(1)

De bhun Airteagal 25 de Rialachán (AE) Uimh. 1306/2013 tá cúlchiste le bunú atá ceaptha tacaíocht bhreise a chur ar fáil d’earnáil na talmhaíochta i gcás géarchéimeanna tromchúiseacha a dhéanann difear don táirgeacht talmhaíochta nó don dáileadh talmhaíochta, cúlchiste atá le bunú trí laghdú a chur i bhfeidhm ag tús gach bliana ar íocaíochtaí díreacha leis an sásra smachta airgeadais dá dtagraítear in Airteagal 26 den Rialachán sin.

(2)

Le hAirteagal 26(1) de Rialachán (AE) Uimh. 1306/2013, d’fhonn a áirithiú go gcomhlíontar na huasteorainneacha bliantúla dá dtagraítear in Airteagal 16 den Rialachán sin do mhaoiniú an chaiteachais a bhaineann leis an margadh agus do mhaoiniú íocaíochtaí díreacha, foráiltear go bhfuil ráta coigeartaithe d’íocaíochtaí díreacha le cinneadh i gcás ina léiríonn na réamhaisnéisí maidir le maoiniú na mbeart a mhaoinítear faoin bhfo-uasteorainn sin do bhliain áirithe airgeadais go sárófar na huasteorainneacha bliantúla is infheidhme.

(3)

Is é EUR 497,3 milliún i bpraghsanna reatha méid an chúlchiste le haghaidh géarchéimeanna san earnáil talmhaíochta i nDréachtbhuiséad an Choimisiúin do 2022. Chun an méid sin a chumhdach, ní mór don sásra smachta airgeadais feidhm a bheith aige maidir le híocaíochtaí díreacha faoi na scéimeanna tacaíochta a liostaítear in Iarscríbhinn I a ghabhann le Rialachán (AE) Uimh. 1307/2013 ó Pharlaimint na hEorpa agus ón gComhairle (2) i ndáil leis an mbliain féilire 2021.

(4)

De réir na réamhaisnéisí ar íocaíochtaí díreacha agus ar chaiteachas a bhaineann leis an margadh agus a leagtar amach i nDréachtbhuiséad an Choimisiúin do 2022 níl gá le tuilleadh smachta airgeadais.

(5)

I gcomhréir le hAirteagal 26(3) de Rialachán (AE) Uimh. 1306/2013, ba cheart an ráta coigeartaithe a shocrú faoin 30 Meitheamh sa bhliain féilire a bhfuil feidhm ag an ráta coigeartaithe ina leith.

(6)

Go ginearálta, nuair a chuireann feirmeoirí iarratas isteach ar chabhair i bhfoirm íocaíochtaí díreacha i ndáil leis an mbliain féilire (N), tugtar an íocaíocht dóibh laistigh de thréimhse sheasta íocaíochta laistigh den bhliain airgeadais (N+1). Mar sin féin, féadfaidh na Ballstáit íocaíochtaí déanacha a dhéanamh le feirmeoirí tar éis na tréimhse íocaíochta sin, laistigh de theorainneacha áirithe. Féadfar íocaíochtaí déanacha den sórt sin a dhéanamh i mbliain airgeadais dá éis sin. Nuair a chuirtear smacht airgeadais i bhfeidhm maidir le bliain féilire ar leith, níor cheart an ráta coigeartaithe a chur i bhfeidhm maidir le híocaíochtaí ar cuireadh iarratais ar chabhair isteach ina leith le linn blianta féilire seachas an bhliain féilire a bhfuil feidhm ag an smacht airgeadais ina leith. Dá bhrí sin, d’fhonn cóir chomhionann d’fheirmeoirí a áirithiú, is iomchuí féachaint chuige nach gcuirfear an ráta coigeartaithe i bhfeidhm ach amháin ar íocaíochtaí ar cuireadh iarratais ar chabhair isteach ina leith le linn na bliana féilire a bhfuil feidhm ag an smacht airgeadais ina leith, gan beann ar an tráth a dhéanfar an íocaíocht leis na feirmeoirí.

(7)

Le hAirteagal 8(1) de Rialachán (AE) Uimh. 1307/2013, foráiltear nach bhfuil feidhm le bheith ag an ráta coigeartaithe a chuirtear i bhfeidhm ar íocaíochtaí díreacha arna gcinneadh i gcomhréir le hAirteagal 26 de Rialachán (AE) Uimh. 1306/2013 ach maidir le híocaíochtaí díreacha atá os cionn EUR 2 000 atá le deonú d’fheirmeoirí i leith na bliana comhfhreagraí féilire. Ina theannta sin, toisc gur de réir a chéile a thabharfar na híocaíochtaí díreacha isteach, foráiltear le hAirteagal 8(2) de Rialachán (AE) Uimh. 1307/2013 nach mbeidh feidhm ag an ráta coigeartaithe maidir leis an gCróit ach amháin ón 1 Eanáir 2022 ar aghaidh. Níor cheart, dá bhrí sin, feidhm a bheith ag an ráta coigeartaithe atá le cinneadh leis an Rialachán seo maidir le híocaíochtaí le feirmeoirí sa Bhallstát sin,