(1)

Is tír í Cabo Verde a thairbhíonn as an socrú speisialta dreasachta um fhorbairt inbhuanaithe agus dea-rialachas a sholáthraítear faoi Airteagal 1(2), pointe (b), de Rialachán (AE) Uimh. 978/2012 ó Pharlaimint na hEorpa agus ón gComhairle (2), dá ngairtear an Córas Ginearálaithe um Fhabhair (GSP+). Leagtar síos na rialacha maidir le tionscnamh fabhrach chun críocha an Chórais Ghinearálaithe um Fhabhair (GSP), seachas rialacha nós imeachta, i Rialachán Tarmligthe (AE) 2015/2446 ón gCoimisiún (3).

(2)

I litir dar dáta an 18 Márta 2020, chuir Cabo Verde iarraidh isteach maidir le síneadh a chur leis na maoluithe sealadacha ar na rialacha maidir le tionscnamh fabhrach a leagtar síos i Rialachán Tarmligthe (AE) 2015/2446, a deonaíodh le Rialacháin Cur Chun Feidhme (AE) 2019/561 (4) agus (AE) 2019/620 (5) ón gCoimisiún. Bhain an iarraidh le méid bliantúil 5 000 tona d’fhilléid tuinnín ullmhaithe nó leasaithe, 3 000 tona d’fhilléid ronnach ullmhaithe nó leasaithe agus 1 000 tona d’fhilléid tuinnín frigéid nó d’fhilléid ronnach frigéid ullmhaithe nó leasaithe. Faoin maolú arna iarraidh, mheasfaí na táirgí sin a bheith de thionscnamh Cabo Verde fiú dá mba tháirgí iad a táirgeadh ó éisc neamhthionscnaimh.

(3)

Maidir lena hiarraidh ar shíneadh a chur leis na maoluithe sin, thacaigh Cabo Verde léi trí bheith ag brath ar na hargóintí a rinneadh in iarrataí a cuireadh isteach roimhe seo, ar argóintí ábhartha iad fós dar le Cabo Verde, eadhon, méideanna ísle tuinnín agus ronnach arna ngabháil ina huiscí teorann, deiseanna iascaireachta atá gann lasmuigh dá huiscí teorann agus fad teoranta an tséasúir iascaireachta. Eilimint eile a cuireadh i dtábhacht san iarraidh is ea bonneagar calafoirt Cabo Verde a forbraíodh le déanaí. Dá thoradh sin, is féidir méideanna éisc ar scála níos mó a láimhseáil chun acmhainneacht táirgeachta an tionscail áitiúil próiseála éisc a choinneáil ar bun trí sholáthar a chur ar fáil dó. Ar deireadh, cuireadh i dtábhacht san iarraidh na deacrachtaí a bhfuil Cabo Verde ag dul i ngleic leo de dheasca na moilleanna maidir le teacht i bhfeidhm an Chomhaontaithe Comhpháirtíochta Eacnamaíche idir an tAontas Eorpach agus an Afraic Thiar. Forbraíonn Cabo Verde argóinteacht chun béim a leagadh ar an ngá atá aici le maolú ar rialacha GSP maidir le tionscnamh fabhrach chun cúiteamh a dhéanamh air nach féidir brath go fóill ar na cuótaí tionscnaimh ná na rialacha maidir le carnadh faoin gComhaontú Comhpháirtíochta Eacnamaíche nach bhfuil curtha i bhfeidhm go sealadach go fóill.

(4)

Is maolú de chineál sealadach é an maolú dá bhforáiltear in Airteagal 64(6) de Rialachán (AE) Uimh. 952/2013 (Cód Custaim an Aontais) agus tá sé faoi réir chomhlíonadh feabhsaithe na rialacha tionscnaimh le haghaidh na dtáirgí lena mbaineann agus chomhlíonadh an cheanglais maidir leis an gcomhar riaracháin. Chun maolú den sórt sin ar na rialacha maidir le tionscnamh fabhrach a bhainistiú, ní mór don tír iarrthach na rialacha tionscnaimh le haghaidh na dtáirgí lena mbaineann agus na nósanna imeachta a bhaineann leo a chomhlíonadh agus ní mór di dea-chomhar riaracháin a áirithiú.

(5)

I ndáil leis sin, leis na gníomhaíochtaí faireacháin a rinne an Coimisiún Eorpach le blianta beaga anuas i gcomhthéacs an mhaolaithe a deonaíodh de bhun Airteagal 64(6) de Rialachán (AE) Uimh. 952/2013, léiríodh roinnt easnamh maidir le comhar riaracháin Cabo Verde le húdaráis chustaim na mBallstát i dtaca le cruthúnais ar thionscnamh a fhíorú. D’fhéadfadh go mbeadh na heasnaimh sin ina gcúis le diúltú an mhaolaithe ar bhonn na gcúiseanna a chuir Cabo Verde i láthair. Tar éis di an iarraidh sin a chur isteach, áfach, bhí ar Cabo Verde agus go háirithe an tionscal iascaireachta in Cabo Verde, dul i ngleic le géarchéim thromchúiseach de dheasca an chaillteanais ioncaim arbh í paindéim COVID-19 ba chúis leis. Le hAirteagal 64(6) den chód, tá an Coimisiún i dteideal an staid nua sin a chur san áireamh, agus cinneadh a dhéanamh maidir le maolú a dheonú ar a thionscnamh féin.

