(1)

Rinneadh Rialachán (CE) Uimh. 294/2008 ó Pharlaimint na hEorpa agus ón gComhairle (3) a leasú go substaintiúil (4). Ós rud é go bhfuil tuilleadh leasuithe le déanamh ar an Rialachán, ba cheart é a athmhúnlú ar mhaithe le soiléireacht.

(2)

Léirítear leis na meastóireachtaí neamhspleácha tréimhsiúla a dhéanann an Institiúid Eorpach um Nuálaíocht agus Teicneolaíocht (EIT) agus an taithí a fuarthas nuair a rinneadh Rialachán (CE) Uimh. 294/2008 a chur i bhfeidhm go bhfuil gá le hathruithe substaintiúla chun tuilleadh feabhais a chur ar shamhail EIT agus ar na próisis fholuiteacha a ghabhann léi. Thairis sin, sainaithníodh sa mheastóireacht eatramhach agus sa mheasúnú tionchair ex-ante a rinne EIT go bhfuil roinnt réimsí ann a bhféadfaí feabhas a chur orthu, inter alia samhail chistiúcháin na bPobal Eolais agus Nuálaíochta (PENanna), comhtháthú PENanna in éiceachórais nuálaíochta áitiúla, oscailteacht agus trédhearcacht PENanna agus faireachán a dhéanann EIT. Gabhann deis leis an Rialachán seo aghaidh a thabhairt ar na gnéithe sin freisin.

(3)

Is iad na Ballstáit go príomha atá freagrach as bonn láidir Eorpach a choinneáil ó thaobh tionscail, iomaíochais agus nuálaíochta de. Mar gheall ar chineál agus ar scála dhúshlán na nuálaíochta, áfach, is gá freisin gníomhú go comhoibríoch ar leibhéal an Aontais.

(4)

Tá EIT bunaithe chun na beartais agus na tionscnaimh atá ag an Aontas cheana a chomhlánú trí chomhtháthú thriantán an eolais – ardoideachas, taighde agus nuálaíocht – a chothú ar fud an Aontais.

(5)

Ba cheart do EIT rannchuidiú le hacmhainneacht nuálaíochta an Aontais agus na mBallstát a threisiú chun dul i ngleic le mórdhúshláin atá roimh an tsochaí agus, ar an gcaoi sin, rannchuidiú le forbairt agus iomaíochas eacnamaíoch inbhuanaithe an Aontais.

(6)

Ba cheart é a bheith d’aidhm ag EIT, trí PENanna, éiceachórais nuálaíochta a neartú ar fud an Aontais ar bhealach oscailte agus trédhearcach. Chun an cuspóir sin a bhaint amach, ba cheart do EIT líonrú, comhtháthú agus comhoibriú a éascú agus a fheabhsú agus sineirgí idir chomhphobail éagsúla nuálaíochta a chur chun cinn ar fud na hEorpa. Tá sé d’aidhm ag EIT freisin tosaíochtaí straitéiseacha an Aontais a bhaint amach agus rannchuidiú le fíorú chuspóirí agus bheartais an Aontais, lena n-áirítear iad siúd dá dtagraítear sna teachtaireachtaí ón gCoimisiúin an 11 Nollaig 2019 maidir leis an gComhaontú Glas don Eoraip: na teachtaireachtaí an 27 Bealtaine 2020 maidir le buiséad AE lena gcumhachtaítear an plean téarnaimh don Eoraip (Plean Téarnaimh don Eoraip), an 19 Feabhra 2020 maidir le straitéis Eorpach um shonraí, an 10 Márta 2020 maidir le Straitéis FBM d’Eoraip inbhuanaithe agus dhigiteach agus an 10 Márta 2020 maidir le Straitéis Nua Tionsclaíochta don Eoraip, chomh maith leo siúd a bhaineann le neamhspleáchas straitéiseach an Aontais a bhaint amach, agus ag an am céanna geilleagar oscailte á choinneáil. Ina theannta sin, ba cheart do EIT rannchuidiú le dul i ngleic le dúshláin dhomhanda, lena n-áirítear Spriocanna Forbartha Inbhuanaithe (SDGanna) na Náisiún Aontaithe trí phrionsabail Chlár Oibre 2030 don Fhorbairt Inbhuanaithe (“Clár Oibre 2030”) agus Chomhaontú Pháras arna ghlacadh faoi Chreat-Choinbhinsiún na Náisiún Aontaithe ar Athrú Aeráide (5) (“Comhaontú Pháras”) a leanúint, agus rannchuidiú le haistriú chuig geilleagar atá neodrach ó thaobh astaíochtaí gás ceaptha teasa a bhaint amach faoi 2050 ar a dhéanaí. Ní bheifear in ann an t-aistriú sin a dhéanamh ach amháin trí bhorradh a chur faoin taighde agus faoin nuálaíocht, rud a chuireann béim ar an ngá atá le dálaí agus infheistíochtaí fabhracha a threisiú maidir le bonn eolais agus acmhainneacht taighde agus nuálaíochta na hEorpa a fheabhsú, go háirithe i dtaca le teicneolaíochtaí agus nuálaíochtaí atá glas agus neamhdhíobhálach don aeráid.

(7)

Ba cheart do EIT feabhas a chur ar oscailteacht PENanna chun naisc chomhoibríocha a neartú agus sineirgí a chruthú idir pobail nuálaíochta éagsúla san Eoraip agus, ar an gcaoi sin, éagsúlacht gheografach agus an chúrsaíocht tallainne a éascú.

(8)

Ba cheart réimsí tosaíochta agus riachtanais airgeadais EIT le haghaidh tréimhse 7 mbliana, lena gcumhdaítear an creat airgeadais ilbhliantúil ábhartha (CAI), a leagan síos i gClár Oibre Straitéiseach um Nuálaíocht (COSN). Ba cheart COSN a ailíniú le Fís Eorpach – an Clár Réime um Thaighde agus um Nuálaíocht (Fís Eorpach) a bunaíodh le Rialachán (AE) 2021/695 ó Pharlaimint na hEorpa agus ón gComhairle (6), lena n-áirítear maidir le tuairisciú, faireachán, meastóireacht agus ceanglais eile a leagtar amach sa Rialachán sin, agus ba cheart pleanáil straitéiseach an chláir Fís Eorpach a chur san áireamh ann. Ba cheart do COSN sineirgí a bhunú agus a chothú le codanna eile den chlár Fís Eorpach, le cláir ábhartha eile de chuid an Aontais de CAI agus le tionscnaimh, beartais agus ionstraimí náisiúnta agus réigiúnacha ábhartha eile de chuid an Aontais, go háirithe leo siúd a thacaíonn le taighde agus nuálaíocht, le hoideachas agus forbairt scileanna, le tionscal inbhuanaithe agus iomaíoch, le fiontraíocht agus le forbairt réigiúnach. I bhfianaise thábhacht COSN do bheartas nuálaíochta an Aontais agus an tionchair shocheacnamaíoch a mheastar a bheidh aige ar an Aontas, ba cheart do Pharlaimint na hEorpa agus don Chomhairle COSN a ghlacadh ar bhonn togra ón gCoimisiún. Ba cheart an togra sin ón gCoimisiún a bheith bunaithe ar ranníocaíocht arna déanamh ag EIT. Ba cheart an ranníocaíocht sin a chur ar fáil do Pharlaimint na hEorpa agus don Chomhairle.

(9)

Bhí an ghéarchéim a tháinig as ráig COVID-19 ina cúis le suaitheadh mór ar chórais cúraim sláinte agus eacnamaíocha na mBallstát. Chun na tionchair shóisialta, eacnamaíocha, chomhshaoil agus theicneolaíocha a eascraíonn as an ngéarchéim a shárú, beidh gá le comhoibriú ó institiúidí, comhlachtaí, oifigí agus gníomhaireachtaí an Aontais. Ba cheart do EIT agus do PENanna solúbthacht a léiriú agus iad ag freagairt do dhúshláin agus tosaíochtaí atá ann cheana agus do dhúshláin agus tosaíochtaí nua agus gan choinne, agus ba cheart dóibh a bheith in ann bearta agus tionscnaimh a ghlacadh chun tacaíocht iomchuí a sholáthar dá n-éiceachórais. Go háirithe, ba cheart do EIT agus do PENanna rannchuidiú leis na hiarrachtaí nuálaíochta is gá chun dul i ngleic le tionchar ghéarchéim COVID-19, i gcomhréir le tosaíochtaí an Chomhaontaithe Ghlais don Eoraip, an Phlean téarnaimh don Eoraip, na Straitéise Nua Tionsclaíochta don Eoraip agus SDGanna, agus sineirge le tionscnaimh agus comhpháirtíochtaí eile de chuid an Aontais á háirithiú ag an am céanna.

(10)

I gcomhréir le Rialachán (AE) 2021/695, ba cheart, le gníomhaíochtaí EIT, aghaidh a thabhairt ar dhúshláin fhadtéarmacha straitéiseacha, go háirithe i réimsí trasdisciplíneacha agus idirdhisciplíneacha, lena n-áirítear réitigh nuálacha neamhtheicneolaíocha a fhorbairt mar chomhlánú riachtanach ar ghníomhaíochtaí nuálaíochta atá dírithe ar an teicneolaíocht. Agus é sin á dhéanamh aici, ba cheart do EIT idirphlé rialta a chur chun cinn leis an tsochaí shibhialta, eagraíochtaí taighde, lárionaid nuálaíochta, fiontair bheaga agus mheánmhéide (FBManna), institiúidí ardoideachais agus ionadaithe tionscail.

(11)

Ba cheart do EIT, trí PENanna, tosaíocht a thabhairt d’aistriú a cuid gníomhaíochtaí ardoideachais, taighde agus nuálaíochta agus fiontraíochta chuig an gcomhthéacs gnó agus chuig a gcur i bhfeidhm tráchtála agus tacú le hacmhainneacht nuálaíochta agus fiontraíochta institiúidí ardoideachais agus tacú le gnólachtaí nuálacha a chruthú agus a fhorbairt, i gcomhlántacht leis an gComhairle Nuálaíochta Eorpach (CNE), chomh maith le codanna ábhartha eile den chlár Fís Eorpach, agus de Chlár InvestEU arna bhunú le Rialachán (AE) 2021/523 ó Pharlaimint na hEorpa agus ón gComhairle (7).

(12)

Ba cheart do EIT feidhmiú trí Chomhpháirtíochtaí Eorpacha Institiúidithe sármhaithe de chuid Institiúidí Ardoideachais, eagraíochtaí taighde, cuideachtaí, lena n-áirítear FBManna agus cuideachtaí poiblí, chomh maith le húdaráis áitiúla, fiontair shóisialta, eagraíochtaí seachbhrabúsacha ábhartha agus le geallsealbhóirí eile. I bhfianaise cineál nuálach fiontar áirithe maidir leis na hearraí nó seirbhísí a bhíonn á dtairiscint acu, maidir lena n-eagrú nó maidir leis na modhanna táirgthe a úsáideann siad, ba cheart go saothrófaí cur chun cinn fiontraíochta sóisialta agus rannpháirtíocht níos dlúithe FBManna agus fiontar sóisialta, lena n-áirithítear a rannpháirtíocht ghníomhach. Ba cheart é a bheith d’aidhm ag na comhpháirtíochtaí sin a bheith inbhuanaithe ó thaobh airgeadais de trí chistí ó fhoinsí poiblí agus príobháideacha eile a shlógadh agus an raon is leithne is féidir de chomhpháirtithe nua ábhartha a mhealladh agus caidreamh a bhunú leo. Ba cheart don Bhord Rialaithe iad a roghnú agus a ainmniú mar PENanna, i gcomhréir leis na réimsí tosaíochta agus leis an amchlár a leagtar amach in COSN, agus na tosaíochtaí a leagtar amach i bpleanáil straitéiseach an chláir Fís Eorpach á gcur san áireamh, agus aghaidh á tabhairt ar dhúshláin dhomhanda agus shóisialta atá ag teacht chun cinn. Ba cheart iad a roghnú ar bhonn próiseas atá iomaíoch, oscailte, trédhearcach agus feabhas-bhunaithe, i gcomhréir leis an Rialachán seo agus leis na critéir chun Comhpháirtíochtaí Eorpacha a roghnú a leagtar amach i Rialachán (AE) 2021/695. Ba cheart baint a bheith ag an gcéad PEN den sórt sin, atá le seoladh a luaithe is féidir in 2022 nó in 2023, le hEarnálacha agus Tionscail an Chultúir agus na Cruthaitheachta, agus ba cheart baint a bheith ag an dara PEN den sórt sin, atá le seoladh in 2026, leis na hEarnálacha agus Éiceachórais Uisce, Mara agus Muirí.

(13)

Agus sainiúlacht PENanna á cur san áireamh, ní mór foráil a dhéanamh maidir le coinníollacha íosta speisialta i dtaca le PEN a bhunú, de mhaolú ar na rialacha maidir le rannpháirtíocht sa chlár Fís Eorpach agus maidir lena scaipeadh. Ar an gcaoi chéanna, féadfaidh sé go mbeidh gá le rialacha sonracha i dtaca le húinéireacht, cearta rochtana, agus i dtaca le saothrú agus scaipeadh maidir le gníomhaíochtaí breisluacha PENanna, i gcás inarb iomchuí.

(14)

Ba cheart don Bhord Rialaithe gníomhaíochtaí EIT a stiúradh agus faireachán a dhéanamh orthu agus ba cheart dó a bheith freagrach as gníomhaíochtaí PENanna a roghnú, a ainmniú, a mhaoiniú, agus as faireachán agus meastóireacht a dhéanamh orthu i gcomhréir le Rialachán (AE) 2021/695 agus le COSN. Agus comhaltaí an Bhoird Rialaithe á gceapadh aige, ba cheart don Choimisiún a áirithiú go ndéanfar ionadaíocht chothrom orthu siúd a bhfuil taithí acu i réimsí an ardoideachais, an taighde, na nuálaíochta nó an ghnó, mar aon le cothromaíocht inscne agus cumhdach geografach, agus an barr feabhais mar phrionsabal treorach acu.

(15)

Ba cheart do EIT faireachán leanúnach agus meastóireachtaí seachtracha tréimhsiúla ar aschur, ar thorthaí agus ar thionchar gach PEN a eagrú, lena n-áirítear ar a ndul chun cinn i dtreo inbhuanaitheacht airgeadais, cost-éifeachtúlacht agus oscailteacht do chomhaltaí nua. Ba cheart a áireamh sna meastóireachtaí sin athbhreithnithe eatramhacha lena gcumhdófaí na chéad 3 bliana den chomhaontú comhpháirtíochta agus na 3 bliana tar éis aon fhadaithe, measúnuithe cuimsitheacha a dhéanfaí roimh dheireadh an seachtú bliain den chomhaontú comhpháirtíochta, agus athbhreithnithe deiridh a dhéanfaí roimh dheireadh an chomhaontaithe comhpháirtíochta. Ba cheart don Bhord Rialaithe bearta ceartaitheacha a dhéanamh i leith PENanna nuair is iomchuí.

(16)

Ba cheart do EIT Grúpa Ionadaithe na mBallstát a chur ar an eolas go rialta maidir le feidhmíocht EIT agus PENanna, a bhfuil bainte amach acu agus a ngníomhaíochtaí, torthaí a bhfaireacháin agus a meastóireachta, agus a dtáscairí feidhmíochta agus a mbearta ceartaitheacha. Ba cheart do Ghrúpa Ionadaithe na mBallstát comhairle a chur ar an mBord Rialaithe agus ar an Stiúrthóir maidir le saincheisteanna a bhfuil tábhacht straitéiseach ag baint leo agus ba cheart dó comhairle a chur ar EIT agus ar PENanna agus taithí a chomhroinnt leo. Ba cheart do EIT cruinnithe de Ghrúpa Ionadaithe na mBallstát a eagrú.

(17)

Chun rannchuidiú le hiomaíochas agus chun mealltacht idirnáisiúnta gheilleagar na hEorpa agus a acmhainneacht nuálaíochta agus fiontraíochta a threisiú, ba cheart go mbeadh EIT agus PENanna in ann eagraíochtaí comhpháirtíochta, taighdeoirí agus mic léinn a mhealladh ar fud an Aontais, lena n-áirítear as na réigiúin is forimeallaí san Aontas, agus as réigiún lasmuigh den Aontas, amhail trína soghluaisteacht a spreagadh.

(18)

Ba cheart an caidreamh idir EIT agus PENanna a bheith bunaithe ar chomhaontuithe comhpháirtíochta agus ar chomhaontuithe deontais, ina leagfar amach cearta agus oibleagáidí PENanna agus ranníocaíocht airgeadais, bunaithe ar fheidhmíocht, ó EIT le PENanna. Chun an t-ualach riaracháin ar PENanna a theorannú agus acmhainní pleanála agus gníomhaíochtaí pleanála níos fadtéarmaí a áirithiú, ba cheart do EIT comhaontuithe deontais ilbhliantúla suas le 3 bliana a thabhairt i gcrích le PENanna, nó, i gcás ina measfar é a bheith níos iomchuí, comhaontuithe deontais bliantúla a thabhairt i gcrích. De mhaolú ar Rialachán (AE, Euratom) 2018/1046 ó Pharlaimint na hEorpa agus ón gComhairle (8) (“an Rialachán Airgeadais”), ba cheart do EIT a bheith in ann comhaontú comhpháirtíochta den sórt sin a bhunú le haghaidh tréimhse tosaigh 7 mbliana agus, faoi réir feidhmíocht dhearfach agus torthaí dearfacha an athbhreithnithe eatramhaigh agus an mheasúnaithe chuimsithigh ar PEN, é a fhadú ar feadh tréimhse breise suas le 7 mbliana. Tar éis dhul in éag an chomhaontaithe comhpháirtíochta, féadfaidh EIT agus PEN meabhrán comhair a thabhairt i gcrích, agus é mar aidhm leis sin comhar gníomhach a choimeád ar bun.

(19)

Is gá tacú leis an ardoideachas ós rud é gur dlúthchuid de thriantán an eolais é, cé gur minic é in easnamh ann. Ba cheart d’institiúidí ardoideachais agus soláthraithe gairmoideachais agus gairmoiliúna rannpháirteacha céimeanna agus dioplómaí a dhámhachtain trí PENanna i gcomhréir le rialacha náisiúnta agus le nósanna imeachta creidiúnaithe. Le comhaontuithe comhpháirtíochta, comhaontuithe deontais agus meabhráin chomhoibrithe idir EIT agus PENanna foráil a dhéanamh maidir le céimeanna agus dioplóma EIT a thabhairt mar lipéad ar na céimeanna agus na dioplómaí sin chomh maith. Ina theannta sin, ba cheart do EIT cur chun cinn céimeanna agus dioplómaí atá faoi lipéad EIT a neartú chun an t-aitheantas atá orthu lasmuigh den Phobal EIT a mhéadú agus a n-úsáid a leathnú chuig cláir foghlama ar feadh an tsaoil, gairmoiliúint, scileanna, athoiliúint agus cláir uas-scilithe. Ba cheart go gcabhródh EIT, trína a chuid gníomhaíochtaí agus a chuid oibre, i gcomhréir le Treoir 2005/36/CE ó Pharlaimint na hEorpa agus ón gComhairle (9), le soghluaisteacht a chur chun cinn do mhic léinn, do thaighdeoirí agus do bhaill foirne agus deiseanna a sholáthar d’fhoghlaim ar feadh an tsaoil, do mheantóireacht agus do chóitseáil.

(20)

Ba cheart foráil iomchuí a dhéanamh chun dliteanas, oscailteacht agus trédhearcacht EIT a áirithiú. Ba cheart rialacha iomchuí lena rialaítear rialachas agus feidhmiú EIT a leagan síos i Reachtanna EIT.

(21)

Ba cheart go mbeadh pearsantacht dhlítheanach ag EIT agus, chun a huathrialaitheacht fheidhmiúil agus a neamhspleáchas ar údaráis náisiúnta agus ar bhrúnna seachtracha a áirithiú, ba cheart go riarfadh sí a buiséad féin, ar cheart go mbeadh ranníocaíocht ón Aontas mar chuid dá hioncam.

(22)

Táthar ag dréim leis go ndéanfaidh na hearnálacha tionscail, airgeadais agus seirbhíse ranníocaíocht shuntasach le buiséad PENanna. Ba cheart go mbeadh sé d’aidhm ag PENanna, go háirithe, sciar na ranníocaíochtaí ó fhoinsí príobháideacha agus ó ioncam a ghintear óna gcuid gníomhaíochtaí a uasmhéadú agus inbhuanaitheacht airgeadais a shaothrú agus a bhaint amach, ar a dhéanaí sula rachaidh an 15 bliana de thacaíocht airgeadais EIT in éag. Ba cheart go bhfógródh PENanna agus a n-eagraíochtaí comhpháirtíochta go bhfuiltear ag tabhairt faoina ngníomhaíochtaí i gcomhthéacs EIT agus go bhfaighidís ranníocaíocht airgeadais ó bhuiséad ginearálta an Aontais. Ina theannta sin, ba cheart trédhearcacht an chistithe a mhéadú trí fhaisnéis atá ar fáil go poiblí a chur ar fáil maidir leis na tionscadail a ndéantar cistiú orthu agus maidir le leithdháileadh an chistithe.

(23)

Ba cheart go mbeadh feidhm ag nós imeachta buiséid an Aontais maidir le ranníocaíocht airgeadais ón Aontas is inmhuirir i leith bhuiséad ginearálta an Aontais. Ba cheart go ndéanfadh an Chúirt Iniúchóirí iniúchadh ar na cuntais i gcomhréir leis an Rialachán Airgeadais.

(24)

Ba cheart do EIT a dícheall a dhéanamh chun aistriú rianúil idir tréimhsí CAI a éascú, go háirithe le haghaidh gníomhaíochtaí leanúnacha.

(25)

Ba cheart go n-áireofaí in ioncam EIT an ranníocaíocht ón Aontas a sholáthraítear ón ranníocaíocht airgeadais ón gclár Fís Eorpach. Ba cheart go bhféadfaí ranníocaíochtaí ó fhoinsí eile príobháideacha agus poiblí a áireamh san ioncam sin.

