(1)

Cuireann an infheistíocht dhíreach choigríche leis an bhfás san Aontas trína iomaíochas a fheabhsú, trí phoist agus barainneachtaí scála a chruthú, trí chaipiteal, teicneolaíochtaí, nuálaíocht agus saineolas a thabhairt isteach léi agus trí mhargaí nua d'onnmhairí an Aontais a oscailt. Tacaíonn sí le cuspóirí an Phlean Infheistíochta don Eoraip agus cuireann sí le tionscadail agus le cláir eile de chuid an Aontais.

(2)

Le hAirteagal 3(5) den Chonradh ar an Aontas Eorpach (CAE), sonraítear go ndéanfaidh an tAontas, ina chaidreamh leis an domhan mór, a chuid luachanna agus leasanna a chumhdach agus a chur chun cinn agus rannchuideoidh sé le cosaint a shaoránach. Anuas air sin, tá timpeallacht oscailte don infheistíocht i réim san Aontas agus sna Ballstáit, atá cumhdaithe sa Chonradh ar Fheidhmiú an Aontais Eorpaigh (CFAE) agus leabaithe i ngealltanais idirnáisiúnta an Aontais agus a Bhallstát i ndáil le hinfheistíocht dhíreach choigríche.

(3)

De bhun na ngealltanas idirnáisiúnta a rinneadh san Eagraíocht Dhomhanda Trádála (EDT), san Eagraíocht um Chomhar agus Forbairt Eacnamaíochta, agus sna comhaontuithe trádála agus infheistíochta a tugadh i gcrích le tríú tíortha, tá an tAontas agus na Ballstáit in ann bearta sriantacha a ghlacadh maidir le hinfheistíocht dhíreach choigríche ar fhorais na slándála nó an oird phoiblí, faoi réir ceanglais áirithe. Is le hinfheistíochtaí dhíreacha coigríche isteach san Aontas a bhaineann an creat a bhunaítear leis an Rialachán seo. Is faoi ionstraimí beartais trádála agus infheistíochta eile a thugtar aghaidh ar infheistíocht amach agus ar rochtain ar mhargaí tríú tíortha.

(4)

Ní dochar an Rialachán seo do cheart na mBallstát maolú ón tsaorghluaiseacht chaipitil dá bhforáiltear i bpointe (b) d'Airteagal 65(1) CFAE. Tá bearta curtha i bhfeidhm ag roinnt Ballstát faoina bhféadfaidh siad srian a chur le gluaiseachtaí sin den chineál sin ar fhorais an bheartais phoiblí nó na slándála poiblí. Léiriú is ea na bearta sin ar chuspóirí agus ábhair imní na mBallstát i ndáil leis an infheistíocht dhíreach choigríche, agus d'fhéadfadh líon beart atá éagsúil ó thaobh raon feidhme agus nós imeachta i a bheith mar thoradh orthu. Ballstáit ar mian leo sásraí den chineál sin a chur i bhfeidhm amach anseo, d'fhéadfadh siad feidhmiú, taithí agus dea-chleachtais na sásraí atá ann cheana a chur san áireamh.

(5)

Ní ann, ar leibhéal an Aontais faoi láthair, do chreat cuimsitheach le hinfheistíochtaí díreacha coigríche a scagadh ar fhorais na slándála nó an oird phoiblí, cé go bhfuil creataí den sórt sin forbartha cheana féin ag príomhpháirtithe trádála an Aontais.

(6)

Tagann an infheistíocht dhíreach choigríche faoi réimse an chomhbheartais tráchtála. I gcomhréir le pointe (e) d'Airteagal 3(1) CFAE, is ag an Aontas atá an inniúlacht eisiach i dtaca leis an gcomhbheartas tráchtála.

