(1)

Le Rialachán Tarmligthe (AE) Uimh. 1062/2014 (2) ón gCoimisiún, leagtar síos liosta de shubstaintí gníomhacha atá ann cheana a bhfuil meastóireacht le déanamh orthu maidir lena bhformheas féideartha i dtaca lena n-úsáid i dtáirgí bithicídeacha. Áirítear cairbeandaisim ar an liosta sin.

(2)

Rinneadh meastóireacht ar chairbeandaisim lena húsáid i dtáirgí bithicídeacha de chineál táirge 7, i leasaithigh sceo, agus i leasaithigh shaoirseachta de chineál táirge 10, mar a thuairiscítear in Iarscríbhinn V a ghabhann le Treoir 98/8/CE ó Pharlaimint na hEorpa agus ón gComhairle (3), a chomhfhreagraíonn do chineálacha táirgí 7 agus 10 faoi seach mar a thuairiscítear in Iarscríbhinn V a ghabhann le Rialachán (AE) Uimh. 528/2012.

(3)

Chuir údarás inniúil meastóireachta na Gearmáine na tuarascálacha measúnaithe, mar aon lena chonclúidí, faoi bhráid an Choimisiúin an 2 Lúnasa 2013.

(4)

I gcomhréir le hAirteagal 7(2) de Rialachán Tarmligthe (AE) Uimh. 1062/2014, ghlac an Coiste um Tháirgí Bithicídeacha tuairimí na Gníomhaireachta Eorpaí Ceimiceán (4) (an ‘Ghníomhaireacht’) an 10 Nollaig 2019, ag féachaint do chonclúidí an údaráis inniúil meastóireachta.

(5)

Is féidir a dhíorthú ó Airteagal 90(2) de Rialachán (AE) Uimh. 528/2012 gur cheart meastóireacht a dhéanamh ar shubstaintí a bhfuil meastóireacht na mBallstát curtha i gcrích ina leith faoin 1 Meán Fómhair 2013 i gcomhréir le forálacha Threoir 98/8/CE.

(6)

De réir thuairimí na Gníomhaireachta, d’fhéadfaí coinne a bheith leis go ndéanfaidh táirgí bithicídeacha de chineálacha táirgí 7 agus 10, ina bhfuil cairbeandaisim, ceanglais Airteagal 5 de Threoir 98/8/CE a shásamh, ar choinníoll go gcomhlíonfar sonraíochtaí agus coinníollacha áirithe maidir lena n-úsáid.

(7)

Is iomchuí, dá bhrí sin, cairbeandaisim a fhormheas lena húsáid i dtáirgí bithicídeacha de chineálacha táirge 7 agus 10, faoi réir sonraíochtaí agus coinníollacha áirithe.

(8)

Baintear de thátal as tuairimí na Gníomhaireachta go gcomhlíonann cairbeandaisim na critéir le haghaidh aicmiú mar chatagóir shó-ghineach 1B agus mar thocsain atáirgthe de chatagóir 1B i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (5).

(9)

Ós rud é gur cheart cairbeandaisim a fhormheas faoi théarmaí Threoir 98/8/CE, agus na hairíonna sin á gcur san áireamh, ba cheart tréimhse an fhormheasa a bheith i bhfad níos giorra ná 10 mbliana i gcomhréir leis an gcleachtas is déanaí arna bhunú faoin Treoir sin. Ina theannta sin, ba cheart trí bliana a bheith i dtréimhse an fhormheasa ós rud é gur tugadh, i leith cairbeandaisim, an idirthréimhse dá bhforáiltear in Airteagal 89 de Rialachán (AE) Uimh. 528/2012 ón 14 Bealtaine 2000 agus go bhfuil sí faoi athbhreithniú piaraí ón 2 Lúnasa 2013 i leith, agus d’fhonn scrúdú a dhéanamh ar leibhéal an Aontais, a luaithe is féidir, i gcomhthéacs athnuachan fhéideartha an fhormheasa, an féidir coinníollacha Airteagal 5(2) de Rialachán (AE) Uimh. 528/2012 a chomhlíonadh i gcás cairbeandaisime.