(26)

Is comhlacht é EIT arna bhunú ag an Aontas de réir bhrí Airteagal 70 den Rialachán Airgeadais agus ba cheart dó a rialacha airgeadais a ghlacadh dá réir. Ba cheart, dá bharr sin, go mbeadh feidhm maidir le EIT ag Rialachán Tarmligthe (AE) 2019/715 ón gCoimisiún (10).

(27)

Ba cheart do EIT tuarascáil chomhdhlúite bhliantúil ar ghníomhaíochtaí a ghlacadh, ina dtabharfaí tuairisc ar na gníomhaíochtaí a rinneadh agus ar thorthaí na n-oibríochtaí sa bhliain féilire roimhe sin. Ba cheart do EIT freisin doiciméad clársceidealaithe aonair a ghlacadh, bunaithe ar COSN, i gcomhréir lena rialacha airgeadais, ar doiciméad é ina dtabharfadh tuairisc ar an tionscnamh atá beartaithe aici i dtéarmaí clársceidealú bliantúil agus ilbhliantúil agus a chuirfeadh ar chumas EIT freagairt d’athruithe inmheánacha agus seachtracha i réimsí an taighde, na sochaí, na teicneolaíochta, an ardoideachais, na nuálaíochta agus i réimsí ábhartha eile. Ba cheart an doiciméad clársceidealaithe aonair sin a tharchur chuig Parlaimint na hEorpa agus chuig an gComhairle mar eolas dóibh.

(28)

Ó cruthaíodh í, tá EIT ag baint tairbhe as saineolas a foirne. Mar gheall ar an gcreat dlíthiúil is infheidhme faoi Rialachán (CE) Uimh. 294/2008, áfach, tá roinnt de na conarthaí foirne sin imithe in éag gan an deis a bheith ann iad a athnuachan. Chun cás den sórt sin a sheachaint amach anseo, agus i bhfianaise a thábhachtaí atá saineolas an duine chun go mbeadh rath ar ghníomhaíochtaí EIT, is chun leasa EIT gach iarracht a dhéanamh, laistigh den chreat dlíthiúil is infheidhme, foireann cháilithe a mhealladh agus a choinneáil.

(29)

Is iomchuí go dtionscnóidh an Coimisiún meastóireachtaí neamhspleácha seachtracha ar oibriú EIT, lena n-áirítear na gníomhaíochtaí arna mbainistiú trí PENanna, go háirithe d’fhonn COSN a ullmhú. Leis na meastóireachtaí sin, ba cheart scrúdú a dhéanamh ar an gcaoi ina gcomhlíonann EIT a misean agus a cuspóirí agus ba cheart gníomhaíochtaí uile EIT agus PENanna a chumhdach leo. Ba cheart measúnú a dhéanamh leo ar bhreisluach Aontais EIT, ar an tionchar ar fud an Aontais agus ar thionchar ghníomhaíochtaí na Scéime Nuálaíochta Réigiúnaí (RIS), ar oscailteacht, éifeachtacht, éifeachtúlacht, gníomhaíochtaí for-rochtana, cumarsáid, infheictheacht, scaipeadh torthaí, ábharthacht na ngníomhaíochtaí a shaothraítear agus ar cibé an bhfuil siad comhsheasmhach agus comhlántacht le beartais ábhartha an Aontais agus le beartas náisiúnta ábhartha, lena n-áirítear aon sineirgí le codanna eile den chlár Fís Eorpach. Ba cheart go mbainfí leas as na meastóireachtaí sin sna meastóireachtaí a dhéanann an Coimisiún faoin gclár Fís Eorpach i gcomhréir le Rialachán (AE) 2021/695.

(30)

Ba cheart go ndéanfadh EIT a dícheall an téarmaíocht a bhaineann le struchtúr gach PEN a chuíchóiriú, agus é mar chuspóir aici inaitheantacht EIT a shimpliú agus a fheabhsú tuilleadh.

(31)

Chun rannchuidiú le dul i ngleic le héagothromaíochtaí sa nuálaíocht san Eoraip, ba cheart do EIT, go háirithe trí RIS, mar a leagtar amach tuilleadh in COSN, tacú le hacmhainneacht nuálaíochta tíortha agus réigiún, ba cheart go mbeadh sé d’aidhm aici éiceachórais nuálaíochta a neartú chun dul i ngleic le dúshláin dhomhanda agus ba cheart di eagraíochtaí comhpháirtíochta nua a chomhtháthú in PENanna.

(32)

Ba cheart do PENanna, ag gníomhú dóibh mar éascaitheoir nuálaíochta, tosaíochtaí straitéise speisialtóireachta cliste na mBallstát a bhreithniú agus a n-acmhainneacht nuálaíochta a fheabhsú trí acmhainneachtaí agus láidreachtaí réigiúnacha, deiseanna, laigí, mar aon le gníomhaithe áitiúla agus a ngníomhaíochtaí agus a margaí, a léiriú go hiomlán.

(33)

Tá sé buntábhachtach sineirgí láidre a chur chun cinn idir EIT agus CNE. Ba cheart go spreagfadh PENanna cruthú gnólachtaí nuálacha i ndlúthshineirge le EIT, agus dúbláil á seachaint ag an am céanna, agus ba cheart tairbhithe EIT a bheith in ann iarratas a dhéanamh ar ionstraimí CNE ag iarraidh tacaíocht sa bhreis ar na seirbhísí a sholáthraíonn PENanna. Go háirithe, gnólachtaí nuathionscanta a bhfuil acmhainneacht fáis ard acu agus a fhaigheann tacaíocht ó PENanna, ba cheart rochtain atá simplithe, agus, dá bharr sin, níos tapa, a bheith acu ar ghníomhaíochtaí CNE i gcomhréir le forálacha ábhartha Rialachán (AE) 2021/695 chun cuidiú leo uas-scálú go tapa, agus ba cheart do thairbhithe CNE tairbhe a bhaint as scéimeanna tacaíochta a chuireann EIT ar fáil. Chun smaointeoireacht neamhchomhtháite a sheachaint agus sineirgí agus comhoibriú a chur chun cinn, ba cheart do EIT agus CNE malartuithe cómhalartacha agus córasacha faisnéise a bheartú. Ba cheart an Bord Rialaithe a bheith in ann cuireadh a thabhairt do chomhaltaí Bhord CNE freastal ar a chruinnithe mar bhreathnóirí i gcás inarb ábhartha.

