(1)

Tá paindéim COVID-19 ag déanamh difear ollmhór do dhaoine, do chuideachtaí, do chórais cúraim sláinte agus do gheilleagair na mBallstát. Ina theachtaireacht an 27 Bealtaine 2020 dar teideal ‘Europe’s moment: Repair and Prepare for the Next Generation’ [Deis na hEorpa: Deisiú agus Ullmhú don Chéad Ghlúin Eile], chuir an Coimisiún i bhfáth go leanfaidh leachtacht agus rochtain ar mhaoiniú de bheith ina ndúshláin. Dá bhrí sin, tá sé ríthábhachtach tacaíocht a thabhairt don iarracht téarnaimh ón suaitheadh tromchúiseach eacnamaíoch arb í paindéim COVID-19 ba chúis léi trí leasuithe dírithe ar dhlí seirbhísí airgeadais reatha an Aontais a thabhairt isteach. Is pacáiste beart iad na leasuithe sin agus glactar leo faoin lipéad “Pacáiste Téarnaimh um Margaí Caipitil”.

(2)

Le Rialachán (AE) 2017/1129 ó Pharlaimint na hEorpa agus ón gComhairle (3), leagtar síos ceanglais maidir le dréachtú, údarú agus dáileadh an réamheolaire atá le foilsiú nuair a thairgtear urrúis don phobal nó nuair a ligtear isteach iad chun a dtrádála ar mhargadh rialáilte atá suite i mBallstát nó atá ag feidhmiú i mBallstát. Mar chuid den phacáiste beart chun cuidiú le heisitheoirí teacht aniar ón suaitheadh eacnamaíoch a eascraíonn as paindéim COVID-19, ní mór leasuithe spriocdhírithe a dhéanamh ar an réamheolaire. Leis na leasuithe sin, ba cheart é a bheith ar a gcumas d’eisitheoirí agus d’idirghabhálaithe airgeadais a gcostais a laghdú agus acmhainní a shaoradh le haghaidh na céime téarnaimh sa tréimhse díreach i ndiaidh phaindéim COVID-19. Ba cheart na leasuithe sin a bheith i gcomhréir le cuspóirí uileghabhálacha Rialachán (AE) 2017/1129 chun tiomsú airgid a chothú trí mhargaí caipitil, chun ardleibhéal cosanta do thomhaltóirí agus d’infheisteoirí a áirithiú, chun cóineasú maoirseachta a spreagadh ar fud na mBallstát agus feidhmiú cuí an mhargaidh inmheánaigh a áirithiú. Ba cheart, leis na leasuithe sin, lánaird a thabhairt go sonrach freisin ar a mhéid a rinne paindéim COVID-19 difear do staid reatha na n-eisitheoirí agus dá n-ionchais amach anseo.

(3)

De dheasca ghéarchéim COVID-19, tá cuideachtaí an Aontais, go háirithe fiontair bheaga agus mheánmhéide (FBManna) agus gnólachtaí nuathionscanta níos leochailí agus soghonta. I gcás inarb iomchuí chun foinsí cistiúcháin do chuideachtaí an Aontais a éascú agus a éagsúlú, le béim ar leith ar FBManna, lena n-áirítear gnólachtaí nuathionscanta agus cuideachtaí meánchaiplithe, is féidir le baint bacainní gan údar agus ualach riaracháin iomarcach cuidiú le cur chun cinn a gcumais rochtain a fháil ar mhargaí cothromais, de bhreis ar deiseanna infheistíochta níos éagsúla, níos fadtéarmaí agus níos iomaíche le haghaidh infheisteoirí miondíola agus móra a chur chun cinn. I ndáil leis sin, ba cheart go mbeadh sé mar aidhm ag an Rialachán seo freisin é a dhéanamh níos éasca d’infheisteoirí ionchasacha foghlaim faoi dheiseanna infheistíochta i gcuideachtaí, ós rud é go mbíonn deacracht ag infheisteoirí ionchasacha go minic meastóireacht a dhéanamh ar chuideachtaí nuathionscanta agus ar ghnólachtaí le taifead gnó beag, ar staid é as a n-eascraíonn níos lú folúntas nuálach, go háirithe le haghaidh daoine a chuireann gnólacht ar bun.