(7)

Is den tábhacht deimhneacht dhlíthiúil a sholáthar i dtaca leis na sásraí um scagadh de chuid na mBallstát ar fhorais na slándála agus an oird phoiblí, agus comhordú agus comhar ar leibhéal an Aontais a áirithiú maidir le hinfheistíochtaí díreacha coigríche ar dócha go ndéanfaidh siad difear don tslándáil nó don ord poiblí. Is faoi na Ballstáit amháin atá sé a slándáil náisiúnta a choimirciú, mar a fhoráiltear in Airteagal 4(2) CAE agus ní dochar an creat comhchoiteann sin don mhéid sin. Ina theannta sin, ní dochar é do chosaint a leasanna bunúsacha slándála i gcomhréir le hAirteagal 346 CFAE.

(8)

Ba cheart, leis an gcreat maidir le hinfheistíochtaí díreacha coigríche a scagadh agus maidir le comhar, modh a chur ar fáil do Bhallstáit agus don Choimisiún chun aghaidh a thabhairt, go cuimsitheach, ar rioscaí don tslándáil agus don ord poiblí agus chun iad féin a chur in oiriúint do dhálaí athraitheacha, agus an tsolúbthacht is gá a chaomhnú do na Ballstáit, ag an am céanna, maidir le hinfheistíochtaí díreacha coigríche a scagadh ar fhorais na slándála agus an oird phoiblí, agus a sonraíochtaí sainiúla agus a ndálaí náisiúnta á gcur san áireamh. Leanfaidh an Ballstát lena mbaineann, agus an Ballstát sin amháin, de bheith freagrach as cinneadh a dhéanamh cibé acu a dhéanfar sásra um scagadh infheistíochta a chur ar bun nó infheistíocht dhíreach choigríche ar leith a scagadh.

(9)

Ba cheart raon leathan infheistíochtaí lena mbunaítear nó lena gcoinnítear ar bun naisc fhadtéarmacha dhíreacha idir infheisteoirí ó thríú tíortha lena n-áirítear eintitis Stáit, agus gnóthais a mbíonn gníomhaíocht eacnamaíoch ar siúl acu sna Ballstáit a chumhdaítear leis an Rialachán seo. Ba cheart, áfach, nach gcumhdódh sé infheistíocht punainne.

(10)

Ba cheart do na Ballstáit a bhfuil sásra um scagadh i bhfeidhm acu foráil a dhéanamh do na bearta riachtanacha, i gcomhréir le dlí an Aontais, chun aon dul timpeall ar a sásraí um scagadh agus ar a gcinntí maidir le scagadh. Ba cheart a chumhdach, leis sin, infheistíochtaí ar as críoch an Aontais a thagann siad agus a dhéantar trí bhíthin socruithe saorga nach léiriú ar an bhfíorchás eacnamaíoch iad agus a théann timpeall ar na sásraí um scagadh agus na cinntí maidir le scagadh, i gcás ina bhfuil an t-infheisteoir, ar deireadh, faoi úinéireacht nó faoi rialú duine nádúrtha nó gnóthas ó thríú tír. Ní dochar an méid sin don tsaoirse bhunaíochta agus do shaorghluaiseacht chaipitil atá cumhdaithe in CFAE.

(11)

Ba cheart go mbeadh sé indéanta do na Ballstáit rioscaí don tslándáil nó don ord poiblí, a eascraíonn as athruithe suntasacha ar an struchtúr úinéireachta nó ar phríomhghnéithe infheisteora coigríche, a mheasúnú.

(12)

D'fhonn treoir a thabhairt do na Ballstáit agus don Choimisiún maidir le cur i bhfeidhm an Rialacháin seo, is iomchuí liosta tosca a thabhairt a d'fhéadfaí a chur san áireamh agus é á chinneadh acu an dócha go ndéanfaidh infheistíocht dhíreach choigríche difear don tslándáil nó don ord poiblí. A bhuí leis an liosta sin, cuirfear feabhas freisin ar thrédhearcacht shásraí um scagadh de chuid na mBallstát d'infheisteoirí a bhfuil rún acu infheistíochtaí díreacha coigríche a dhéanamh san Aontas nó a rinne amhlaidh cheana. Ba cheart gur liosta neamh-uileghabhálach a bheadh fós sa liosta de thosca a d'fhéadfadh difear a dhéanamh don tslándáil nó don ord poiblí.