(10)

Thairis sin, de bhun phointe 10 d’Iarscríbhinn VI a ghabhann le Rialachán (AE) Uimh. 528/2012, ba cheart d’údaráis inniúla na mBallstát meastóireacht a dhéanamh i dtaobh an féidir coinníollacha Airteagal 5(2) den Rialachán sin a chomhlíonadh ina gcríocha chun cinneadh a dhéanamh an féidir táirge bithicídeach ina bhfuil cairbeandaisim a údarú.

(11)

Baintear de thátal as tuairimí na Gníomhaireachta freisin go gcomhlíonann cairbeandaisim na critéir maidir le bheith ina shubstaint mharthanach thocsaineach i gcomhréir le hIarscríbhinn XIII a ghabhann le Rialachán (CE) Uimh. 1907/2006 ó Pharlaimint na hEorpa agus ón gComhairle (6).

(12)

Chun críocha Airteagal 23 de Rialachán (AE) Uimh. 528/2012, comhlíonann cairbeandaisim an coinníoll a leagtar síos i bpointí (a) agus (d) d’Airteagal 10(1) den Rialachán sin agus ba cheart, dá bhrí sin, í a mheas mar shubstaint atá le hionadú. Ba cheart d’údaráis inniúla na mBallstát measúnú comparáideach a dhéanamh mar chuid den mheastóireacht ar iarratas ar údarú nó ar athnuachan ar údarú do tháirge bithicídeach ina bhfuil cairbeandaisim.

(13)

Baintear de thátal as tuairimí na Gníomhaireachta freisin go bhfuil rioscaí do-ghlactha maidir le huisce dromchla agus dríodar le linn a saolré seirbhíse ann de thoradh péinteanna agus plástair a chóireáiltear le cairbeandaisim nó a bhfuil cairbeandaisim iontu a úsáid lasmuigh. Ní fhéadfaí aon bheart leordhóthanach maolaithe riosca a shainaithint chun scaoileadh cairbeandaisime i séaraigh, le linn saolré earraí cóireáilte den sórt sin nuair a úsáidtear amuigh faoin aer iad, a sheachaint. Dá bhrí sin, i dteannta na moltaí i dtuairimí na Gníomhaireachta, measann an Coimisiún gurb iomchuí an cinneadh é nár cheart táirgí bithicídeacha ina bhfuil cairbeandaisim a údarú lena n-úsáid i bpéinteanna agus i bplástair a bheartaítear a úsáid lasmuigh. Thairis sin, níor cheart cead a thabhairt péinteanna ná plástair a chóireáiltear le cairbeandaisim nó a bhfuil cairbeandaisim iontu a chur ar an margadh lena n-úsáid lasmuigh. Ar deireadh, péinteanna agus plástair a chóireáiltear le cairbeandaisim nó a bhfuil cairbeandaisim iontu, ba cheart iad a lipéadú lena léiriú nach bhfuil siad le húsáid lasmuigh.

(14)

Ós rud é, mar atá tugtha i gcrích ag an nGníomhaireacht, go gcomhlíonann cairbeandaisim na critéir le haghaidh aicmiú mar chatagóir shó-ghineach 1B, mar thocsain atáirgthe de chatagóir 1B, agus mar íogróir craicinn de chatagóir 1 i gcomhréir le hIarscríbhinn I a ghabhann le Rialachán (CE) Uimh. 1272/2008, ba cheart earraí cóireáilte a chóireáiltear le cairbeandaisim nó a bhfuil cairbeandaisim iontu a lipéadú go hiomchuí nuair a chuirtear ar an margadh iad.

(15)

Ní dhéanann an Rialachán seo difear do chur i bhfeidhm dhlí an Aontais i réimse na sláinte agus na sábháilteachta ag an obair, go háirithe Treoir 89/391/CEE (7) agus Treoir 98/24/CE (8) ón gComhairle, agus Treoir 2004/37/CE ó Pharlaimint na hEorpa agus ón gComhairle (9).

(16)

Ba cheart tréimhse réasúnta a bheith ann sula bhformheasfar substaint ghníomhach ionas go mbeidh páirtithe leasmhara in ann na bearta ullmhúcháin is gá a dhéanamh chun na ceanglais nua a chomhlíonadh.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Tháirgí Bithicídeacha,