(1)

An 29 Márta 2017, chuir an Ríocht Aontaithe isteach fógra á rá go raibh rún aici tarraingt siar as an Aontas de bhun Airteagal 50 den Chonradh ar an Aontas Eorpach (CAE). Scoirfidh na Conarthaí d'fheidhm a bheith acu maidir leis an Ríocht Aontaithe ó dháta theacht i bhfeidhm an chomhaontaithe um tharraingt siar nó, ina éagmais sin, 2 bhliain tar éis an fhógra sin, i.e. ón 30 Márta 2019, mura rud é go gcinneann an Chomhairle Eorpach d'aon toil, i gcomhaontú leis an Ríocht Aontaithe, an tréimhse sin a fhadú.

(2)

Maidir leis an gcomhaontú um tharraingt siar, mar a comhaontaíodh ag na hidirbheartaithe, forálfaidh sé do shocruithe a cheadaíonn forálacha dhlí an Aontais a chur i bhfeidhm i leith na Ríochta Aontaithe agus sa Ríocht Aontaithe i ndiaidh an dáta a thiocfaidh deireadh le feidhm a bheith ag na Conarthaí i leith na Ríochta Aontaithe agus sa Ríocht Aontaithe. Má thagann an comhaontú sin i bhfeidhm, beidh feidhm ag reachtaíocht cineálcheadaithe an Aontais i leith na Ríochta Aontaithe agus sa Ríocht Aontaithe le linn na hidirthréimhse i gcomhréir leis an gcomhaontú sin agus scoirfidh an reachtaíocht sin d'fheidhm a bheith aici ag deireadh na tréimhse sin.

(3)

Bunaíodh creat reachtaíochta cuimsitheach an Aontais maidir le cineálcheadú le Treoir 2007/46/CE ó Pharlaimint na hEorpa agus ón gComhairle (3), Rialachán (AE) Uimh. 167/2013 ó Pharlaimint na hEorpa agus ón gComhairle (4), Rialachán (AE) Uimh. 168/2013 ó Pharlaimint na hEorpa agus ón gComhairle (5) agus Rialachán (AE) 2016/1628 ó Pharlaimint na hEorpa agus ón gComhairle (6).

(4)

Leis na gníomhartha sin, is faoi na monaróirí féin atá sé an t-údarás cineálcheadaithe a roghnú óna bhfaighidh siad cineálcheadú, rud a fhágann go mbíonn siad in ann feithiclí, córais, comhpháirteanna agus aonaid theicniúla ar leithligh a chur ar mhargadh an Aontais.

(5)

Is é an éifeacht a bheadh ag tarraingt siar na Ríochta Aontaithe ón Aontas, in éagmais aon fhorálacha speisialta, ná nach bhféadfaí rochtain ar mhargadh an Aontais a áirithiú a thuilleadh do chineálcheaduithe CE agus cineálcheaduithe AE a ndearna údarás cineálcheadaithe na Ríochta Aontaithe (“údarás cineálcheadaithe na Ríochta Aontaithe”) iad a dheonú roimhe sin, i gcomhréir le gníomhartha rialála an Aontais. Tá cineálcheaduithe den sórt sin freisin ag monaróirí atá bunaithe i mBallstáit seachas an Ríocht Aontaithe. Cé gur féidir feithiclí, córais, comhpháirteanna agus aonaid theicniúla ar leithligh atá cineálcheadaithe ag an Ríocht Aontaithe, i gcomhréir le gníomhartha rialála an Aontais, a chur ar mhargadh an Aontais go dtí go scoirfidh reachtaíocht cineálcheadaithe an Aontais d'fheidhm a bheith aige i leith na Ríochta Aontaithe agus sa Ríocht Aontaithe, is gá forálacha speisialta a bhunú chun éascaíocht a dhéanamh ar na feithiclí, córais, comhpháirteanna agus aonaid theicniúla ar leithligh sin a chur ar an margadh i ndiaidh an dáta sin.

(6)

Faoi láthair, ní fhoráiltear le reachtaíocht an Aontais maidir le cineálcheadú don deis cineálacha a ceadaíodh cheana in áit eile san Aontas a athcheadú. Ba cheart, áfach, go mbeadh monaróirí in ann leanúint d'fheithiclí, córais, comhpháirteanna agus aonaid theicniúla ar leithligh, a bhí bunaithe roimhe sin ar chineálcheaduithe a bhí deonaithe ag údarás cineálcheadaithe na Ríochta Aontaithe, a tháirgeadh agus leanúint de na feithiclí, córais, comhpháirteanna agus aonaid theicniúla ar leithligh sin a chur ar mhargadh an Aontais. Dá bhrí sin, is gá cineálcheaduithe a thabhairt do mhonaróirí ceaduithe nua a fháil ó údaráis cineálcheadaithe na mBallstát seachas an Ríocht Aontaithe.