(13)

Agus cinneadh á dhéanamh acu an bhféadfaidh infheistíocht dhíreach choigríche difear a dhéanamh don tslándáil nó don ord poiblí, ba cheart go mbeadh sé indéanta ag na Ballstáit agus an Coimisiún cuimhneamh ar na tosca ábhartha uile, lena n-áirítear na héifeachtaí ar bhonneagar criticiúil, teicneolaíochtaí, eochairtheicneolaíochtaí cumasúcháin san áireamh, agus ionchuir atá riachtanach don tslándáil nó chun an t-ord poiblí a choimeád, agus as a dtiocfadh mórthionchar d'aon Bhallstát nó don Aontas dá ndéanfaí iad a shuaitheadh, a chailleadh, a dhíothú nó dá dteipfeadh orthu. I ndáil leis sin, ba cheart go mbeadh sé indéanta ag na Ballstáit agus an Coimisiún freisin comhthéacs agus imthosca na hinfheistíochta dírí coigríche a chur san áireamh, go háirithe i gcás ina mbeadh infheisteoir coigríche faoi rialú díreach nó indíreach tríú tír, mar shampla, trí bhíthin cistiú suntasach, lena n-áirítear fóirdheontais, nó ina mbeadh tionscadail nó cláir eachtracha, atá faoi stiúir an Stáit, á saothrú aige.

(14)

D'fhéadfadh na Ballstáit nó an Coimisiún a mheas, de réir mar is iomchuí, faisnéis ábhartha a fuarthas ó oibreoirí eacnamaíocha, ó eagraíochtaí na sochaí sibhialta, nó ó chomhpháirtithe sóisialta amhail ceardchumainn, a bhaineann le hinfheistíocht dhíreach choigríche ar dócha go ndéanfaidh sí difear don tslándáil nó don ord poiblí.

(15)

Is iomchuí eilimintí riachtanacha an chreata nós imeachta maidir le scagadh infheistíochtaí dírí coigríche arna dhéanamh ag Ballstát a leagan síos ionas go mbeidh tuiscint ag infheisteoirí, ag an gCoimisiún agus ag na Ballstáit eile ar an gcaoi ar dócha go ndéanfar infheistíochtaí den chineál sin a scagadh. Ba cheart a áireamh ar na heilimintí sin, ar a laghadh, creatanna ama le haghaidh an scagtha agus deis a bheith ag infheisteoirí coigríche cúlárach a iarraidh in aghaidh cinntí maidir le scagadh. Ba cheart rialacha agus nósanna imeachta a bhaineann le sásraí um scagadh a bheith trédhearcach agus níor cheart aon idirdhealú a dhéanamh leo idir tríú tíortha.

(16)

Ba cheart sásra a chur ar bun lena gcuirtear ar chumas na mBallstát comhoibriú agus cuidiú le chéile i gcás ina bhféadfadh infheistíocht dhíreach choigríche i mBallstát amháin difear a dhéanamh don tslándáil agus don ord poiblí i mBallstáit eile. Ba cheart go mbeadh sé indéanta ag na Ballstáit a bheith in ann barúlacha a chur ar fáil do Bhallstát ina bhfuil sé beartaithe infheistíocht dhíreach choigríche den sórt sin a dhéanamh nó ina ndearnadh an infheistíocht sin, is cuma sásra um scagadh a bheith i bhfeidhm ag an mBallstát sin, nó scagadh a bheith á dhéanamh aige ar infheistíocht den sórt sin. Ba cheart iarrataí ar fhaisnéis, freagraí agus barúlacha na mBallstát a chur ar aghaidh chuig an gCoimisiún freisin. Ba cheart é a bheith indéanta ag an gCoimisiún, más iomchuí, barúil a thabhairt uaidh de réir bhrí Airteagal 288 CFAE don Bhallstát ina bhfuil sé beartaithe an infheistíocht a dhéanamh nó ina ndearnadh an infheistíocht sin. Ba cheart go mbeadh sé indéanta ag Ballstát freisin a iarraidh ar an gCoimisiún tuairim a eisiúint nó a iarraidh ar Bhallstáit eile barúlacha a chur ar fáil maidir le hinfheistíocht dhíreach choigríche atá á déanamh ar a chríoch féin.