(34)

Chun leanúnachas ghníomhaíochtaí EIT agus PENanna a áirithiú i gcomhréir le forálacha ábhartha Rialachán (AE) 2021/695, ba cheart an Rialachán seo a theacht i bhfeidhm mar ábhar práinne agus ba cheart feidhm a bheith ag forálacha áirithe de, le héifeacht chúlghabhálach, ón 1 Eanáir 2021.

(35)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach agus, de bharr fairsinge agus trasnáisiúntachta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta, mar a leagtar amach san Airteagal sin é, ní théann an Rialachán seo thar a bhfuil riachtanach chun na cuspóirí sin a ghnóthú,

(1)

ciallaíonn “nuálaíocht” an próiseas, lena n-áirítear torthaí an phróisis sin, trína bhfreagraíonn smaointe nua do riachtanais nó d’éileamh ón tsochaí, ón ngeilleagar, nó ón gcomhshaol agus trína ngintear táirgí nua, próisis nua, seirbhísí nua, nó samhlacha nua gnó, eagraíochta agus sóisialta a thugtar isteach go rathúil i margadh atá ann cheana nó atá ábalta margaí nua a chruthú agus a thugann luach don tsochaí;

(2)

ciallaíonn “Pobal Eolais agus Nuálaíochta” nó “PEN” Comhpháirtíocht Eorpach Institiúidithe ar mhórscála, amhail dá dtagraítear i Rialachán (AE) 2021/695, d’institiúidí ardoideachais, d’eagraíochtaí taighde, de chuideachtaí agus de gheallsealbhóirí eile sa phróiseas nuálaíochta i bhfoirm gréasán straitéiseach, gan beann ar an bhfoirm dhlíthiúil bheacht atá aici, bunaithe ar phleanáil nuálaíochta chomhpháirteach sa mheántéarma agus san fhadtéarma chun dúshláin EIT a chomhlíonadh agus chun rannhcuidiú le baint amach na gcuspóirí arna mbunú faoi Rialachán (AE) 2021/695;

(3)

ciallaíonn “ionad comhlonnaithe” mol fisiciúil, a bunaíodh ar bhealach oscailte agus trédhearcach, lena ndéantar naisc idir gníomhaithe thriantán an eolais agus comhar gníomhach eatarthu a chur chun cinn agus a ghníomhaíonn mar chroílár do mhalartú eolais agus trína bhfuil comhpháirtithe PENanna in ann rochtain a fháil ar shaoráidí agus ar an saineolas is gá chun a gcuspóirí coiteanna a shaothrú;

(4)

ciallaíonn “mol RIS” mol fisiciúil, atá bunaithe ag PEN agus é mar chuid dá struchtúr, i mBallstát nó i dtír chomhlachaithe ar a bhfuil RIS spriocdhírithe atá ag fónamh mar chroílár do ghníomhaíochtaí PEN agus do shlógadh agus rannpháirtíocht gníomhaithe áitiúla thriantán an eolais i ngníomhaíochtaí PEN;

(5)

ciallaíonn “eagraíocht chomhpháirtíochta” eintiteas dlítheanach ar comhalta de PEN é, agus féadfar a áireamh léi, go háirithe, institiúidí ardoideachais, soláthraithe gairmoideachais agus gairmoiliúna, eagraíochtaí taighde, institúidí poiblí, cuideachtaí poiblí nó príobháideacha, institiúidí airgeadais, údaráis réigiúnacha agus údaráis áitiúla, fondúireachtaí agus eagraíochtaí seachbhrabúsacha;

(6)

ciallaíonn “eagraíocht taighde” eintiteas dlítheanach poiblí nó príobháideach a bhfuil cúram an taighde nó na forbartha teicniúla ar cheann dá phríomhchuspóirí;

(7)

ciallaíonn “institiúid ardoideachais” ollscoil nó aon chineál institiúide ardoideachais a chuireann céimeanna agus dioplómaí ar fáil go háirithe ar leibhéal máistreachta nó dochtúireachta, i gcomhréir leis an reachtaíocht náisiúnta nó leis an gcleachtas náisiúnta, gan beann ar an ainmníocht atá aici sa chomhthéacs náisiúnta;

(8)

ciallaíonn “Comhphobal EIT” EIT agus comhphobal gníomhach na ndaoine aonair agus na n-eintiteas dlítheanach uile a bhain nó a bhaineann sochar as tacaíocht EIT nó ranníocaíocht airgeadais EIT;

(9)

ciallaíonn “Clár Oibre Straitéiseach um Nuálaíocht” nó “COSN” gníomh ina leagtar amach réimsí tosaíochta agus straitéis EIT i leith tionscnaimh a dtabharfar fúthu amach anseo, acmhainneacht EIT chun an breisluach nuálaíochta is fearr a ghiniúint, cuspóirí EIT, príomhghníomhaíochtaí EIT, modh oibríochta EIT, na torthaí a bhfuil EIT ag dréim leo agus tionchar EIT, chomh maith le meastachán ar na hacmhainní a bhfuil gá leo do thréimhse Fís Eorpach agus CAI;