(6)

Dá bhrí sin, ba cheart maolú sealadach a dheonú do Cabo Verde ar an gceanglas faoi na rialacha maidir le tionscnamh fabhrach na táirgí a mheas a bheith de thionscnamh na tíre is tairbhí i gcás ina bhfaightear na hábhair iontu a áirithítear i gCaibidlí 3 agus 16 den Ainmníocht Chomhcheangailte go hiomlán sa tír sin agus sa chás sin amháin. Sa chéad bhliain dá chur i bhfeidhm, ba cheart an maolú a dheonú ar mhéid bliantúil 5 000 tona d’fhilléid tuinnín ullmhaithe nó leasaithe, 3 000 tona d’fhilléid ronnach ullmhaithe nó leasaithe agus 1 000 tona d’fhilléid tuinnín frigéid nó d’fhilléid ronnach frigéid ullmhaithe nó leasaithe. Chun leasanna tráchtála an Aontais Eorpaigh a chur san áireamh agus chun iomaíocht chóir a choinneáil ar bun idir tionscal iascaigh intíre an Aontais agus tionscal iascaigh intíre tríú tíortha, ba cheart an méid bliantúil a laghdú sna blianta ina dhiaidh sin de réir na méideanna dá bhforáiltear in Iarscríbhinní I agus II, cé is moite d’fhilléid tuinnín frigéid nó filléid ronnach frigéid ullmhaithe nó leasaithe. Ba cheart teorainn 3 bliana a chur le fad an mhaolaithe chun deis a thabhairt do Cabo Verde téarnamh ó ghéarchéim COVID-19 agus féachaint leis na coigeartuithe struchtúrtha is gá a dhéanamh in earnáil an iascaigh, d’fhonn na rialacha tionscnaimh a chomhlíonadh le haghaidh na dtáirgí lena mbaineann. Ba cheart an maolú a dheonú, áfach, ar choinníoll go ndéanfaidh údaráis chustaim Cabo Verde seiceálacha cainníochtúla ar onnmhairithe na dtáirgí atá faoi réir an mhaolaithe agus go gcuirfidh siad ráiteas in iúl don Choimisiún maidir leis na méideanna ar eisíodh ráitis maidir le tionscnamh ina leith de bhun an Rialacháin seo agus sraithuimhreacha na ráiteas sin.

(7)

Thairis sin, ba cheart do Cabo Verde tairbhiú de mhaolú a sholáthraítear faoi rialacha tionscnaimh fabhracha GSP maidir le tuinnín agus ronnach ar choinníoll go dtuairiscíonn sí go tráthrialta do sheirbhísí inniúla an Choimisiúin maidir leis na bearta atá glactha aici chun comhlíonadh na rialacha a fheabhsú i dtaca le tionscnamh na dtáirgí agus na nósanna imeachta a bhaineann leo agus chun comhar riaracháin a chur ar fáil de réir mar a cheanglaítear chun na socruithe fabhracha faoi GSP a chur chun feidhme dá dtagraítear in Airteagal 1(2) de Rialachán (AE) Uimh. 978/2012. Ba cheart na tuarascálacha sin a chur isteach i gcomhréir le sceideal ama beacht, lena mbeadh moilleanna maidir le baint amach na sprioc-amanna socraithe ina gcúis le fionraí an mhaolaithe, fionraí a bheadh le cur in iúl d’údaráis inniúla Cabo Verde tar éis meabhrúcháin agus cuireadh na tuarascálacha a chur isteach laistigh de 10 lá oibre. Le fionraí den sórt sin, ní dhéanfar an tréimhse dá bhforáiltear sa Rialachán agus in Iarscríbhinní 1 agus 2 a ghabhann leis an Rialachán a fhadú. Na heilimintí atá le háireamh sna tuarascálacha sin, ba cheart iad a liostú in iarscríbhinn a ghabhann leis an Rialachán seo.

(8)

Na méideanna a leagtar amach sna hIarscríbhinní a ghabhann leis an Rialachán seo, ba cheart iad a bhainistiú i gcomhréir le hAirteagail 49 go 54 de Rialachán Cur Chun Feidhme (AE) 2015/2447 ón gCoimisiún (6), lena rialaítear bainistiú cuótaí taraife.

(9)

Ba cheart do na bearta dá bhforáiltear sa Rialachán seo teacht i bhfeidhm an lá tar éis lá a fhoilsithe agus ba cheart feidhm chúlghabhálach a bheith acu amhail ón 1 Eanáir 2021, chun staid dhúshlánach Cabo Verde a chur san áireamh agus chun cead a thabhairt don tír sin an maolú a chur i bhfeidhm ar tháirgí a allmhairíodh isteach san Aontas ó bhí an dáta sin ann.

(10)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim,