Is áis doiciméadúcháin amháin an téacs seo agus níl aon éifeacht dhlíthiúil aige. Ní ghabhann institiúidí an Aontais aon dliteanas orthu féin i leith inneachar an téacs. Is iad na leaganacha de na gníomhartha a foilsíodh in Iris Oifigiúil an Aontais Eorpaigh agus atá ar fáil ar an suíomh gréasáin EUR-Lex na leaganacha barántúla de na gníomhartha ábhartha, brollach an téacs san áireamh. Is féidir teacht ar na téacsanna oifigiúla sin ach na naisc atá leabaithe sa doiciméad seo a bhrú

TREOIR (AE) 2024/1799 Ó PHARLAIMINT NA hEORPA AGUS ÓN gCOMHAIRLE

an 13 Meitheamh 2024

maidir le rialacha comhchoiteanna lena gcuirtear deisiú earraí chun cinn agus lena leasaítear Rialachán (AE) 2017/2394 agus Treoracha (AE) 2019/771 agus (AE) 2020/1828

(Téacs atá ábhartha maidir le LEE)

Airteagal 1

Ábhar, cuspóir agus raon feidhme

Leagtar síos leis an Treoir seo rialacha comhchoiteanna lena neartaítear na forálacha a bhaineann le deisiú earraí, d’fhonn rannchuidiú le feidhmiú cuí an mhargaidh inmheánaigh, agus foráil á déanamh an tráth céanna d’ardleibhéal cosanta do thomhaltóirí agus don chomhshaol.

Beidh feidhm ag an Treoir seo maidir le deisiú earraí arna gceannach ag tomhaltóirí i gcás lochta sna hearraí a thagann chun cinn nó a thagann chun solais lasmuigh de dhliteanas an díoltóra de bhun Airteagal 10 de Threoir (AE) 2019/771.

Ní bheidh feidhm ag Airteagail 5 agus 6 ach amháin maidir le hearraí dá ndéantar foráil i ngníomhartha dlí an Aontais a liostaítear in Iarscríbhinn II d’aon cheanglais indeisitheachta, agus a mhéid a dhéantar foráil don mhéid sin.

Ní dochar an Treoir seo do Threoir (AE) 2018/958.

Airteagal 2

Sainmhínithe

Chun críoch na Treorach seo, tá feidhm ag na sainmhínithe seo a leanas:

(1)

ciallaíonn “tomhaltóir” tomhaltóir mar a shainmhínítear in Airteagal 2, pointe (2), de Threoir (AE) 2019/771;

(2)

ciallaíonn “deisitheoir” aon duine nádúrtha nó dlítheanach a sholáthraíonn seirbhís deisiúcháin a bhaineann le trádáil, gnó, ceird nó gairm an duine sin, lena n-áirítear monaróirí agus díoltóirí a sholáthraíonn seirbhísí deisiúcháin agus soláthraithe seirbhísí deisiúcháin, bídís neamhspleách nó cleamhnaithe leis na monaróirí nó díoltóirí sin;

(3)

ciallaíonn “deisiú”“deisiú” mar a shainmhínítear in Airteagal 2, pointe (20), de Rialachán (AE) 2024/1781;

(4)

ciallaíonn “díoltóir”“díoltóir” mar a shainmhínítear in Airteagal 2, pointe (3), de Threoir (AE) 2019/771;

(5)

ciallaíonn “monaróir”“monaróir” mar a shainmhínítear in Airteagal 2, pointe (42), de Rialachán (AE) 2024/1781;

(6)

ciallaíonn “ionadaí údaraithe”“ionadaí údaraithe” mar a shainmhínítear in Airteagal 2, pointe (43) de Rialachán (AE) 2024/1781;

(7)

ciallaíonn “allmhaireoir”“allmhaireoir” mar a shainmhínítear in Airteagal 2, pointe (44), de Rialachán (AE) 2024/1781;

(8)

ciallaíonn “dáileoir”“dáileoir” mar a shainmhínítear in Airteagal 2, pointe (45), de Rialachán (AE) 2024/1781;

(9)

ciallaíonn “earraí”“earraí” mar a shainmhínítear in Airteagal 2, pointe (5), de Threoir (AE) 2019/771, seachas uisce, gás agus leictreachas;

