(1)

I gcomhréir le hAirteagal 14 de Threoir 2014/32/AE ó Pharlaimint na hEorpa agus ón gComhairle (2), uirlisí tomhais atá i gcomhréir le caighdeáin chomhchuibhithe nó le codanna díobh, caighdeáin ar foilsíodh na tagairtí dóibh in Iris Oifigiúil an Aontais Eorpaigh, glactar leis go bhfuil siad i gcomhréir leis na buncheanglais a leagtar amach in Iarscríbhinn I agus sna hIarscríbhinní uirlis-shonracha ábhartha, ceanglais a chumhdaítear faoi na caighdeáin chomhchuibhithe sin nó faoi na codanna sin díobh.

(2)

Le Cinneadh Cur Chun Feidhme C(2015) 8558 (3) ón gCoimisiún an 15 Nollaig 2015, rinne an Coimisiún iarraidh ar an gCoiste Eorpach um Chaighdeánú (CEN), ar Choiste Eorpach na gCaighdeán Leictriteicniúil (Cenelec), agus ar Institiúid Eorpach na gCaighdeán Teileachumarsáide (ETSI) caighdeáin chomhchuibhithe a dhréachtú chun tacú le Treoir 2014/32/AE i ndáil le huirlisí áirithe tomhais, sin agus athbhreithniú a dhéanamh ar na caighdeáin sin, agus iad a thabhairt i gcrích.

(3)

Ar bhonn na hiarrata a leagtar amach i gCinneadh Cur Chun Feidhme C(2015) 8558, rinne CEN agus Cenelec athbhreithniú ar chaighdeáin chomhchuibhithe EN 1359, EN 12261, EN 12405-1 agus EN 14236. Is é an toradh a bhí air sin gur glacadh na caighdeáin chomhchuibhithe seo a leanas faoi seach – EN 1359:2017 maidir le méadair gháis scannáin; EN 12261:2018 maidir le méadair gháis tuirbín; EN 12405-1:2018 maidir le gairis tiontaithe toirte gáis; agus EN 14236:2018 maidir le méadair ultrasonacha gáis tí.

(4)

Caighdeáin EN 1359:2017, EN 12261:2018, EN 12405-1:2018, agus EN 14236:2018, rinne an Coimisiún measúnú i gcomhar le CEN agus Cenelec féachaint an gcomhlíonann na caighdeáin sin an iarraidh a leagtar amach i gCinneadh Cur Chun Feidhme C(2015) 8558.

(5)

Caighdeáin EN 1359:2017, EN 12261:2018, EN 12405-1:2018, agus EN 14236:2018, is caighdeáin iad a chomhlíonann na ceanglais is aidhm dóibh a chumhdach, ceanglais a leagtar amach i dTreoir 2014/32/AE. Dá bhrí sin, is iomchuí na tagairtí do na caighdeáin sin a fhoilsiú in Iris Oifigiúil an Aontais Eorpaigh.

(6)

Mar sin féin, na caighdeáin idirnáisiúnta agus Eorpacha dá dtagraítear i gclásal 2 “Tagairtí normatacha” de chaighdeáin EN 1359:2017, EN 12261:2018, EN 12405-1:2018, agus EN 14236:2018, is gá a shoiléiriú cé na leaganacha díobh atá le cur i bhfeidhm chun glacadh leis go bhfuil comhréireacht ann.

(7)

An obair a rinne CEN agus Cenelec ar bhonn na hiarrata ón gCoimisiún, is é an toradh a bhí uirthi go ndearnadh athbhreithniú ar na caighdeáin chomhchuibhithe seo a leanas, caighdeáin a foilsíodh i sraith C d’Iris Oifigiúil an Aontais Eorpaigh (4): EN 1359:1998/A1:2006; EN 12261:2002/A1:2006; EN 12405-1:2005+A2:2010; agus EN 14236:2007. Dá bhrí sin, is gá na tagairtí do na caighdeáin sin a tharraingt siar as Iris Oifigiúil an Aontais Eorpaigh. Tarraingt siar na dtagairtí do na caighdeáin chomhchuibhithe sin, is gá í a chur siar ionas go mbeidh a ndóthain ama ag monaróirí ullmhú do na caighdeáin athbhreithnithe nó leasuithe ar chaighdeáin a chur i bhfeidhm.

(8)

Caighdeáin chomhchuibhithe EN 14154-1:2005+A2:2011, EN 14154-2:2005+A2:2011, agus EN 14154-3:2005+A2:2011 maidir le méadair uisce, is caighdeáin iad a rinne CEN agus Cenelec a tharraingt siar. Ní den úrscothacht na caighdeáin sin a thuilleadh, ba cheart a mheas go bhfuil siad as feidhm. Dá bhrí sin is gá na tagairtí do na caighdeáin sin a tharraingt siar as Iris Oifigiúil an Aontais Eorpaigh (5). Ionas go mbeidh an t-am is gá ag monaróirí chun iad féin a oiriúnú, is gá tarraingt siar na dtagairtí do na caighdeáin sin a chur siar 6 mhí.

(9)

Ar mhaithe leis an tsoiléireacht agus an deimhneacht dhlíthiúil, na caighdeáin chomhchuibhithe a dréachtaíodh chun tacú le Treoir 2014/32/AE, caighdeáin a chomhlíonann na buncheanglais is aidhm dóibh a chumhdach, ba cheart liosta iomlán de na tagairtí do na caighdeáin sin a fhoilsiú in aon ghníomh amháin. Dá bhrí sin, na tagairtí eile do chaighdeáin a foilsíodh ar dtús i dTeachtaireacht 2012/C 218/08 (6) ón gCoimisiún, ba cheart na tagairtí sin a chuimsiú sa Chinneadh seo freisin, is é sin trína mbailíocht a dheimhniú nó trí dháta a leagan síos ar a ndéanfar iad a tharraingt siar as Iris Oifigiúil an Aontais Eorpaigh. Dá bhrí sin ba cheart an Teachtaireacht sin a aisghairm ó dháta theacht i bhfeidhm an Chinnidh seo. Mar sin féin, na tagairtí do na caighdeáin a ndéantar iad a tharraingt siar leis an gCinneadh seo, ba cheart feidhm a bheith ag an Teachtaireacht chéanna go fóill i ndáil leis na tagairtí sin, ós rud é gur gá tarraingt siar na dtagairtí sin a chur siar.

(10)

Ón dáta a fhoilsítear an tagairt do chaighdeán comhchuibhithe in Iris Oifigiúil an Aontais Eorpaigh, is rud é comhlíonadh an chaighdeáin sin a fhágann go nglactar go bhfuil comhréir ann leis na buncheanglais chomhfhreagracha a leagtar amach i reachtaíocht chomhchuibhithe an Aontais. Dá bhrí sin, ba cheart an Cinneadh seo a theacht i bhfeidhm lá a fhoilsithe,