(1)

D’fhormheas an tAontas Prótacal 1999 a ghabhann le Laghdú a dhéanamh ar an Aigéadú, ar an Eotrófú agus ar an Ózón ar Leibhéal na Talún don Choinbhinsiún ar Aerthruailliú Trasteorann Fadraoin, arna leasú an 4 Bealtaine 2012 (“Prótacal Gothenburg leasaithe”), faoin le Cinneadh (AE) 2017/1757 (1) ón gComhairle agus tháinig sé i bhfeidhm an 7 Deireadh Fómhair 2019.

(2)

Sa 36ú seisiún de chuid Chomhlacht Feidhmiúcháin an Choinbhinsiúin ar Aerthruailliú Trasteorann Fadraoin (“an Coinbhinsiún”), d’iarr Páirtithe an Choinbhinsiúin ar an Aontas agus ar a Bhallstáit modheolaíocht a mholadh lena ndéanfar coigeartú ar uasteorainneacha astaíochtaí an Aontais a leagtar amach i dtábla 1 d’Iarscríbhinn II a ghabhann le Prótacal bunaidh Gothenburg a glacadh in 1999, chun athruithe ar an mballraíocht san Aontas Eorpach a thabhairt san áireamh;

(3)

Sa 37ú seisiún de chuid Chomhlacht Feidhmiúcháin an Choinbhinsiúin Aeir, glacadh an cinneadh a mhol an tAontas agus a Bhallstáit le Cinneadh 2017/3 ón gComhlacht Feidhmiúcháin.

(4)

Is gá an mhodheolaíocht lena ndéanfar coigeartú ar luacha an Aontais a leagtar amach i dtáblaí 2 go 6 d’Iarscríbhinn II a ghabhann le Prótacal Gothenburg, modheolaíocht atá bunaithe go heisiach ar ríomh matamaiticiúil nach n-úsáidtear ann ach faisnéis atá liostaithe cheana féin sna táblaí luaite chun athruithe ar bhallraíocht san Aontas Eorpach a chur san áireamh, chun go bhféadfar athruithe den sórt sin a léiriú i gceart i bhfianaise an athbhreithnithe a rinneadh ar chomhlíonadh an Aontais Eorpaigh maidir lena chuid oibleagáidí faoin leagan leasaithe de Phrótacal Gothenburg. Ní bhaineann sin le haon choigeartú ar uasteorainneacha astaíochtaí náisiúnta ná ar ghealltanais laghdaithe astaíochtaí sna táblaí céanna.

(5)

A luaithe a ghlacfaidh Comhlacht Feidhmiúcháin an Choinbhinsiúin an mhodheolaíocht le haghaidh coigeartuithe, ba cheart don Choimisiún, thar ceann an Aontais, na coigeartuithe is gá a chur faoi bhráid Choimisiún Eacnamaíochta na Náisiún Aontaithe don Eoraip, chun athruithe ar an mballraíocht san Aontas a thabhairt san áireamh ón nglacadh Prótacal Gothenburg leasaithe. Ba cheart don Choimisiún aon choigeartú is gá i gcás athruithe ar bhallraíocht san Aontas dá éis a thíolacadh.

(6)

Is iomchuí an seasamh atá le glacadh thar ceann an Aontais i gComhlacht Feidhmiúcháin an Choinbhinsiúin, a leagan síos, ós rud é go mbeidh na cinntí a dhéanann sé ina gceangal ar an Aontas.