(1)

Le Rialachán Cur Chun Feidhme (AE) 2017/1529 ón gCoimisiún (2) formheasadh an tsubstaint ghníomhach clóiríd sóidiam mar shubstaint bhunúsach agus áiríodh í i gCuid C den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3). Bhunaigh an Coimisiún a chinneadh féin ar Thuarascáil Theicniúil a sholáthair an tÚdarás Eorpach um Shábháilteacht Bia (“an tÚdarás”) agus ar Thuarascáil Athbhreithnithe (4)ar chuir an Coimisiún ar bun.

(2)

Maidir le formheas na substainte bunúsaí clóiríd sóidiam, mar a leagtar amach i gCuid C den Iarscríbhinn a ghabhann le Rialachán Cur Chun Feidhme (AE) Uimh. 540/2011, cuireadh srian leis ionas nárbh fhéidir í a úsáid ach mar fhungaicíd agus feithidicíd.

(3)

I mí na Samhna 2017, agus ina dhiaidh sin nuair a tugadh cothrom le dáta é i mí Lúnasa 2018 agus i mí Iúil 2020, chuir an eagraíocht Collectif Anti-baccharis iarratas faoi bhráid an Choimisiúin i gcomhréir le hAirteagal 23(3) de Rialachán (CE) Uimh. 1107/2009 inar iarradh go ndéanfaí úsáid clóiríde sóidiam mar luibhicíd a leathnú.

(4)

D’iarr an Coimisiún ar an Údarás Eorpach um Shábháilteacht Bia (“an tÚdarás”) cúnamh eolaíoch a chur ar fáil dó. Ba é toradh an chomhairliúcháin sin, i bhfianaise chineál na substainte agus mhéid na hiarrata, nár ghá don Údarás measúnú eolaíoch nua a dhéanamh. D’ullmhaigh an Coimisiún tuarascáil athbhreithnithe nuashonraithe, lenar cuireadh san áireamh an tuarascáil theicniúil ón Údarás a bhí ann roimhe sin (5) agus an fhaisnéis a chuir an t-iarratasóir ar fáil.

(5)

Chuir an Coimisiún an tuarascáil athbhreithnithe nuashonraithe agus an dréacht-Rialachán faoi bhráid an Bhuanchoiste um Plandaí, Ainmhithe, Bia agus Beatha an 25 Eanáir 2021.

(6)

Tugadh deis don iarratasóir barúlacha a chur isteach maidir leis an tuarascáil athbhreithnithe nuashonraithe.

(7)

Dealraíonn sé go bhféadfaí a bheith ag súil leis go gcomhlíonfaidh clóiríd sóidiam na ceanglais a leagtar síos in Airteagal 23 de Rialachán (CE) Uimh. 1107/2009 maidir lena húsáid mar luibhicíd mar a shonraítear sa tuarascáil athbhreithnithe nuashonraithe. Dá bhrí sin, ba cheart úsáid clóiríde sóidiam mar luibhicíd a cheadú. Thairis sin, ós rud é go bhfuil úsáid nua de chlóiríd sóidiam á ceadú, agus go bhfuil sé inghlactha leanúint de chead a thabhairt d'úsáidí a d’fhéadfaí a bhaint as clóiríd sóidiam dá dtagraítear sa tuarascáil athbhreithnithe nuashonraithe maidir le clóiríd sóidiam, is iomchuí an srian atá ann faoi láthair gan an tsubstaint a úsáid ach mar fhuingicíd agus feithidicíd a tharraingt siar.

(8)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá, mar sin féin, coinníollacha áirithe maidir le húsáid na substainte gníomhaí a choinneáil ar bun.

(9)

Dá bhrí sin, ba cheart Rialacháin Cur Chun Feidhme (AE) 2017/1529 agus (AE) Uimh. 540/2011 a leasú dá réir.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,