(4)

Bhí institiúidí creidmheasa gníomhach san iarracht chun tacú le cuideachtaí a raibh maoiniú ag teastáil uathu agus meastar go mbeidh siad ina gcolún bunúsach den téarnamh. Le Rialachán (AE) 2017/1129, beidh institiúidí creidmheasa i dteideal díolúine ón oibleagáid réamheolaire a fhoilsiú i gcás tairiscint nó ligean isteach chun a dtrádála ar mhargadh rialáilte ar urrúis áirithe neamhchothromais arna n-eisiúint go leanúnach nó arís is arís eile suas le méid comhiomlánaithe EUR 75 mhilliún thar thréimhse 12 mhí. Ba cheart an tairseach dhíolúine sin a mhéadú go ceann tréimhse theoranta ama chun tiomsú airgid a chothú le haghaidh institiúidí creidmheasa agus chun spás anála a thabhairt dóibh chun tacú lena gcliaint san fhíorgheilleagar. Ós rud é go bhfuil cur i bhfeidhm an bhirt sin teoranta do chéim an téarnaimh, níor cheart é a bheith ar fáil ach amháin ar feadh tréimhse theoranta ama, dar críoch an 31 Nollaig 2022.

(5)

Chun dul i ngleic go mear le tionchar eacnamaíoch tromchúiseach phaindéim COVID-19, tá sé tábhachtach bearta a thabhairt isteach chun infheistíochtaí san fhíorgheilleagar a éascú, go mbeifí in ann cuideachtaí san Aontas a athchaipitliú go tapa agus é a chur ar a gcumas d’eisitheoirí leas a bhaint as margaí poiblí go luath sa phróiseas téarnaimh. Chun na cuspóirí sin a bhaint amach, is iomchuí réamheolaire nua gearrfhoirme a chruthú ar a dtabharfar réamheolaire Téarnaimh AE, agus ag an am céanna aghaidh á tabhairt freisin ar na saincheisteanna eacnamaíocha agus airgeadais atá ardaithe go sonrach ag paindéim COVID-19, ar réamheolaire é atá éasca a tháirgeadh le haghaidh eisitheoirí, atá éasca a thuiscint le haghaidh infheisteoirí, go háirithe infheisteoirí miondíola, ar mian leo eisitheoirí a mhaoiniú, agus atá éasca a ghrinnscrúdú agus a údarú le haghaidh údaráis inniúla. Ba cheart breathnú ar an réamheolaire maidir le téarnamh AE go príomha mar éascaitheoir i leith athchaipitliú, agus go ndéanfadh na húdaráis inniúla faireachán cúramach air chun a áirithiú go gcomhlíonfar na ceanglais maidir le faisnéis d’infheisteoirí. Rud atá tábhachtach, níor cheart na leasuithe ar Rialachán (AE) 2017/1129 atá sa Rialachán seo a úsáid chun go ngabhfadh sé ionad an athbhreithnithe sceidealta, agus an leasaithe a d’fhéadfaí, a dhéanamh ar Rialachán (AE) 2017/1129, ar ghá measúnú tionchair iomlán a bheith ag gabháil leis. I ndáil leis sin, ní bheadh sé iomchuí gnéithe breise a chur leis na córais nochta nach gceanglaítear cheana féin faoin Rialachán sin ná faoi Rialachán Tarmligthe (AE) 2019/980 ón gCoimisiún (4), cé is moite d’fhaisnéis shonrach a bhaineann le tionchar phaindéim COVID-19. Níor cheart na gnéithe sin a thabhairt isteach ach amháin i gcás togra reachtach ón gCoimisiún ar bhonn a athbhreithnithe ar Rialachán (AE) 2017/1129, dá bhforáiltear in Airteagal 48 den Rialachán sin.

