(1)

Maidir leis an gComhaontú idir Stáit Aontaithe Mheiriceá agus an Comhphobal Eorpach um chomhar maidir le sábháilteacht eitlíochta sibhialta a rialáil (1) (“an Comhaontú”), rinneadh é a fhormheas, thar ceann an Aontais, le Cinneadh 2011/719/AE ón gComhairle (2) agus tháinig sé i bhfeidhm ar an 1 Bealtaine 2011.

(2)

Ar cheann de phríomhaidhmeanna an Chomhaontaithe tá feabhas a chur ar an gcaidreamh comhair atá ann le fada idir an Eoraip agus na Stáit Aontaithe chun ardleibhéal sábháilteachta san eitlíocht shibhialta ar fud an domhain a áirithiú agus chun ualaí eacnamaíocha ar thionscal na heitlíochta agus ar oibreoirí ó fhormhaoirseacht rialála iomarcach a íoslaghdú.

(3)

Le Leasú 1 (3) ar an gComhaontú, leathnaítear raon feidhme Airteagal 2.B den Chomhaontú chun go n‐áireofar, inter alia, ceadúnú agus oiliúint pearsanra, agus tá feidhm leis go sealadach ó 13 Nollaig 2017 i leith i gcomhréir le hAirteagal 3 de Chinneadh (AE) 2018/61 ón gComhairle (4).

(4)

Le hAirteagal 5 den Chomhaontú, arna leasú, déantar foráil maidir le hIarscríbhinní nua a ghabhann leis an gComhaontú a fhorbairt i ndáil le hábhair a thagann faoi raon feidhme an Chomhaontaithe.

(5)

Maidir leis an dá Ghníomhaire Theicniúla de réir bhrí Airteagal 1.F an Chomhaontaithe, eadhon Gníomhaireacht Sábháilteachta Eitlíochta an Aontais Eorpaigh (EASA) don Aontas Eorpach (AE), agus an Riarachán Cónaidhme Eitlíochta (FAA) do na Stáit Aontaithe (SA), mhol siad araon go ndéanfadh an Bord Déthaobhach Formhaoirseachta Cinneadh a ghlacadh chun Iarscríbhinn 3 nua a ghabhann leis an gComhaontú a fhorbairt chun go gcumhdófar glacadh cómhalartach le cinntí comhlíonta agus doiciméadachta, agus soláthar cúnaimh theicniúil maidir le ceadúnú píolótaí príobháideacha agus faireachán ar chomhlíonadh.

(6)

Le tiontú simplithe ar cheadúnais do phíolótaí príobháideacha agus ar rátálacha píolóta áirithe a cheadú, cuirfear creat ar fáil chun a áirithiú go n‐eitleoidh píolótaí atá ina gcónaí san Aontas aerárthaí bunaithe ar cheadúnais/rátálacha arna n‐eisiúint i gcomhréir le rialacháin an Aontais faoi fhormhaoirseacht údaráis Bhallstáit an Aontais agus go ndéanfaidh siad a gcáilíochtaí a chothabháil agus a fhorbairt in eagraíochtaí oiliúna de chuid an Aontais. Ina theannta sin, rachaidh sé chun tairbhe go praiticiúil do líon mór píolótaí, atá ina gcónaí san Aontas agus sna Stáit Aontaithe, gan cur isteach ar shábháilteacht.

(7)

Foráiltear le hAirteagal 19.C den Chomhaontú go dtiocfaidh Iarscríbhinní aonair i bhfeidhm ar chinneadh ón mBord Déthaobhach Formhaoirseachta arna bhunú de bhun Airteagal 3 den Chomhaontú.

(8)

Is iomchuí an seasamh a bhunú atá le glacadh, thar ceann an Aontais, sa Bhord Déthaobhach Formhaoirseachta i gcomhréir le hAirteagal 4(3) de Chinneadh 2011/719/AE, i dtaca le Cinneadh Uimh. 0010 ón mBord Déthaobhach Formhaoirseachta lena ndéantar Iarscríbhinn 3 ar Cheadúnú Píolótaí a ghabhann leis an gComhaontú a oiriúnú i gcomhréir le hAirteagail 3.C.7 agus 19.C de.

(9)

Ba cheart, dá bhrí sin, seasamh an Aontais sa Bhord Déthaobhach Formhaoirseachta a bhunú ar dhréacht-Chinneadh Uimh. 0010 ón mBord Déthaobhach Formhaoirseachta agus ar an Dearbhú Compháirteach,