(7)

Ba cheart a áirithiú freisin leis an Rialachán seo go leanfaidh monaróirí den tsaoirse is mó is féidir a bheith acu chun údarás cineálcheadaithe eile de chuid an Aontais a roghnú. Go háirithe, ba cheart nach mbeadh an rogha sin atá ag an monaróir ag brath ar thoiliú údarás cineálcheadaithe na Ríochta Aontaithe nó ar aon socruithe a bheith ann idir údarás cineálcheadaithe na Ríochta Aontaithe agus an t-údarás cineálcheadaithe nua de chuid an Aontais.

(8)

Chun an deimhneacht dhlíthiúil is gá a sholáthar do na geallsealbhóirí uile lena mbaineann agus chun cothrom iomaíochta a áirithiú do mhonaróirí, is gá coinníollacha is infheidhme sna Ballstáit uile a leagan síos ar dhóigh thrédhearcach.

(9)

Chun gur féidir leanúint de na feithiclí, na córais, na comhpháirteanna agus na haonaid theicniúla ar leithligh a tháirgeadh agus iad a chur ar an margadh, is é ba cheart a bheith sna ceanglais a bheidh le comhlíonadh ag na cineálacha sin ionas go bhfaighidh siad ceadú ó údarás Ballstáit seachas an Ríocht Aontaithe ná na ceanglais is infheidhme maidir le feithiclí, córais, comhpháirteanna agus aonaid theicniúla ar leithligh nua a chur ar an margadh agus níor cheart na ceanglais is infheidhme maidir le cineálacha nua a bheith san áireamh.

(10)

Na ceanglais maidir le feithiclí, córais, comhpháirteanna agus aonaid theicniúla ar leithligh nua, tá feidhm acu ar an gcaoi chéanna maidir le monaróirí a bhfuil cineálcheaduithe acu a dheonaigh Ballstáit seachas an Ríocht Aontaithe. Trí na ceanglais chéanna a leagan síos maidir le cineálacha a cheadú faoin Rialachán seo maidir le feithiclí, córais, comhpháirteanna agus aonaid theicniúla ar leithligh nua a chur ar an margadh, tá mar aidhm leis cóir chomhionann a áirithiú idir monaróirí a ndéanfaidh tarraingt siar na Ríochta Aontaithe difear dóibh agus monaróirí a bhfuil cineálcheaduithe acu a dheonaigh Ballstáit seachas an Ríocht Aontaithe.

(11)

Aon ní atá sa Rialachán seo, níor cheart go ndéanfadh sé cosc a chur ar mhonaróir feithicle iarratas a dhéanamh ar bhonn deonach ar cheadú ón Aontas i leith cineál feithicle a ceadaíodh roimhe sin sa Ríocht Aontaithe, mar gheall ar cheanglais áirithe is infheidhme maidir le cineálacha nua córas, comhpháirteanna nó aonad teicniúil ar leithligh i gcás ina leanann an cineál feithicle de bheith comhionann ar gach dóigh leis an gcineál a ceadaíodh sa Ríocht Aontaithe.

(12)

Maidir le cineálcheaduithe a lorgaítear i dtaobh cineálacha nua feithiclí, córas, comhpháirteanna nó aonad teicniúil ar leithligh, ba cheart nach dtiocfaidís faoi raon feidhme an Rialacháin seo.

(13)

Ba cheart go bhféadfadh na cineálcheaduithe a dheonaítear ar bhonn an Rialacháin seo a bheith bunaithe ar na tuarascálacha tástála a cuireadh isteach cheana chun críocha cineálcheaduithe a fháil sa Ríocht Aontaithe, más rud é nár tháinig athrú ar na ceanglais a bhí mar bhonn leis na tuarascálacha tástála sin. Chun go gceadófaí leanúint d'úsáid a bhaint as na tuarascálacha tástála arna n-eisiúint ag an tseirbhís theicniúil ar thug an Ríocht Aontaithe fógra ina leith, ba cheart don Rialachán seo foráil a dhéanamh do dhíolmhú ón gceanglas nach mór don údarás a dheonaíonn cineálcheadú an tseirbhís theicniúil sin a ainmniú agus fógra a thabhairt ag an mBallstát don Choimisiún ina leith. Ionas go gcuimseofar freisin an t-am ar lena linn a bheidh reachtaíocht cineálcheadaithe an Aontais scortha de bheith infheidhme i leith na Ríochta Aontaithe agus sa Ríocht Aontaithe, ba cheart don Rialachán seo freisin foráil do dhíolmhú ó na ceanglais shonracha a bhaineann le seirbhísí teicniúla tríú tíortha a ainmniú agus fógra a thabhairt ina leith.

