(1)

I gcomhréir le hAirteagal 7(1) de Rialachán (CE) Uimh. 1107/2009, chuir Abiopep Plant Health S.L. iarratas faoi bhráid na Spáinne an 27 Samhain 2017 maidir le formheas na substaintí gníomhacha Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2.

(2)

I gcomhréir le hAirteagal 9(3) den Rialachán sin, an 15 Feabhra 2018 thug an Spáinn, ina cáil mar Bhallstát rapporteur, fógra don iarratasóir, do na Ballstáit eile, don Choimisiún agus don Údarás Eorpach um Shábháilteacht Bia (‘an tÚdarás’) faoi inghlacthacht an iarratais.

(3)

An 22 Iúil 2019, chuir an Ballstát rapporteur dréacht-tuarascáil maidir le measúnú faoi bhráid an Choimisiúin agus cóip di faoi bhráid an Údaráis, féachaint an dóigh nó a mhalairt go gcomhlíonfaidh na substaintí gníomhacha sin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(4)

Rinne an tÚdarás Airteagal 12(1) de Rialachán (CE) Uimh. 1107/2009 a chomhlíonadh.

(5)

An 22 Deireadh Fómhair 2019, chuir an tÚdarás a chonclúid (2) in iúl don iarratasóir, do na Ballstáit agus don Choimisiún, maidir le cé acu ba dhóigh nó a mhalairt go gcomhlíonfaidh na substaintí gníomhacha, eadhon Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2, na critéir formheasa dá bhforáiltear in Airteagal 4 de Rialachán (CE) Uimh. 1107/2009. Chuir an tÚdarás a chonclúid ar fáil don phobal.

(6)

An 25 Eanáir 2021 chuir an Coimisiún faoi bhráid an Bhuanchoiste um Plandaí, Ainmhithe, Bia agus Beatha tuarascáil athbhreithniúcháin agus dréacht-Rialachán maidir le Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2.

(7)

Tugadh deis don iarratasóir a bharúil a chur in iúl maidir leis an tuarascáil athbhreithniúcháin.

(8)

Maidir le haon úsáid ionadaíoch amháin nó níos mó a bhaintear as, ar a laghad, táirge cosanta plandaí amháin ina bhfuil na substaintí gníomhacha, agus go háirithe na húsáidí a scrúdaíodh agus a sonraíodh sa tuarascáil athbhreithniúcháin, is éard a suíodh gurbh amhlaidh a comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá bhrí sin, is iomchuí Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2 a fhormheas.

(9)

Measann an Coimisiún thairis sin gur substaintí gníomhacha ísealriosca iad Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2 de bhun Airteagal 22 de Rialachán (CE) Uimh. 1107/2009. Ní substaintí atá ina n-ábhar imní iad Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2, agus comhlíonann siad na coinníollacha a leagtar amach i bpointe 5.2 d’Iarscríbhinn II a ghabhann le Rialachán (CE) Uimh. 1107/2009. Agus aird á tabhairt ar an measúnú a rinne an Ballstát rapporteur agus an tÚdarás a mhéid a bhaineann leis na húsáidí atá beartaithe i dtithe gloine buana (úsáidí a bhaineann leis an saothrú san ithir agus le hidreaponaic), is miocrorgánaigh iad Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2 a meastar go mbeidh riosca íseal ag baint leo don duine, d’ainmhithe agus don chomhshaol. Is eol go mbaineann ionfhabhtú Víreas Mósáice an Pheipíonó agus macasamhlú an víris sin go sonrach le plandaí áirithe (fine Solanaceae) agus nach bhfuil tuairiscí ann go mbíonn sé ag gabháil d’orgánaigh eile. Níor sainaithníodh aon réimse criticiúil imní, agus ní dócha go mbeidh acmhainneacht tocsaineachta, ionfhabhtaíochta ná pataigineachta ag an dá thréithchineál den víreas. Ar na cúiseanna sin, níor cheart ach bearta ginearálta maolaithe a ghlacadh le haghaidh oibreoirí agus oibrithe.

(10)

Dá bhrí sin, is iomchuí Víreas Mósáice an Pheipíonó, tréithchineál AE, aonraíoch lag Abp1 agus Víreas Mósáice an Pheipíonó, tréithchineál CH2, aonraíoch lag Abp2 a fhormheas mar shubstaintí a bhfuil riosca íseal ag baint leo.

(11)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá coinníollacha áirithe a chur san áireamh.

(12)

I gcomhréir le hAirteagal 13(4) de Rialachán (CE) Uimh. 1107/2009, ba cheart an Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3) a leasú dá réir.

(13)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,