(6)

Tá sé tábhachtach faisnéis d’infheisteoirí miondíola agus doiciméid faisnéise bunriachtanaí a ailíniú ar fud táirgí agus dlíthe airgeadais éagsúla, agus rogha agus inchomparáideacht iomlán infheistíochta san Aontas a áirithiú. Ina theannta sin, ba cheart cosaint tomhaltóirí agus infheisteoirí miondíola a chur san áireamh san athbhreithniú atá beartaithe a dhéanamh ar Rialachán (AE) 2017/1129 chun doiciméid faisnéise chomhchuibhithe, shimplí agus shothuigthe a áirithiú do gach infheisteoir miondíola.

(7)

Tá faisnéis maidir le cúrsaí comhshaoil, sóisialta agus rialachais (ESG) ag cuideachtaí tar éis éirí níos ábhartha d’infheisteoirí chun tionchar inbhuanaitheachta a gcuid infheistíochtaí a thomhas agus chun breithnithe inbhuanaitheachta a chomhtháthú ina bpróisis chinnteoireachta maidir le hinfheistíocht agus ina mbainistiú priacail. Mar thoradh air sin, tá níos mó brú ar chuideachtaí freagairt d’éilimh ó infheisteoirí agus ó institiúidí creidmheasa araon maidir le hábhair ESG agus ceanglaítear orthu cloí le hilchaighdeáin do nochtadh ESG, a bhíonn ilroinnte agus neamhréireach go minic. Dá bhrí sin, ar mhaithe le nochtadh faisnéise a bhaineann le hinbhuanaitheacht a fheabhsú i gcuideachtaí agus na ceanglais maidir le nochtadh den sórt sin a chomhchuibhiú dá bhforáiltear i Rialachán (AE) 2017/1129, agus dlí seirbhísí eile airgeadais de chuid an Aontais á chur san áireamh ag an am céanna, ba cheart don Choimisiún, i gcomhthéacs an athbhreithnithe ar Rialachán (AE) 2017/1129, a mheas an iomchuí faisnéis a bhaineann le hinbhuanaitheacht a chomhtháthú i Rialachán (AE) 2017/1129 agus a mheas an iomchuí togra reachtach a dhéanamh chun comhleanúnachas le cuspóirí inbhuanaitheachta agus inchomparáideacht na faisnéise a bhaineann le hinbhuanaitheacht a áirithiú ar fud dhlí sheirbhísí airgeadais an Aontais.

(8)

Maidir le cuideachtaí a bhfuil scaireanna acu arna ligean isteach chun trádála ar mhargadh rialáilte nó chun trádála ar mhargadh fáis FBManna go leanúnach ar feadh 18 mí ar a laghad roimh an tairiscint ar scaireanna nó an cead isteach chun trádála, ba cheart ceanglais nochta leanúnacha a bheith comhlíonta acu faoi Rialachán (AE) Uimh. 596/2014 ó Pharlaimint na hEorpa agus ón gComhairle (5), faoi Threoir 2004/109/CE ó Pharlaimint na hEorpa agus ón gComhairle (6) nó, d’eisitheoirí ar mhargaí fáis FBManna, faoi Rialachán Tarmligthe (AE) 2017/565 ón gCoimisiún (7). Dá bhrí sin, beidh go leor den ábhar atá ag teastáil i réamheolaire ar fáil go poiblí cheana féin agus beidh infheisteoirí ag trádáil ar bhonn na faisnéise sin. Dá bhrí sin, níor cheart réamheolaire Téarnaimh AE a úsáid ach le haghaidh eisiúintí tánaisteacha scaireanna. Ba cheart le réamheolaire Téarnaimh AE maoiniú cothromais a éascú agus ar an gcaoi sin lamháil do chuideachtaí athchaipitliú tapa a dhéanamh. Níor cheart le réamheolaire Téarnaimh AE a chur ar chumas eisitheoirí aistriú ó mhargadh fáis FBManna go margadh rialáilte. Thairis sin, níor cheart do réamheolaire Téarnaimh AE a bheith dírithe ach ar fhaisnéis bhunriachtanach lena gcuirtear ar chumas infheisteoirí cinntí infheistíochta eolasacha a dhéanamh. Mar sin féin, más infheidhme, ba cheart d’eisitheoirí nó do thairgeoirí aghaidh a thabhairt ar an gcaoi a ndearna paindéim COVID-19 difear do ghníomhaíochtaí gnó na n-eisitheoirí chomh maith leis an tionchar, más ann dó, a mheastar a bheidh ag an bpaindéim amach anseo ar ghníomhaíochtaí gnó na n-eisitheoirí.

