(1)

Tá an caidreamh déthaobhach trádála agus infheistíochta is mó agus is doimhne ar domhan ag an Aontas agus Stáit Aontaithe Mheiriceá (na “Stáit Aontaithe”) agus tá a ngeilleagair comhtháite go mór. Luach os cionn EUR 1 trilliún in aghaidh na bliana atá ar an trádáil in earraí agus seirbhísí sa dá threo eatarthu, arb ionann é agus thart ar EUR 3 000 mhilliún euro in aghaidh an lae. Tá an dlúthchaidreamh trádála agus infheistíochta sin tairbhiúil le haghaidh custaiméirí, oibrithe, gnólachtaí agus infheisteoirí.

(2)

Tá an tAontas tiomanta feabhas a chur ar a chaidreamh trádála agus infheistíochta leis na Stáit Aontaithe. Áirítear leis sin bealaí nua a aimsiú chun feabhas a chur ar an gcaidreamh trádála déthaobhach, aghaidh a thabhairt ar bhacainní trádála agus díospóidí trádála leanúnacha a réiteach. Ionas nach gcuirfear isteach a thuilleadh ar an gcaidreamh trádála sin, ba cheart na dleachtanna custaim a chuireann an tAontas i bhfeidhm ar allmhairí a dhíchur le haghaidh líon teoranta earraí ar feadh tréimhse 5 bliana ar bhonn erga omnes.

(3)

Ba cheart díchur dleachtanna custaim a bheith faoi réir an fhógra ó na Stáit Aontaithe maidir le dleachtanna custaim a laghdú ar líon roghnaithe earraí a chur chun feidhme go héifeachtach agus faoi réir staonadh na Stát Aontaithe ó bhearta nua a thabhairt isteach a d’fhéadfadh an bonn a bhaint de na cuspóirí atá á saothrú leis an gComhráiteas ó na Stáit Aontaithe agus ón Aontas Eorpach an 21 Lúnasa 2020 maidir le Comhaontú um Thairifí (an “Comhráiteas”) (2),

(4)

Ba cheart feidhm a bheith ag díchur dleachtanna custaim ón dáta céanna le cur chun feidhme éifeachtach an fhógra ó na Stáit Aontaithe maidir lena ndleachtanna custaim ar líon roghnaithe earraí a laghdú, eadhon ón 1 Lúnasa 2020.

(5)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun cur i bhfeidhm an Rialacháin seo a chur ar fionraí go sealadach mura gcomhlíontar na coinníollacha a leagtar amach sa Rialachán seo. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ón bParlaimint agus ón gComhairle (3).

(6)

I bhfianaise a phráinní atá sé aon chur isteach eile ar an gcaidreamh trádála idir an Aontas agus na Stáit Aontaithe a sheachaint, ba cheart an Rialachán seo a theacht i bhfeidhm láithreach tar éis a fhoilsithe. Ar an gcúis chéanna, meastar gurb iomchuí chomh maith foráil a dhéanamh maidir le heisceacht ar an tréimhse 8 seachtaine dá dtagraítear in Airteagal 4 de Phrótacal Uimh. 1 maidir le ról na bParlaimintí náisiúnta san Aontas Eorpach, atá i gceangal leis an gConradh ar an Aontas Eorpach, leis an gConradh ar Fheidhmiú an Aontais Eorpaigh agus an Conradh ag bunú an Chomhphobail Eorpaigh do Fhuinneamh Adamhach,

(a)

na Stáit Aontaithe do laghdú dleachtanna custaim ar bhonn erga omnes le haghaidh na n-earraí a aicmítear sna línte taraife a liostaítear i Roinn II den Iarscríbhinn; agus

(b)

na Stáit Aontaithe do staonadh ó bhearta nua a thabhairt isteach i gcoinne an Aontais a bhaineann an bonn de na cuspóirí atá á saothrú leis an gComhráiteas.