(10)

ciallaíonn “athchóiriú”“athchóiriú” mar a shainmhínítear in Airteagal 2, pointe (18), de Rialachán (AE) 2024/1781;

(11)

ciallaíonn “ceanglais indeisitheachta” ceanglais faoi ghníomhartha dlí an Aontais a liostaítear in Iarscríbhinn II lena gcumasaítear earra a dheisiú, lena n-áirítear ceanglais maidir le feabhas a chur ar a éascaíocht díchóimeála agus ceanglais maidir le rochtain ar pháirteanna spártha, agus faisnéis agus uirlisí a bhaineann le deisiúchán is infheidhme maidir le hearraí nó comhpháirteanna sonracha earraí;

(12)

ciallaíonn “meán marthanach”“meán marthanach” mar a shainmhínítear in Airteagal 2, pointe (11), de Threoir (AE) 2019/771.

Airteagal 3

Leibhéal an chomhchuibhithe

Ní dhéanfaidh na Ballstáit forálacha nach bhfuil i gcomhréir leo sin a leagtar síos sa Treoir seo a choinneáil ar bun ná a thabhairt isteach ina ndlí náisiúnta.

Airteagal 4

An Fhoirm Eorpach um Fhaisnéis faoin Deisiúchán

Féadfaidh deisitheoirí an Fhoirm Eorpach um Fhaisnéis faoin Deisiúchán a leagtar amach in Iarscríbhinn I a sholáthar don tomhaltóir. Cuirfear an Fhoirm Eorpach um Fhaisnéis faoin Deisiúchán ar fáil ar mheán marthanach agus laistigh de thréimhse réasúnta ama tar éis na hiarrata agus sula mbeidh an tomhaltóir faoi cheangal ag conradh ó thaobh seirbhísí deisiúcháin a sholáthar.

Cuirfear an Fhoirm Eorpach um Fhaisnéis faoin Deisiúchán ar fáil saor in aisce.

De mhaolú ar mhír 2, i gcás inar gá seirbhís dhiagnóiseach, lena n-áirítear scrúdú fisiceach nó cianscrúdú, chun cineál an lochta nó an deisiúcháin a shainaithint agus chun praghas an deisiúcháin a mheas, féadfaidh an deisitheoir a iarraidh ar an tomhaltóir costais riachtanacha na seirbhíse sin a íoc.

Gan dochar do Threoir 2011/83/AE, cuirfidh an deisitheoir an tomhaltóir ar an eolas faoi chostais na seirbhíse diagnóisí.

Sonrófar san Fhoirm Eorpach um Fhaisnéis faoin Deisiúchán na coinníollacha deisiúcháin seo a leanas ar bhealach atá soiléir agus sothuigthe:

(a)

céannacht an deisitheora;

(b)

an seoladh geografach ag a bhfuil an deisitheoir bunaithe chomh maith le huimhir theileafóin agus seoladh ríomhphoist an deisitheora agus, má tá siad ar fáil, modhanna eile cumarsáide ar líne a chuireann ar a chumas don tomhaltóir dul i dteagmháil leis an deisitheoir, agus cumarsáid a dhéanamh leis, ar bhealach tapa éifeachtúil inrochtana;

(c)

an t-earra atá le deisiú;

(d)

cineál an lochta agus an deisiúcháin a mholtar;

(e)

an praghas nó, mura bhfuil sé réasúnach an praghas a ríomh roimh ré, an modh ina ríomhfar an praghas agus an t-uasphraghas le haghaidh an deisiúcháin;

(f)

an t-am a bheidh ag teastáil chun an deisiúchán a chur i gcrích;

(g)

infhaighteacht earraí athsholáthair sealadacha ar feadh thréimhse an deisithe agus na costais a bhaineann le hathsholáthar sealadach, más ann dóibh, don tomhaltóir;

(h)

an áit a dtugann an tomhaltóir an earra ar láimh chun iad a dheisiú;

(i)

i gcás inarb infheidhme, infhaighteacht seirbhísí coimhdeacha, mar shampla baint, suiteáil agus iompar, a thairgeann an deisitheoir, agus costais mhionsonraithe na seirbhísí sin, más ann dóibh, ar an tomhaltóir;

(j)

tréimhse bhailíochta na Foirme Eorpaí um Fhaisnéis faoin Deisiúchán;

(k)

i gcás inarb infheidhme, faisnéis bhreise.