(9)

Chun go mbeidh sé ina uirlis éifeachtúil le haghaidh eisitheoirí, ba cheart réamheolaire Téarnaimh AE a bheith ina dhoiciméad aonair de mhéid teoranta, bheith in ann ionchorprú de réir tagairtí, agus tairbhiú den phas le haghaidh tairiscintí uile-Eorpacha ar scaireanna don pobal nó do cheadanna isteach chun trádála ar mhargadh rialáilte.

(10)

Ba cheart achoimre ghearrfhoirme a bheith san áireamh i réamheolaire Téarnaimh AE mar fhoinse faisnéise le haghaidh infheisteoirí, go háirithe infheisteoirí miondíola. Ba cheart an achoimre sin a bheith leagtha amach i dtús réamheolaire Téarnaimh AE agus a bheith dírithe ar fhaisnéis bhunriachtanach le go mbeadh infheisteoirí in ann a chinneadh cé na scaireanna atá á dtairiscint don phobal nó atá á ligean isteach chun a dtrádála le staidéar a dhéanamh orthu tuilleadh, agus ina dhiaidh sin réamheolaire Téarnaimh AE ina iomláine a athbhreithniú chun a gcinneadh a dhéanamh. Ba cheart a bheith san áireamh san fhaisnéis bhunriachtanach faisnéis lena gcumhdaítear go sonrach an tionchar gnó agus airgeadais, más ann dó, a bheidh ag paindéim COVID-19, mar aon lena tionchar, más ann dó, a mheastar a bheidh aici amach anseo. Le réamheolaire téarnaimh AE, ba cheart cosaint infheisteoirí miondíola a áirithiú trí chloí le forálacha ábhartha Rialachán (AE) 2017/1129, agus ualach iomarcach riaracháin á sheachaint ag an am céanna. I ndáil leis sin, tá sé ríthábhachtach nach laghdófar cosaint infheisteoirí leis an achoimre ná nach dtabharfaí tuiscint mhíthreorach d’infheisteoirí. Dá bhrí sin, ba cheart d’eisitheoirí nó do thairgeoirí ardleibhéal díchill a áirithiú i ndréachtú na hachoimre sin.

(11)

Ós rud é le réamheolaire Téarnaimh AE, go gcuirfí i bhfad níos lú faisnéise ar fáil ná réamheolaire simplithe faoin gcóras nochta simplithe d’eisiúintí tánaisteacha, níor cheart go mbeadh sé indéanta d’eisitheoirí é a úsáid le haghaidh eisiúintí ardchaolúcháin scaireanna a bhfuil tionchar suntasach acu ar struchtúr caipitil, ionchais agus staid airgeadais an eisitheora. Ba cheart, dá bhrí sin, úsáid réamheolaire Téarnaimh AE a theorannú do thairiscintí nach mó ná 150 % den chaipiteal gan íoc. Ba cheart critéir bheachta a leagan síos sa Rialachán seo chun tairseach den sórt sin a ríomh.