(14)

Ag an am céanna, ós rud é go mbeidh údaráis cheadaithe de chuid an Aontais freagrach go hiomlán as cineálcheaduithe nua an Aontais a dheonóidh siad, ba cheart an lánrogha a bheith acu a éileamh go ndéanfaí tástálacha nua ar aon ghné den chineálcheadú de réir mar is cuí leo.

(15)

Sa mhéid is nach bhforálann an Rialachán seo dá mhalairt, ba cheart go leanfadh na rialacha ginearálta maidir le cineálcheadú CE agus cineálcheadú AE d'fheidhm a bheith acu.

(16)

Ba cheart a chur san áireamh nach dtagann deireadh leis an ról a thugtar d'údaráis cineálcheadaithe nuair a tháirgtear feithicil, córas, comhpháirt nó aonad teicniúil ar leithligh, nó nuair a chuirtear ar an margadh iad, ach go leanann sé ar feadh roinnt blianta tar éis na feithiclí, córais, comhpháirteanna agus aonaid theicniúla ar leithligh sin a bheith curtha ar an margadh. Tá feidhm aige sin, go háirithe, maidir le hoibleagáidí comhréireachta inseirbhíse i dtaca le feithiclí a thagann faoi Threoir 2007/46/CE agus a mhéid a bhaineann le hoibleagáidí faisnéise i dtaobh deisiú agus cothabhála agus aisghlaonna féideartha i dtaca le feithiclí, córais, comhpháirteanna agus aonaid theicniúla ar leithligh a thagann faoi Threoir 2007/46/CE, Rialachán (AE) Uimh. 167/2013, Rialachán (AE) Uimh. 168/2013 nó Rialachán (AE) 2016/1628. Dá bhrí sin, ní mór don údarás a dheonaíonn cineálcheadú an Aontais i gcomhréir leis an Rialachán seo na hoibleagáidí sin a ghabháil air féin freisin i dtaca le feithiclí, córais, comhpháirteanna agus aonaid theicniúla ar leithligh atá bunaithe ar an gcineál céanna agus a cuireadh ar margadh an Aontais cheana ar bhonn cineálcheadaithe na Ríochta Aontaithe chun a áirithiú gurb ann d'údarás cineálcheadaithe freagrach.

(17)

Nuair a bhaineann monaróirí úsáid as na nósanna imeachta a leagtar amach sa Rialachán seo, d'fhéadfadh sé go dtiocfadh cineálcheadú na Ríochta Aontaithe atá acu chun bheith neamhbhailí sula scoirfidh reachtaíocht cineálcheadaithe an Aontais d'fheidhm a bheith aici i leith na Ríochta Aontaithe agus sa Ríocht Aontaithe mar gheall air go ndearnadh cineálcheadú an Aontais a dheonú don chineál céanna. Ós rud é nár cheart go mbeadh monaróirí faoi mhíbhuntáiste de bharr gur bhaineadar úsáid as an Rialachán seo, ba cheart cead a thabhairt an stoc d'fheithiclí, de chórais, de chomhpháirteanna agus d'aonaid theicniúla ar leithligh atá comhlántach agus a táirgeadh ar bhonn cineálcheadú ón Ríocht Aontaithe a chur ar an margadh, a chlárú agus a chur i mbun seirbhíse ón uair a bheidh cineálcheadú nua ón Aontas faighte ag na monaróirí agus chomh fada agus a leanann reachtaíocht cineálcheadaithe an Aontais d'fheidhm a bheith aici i leith na Ríochta Aontaithe agus sa Ríocht Aontaithe, ar an gcoinníoll go leanann na feithiclí, córais, comhpháirteanna agus aonaid theicniúla ar leithligh sin de cheanglais ghinearálta na ngníomhartha a liostaítear in Airteagal 1 a chomhlíonadh. Ós rud é go bhféadfadh difríocht a bheith idir na hamanna a tharlaíonn cur ar an margadh, clárú agus dul i mbun seirbhíse, ba cheart an t-am a tharlaíonn an chéad cheann de na céimeanna sin a úsáid chun a chinntiú na teorainneacha ama a leagtar amach sa Rialachán seo.