(17)

I gcás ina bhfaighidh Ballstát barúlacha ó Bhallstáit eile nó tuairim ón gCoimisiún, ba cheart aird iomchuí a thabhairt ar bharúlacha nó tuairimí den sórt sin, i gcás inarb iomchuí, de bhíthin bearta atá ar fáil faoina dhlí náisiúnta, nó maidir le ceapadh a bheartais i gcoitinne, i gcomhréir le dualgas an chomhair dhílis a leagtar síos in Airteagal 4(3) CAE.

Is ar an mBallstát ina bhfuil sé beartaithe an infheistíocht a dhéanamh nó ina ndearnadh an infheistíocht sin, agus ar an mBallstát sin amháin, a bheidh an fhreagracht an cinneadh deiridh a dhéanamh i dtaca le haon infheistíocht dhíreach choigríche ar a bhfuil scagadh á dhéanamh nó i dtaca le haon bhearta a ghlacfar maidir le hinfheistíocht dhíreach choigríche nach bhfuil scagadh á dhéanamh air.

(18)

Níor cheart an sásra comhair a úsáid ach chun an tslándáil nó an t-ord poiblí a chosaint. Chuige sin, ba cheart do na Ballstáit údar cuí a thabhairt le haon iarraidh a dhéanfaidh siad ar fhaisnéis maidir le hinfheistíocht dhíreach choigríche i mBallstát eile, agus le haon bharúil a sheolfaidh siad chuig an mBallstát sin. Ba cheart feidhm a bheith ag na ceanglais chéanna i gcás ina n-iarrann an Coimisiún faisnéis faoi infheistíocht dhíreach choigríche ar leith nó ina dtugann sé tuairim do Bhallstát. Ina theannta sin, is den tábhachtach go gcomhlíontar na ceanglais sin i gcás ina dtéann infheisteoir de chuid Ballstáit in iomaíocht le hinfheisteoirí tríú tíre chun infheistíocht a dhéanamh i mBallstát eile, amhail sócmhainní a fháil.

(19)

Ar a bharr sin, ba cheart é a bheith indéanta ag an gCoimisiún tuairim a thabhairt de réir bhrí 288 CFAE maidir le hinfheistíochtaí díreacha coigríche ar dócha go ndéanfaidh siad difear, ar fhorais na slándála nó an oird phoiblí do thionscadail nó do chláir atá chun leasa an Aontais. A bhuí leis sin bheadh uirlis ag an gCoimisiún le tionscadail agus cláir atá chun leasa an Aontais a chosaint, ar tionscadail agus cláir iad a fhónann don Aontas ina iomláine agus a chuireann leis an Aontas ar bhealach tábhachtach i dtaca le fás eacnamaíoch, poist agus iomaíochas de. Ba cheart a áireamh air sin go háirithe tionscadail nó cláir a fuair cistiú suntasach ón Aontas nó a bunaíodh le dlí an Aontais maidir le bonneagar criticiúil, teicneolaíochtaí criticiúla nó ionchuir chriticiúla. Ba cheart, na tionscadail nó na cláir sin atá chun leasa an Aontais a liostáil sa Rialachán seo. Ba cheart tuairim a chuirtear chuig Ballstát a chur go comhuaineach chuig na Ballstáit eile freisin.

Ba cheart don Bhallstát lánaird a thabhairt ar an tuairim sin a fuarthas ón gCoimisiún, i gcás inarb infheidhme, de bhíthin bearta atá ar fáil faoina dhlí náisiúnta, nó i gcás cheapadh a bheartais i gcoitinne, agus míniú a thabhairt don Choimisiún i gcás nach leanfaidh sé an tuairim sin, i gcomhréir le dualgas an chomhair dhílis atá air faoi Airteagal 4(3) CAE. Is ar an mBallstát a bhfuil infheistíocht dhíreach choigríche le déanamh nó déanta ann, agus ar an mBallstát sin amháin, a bheidh an fhreagracht an cinneadh deiridh i dtaca le haon infheistíocht dhíreach choigríche ar a bhfuil scagadh á dhéanamh nó aon bhearta a ghlactar maidir le hinfheistíocht dhíreach choigríche nach bhfuil scagadh á dhéanamh air.