(12)

Chun sonraí a bhailiú a thacaíonn le measúnú ar chóras réamheolaire Téarnaimh AE, ba cheart réamheolaire téarnaimh AE a chur san áireamh i sásra stórála dá dtagraítear in Airteagal 21(6) de Rialachán (AE) 2017/1129. Chun teorainn a chur leis an ualach riaracháin maidir leis an sásra stórála sin a athrú, ba cheart do réamheolaire Téarnaimh AE a bheith in ann na sonraí céanna a úsáid agus iad siúd a shainítear le haghaidh an réamheolaire eisiúintí tánaisteacha arna leagan amach in Airteagal 14 de Rialachán (AE) 2017/1129, ar choinníoll go leanfaidh an dá chineál réamheolaire de bheith difreáilte go soiléir.

(13)

Ba cheart do réamheolaire Téarnaimh AE comhlánú a dhéanamh ar chineálacha eile réamheolairí arna leagan síos i Rialachán (AE) 2017/1129 i bhfianaise sainiúlachtaí cineálacha éagsúla urrús, eisitheoirí, tairiscintí agus ceadanna isteach. Dá bhrí sin, ach amháin má luaitear a mhalairt go sonrach, tá le tuiscint leis na tagairtí uile don téarma “réamheolaire” faoi Rialachán (AE) 2017/1129 gur ag tagairt do gach cineál réamheolaire atá siad, lena n-áirítear réamheolairí Téarnaimh an Aontais arna leagan síos sa Rialachán seo.

(14)

Le Rialachán (AE) 2017/1129, ceanglaítear ar idirghabhálaithe airgeadais infheisteoirí a chur ar an eolas maidir leis an bhféidearthacht go bhféadfaí forlíonadh a fhoilsiú agus, faoi choinníollacha áirithe, dul i dteagmháil le hinfheisteoirí an lá céanna a fhoilsítear forlíonadh. Is féidir go mbeadh deacrachtaí ann d’idirghabhálaithe airgeadais leis an sprioc-am faoinar gá dul i dteagmháil le hinfheisteoirí, mar aon le raon feidhme na n-infheisteoirí a bhfuil teagmháil le déanamh leo. Chun faoiseamh agus acmhainní a sholáthar d’idirghabhálaithe airgeadais agus san am céanna, ardleibhéal cosanta a choinneáil ar bun i dtaca le hinfheisteoirí, ba cheart córas níos comhréirí a leagan síos. Ba cheart a shoiléiriú, go háirithe, gur cheart d’idirghabhálaithe airgeadais teagmháil a dhéanamh le hinfheisteoirí a cheannaíonn nó a shuibscríobhann urrúis ag deireadh na tréimhse tosaigh tairisceana ar a dhéanaí. Ba cheart a thuiscint go dtagraíonn an tréimhse tosaigh tairisceana don tréimhse ama ina dtairgeann an t-eisitheoir nó an tairgeoir urrúis don phobal mar a fhorordaítear sa réamheolaire agus na tréimhsí ina dhiaidh sin a eisiamh ina n-athdhíoltar urrúis ar an margadh lena linn. Ba cheart go gcuimseodh tréimhse na tairisceana tosaigh eisiúintí príomhúla agus tánaisteacha urrús le córas den sórt sin, ba cheart a shainiú cé na hinfheisteoirí ar cheart d’idirghabhálaithe airgeadais dul i dteagmháil leo nuair a fhoilsítear forlíonadh agus ba cheart leis síneadh a chur leis an sprioc-am ina mbeidh teagmháil le déanamh leis na hinfheisteoirí sin. Gan beann ar cén córas nua dá bhforáiltear sa Rialachán seo, maidir le forálacha Rialachán (AE) 2017/1129 atá ann cheana, lena n-áirithítear go bhfuil an forlíonadh inrochtana le haghaidh gach infheisteora trína cheangal go bhfoilseofar an forlíonadh ar shuíomh gréasáin atá ar fáil go poiblí, ba cheart go leanfaidís d’fheidhm a bheith acu.