(10)

ciallaíonn “Scéim Nuálaíochta Réigiúnach” nó “RIS” scéim lena gcothaítear comhtháthú thriantáin an eolais agus acmhainneacht nuálaíochta tíortha (agus réigiún sna tíortha sin) atá aicmithe mar nuálaithe “measartha” nó “meánacha” sa Scórchlár Eorpach Nuálaíochta amhail dá dtagraítear in COSN agus acmhainneacht nuálaíochta na réigiún is forimeallaí de réir bhrí Airteagal 349 den Chonradh ar Fheidhmiú an Aontais Eorpaigh (CFAE), go háirithe trí chomhpháirtithe nua a mhealladh agus a chomhtháthú isteach in PENanna agus trí éagothromaíochtaí réigiúnacha a réiteach, agus, ar an gcaoi sin, an deighilt nuálaíochta a mhaolú;

(11)

ciallaíonn “fóram na ngeallsealbhóirí” ardán atá oscailte d’ionadaithe institiúidí an Aontais, údarás náisiúnta, réigiúnach agus áitiúil, do leasa eagraithe agus d’eintitis aonair ó earnáil an ghnó, ón ardoideachas, ó thaighde, ó chomhlachais, ón tsochaí shibhialta agus ó chnuas-eagraíochtaí, mar aon le páirtithe leasmhara eile ar fud thriantán an eolais;

(12)

ciallaíonn “plean gnó PEN” doiciméad atá i gceangal leis an gcomhaontú deontais lena gcumhdaítear tréimhse suas le 3 bliana, ina dtugtar tuairisc ar chuspóirí PEN, an bealach a bhfuil siad le baint amach, na torthaí a bhfuiltear ag dréim leo, na gníomhaíochtaí breisluacha PEN atá beartaithe agus na riachtanais agus na hacmhainní airgeadais gaolmhara, lena n-áirítear na gníomhaíochtaí arb é is aidhm dóibh inbhuanaitheacht airgeadais a bhaint amach agus oscailteacht PEN a mhéadú do chomhpháirtithe nua ar fud an Aontais;

(13)

ciallaíonn “gníomhaíochtaí breisluacha PEN” gníomhaíochtaí arna ndéanamh ag eagraíochtaí comhpháirtíochta PEN i gcomhréir le plean gnó PEN, lena gcuirtear le comhtháthú thriantán eolais an ardoideachais, an taighde agus na nuálaíochta, lena n-áirítear gníomhaíochtaí bunaithe, riaracháin agus comhordaithe PENanna, agus lena gcuirtear le cuspóirí foriomlána EIT;

(14)

ciallaíonn “gníomhaíochtaí tras-PEN” gníomhaíochtaí arb é is aidhm dóibh comhar agus sineirgí idir PENanna a fheabhsú, cur chuige níos idirdhisciplíní a chothú agus mais chriticiúil a chruthú i measc PENanna chun dul i ngleic le topaicí leasa choitinn;

(15)

ciallaíonn “meabhrán comhair” comhaontú idir EIT agus PEN, arb é is aidhm dó PEN a choimeád ina bhall gníomhach de Chomhphobal EIT tar éis dhul in éag an chomhaontaithe comhpháirtíochta, agus lena n-áirítear na coinníollacha maidir le rochtain ar ghlaonna iomaíocha EIT le haghaidh roinnt gníomhaíochtaí sonracha agus gníomhaíochtaí trasnáisiúnta a bhfuil breisluach mór don Aontas ag baint leo;

(16)

ciallaíonn “inbhuanaitheacht airgeadais” acmhainneacht PEN a ghníomhaíochtaí triantáin eolais a mhaoiniú go neamhspleách ar ranníocaíochtaí ó EIT.

(a)

sainaithneoidh sí, i gcomhréir le COSN, a príomhthosaíochtaí agus a príomhghníomhaíochtaí, i gcomhréir le COSN, agus cuirfidh sí chun feidhme iad i gcomhréir leis na forálacha is infheidhme de Rialachán (AE) 2021/695;

(b)

áiritheoidh sí oscailteacht agus músclóidh sí feasacht i measc eagraíochtaí comhpháirtíochta ionchasacha nua agus déanfaidh sí rannpháirtíocht na n-eagraíochtaí sin ina gníomhaíochtaí, go háirithe FBManna agus ionaid barr feabhais atá ag teacht chun cinn, a spreagadh ar fud an Aontais, lena n-áirítear trí SNR, trí thógáil ar ghréasáin faisnéise agus struchtúir atá ann cheana;

(c)

roghnóidh agus ainmneoidh sí PENanna i gcomhréir le hAirteagal 9 agus leagfaidh sí amach cearta agus oibleagáidí PENanna trí bhíthin comhaontuithe comhpháirtíochta agus comhaontuithe deontais, déanfaidh sí faireachán ar PENanna agus cuirfidh sí tacaíocht agus treoir straitéiseach iomchuí ar fáil dóibh trí bhearta rialaithe cáilíochta iomchuí, trí fhaireachán leanúnach agus trí mheastóireacht sheachtrach thréimhsiúil a dhéanamh ar a gcuid gníomhaíochtaí i gcomhréir le hAirteagal 11, agus déanfaidh sí bearta ceartaitheacha i gcás inarb iomchuí;

(d)

stiúróidh sí cur chun feidhme RIS, lena n-áirítear trí mhoil RIS a bheith á gcur chun feidhme ag PENanna;

(e)

áiritheoidh sí go ndéanfar leibhéal iomchuí comhordaithe agus éascóidh sí cumarsáid agus comhar téamach idir PENanna agus seolfaidh sí glaonna ar ghníomhaíochtaí tras-PEN agus ar sheirbhísí comhroinnte;

