12003TN04/04



Official Journal L 236 , 23/09/2003 P. 0798 - 0798


4. AN TALMHAÍOCHT

An Conradh ag bunú an Chomhphobail Eorpaigh, Cuid a Trí, Teideal II, Talmhaíocht

1. Is é an Comhphobal a ghabhfaidh chuige féin stoic phoiblí atá á sealbhú ag na Ballstáit nua de thairbhe a mbeartas tacaíochta do mhargaí ag an luach a leanann ó chur i bhfeidhm Airteagal 8 de Rialachán (CEE) Uimh. 1833/88 ón gComhairle ag leagan síos rialacha ginearálta do mhaoiniú idirghabhála ag Roinn Treoraíochta an Chiste Eorpaigh um Threoraíocht agus Ráthaíocht Talmhaíochta [2]. Ní ghabhfar na stoic a dúradh ach ar choinníoll go bhforáiltear i rialacha an Chomhphobail d'idirghabháil phoiblí do na táirgí i dtrácht agus go gcomhallann na stoic ceanglais idirghabhála an Chomhphobail.

2. Ní foláir do na Ballstáit nua aon stoc de tháirgí, príobháideach mar aon le poiblí, atá ar saorchúrsaíocht laistigh de chríoch na mBallstát nua ar dháta an aontachais agus a théann thar an gcainníocht ba inmheasta mar ghnáthstoc le tabhairt anonn a dhíchur ar a gcostas féin.

Déanfar an coincheap faoi ghnáthstoic le tabhairt anonn a shainiú do gach táirge i bhfianaise na gcritéar agus na gcuspóirí is sonrach do gach comheagraíocht mhargaidh.

3. Déanfar na stoic dá dtagraítear i mír 1 a asbhaint ón gcainníocht a théann thar an ngnáthstoc le tabhairt anonn.

4. Déanfaidh an Coimisiún na socruithe atá tuairiscithe thuas a chur chun feidhme agus a chur i bhfeidhm i gcomhréir leis an nós imeachta atá leagtha síos in Airteagal 13 de Rialachán (CE) Uimh. 1258/1999 ón gComhairle maidir le maoiniú an chomhbheartais talmhaíochta [3] nó, mar is iomchuí, i gcomhréir leis an nós imeachta dá dtagraítear in Airteagal 42(2) de Rialachán (CE) Uimh. 1260/2001 ón gComhairle maidir le comheagraíocht na margaí in earnáil an tsiúcra [4], nó, mar is iomchuí, sna hAirteagail chomhfhreagracha de na Rialacháin eile maidir le comheagraíocht na margaí talmhaíochta nó i gcomhréir leis an nós imeachta coiste ábhartha mar a chinntear sa reachtaíocht is infheidhme.

An Conradh ag bunú an Chomhphobail Eorpaigh, Cuid a Trí, Teideal VI, Caibidil 1, Rialacha Iomaíochta

Gan dochar do na nósanna imeachta a bhaineann le cabhair atá ann dá bhforáiltear in Airteagal 88 de Chonradh CE, measfar faoi réir na gcoinníollacha seo a leanas gur cabhair atá ann de réir bhrí Airteagal 88(1) de Chonradh CE scéimeanna cabhrach agus cabhair leithleach arna ndeonú do ghníomhaíochtaí atá nasctha le táirgí atá liostaithe in Iarscríbhinn I a ghabhann le Conradh CE a tháirgeadh, a phróiseáil agus a mhargú, amach ó tháirgí iascaigh agus táirgí arna ndíorthú uathu, arna gcur i gcrích i mBallstát nua roimh dháta an aontachais agus atá fós infheidhme tar éis an dáta sin,

- cuirfear na bearta cabhrach in iúl don Choimisiún laistigh de cheithre mhí ó dháta an aontachais. Beidh sa chumarsáid faisnéis faoin mbunús dlí atá ag gach beart. Bearta cabhrach atá ann agus pleananna chun cabhracha a dheonú nó a athrú arna gcur in iúl don Choimisiún roimh dháta an aontachais, measfar go bhfuil siad curtha in iúl ar dháta an aontachais. Foilseoidh an Coimisiún liosta de chabhracha den sórt sin.

Measfar gur cabhair "atá ann" de réir bhrí Airteagal 88(1) de Chonradh CE na bearta cabhrach sin go dtí deireadh an tríú bliain tar éis an aontachais.

Modhnóidh na Ballstáit nua na bearta cabhrach sin, nuair is gá, chun na treoirlínte a chomhlíonadh arna gcur i bhfeidhm ag an gCoimisiún faoi cheann dheireadh an tríú bliain tar éis dháta an aontachais ar a dhéanaí. Tar éis an dáta sin, measfar gur cabhair nua aon chabhair a fhaightear nach bhfuil ag luí leis na treoirlínte sin.

[2] IO L 216, 5.8.1978, lch. 1.

[3] IO L 160, 26.6.1999, lch. 103.

[4] IO L 178, 30.6.2001, lch. 1.

--------------------------------------------------