(18)

Ní mór freisin go ngabhfadh údarás cineálcheadaithe de chuid an Aontais oibleagáidí áirithe chucu féin i dtaca le feithiclí, córais, comhpháirteanna agus aonaid theicniúla ar leithligh a cuireadh ar an margadh ar bhonn cineálcheaduithe na Ríochta Aontaithe ach nach bhfuil bailí a thuilleadh de bhun Airteagal 17 de Threoir 2007/46/CE, Airteagal 32 de Rialachán (AE) Uimh. 167/2013, Airteagal 37 de Rialachán (AE) Uimh. 168/2013 nó Airteagal 30 de Rialachán (AE) 2016/1628 nó nach bhfuil cineálcheadú á iarraidh ina leith. Chun a áirithiú gurb ann d'údarás cineálcheadaithe de chuid an Aontais freagrach, ba cheart a cheangal ar mhonaróirí a iarraidh ar údarás cineálcheadaithe an Aontais atá ann chun cineálacha a ceadaíodh roimhe sin sa Ríocht Aontaithe a cheadú oibleagáidí a ghabháil chucu féin i dtaca le haisghlaonna, faisnéis deisithe agus chothabhála agus seiceálacha comhréireachta inseirbhíse i ndáil lena bhfeithiclí, a gcórais, a gcomhpháirteanna agus a n-aonaid theicniúla ar leithligh atá bunaithe ar chineálacha eile agus atá curtha ar mhargadh an Aontais cheana. Chun méid na n-oibleagáidí a ghabhfaidh údarás cineálcheadaithe de chuid an Aontais chuige féin a theorannú, ba cheart nach mbeadh na hoibleagáidí sin bainteach ach le feithiclí, córais, comhpháirteanna agus aonaid theicniúla ar leithligh atá bunaithe ar chineálcheaduithe na Ríochta Aontaithe a deonaíodh tar éis an 1 Eanáir 2008.

(19)

Maidir le cinntí na n-údarás náisiúnta a rinneadh i gcomhréir le hAirteagal 27(3) de Threoir 2007/46/CE, Airteagal 39(3) de Rialachán (AE) Uimh. 167/2013 nó Airteagal 44(3) de Rialachán (AE) Uimh. 168/2013, ar cinntí iad a cheadaíonn feithiclí ceann sraithe, a bhí i gcomhréir le cineál a mbeidh a chineálcheadú ón Ríocht Aontaithe tagtha chun bheith neamhbhailí roimh an lá a scoirfidh reachtaíocht cineálcheadaithe an Aontais de bheith infheidhme i leith na Ríochta Aontaithe agus sa Ríocht Aontaithe, a chur ar an margadh, a chlárú, a dhíol nó a chur i mbun seirbhíse, ba cheart go mbeidís fós infheidhme fad atá feidhm fós ag reachtaíocht cineálcheadaithe an Aontais i leith na Ríochta Aontaithe agus sa Ríocht Aontaithe.

(20)

Na díolúintí agus na forálacha idirthréimhseacha is infheidhme maidir le hinnill nó feithiclí agus soghluaiste nach innealra bóthair é, ina bhfuil innill den sórt sin suiteáilte iontu mar a leagtar amach in Airteagal 10(7) de Threoir 97/68/CE, Airteagal 34(7) agus (8) nó Airteagal 58(5) go (11) de Rialachán (AE) 2016/1628, agus i ngníomhartha a glacadh ar bhonn Airteagal 19(6), Airteagal 20(8), Airteagal 28(6) agus Airteagal 53(12) de Rialachán (AE) Uimh. 167/2013 agus a cheadaíonn innill, feithiclí agus soghluaiste nach innealra bóthair é den sórt sin a chur ar an margadh gan gá a bheith le cineálcheadú bailí, ba cheart go leanfaidís d'fheidhm a bheith acu.

(21)

Ós rud é nach féidir leis na Ballstáit cuspóir an Rialacháin seo, eadhon Treoir 2007/46/CE, Rialachán (AE) Uimh. 167/2013, Rialachán (AE) Uimh. 168/2013 agus Rialachán (AE) 2016/1628 a chomhlánú le rialacha speisialta a bhaineann le tarraingt siar na Ríochta Aontaithe ón Aontas, a ghnóthú go leordhóthanach agus, de bharr a fhairsinge agus éifeachtaí an Rialacháin seo, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta mar a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(22)

Chun go bhféadfaidh monaróirí na bearta is gá a dhéanamh chun ullmhúchán a dhéanamh gan mhoill do tharraingt siar na Ríochta Aontaithe a mhéid a bhaineann le reachtaíocht de chuid an Aontais maidir le cineálcheadú, ba cheart don Rialachán seo teacht i bhfeidhm ar an tríú lá tar éis a fhoilsithe in Iris Oifigiúil an Aontais Eorpaigh,