(f)

áiritheoidh sí go ndéanfaidh PENanna céimeanna agus dioplómaí atá faoi lipéad EIT a chur chun feidhme go forleathan, déanfaidh sí a gcur chun cinn a neartú lasmuigh de Chomhphobal EIT agus déanfaidh sí iad a leathnú chuig cláir foghlama ar feadh an tsaoil;

(g)

déanfaidh sí scaipeadh dea-chleachtas a chur chun cinn le haghaidh triantán an eolais a chomhtháthú, lena n-áirítear i measc PENanna agus ar fud an Aontais, inter alia trí RIS, chun comhchultúr aistrithe nuálaíochta agus eolais a fhorbairt, agus chun oscailteacht PENanna do chomhaltaí nua a spreagadh trí ghníomhaíochtaí for-rochtana;

(h)

déanfaidh sí scaipeadh, cumarsáid agus saothrú forleathan na dtorthaí agus na ndeiseanna a eascraíonn as Comhphobal EIT a chur chun cinn chun feasacht, infheictheacht agus eolas ar EIT a mhéadú ar fud an Aontais, chomh maith le rannpháirtíocht i ngníomhaíochtaí Chomhphobail EIT a spreagadh;

(i)

tacóidh sí le PENanna, agus straitéis éifeachtach i leith inbhuanaitheacht airgeadais á forbairt, chun cistí a shlógadh ó fhoinsí poiblí agus príobháideacha eile;

(j)

cothóidh sí barr feabhais san ardoideachas, sa taighde agus sa nuálaíocht, go háirithe trí PENanna a chur chun cinn mar chomhpháirtithe nuálaíochta den scoth;

(k)

déanfaidh sí cineálacha cur chuige ildisciplíneacha maidir le nuálaíocht a chur chun cinn, ar fud na n-earnálacha uile, eadhon trí réitigh theicneolaíocha, shóisialta agus neamhtheicneolaíocha, inbhuanaitheacht agus neodracht aeráide trí dhearadh, trí chineálacha cur chuige eagraíochta, trí dhíriú ar fhiontraíocht agus trí shamhlacha nua gnó;

(l)

déanfaidh sé sineirgí agus comhlántachtaí a áirithiú idir gníomhaíochtaí EIT agus cláir eile de chuid an Aontais, i gcás inarb iomchuí, i gcomhréir le Rialachán (AE) 2021/695;

(m)

déanfaidh sí an plé agus an malartú agus scaipeadh saineolais agus feasa gnó a chothú idir PENanna maidir le samhlacha nuálacha maoine intleachtúla, agus é mar aidhm aici aistriú agus scaipeadh eolais a chur chun cinn, laistigh de chomhthéacs PENanna agus ar bhonn níos forleithne ar fud an Aontais;

(n)

déanfaidh sí an tacaíocht is gá a chur ar fáil agus cothóidh sí sineirgí le PENanna chun réitigh nuálacha a fhorbairt;

(o)

eagróidh sí cruinnithe rialta, gach 2 bhliain ar a laghad, d’fhóram na ngeallsealbhóirí chun gníomhaíochtaí EIT, a taithí, a dea-chleachtais agus a rannchuidiú le beartais agus cuspóirí an Aontais i leith nuálaíochta, taighde agus oideachais, chomh maith le beartais agus cuspóirí eile de chuid an Aontais nuair is ábhartha, a chomhroinnt agus a phlé, agus chun a cheadú do gheallsealbhóirí a ndearcthaí a chur in iúl;

(p)

eagróidh sí cruinnithe de Ghrúpa Ionadaithe na mBallstát, dhá uair sa bhliain ar a laghad, neamhspleách ar chruinnithe d’fhóram na ngeallsealbhóirí;

(q)

éascóidh sí bunú saoráidí seirbhísí comhroinnte de chuid Chomhphobail EIT;

(r)

spreagfaidh sí, le himeacht ama, líonrú mhoil agus ionaid chomhlonnaithe RIS sna Ballstáit chun a gcomhar laistigh de Chomhphobal EIT agus leis na héiceachórais nuálaíochta áitiúla a éascú;

(s)

déanfaidh sí faireachán ar chur chun feidhme na ngníomhaíochtaí tacaíochta a bheidh le déanamh ag PENanna ar mhaithe le hacmhainneacht fiontraíochta agus nuálaíochta a gcuid balleagraíochtaí a fhorbairt, go háirithe institiúidí ardoideachais, soláthraithe gairmoideachais agus gairmoiliúna, FBManna agus gnólachtaí nuathionscanta agus ar mhaithe lena gcomhtháthú in éiceachórais nuálaíochta, ar fud an Aontais agus i gcomhréir le cur chuige thriantán an eolais;

(t)

déanfaidh sí, i gcomhar leis an gCoimisiún agus tar éis dul i gcomhairle le PENanna, tionscnamh píolótach a dhearadh, a sheoladh agus a chomhordú lena dtacófar le hacmhainneachtaí nuálaíochta agus fiontraíochta institiúidí ardoideachais agus lena gcomhtháthú in éiceachórais nuálaíochta (an tionscnamh piolótach ordoideachais), atá le cur chun feidhme ag PENanna.

(a)

is in Airteagal 9(3) agus (4) den Rialachán seo a leagtar amach na híoschoinníollacha chun PEN a bhunú;

(b)

féadfaidh feidhm a bheith ag rialacha sonracha i dtaca le húinéireacht, cearta rochtana, saothrú agus scaipeadh maidir le gníomhaíochtaí breisluacha PEN, i gcás inarb iomchuí.