(1)

Áiríodh an tsubstaint ghníomhach própaconasól in Iarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) lena úsáid i dtáirgí bithicídeacha de chineál táirge 8, agus de bhun Airteagal 86 de Rialachán (AE) Uimh. 528/2012, meastar dá bhrí sin go bhfuil sí formheasta faoin Rialachán sin faoi réir na sonraíochtaí agus na gcoinníollacha a leagtar amach in Iarscríbhinn I a ghabhann leis an Treoir sin.

(2)

An 1 Deireadh Fómhair 2018, cuireadh isteach iarratas i gcomhréir le hAirteagal 13(1) de Rialachán (AE) Uimh. 528/2012 chun formheas própaconasóil a athnuachan.

(3)

An 8 Feabhra 2019, chuir údarás inniúil meastóireachta na Fionlainne in iúl don Choimisiún gur chinn sé, de bhun Airteagal 14(1) de Rialachán (AE) Uimh. 528/2012, go raibh gá le meastóireacht iomlán ar an iarratas. De bhun Airteagal 8(1) de Rialachán (AE) Uimh. 528/2012, tá an t-údarás inniúil le meastóireacht iomlán a dhéanamh ar an iarratas laistigh de 365 lá tar éis a bhailíochtaithe. Tá sé iarrtha ag an údarás inniúil meastóireachta ar an iarratasóir sonraí leordhóthanacha a chur ar fáil chun an mheastóireacht a dhéanamh i gcomhréir le hAirteagal 8(2) den Rialachán sin.

(4)

Ós rud é go bhfuil meastóireacht iomlán á déanamh ag an údarás inniúil ar an iarratas, i gcomhréir le hAirteagal 14(3) de Rialachán (AE) Uimh. 528/2012, tá an Ghníomhaireacht Eorpach Ceimiceán (“an Ghníomhaireacht”) le tuairim a ullmhú agus a chur faoi bhráid an Choimisiúin maidir le formheas na substainte gníomhaí a athnuachan laistigh de 270 lá ón moladh a fháil ón údarás inniúil meastóireachta.

(5)

Ós rud é go bhfuil própaconasól aicmithe mar thocsaineach maidir leis an atáirgeadh, catagóir 1B, i gcomhréir le Rialachán (CE) Uimh. 1272/2008 ó Pharlaimint na hEorpa agus ón gComhairle (3), agus go gcomhlíonann sé, dá bhrí sin, an critéar eisiaimh a leagtar amach i bpointe (c) d’Airteagal 5(1) de Rialachán (AE) Uimh. 528/2012, is gá scrúdú breise a dhéanamh chun a chinneadh an bhfuil ceann amháin ar a laghad de choinníollacha na chéad fhomhíre d’Airteagal 5(2) de Rialachán (AE) Uimh. 528/2012 á chomhlíonadh, agus an bhféadfar formheas própaconasóil a athnuachan dá bhrí sin.

(6)

Le Cinneadh Cur Chun Feidhme (AE) 2020/27 ón gCoimisiún (4), cuireadh an dáta éaga i leith formheas própaconasóil ar atráth go dtí an 31 Márta 2021 ionas go mbeadh am leordhóthanach ann chun scrúdú a dhéanamh ar an iarratas. Níl an mheastóireacht sin tugtha chun críche fós agus níl a thuarascáil mheasúnaithe ná conclúidí a mheastóireachta curtha faoi bhráid na Gníomhaireachta fós.

(7)

Dá bhrí sin, ar chúiseanna nach bhfuil neart ag an iarratasóir orthu, is dócha go n-éagfar formheas própaconasóil lena úsáid i dtáirgí bithicídeacha de chineál táirge 8 sula ndéanfar cinneadh maidir lena athnuachan. Is iomchuí, dá bhrí sin, an dáta éaga i leith formheas própaconasóil lena úsáid i dtáirgí bithicídeacha de chineál táirge 8 a chur ar atráth go ceann tréimhse a bheidh fada go leor chun go mbeifear in ann scrúdú a dhéanamh ar an iarratas.

(8)

I bhfianaise na tréimhse is gá chun go ndéanfaidh an Ghníomhaireacht an tuairim a ullmhú agus a chur isteach, na tréimhse is gá chun measúnú a dhéanamh an bhfuil ar a laghad ceann amháin de na coinníollacha atá sa chéad fhomhír d’Airteagal 5(2) de Rialachán (AE) Uimh. 528/2012 á chomhlíonadh agus chun a mheasúnú an bhféadfar formheas própaconasóil a athnuachan dá bhrí sin, is iomchuí dáta éaga an fhormheasa a chur ar atráth go dtí an 31 Nollaig 2022.

(9)

Seachas an dáta éaga i leith formheasa, leanfaidh própaconasól de bheith formheasta lena úsáid i dtáirgí bithicídeacha de chineál táirge 8 faoi réir na sonraíochtaí agus na gcoinníollacha a leagtar amach in Iarscríbhinn I a ghabhann le Treoir 98/8/CE,