(20)

Ionas gur féidir forbairtí a bhaineann le tionscadail agus cláir atá chun leasa an Aontais a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun liosta na dtionscadal agus na gclár atá chun leasa an Aontais a leagtar amach san Iarscríbhinn a ghabhann leis an Rialachán seo a leasú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (4). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus tá rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(21)

Ionas gur mó an deimhneacht a thabharfar do na hinfheisteoirí, ba cheart é a bheith indéanta ag na Ballstáit barúlacha a chur ar fáil agus ba cheart é a bheith indéanta ag an gCoimisiún tuairim a eisiúint maidir le hinfheistíochtaí a rinneadh nach bhfuil scagadh á dhéanamh orthu go ceann tréimhse atá teoranta do 15 mhí ó rinneadh an infheistíocht dhíreach choigríche sin. Níor cheart an sásra comhair a bheith infheidhme i gcás infheistíochtaí díreacha coigríche a rinneadh roimh 10 Aibreán 2019.

(22)

Ba cheart do na Ballstáit fógra a thabhairt don Choimisiún maidir lena sásraí um scagadh agus maidir le haon leasú orthu sin agus tuairisciú go rialta ar chur i bhfeidhm a sásraí um scagadh ar bhonn bliantúil, lena n-áirítear maidir le cinntí lena gcuirtear infheistíochtaí díreacha coigríche faoi réir coinníollacha nó bearta maolúcháin, maidir le cinntí lena gceadaítear sin nó lena dtoirmisctear sin, agus maidir leis na cinntí faoi infheistíochtaí díreacha coigríche ar dócha go ndéanfaidh siad difear do thionscadail nó do chláir atá chun leasa an Aontais. Ba cheart do na Ballstáit uile tuarascáil ar na hinfheistíochtaí díreacha coigríche a rinneadh ar a gcríoch féin a chur i láthair freisin ar bhonn na faisnéise atá ar fáil dóibh. D'fhonn feabhas a chur ar cháilíocht agus inchomparáideacht na faisnéise a chuirfidh na Ballstáit ar fáil mar aon le héascú a dhéanamh ar chomhlíonadh an fhógra agus na n-oibleagáidí tuairiscithe, cuirfidh an Coimisiún foirmeacha caighdeánacha ar fáil, agus breathnóidh siad, inter alia, ar fhoirmeacha ábhartha ar chun críche tuairisciú do Eurostat iad, i gcás inarb iomchuí.

(23)

D'fhonn éifeachtacht an tsásra comhair a áirithiú, is den tábhacht freisin íosleibhéal faisnéise agus comhordúcháin a áirithiú i ndáil le hinfheistíochtaí a thagann faoi raon feidhme an Rialacháin seo sna Ballstáit uile. Ba cheart do na Ballstáit an fhaisnéis sin a chur ar fáil maidir le hinfheistíochtaí díreacha coigríche ar a bhfuil scagadh á dhéanamh, mar aon leis, arna iarraidh sin, infheistíochtaí díreacha coigríche eile. Ba cheart a áirimh san fhaisnéis is ábhartha gnéithe amhail struchtúr úinéireachta an infheisteora coigríche agus maoiniú na hinfheistíochta atá le déanamh nó déanta, lena n-áirítear, nuair is ann di, faisnéis faoi mhaoiniú na hinfheistíochta lena n-áirítear fóirdheontais arna dtabhairt ag tríú tíortha. Ba cheart go bhféachfadh na Ballstáit le faisnéis chruinn chuimsitheach iontaofa a chur ar fáil.

