(1)

De bhun Airteagal 76(3) de Rialachán (AE) 2018/1139, eisíonn Gníomhaireacht Sábháilteachta Eitlíochta na hEorpa (“An Ghníomhaireacht”) sonraíochtaí deimhniúcháin agus nuashonraíonn sí go rialta iad chun a áirithiú go leanann siad de bheith oiriúnach don fheidhm. Mar sin féin, maidir le haerárthach ar deimhníodh a dhearadh cheana, níl sé de cheangal air leagan nuashonraithe na sonraíochtaí deimhniúcháin a chomhlíonadh nuair a tháirgtear é nó nuair atá sé i seirbhís. Dá bhrí sin, d'fhonn tacú leis an aeracmhainneacht leanúnach agus d'fhonn an tsábháilteacht a fheabhsú, ba cheart comhlíonadh na gceanglas aeracmhainneachta breise ag na haerárthaí sin a thabhairt isteach, ceanglais nach raibh sna sonraíochtaí deimhniúcháin tosaigh tráth a deimhníodh an dearadh. I Rialachán (AE) 2015/640 ón gCoimisiún (2) leagtar amach na ceanglais aeracmhainneachta bhreise sin.

(2)

Le Rialachán Cur Chun Feidhme (AE) 2019/133 ón gCoimisiún (3), i bpointe 26.60 d’Iarscríbhinn I a ghabhann le Rialachán (AE) 2015/640, tugadh isteach ceanglais aeracmhainneachta bhreise maidir le dálaí dinimiciúla suíochán paisinéirí agus foirne cábáin ar eitleáin mhóra a táirgeadh le déanaí ar bhonn dearadh a dheimhnigh an Ghníomhaíocht cheana. Maidir le heitleáin mhóra ar eisíodh an deimhniú aeracmhainneachta aonair ina leith den chéad uair an 18 Feabhra 2021 nó ina dhiaidh sin, ní mór dóibh pointe 26.60 a chomhlíonadh. Mar gheall ar mhoilleanna a bhí ar tháirgeadh eitleán de bharr phaindéim COVID-19, i gcás eitleáin áirithe a raibh sé beartaithe deimhniú aeracmhainneachta a eisiúint dóibh roimh an 18 Feabhra 2021, eiseofar an deimhniú sin dóibh i ndiaidh an dáta sin. Chun nach gcuirfí ualach breise ar earnáil na heitlíochta mar gheall ar an ngá le suíocháin a athcháiliú sna heitleáin sin i dtaca leis na dálaí dinimiciúla, ba cheart, dá bhrí sin, eitleáin ar cuireadh moill ar iad a tháirgeadh de dheasca phaindéim COVID-19 a dhíolmhú ó chomhlíonadh phointe 26.60.

(3)

Ar an gcúis sin, ba cheart dáta eisiúna an chéad deimhnithe aeracmhainneachta aonair dá dtagraítear i bpointe 26.60 d’Iarscríbhinn I a ghabhann le Rialachán (AE) 2015/640, arb é an 18 Feabhra 2021 é faoi láthair, a ailíniú le dáta chur i bhfeidhm liosta na gcineálacha eitleán nach bhfuil faoi réir fhorálacha áirithe Iarscríbhinn I de Rialachán (AE) 2015/640 a leagtar amach i bhFoscríbhinn I a ghabhann le Rialachán Cur Chun Feidhme (AE) 2020/1159 ón gCoimisiún (4), mar atá an 26 Feabhra 2021. Ós rud é gur beag difríocht ama atá ann idir an dá dháta, ní dhéanfaí difear suntasach don tsábháilteacht eitlíochta. Dá bhrí sin, ba cheart Rialachán (AE) 2015/640 a leasú dá réir.

(4)

Le Rialachán Cur Chun Feidhme (AE) 2020/1159 tugadh isteach ceanglais nua maidir le haerárthaí atá ag éirí sean. Go háirithe, i bpointe 26.334 d’Iarscríbhinn I a ghabhann le Rialachán (AE) 2015/640 tugtar le tuiscint go mbeidh ar na sealbhóirí deimhnithe cineáil forlíontacha a eisíodh roimh an 1 Meán Fómhair 2003 na sonraí faoi lamháltas damáiste a thiomsú cibé acu a theastaíonn na sonraí sin ó oibreoirí nó nach dteastaíonn. Chun a áirithiú gur comhréireach a bheidh an t-ualach ar earnáil na heitlíochta, bhí sé beartaithe i gcónaí nár cheart na sonraí sin a thiomsú ach amháin má theastaíonn siad ó oibreoirí agus arna iarraidh sin dóibh. Dá bhrí sin, ba cheart Rialachán (AE) 2015/640 a cheartú dá réir.

(5)

Leis na bearta dá bhforáiltear sa Rialachán seo tagraítear do na leasuithe a tugadh isteach le Rialachán Cur Chun Feidhme (AE) 2020/1159 a bhfuil feidhm acu ón 26 Feabhra 2021. Dá bhrí sin, ar mhaithe le comhsheasmhacht, ba cheart an Rialachán seo a bheith infheidhme ón 26 Feabhra 2021 amach.

(6)

Tá na bearta dá bhforáiltear sa Rialachán seo i gcomhréir leis an tuairim ón gCoiste arna bhunú le hAirteagal 127 de Rialachán (AE) 2018/1139,