaiméirí ionchasacha tosca inbhuanaitheachta a chur san áireamh.

(10)

Chun ardchaighdeán cosanta d’infheisteoirí a choinneáil ar bun, ba cheart go n-áireofaí ar idirghabhálaithe árachais agus ar ghnóthais árachais a dháileann táirgí infheistíochta atá árachas-bhunaithe, agus iad ag sainaithint na gcineálacha coinbhleachtaí leasa a d’fhéadfadh dochar a dhéanamh do leasanna custaiméara nó do leasanna custaiméara ionchasaigh, na cineálacha coinbhleachtaí leasa sin a eascraíonn as comhtháthú sainroghanna inbhuanaitheachta custaiméara. I gcás custaiméirí atá ann cheana, custaiméirí a bhfuil measúnú oiriúnachta déanta ina leith cheana, ba cheart go mbeadh an deis ag idirghabhálaithe árachais agus gnóthais árachais sainroghanna inbhuanaitheachta ar leith de chuid an chustaiméara a shainaithint leis an gcéad nuashonrú rialta eile ar an measúnú oiriúnachta atá ann cheana.

(11)

Ba cheart d’idirghabhálaithe árachais agus do ghnóthais árachais a chuireann comhairle ar fáil maidir le táirgí infheistíochta árachas-bhunaithe a bheith in ann táirgí infheistíochta árachas-bhunaithe a mholadh dá gcustaiméirí nó dá gcustaiméirí ionchasacha agus, dá bhrí sin, ba cheart go mbeidís in ann ceisteanna a chur chun sainroghanna inbhuanaitheachta ar leith an chustaiméara a shainaithint. I gcomhréir leis an oibleagáid gníomhaíochtaí dáileacháin a dhéanamh i gcomhréir le sárleas na gcustaiméirí, ba cheart na cuspóirí airgeadais agus aon sainrogha inbhuanaitheachta arna gcur in iúl ag na custaiméirí sin a léiriú sna moltaí do chustaiméirí nó do chustaiméirí ionchasacha araon. Dá bhrí sin, is gá a shoiléiriú agus tosca inbhuanaitheachta á gcur san áireamh sa phróiseas comhairleach nár cheart, mar thoradh air sin, go ndéanfaí cleachtais mhídhíola nó mífhaisnéis a thabhairt i dtaobh táirgí infheistíochta árachas-bhunaithe amhail is go gcomhlíontar sainroghanna inbhuanaitheachta leo. Chun cleachtais nó mífhaisnéis den sórt sin a sheachaint, ba cheart d’idirghabhálaithe árachais agus do ghnóthais árachais a sholáthraíonn comhairle maidir le táirgí infheistíochta árachas-bhunaithe measúnú a dhéanamh ar dtús ar chuspóirí infheistíochta eile agus ar chúinsí aonair de chuid custaiméara nó custaiméara ionchasaigh, sula n-iarrfaidh siad a sainroghanna inbhuanaitheachta ionchasacha.

(12)

Go dtí seo, forbraíodh táirgí infheistíochta árachas-bhunaithe a bhfuil leibhéil éagsúla uaillmhéine maidir leis an inbhuanaitheacht ag gabháil leo. Chun cur ar chumas custaiméirí nó custaiméirí ionchasacha na céimeanna éagsúla inbhuanaitheachta a thuiscint agus chun a bheith in ann cinntí feasacha infheistíochta a dhéanamh i dtaobh inbhuanaitheachta, ba cheart d’idirghabhálaithe árachais agus do ghnóthais árachais a dháileann táirgí infheistíochta árachas-bhunaithe míniú a thabhairt faoin difríocht idir táirgí infheistíochta árachas-bhunaithe a dhírítear, go huile nó i bpáirt, ar infheistíochtaí inbhuanaithe i ngníomhaíochtaí eacnamaíochta, táirgí atá incháilithe mar infheistíochtaí inbhuanaithe ó thaobh an chomhshaoil de faoi Rialachán (AE) 2020/852 ó Pharlaimint na hEorpa agus ón gComhairle (7), is é sin infheistíochtaí inbhuanaithe faoi mar a shainmhínítear in Airteagal 2, pointe (17), de Rialachán (AE) 2019/2088 ó Pharlaimint na hEorpa agus ón gComhairle (8) agus táirgí infheistíochta árachas-bhunaithe ina dtugtar drochthionchair phríomha ar thosca inbhuanaitheachta san áireamh, táirgí a bhfhéadfaidís a bheith incháilithe le bheith á moladh do chustaiméirí óir tagann siad le sainroghanna inbhuanaitheachta custaiméirí, agus, ar an taobh eile, táirgí infheistíochta árachas-bhunaithe eile gan na gnéithe sonracha sin agus nár cheart iad a bheith incháilithe le bheith á moladh do chustaiméirí nó do chustaiméirí ionchasacha a bhfuil sainroghanna inbhuanaitheachta ar leith acu.