(24)

Arna iarraidh sin do Bhallstát ina bhfuil sé beartaithe infheistíocht dhíreach choigríche a dhéanamh nó ina ndearnadh infheistíocht dhíreach choigríche, ba cheart don infheisteoir coigríche nó don ghnóthas lena mbaineann an fhaisnéis a iarradh a chur ar fáil. I gcás nach mbeidh Ballstát in ann an fhaisnéis sin a fháil, in ainneoin a dhícheall, de dheasca imthosca eisceachtúla, ba cheart dó fógra a thabhairt do na Ballstáit nó don Choimisiún gan mhoill. I gcás den sórt sin, aon bharúil a eiseoidh Ballstát eile nó aon tuairim a eiseoidh an Coimisiún faoi raon feidhme an tsásra comhair, ba cheart go mbeadh sé indéanta í a bhunú ar bhonn na faisnéise atá ar fáil dóibh.

(25)

Agus an fhaisnéis arna hiarraidh á cur ar fáil, beidh ar na Ballstát dlí an Aontais agus an dlí náisiúnta a chomhlíonann dlí an Aontais, a chomhlíonadh.

(26)

Ba cheart an chumarsáid agus an comhar ar leibhéal na mBallstát agus ar leibhéal an Aontais a fheabhsú trí phointe teagmhála a bhunú chun an Rialachán seo a chur chun feidhme i ngach Ballstát agus sa Choimisiún.

(27)

Ba cheart na pointí teagmhála arna mbunú ag na Ballstáit agus ag an gCoimisiún a chur laistigh den riarachán faoi seach ar bhealach iomchuí, agus ba cheart foireann cháilithe a bheith acu mar aon leis na cumhachtaí is gá chun a gcuid feidhmeanna a fheidhmiú faoin sásra um chomhordú agus chun láimhseáil cheart faisnéise rúnda a áirithiú.

(28)

Ba cheart do ghrúpa saineolaithe an Choimisiúin, arb iad atá ann ionadaithe ó na Ballstáit, tacú le forbairt agus le cur chun feidhme beartas cuimsitheach éifeachtach maidir le hinfheistíochtaí díreacha coigríche isteach san Aontas Eorpach, arna bhunú le Cinneadh an 29 Samhain 2017 ón gCoimisiún (5). a scagadh. Ba cheart don ghrúpa sin saincheisteanna a bhaineann le hinfheistíochtaí díreacha coigríche a scagadh a phlé, go háirithe, dea-chleachtais agus ceachtanna a fhoghlaimíodh a roinnt, agus tuairimí faoi threochtaí agus saincheisteanna leasa choitinn a bhaineann le hinfheistíochtaí díreacha coigríche a mhalartú agus saincheisteanna sistéamacha i ndáil leis an Rialachán seo a chur chun feidhme a mheas. Ba cheart don Choimisiún a bhreithniú a dhéanamh i dtaca le dul i gcomhairle leis an ngrúpa saineolaithe i dtaca le dréachtghníomhartha tarmligthe i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr.

(29)

Ba cheart na Ballstáit agus an Coimisiún a spreagadh chun obair i gcomhar le húdaráis fhreagracha na dtríú tíortha atá ar aon intinn maidir le saincheisteanna a bhaineann le hinfheistíochtaí díreacha coigríche ar dócha go ndéanfaidís difear don tslándáil dó don ord poiblí, a scagadh. Ba cheart í a bheith mar aidhm leis an comhar riaracháin sin éifeachtacht an chreata a neartú lena ndéanfaidh na Ballstáit scagadh ar infheistíochtaí díreacha coigríche agus lena ndéanfar comhar de bhun an Rialacháin seo idir na Ballstáit agus an Coimisiún. Ba cheart go mbeadh sé indéanta don Choimisiún faireachán a dhéanamh ar a dtarlaíonn maidir le sásraí um scagadh i dtríú tíortha freisin.