(15)

Ós rud é go bhfuil córas réamheolaire Théarnaimh AE teoranta do chéim an téarnaimh, ba cheart an córas sin dul in éag faoin 31 Nollaig 2022. Chun leanúnachas réamheolairí Téarnaimh an Aontais a áirithiú, ba cheart na réamheolairí Téarnaimh sin de chuid an Aontais a formheasadh roimh dhul in éag chóras réamheolaire Théarnaimh AE tairbhe a bhaint as foráil mharthanachta.

(16)

Faoin 21 Iúil 2022, tá an Coimisiún chun tuarascáil a thíolacadh do Pharlaimint na hEorpa agus don Chomhairle maidir le cur i bhfeidhm Rialachán (AE) 2017/1129, lena ngabhfaidh i gcás inarb iomchuí togra reachtach. Leis an tuarascáil sin, ba cheart measúnú a dhéanamh, inter alia, an amhlaidh gurb iomchuí an córas nochta le haghaidh réamheolairí Téarnaimh an Aontais chun na cuspóirí arna saothrú ag an Rialachán seo a chomhlíonadh. Leis an measúnú sin, ba cheart aghaidh a thabhairt ar an gceist i dtaobh an mbaineann réamheolaire Téarnaimh AE cothromaíocht chuí amach idir cosaint infheisteoirí agus laghdú an ualaigh riaracháin.

(17)

Ceanglaítear le Treoir 2004/109/CE ar eisitheoirí a ligtear a n-urrúis isteach chun a dtrádála ar mhargadh rialáilte atá suite i mBallstát nó atá ag feidhmiú i mBallstát a dtuarascálacha airgeadais bliantúla a ullmhú agus a nochtadh i bhformáid tuairiscithe leictreonach aonair, ag tosú ó bhlianta airgeadais dar tús an 1 Eanáir 2020 nó dá éis sin. Sonraítear an fhormáid tuairiscithe leictreonach aonair sin i Rialachán Tarmligthe (AE) 2019/815 ón gCoimisiún (8). Ós rud é go n-éilíonn ullmhú tuarascálacha airgeadais bliantúla agus úsáid á baint as an bhformáid tuairiscithe leictreonach aonair leithdháileadh acmhainní breise daonna agus airgeadais, go háirithe le linn na chéad bhliana ullmhúcháin, agus i bhfianaise na srianta ar acmhainní eisitheoirí mar gheall ar phaindéim COVID-19, ba cheart go mbeadh Ballstát in ann cur i bhfeidhm an cheanglais tuarascálacha airgeadais bliantúla a ullmhú agus a nochtadh agus úsáid á baint as formáid tuairiscithe leictreonach aonair a chur siar aon bhliain amháin. Chun an rogha sin a fheidhmiú, ba cheart do Bhallstát a chur in iúl don Choimisiún go bhfuil sé de rún aige go mbeifí ann an cur siar sin a dhéanamh agus go bhfuil údar cuí lena rún.

(18)

Ós rud é nach féidir leis na Ballstáit cuspóirí an Rialacháin seo, eadhon bearta a thabhairt isteach chun infheistíochtaí san fhíorgheilleagar a éascú, chun go mbeifí in ann cuideachtaí san Aontas a athchaipitliú go tapa agus é a chur ar a gcumas d’eisitheoirí leas a bhaint as margaí poiblí go luath sa phróiseas téarnaimh, a ghnóthú go leordhóthanach agus, de bharr a fhairsinge agus a éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta, a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,

(19)

Ba cheart, dá bhrí sin, Rialachán (AE) 2017/1129 agus Treoir 2004/109/CE a leasú dá réir,