(13)

Is gá aghaidh a thabhairt ar ábhair imní faoi “snas-glasú”, is é sin, go háirithe, an cleachtas buntáiste iomaíoch éagórach a bhaint amach trí tháirge infheistíochta árachas-bhunaithe a mholadh mar tháirge atá neamhdhíobhálach don chomhshaol nó inbhuanaithe, nuair is amhlaidh nach gcomhlíonann an táirge infheistíochta árachas-bhunaithe bunchaighdeáin chomhshaoil ná caighdeáin eile a bhaineann leis an inbhuanaitheacht. Chun mídhíol agus snas-glasú a chosc, níor cheart d’idirghabhálaithe árachais ná do ghnóthais árachais a dháileann táirgí infheistíochta árachas-bhunaithe táirgí infheistíochta árachas-bhunaithe a mholadh amhail is go gcomhlíonann siad sainroghanna inbhuanaitheachta ar leith i gcás nach gcomhlíonann na táirgí sin na sainroghanna sin. Ba cheart d’idirghabhálaithe árachais agus do ghnóthais árachais a dháileann táirgí infheistíochta árachas-bhunaithe na cúiseanna nach ndearna siad amhlaidh a mhíniú dá gcustaiméirí nó dá gcustaiméirí ionchasacha agus taifid a choimeád ar na cúiseanna sin.

(14)

Is gá a shoiléiriú gur féidir le hidirghabhálaithe árachais agus gnóthais árachais a dháileann táirgí infheistíochta árachas-bhunaithe nach bhfuil incháilithe le haghaidh sainroghanna inbhuanaitheachta ar leith a mholadh fós ach ní amhail is go gcomhlíontar leo sainroghanna inbhuanaitheachta ar leith. D’fhonn tuilleadh moltaí a thabhairt do chustaiméirí nó do chustaiméirí ionchasacha, i gcás nach gcomhlíonann táirgí infheistíochta árachas-bhunaithe sainroghanna inbhuanaitheachta custaiméara, ba cheart an deis a bheith ag an gcustaiméir faisnéis faoina sainroghanna inbhuanaitheachta a oiriúnú. D’fhonn mídhíol agus snas-glasú a chosc, ba cheart d’idirghabhálaithe árachais agus do ghnóthais árachais a dháileann táirgí infheistíochta árachas-bhunaithe taifid a choimeád de chinneadh an chustaiméara mar aon le míniú an chustaiméara i leith an oiriúnaithe.

(15)

Tá dlúthnasc ag forálacha an Rialacháin seo eatarthu féin agus le forálacha Rialachán (AE) 2019/2088 ós rud é go mbunaítear leo córas cuimsitheach chun gnéithe inbhuanaitheachta a nochtadh. Chun gur féidir na forálacha sin a léirmhíniú agus a chur i bhfeidhm go comhleanúnach agus chun a áirithiú go dtabharfar tuiscint chuimsitheach agus rochtain éasca orthu do rannpháirtithe sa mhargadh agus d’údaráis inniúla agus d’infheisteoirí, is inmhianaithe iad a chur san áireamh in aon ghníomh dlí amháin.

(16)

Ba cheart, dá bhrí sin, Rialacháin Tharmligthe (AE) 2017/2358 agus (AE) 2017/2359 (9) ón gCoimisiún a leasú dá réir.

(17)

Ba cheart a dhóthain ama a thabhairt d’údaráis inniúla, d’idirghabhálaithe árachais agus do ghnóthais árachais chun iad féin a chur in oiriúint do na ceanglais nua atá sa Rialachán seo. Ba cheart, dá bhrí sin, a chur i bhfeidhm a chur siar,