(30)

Ba cheart do na Ballstáit agus don Choimisiún na bearta uile is gá a ghlacadh chun cosaint na faisnéise rúnda agus na faisnéise íogaire eile a áirithiú i gcomhréir, go háirithe, le Cinneadh (AE, Euratom) 2015/443 ón gCoimisiún (6), Cinneadh (AE, Euratom) 2015/444 ón gCoimisiún (7) agus an Comhaontú idir Ballstáit an Aontais Eorpaigh, ag teacht le chéile dóibh i dtionól na Comhairle, maidir le cosaint faisnéise rúnaicmithe a mhalartaítear ar mhaithe le leas an Aontais Eorpaigh (8). Áirítear leis seo, go háirithe, an oibleagáid gan faisnéis rúnaicmithe a íosghrádú nó a scaoileadh ón rúnaicmiú gan toiliú i scríbhinn roimh ré ón tionscnóir (9). Aon fhaisnéis atá de chineál íogair ach nach bhfuil rúnaicmithe nó aon fhaisneis a chuirtear ar fáil ar bhonn rúnda, ba cheart do na húdaráis í a láimhseáil amhlaidh.

(31)

Ba cheart aon phróiseáil sonraí pearsanta de bhun an Rialacháin seo a bheith i gcomhréir leis na rialacha is infheidhme maidir le cosaint sonraí pearsanta. Ba cheart do na pointí teagmhála agus do na heintitis eile laistigh de na Ballstáit próiseáil sonraí pearsanta a dhéanamh i gcomhréir le Rialachán (AE) Uimh. 2016/679 ó Pharlaimint na hEorpa agus ón gComhairle (10). Ba cheart don Choimisiún próiseáil sonraí pearsanta a dhéanamh i gcomhréir le Rialachán (AE) 2018/1725 ó Pharlaimint na hEorpa agus ón gComhairle (11).

(32)

Ar bhonn, inter alia, na dtuarascálacha arna dtíolacadh ag na Ballstáit go léir, agus aird chuí á tabhairt ar chineál rúnda faisnéise áirithe a áirítear sna tuarascálacha sin, ba cheart don Choimisiún tuarascáil bhliantúil a dhréachtú maidir le cur chun feidhme an Rialacháin seo agus í a chur faoi bhráid Pharlaimint na hEorpa agus na Comhairle. De ghrá na trédhearcachta, ba cheart an tuarascáil a chur ar fáil don phobal.

(33)

Ba cheart an deis a bheith ag Parlaimint na hEorpa a iarraidh ar an gCoimisiún teacht chuig cruinniú dá coiste atá freagrach chun saincheisteanna sistéamacha a bhaineann le cur chun feidhme an Rialacháin seo a chur i láthair agus a mhíniú.

(34)

Faoin 12 Deireadh Fómhair 2023 agus gach 5 bliana ina dhiaidh sin, ba cheart don Choimisiún meastóireacht a dhéanamh ar fheidhmiú agus éifeachtacht an Rialacháin seo agus tuarascáil a chur faoi bhráid Pharlaimint na hEorpa agus na Comhairle. Ba cheart a mheasúnú sa tuarascáil sin an éilítear leasú ar an Rialachán seo. I gcás ina moltar sa tuarascáil sin go leasófaí an Rialachán seo, féadfaidh, más iomchuí, togra reachtach a bheith ag gabháil leis.

(35)

Ba cheart don Aontas agus do na Ballstáit an Rialachán seo a chur chun feidhme i gcomhréir leis na ceanglais ábhartha maidir le bearta sriantacha a fhorchur ar fhoras na slándála agus an oird phoiblí atá i gcomhaontuithe EDT, lena n-áirítear, go háirithe Airteagal XIV (a) agus Airteagal XIV bis den Chomhaontú Ginearálta maidir le Trádáil Seirbhísí (12) (GATS). Ba cheart dó dlí an Aontais a chomhlíonadh freisin agus ba cheart é a bheith i gcomhréir leis na gealltanais a tugadh faoi chomhaontuithe eile trádála agus infheistíochta ar comhpháirtithe iontu iad an tAontas nó na Ballstáit agus faoi chomhshocruithe trádála agus infheistíochta inar páirtithe iad an tAontas agus na Ballstáit.

