(1)

De dheasca ghéarchéim COVID-19, tá curtha isteach ar shlabhra soláthair na bpáirteanna agus na gcomhpháirteanna criticiúla d’fheithiclí de chatagóir L agus tá laghdú suntasach ar an éileamh atá ar na feithiclí sin. Fágann sé sin go bhfuil moilleanna suntasacha ar mhonaróirí maidir lena stoc feithiclí Euro 4 ina iomláine a dhíol, feithiclí a bhfuil gá de réir Iarscríbhinn IV a ghabhann le Rialachán (AE) Uimh. 168/2013 ó Pharlaimint na hEorpa agus ón gComhairle (3) lena gclárú sula dtiocfaidh céim chomhshaoil Euro 5 i bhfeidhm an 1 Eanáir 2021.

(2)

Leis na rialacha maidir le feithiclí ceann sraithe a leagtar síos i Rialachán (AE) Uimh. 168/2013, ceadaítear do mhonaróirí leanúint de chuid theoranta de stoc feithiclí de chatagóir L a chur ar fáil ar an margadh, a chlárú nó a chur i seirbhís, ar feithiclí iad nach féidir a chur ar fáil ar an margadh, nó nach féidir a chur ar fáil ar an margadh a thuilleadh, de bharr teacht i bhfeidhm ceanglas teicniúil nua nár ceadaíodh na feithiclí sin dá réir.

(3)

I bhfianaise an chur isteach arb í géarchéim COVID-19 is cúis leis, is léir nach sásra iomchuí atá sna rialacha maidir le feithiclí ceann sraithe i Rialachán (AE) Uimh. 168/2013 chun aghaidh a thabhairt ar an líon feithiclí Euro 4 de chatagóir L a bheidh sa stoc ag monaróirí tar éis chur i bhfeidhm chéim chomhshaoil Euro 5.

(4)

Mar gheall ar na himthosca eisceachtúla arb í géarchéim COVID-19 is cúis leo, agus chun an cur isteach a d’fhéadfaí a dhéanamh ar an margadh a sheachaint, is gá Rialachán (AE) Uimh. 168/2013 a leasú chun bearta sonracha maidir le feithiclí ceann sraithe a chur san áireamh mar fhreagairt ar ghéarchéim COVID-19.

(5)

Chun a áirithiú nach ndéantar na bearta sonracha sin maidir le feithiclí ceann sraithe a chur i bhfeidhm ach amháin i gcás feithiclí a bhí sa stoc tráth na mbeart náisiúnta dianghlasála, níor cheart don líon feithiclí a thairbhíonn de na bearta sonracha maidir le feithiclí ceann sraithe dul thar an líon feithiclí Euro 4 de chatagóir L a bhí sa stoc an 15 Márta 2020.

(6)

Ós rud é nach féidir leis na Ballstáit cuspóir an Rialacháin seo, eadhon leasú a dhéanamh ar na rialacha maidir le feithiclí ceann sraithe, is infheidhme maidir leis an mbliain 2021, de Rialachán (AE) Uimh. 168/2013 mar fhreagairt ar ghéarchéim COVID-19, a ghnóthú go leordhóthanach agus, de bharr fhairsinge agus éifeachtaí na gníomhaíochta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(7)

I bhfianaise na práinne a bhaineann leis na himthosca eisceachtúla arb í géarchéim COVID-19 is cúis leo, meastar gurb iomchuí foráil a dhéanamh maidir le heisceacht ar an tréimhse 8 seachtaine dá dtagraítear in Airteagal 4 de Phrótacal Uimh. 1 maidir le ról na bparlaimintí náisiúnta san Aontas Eorpach, atá i gceangal le CAE, leis an gConradh ar Fheidhmiú an Aontais Eorpaigh agus leis an gConradh ag bunú an Chomhphobail Eorpaigh do Fhuinneamh Adamhach.

(8)

Ba cheart, dá bhrí sin, Rialachán (AE) Uimh. 168/2013 a leasú dá réir sin.

(9)

Ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,