(36)

Más é atá san infheistíocht dhíreach choigríche comhchruinniú a thagann faoi raon feidhme Rialachán (CE) Uimh. 139/2004 (13) ón gComhairle, ba cheart nár dhochar cur chun feidhme an Rialacháin seo do chur i bhfeidhm Airteagal 21(4) de Rialachán (CE) Uimh. 139/2004. Ba cheart an Rialachán seo agus Airteagal 21(4) de Rialachán (CE) Uimh. 139/2004 a chur i bhfeidhm ar bhealach comhsheasmhach. A mhéid atá raon feidhme an dá rialachán sin, faoi seach, ag forluí ar a chéile, ba cheart na forais atá leis an scagadh a leagtar amach in Airteagal 1 den Rialachán seo agus coincheap na leasanna dlisteanacha de réir bhrí na tríú míre d'Airteagal 21(4) de Rialachán (CE) Uimh. 139/2004, ba cheart iad a léiriú ar bhealach comhleanúnach, gan dochar don mheasúnú ar a mhéid atá na bearta náisiúnta atá dírithe ar na leasanna sin a chosaint comhoiriúnach do phrionsabail ghinearálta dhlí an Aontais agus d'fhorálacha eile de dhlí an Aontais.

(37)

Ní dhéanann an Rialachán seo difear do rialacha an Aontais maidir le measúnú stuamachta ar shealúchais cháilitheacha san earnáil airgeadais a fháil, ar nós imeachta ar leith é lena bhfuil cuspóir sonrach (14).

(38)

Tá an Rialachán seo comhsheasmhach leis na nósanna imeachta eile um fhógra a thabhairt agus um scagadh arna leagan amach i ndlí earnálach an Aontais agus ní dochar dóibh é,

(1)

ciallaíonn “infheistíocht dhíreach choigríche” infheistíocht d'aon sórt arna déanamh ag infheisteoir coigríche atá dírithe ar naisc fhadtéarmacha dhíreacha a bhunú nó a choinneáil ar bun idir an t-infheisteoir coigríche agus an fiontraí dá gcuirtear an caipiteal ar fáil chun gníomhaíocht eacnamaíoch a dhéanamh i mBallstát, lena n-áirítear infheistíochtaí a chumasaíonn rannpháirtíocht éifeachtach i mbainistiú nó i rialú cuideachta atá i mbun gníomhaíocht eacnamaíoch;

(2)

ciallaíonn “infheisteoir coigríche” duine nádúrtha de chuid tríú tír nó gnóthas de chuid tríú tír, a bhfuil sé ar intinn aige infheistíocht dhíreach choigríche a dhéanamh nó a bhfuil infheistíocht dhíreach choigríche déanta aige;

(3)

ciallaíonn “scagadh” nós imeachta lenar féidir infheistíochtaí díreacha coigríche a mheasúnú, a imscrúdú, a údarú, coinníollacha a chur leo, iad a thoirmeasc nó a leachtú;

(4)

ciallaíonn “sásra um scagadh” ionstraim a bhfuil feidhm ghinearálta aici, amhail dlí nó rialachán, agus ceanglais riaracháin, rialacha cur chun feidhme nó treoirlínte a ghabhann leo, lena leagtar amach na téarmaí, na coinníollacha agus na nósanna imeachta maidir le hinfheistíochtaí díreacha coigríche a mheasúnú, a imscrúdú, a údarú, a thoirmeasc nó a leachtú, nó maidir le coinníoll a fhorchur i leith infheistíochtaí dhíreacha coigríche, ar fhorais na slándála nó an oird phoiblí;

(5)

ciallaíonn “infheistíocht dhíreach choigríche ar a bhfuil scagadh á déanamh” infheistíocht dhíreach choigríche ar a bhfuil measúnú nó imscrúdú foirmiúil á dhéanamh de bhun sásra um scagadh;

(6)

ciallaíonn “cinneadh maidir le scagadh” beart arna ghlacadh i dtaca le sásra um scagadh a chur i bhfeidhm;

(7)

ciallaíonn “gnóthas de chuid tríú tír” gnóthas arna chomhdhéanamh nó arna eagrú ar bhealach eile faoi dhlíthe tríú tír.