Ní athróidh an deisitheoir na coinníollacha deisiúcháin a shonraítear san Fhoirm Eorpach um Fhaisnéis faoin Deisiúchán ar feadh tréimhse 30 lá féilire ón dáta a soláthraíodh an fhoirm sin don tomhaltóir. Féadfaidh an deisitheoir agus an tomhaltóir teacht ar chomhaontú maidir le tréimhse bhailíochta níos faide don Fhoirm Eorpach um Fhaisnéis faoin Deisiúchán. I gcás ina nglacfaidh an tomhaltóir, laistigh den tréimhse bhailíochta, leis na coinníollacha a leagtar amach san Fhoirm Eorpach um Fhaisnéis faoin Deisiúchán, beidh sé d’oibleagáid ar an deisitheoir an tseirbhís deisiúcháin a dhéanamh faoi na coinníollacha sin.

I gcás inar sholáthair an deisitheoir Foirm Eorpach um Fhaisnéis faoin Deisiúchán atá iomlán agus cruinn don tomhaltóir, measfar gur chomhlíon sé na ceanglais seo a leanas:

(a)

ceanglais faisnéise maidir le príomhghnéithe na seirbhíse deisiúcháin a leagtar síos in Airteagal 5(1) pointe (a), agus in Airteagal 6(1), pointe (a) de Threoir 2011/83/AE agus in Airteagal 22(1), pointe (j) de Threoir 2006/123/CE ó Pharlaimint na hEorpa agus ón gComhairle ( 1 );

(b)

ceanglais faisnéise maidir le céannacht agus faisnéis teagmhála an deisitheora a leagtar síos in Airteagal 5(1), pointe (b), agus Airteagal (6)(1), pointí (b) agus (c), de Threoir 2011/83/AE, Airteagal 22(1), pointe (a), de Threoir 2006/123/CE agus Airteagal 5(1), pointí (a), (b) agus (c) de Threoir 2000/31/CE ó Pharlaimint na hEorpa agus ón gComhairle ( 2 );

(c)

ceanglais faisnéise maidir leis an bpraghas a leagtar síos in Airteagal 5(1), pointe (c), agus in Airteagal 6(1), pointe (e) de Threoir 2011/83/AE agus in Airteagal 22(1), pointe (i), agus (3), pointe (a), de Threoir 2006/123/CE;

(d)

ceanglais faisnéise maidir leis na socruithe le haghaidh na feidhmíochta agus an t-am chun an tseirbhís deisiúcháin a dhéanamh a leagtar síos in Airteagal 5(1), pointe (d), agus Airteagal 6(1), pointe (g), de Threoir 2011/83/AE.

Airteagal 5

Oibleagáid maidir le deisiú

Áiritheoidh na Ballstáit, arna iarraidh sin don tomhaltóir, go ndéanfaidh an monaróir earraí a dheisiú, ar earraí iad dá ndéantar foráil i ngníomhartha dlí an Aontais a liostaítear in Iarscríbhinn II d’aon cheanglais indeisitheachta, agus a mhéid a fhoráiltear don mhéid sin. Ní bheidh sé d’oibleagáid ar an monaróir na hearraí sin a dheisiú i gcás nach féidir iad a dheisiú. Féadfaidh an monaróir deisiú a ligean ar fochonradh chun a oibleagáid maidir le deisiú a chomhlíonadh.

Déanfar an deisiú de bhun mhír 1 faoi réir na gcoinníollacha seo a leanas:

(a)

déanfar é saor in aisce nó ar phraghas réasúnta;

(b)

déanfar é laistigh de thréimhse réasúnta ama ón uair a bheidh seilbh fhisiciúil ag an monaróir ar an earra, a bheidh an t-earra faighte aige nó a bheidh rochtain tugtha ag an tomhaltóir dó ar an earra;

(c)

féadfaidh an monaróir earra athsholáthair a thabhairt ar iasacht don tomhaltóir saor in aisce nó ar tháille réasúnta fad a bheidh an deisiú á dhéanamh; agus

(d)

i gcásanna nach féidir an deisiú a dhéanamh, féadfaidh an monaróir earra athchóirithe a thairiscint don tomhaltóir.

I gcás ina bhfuil an monaróir a bhfuil oibleagáid air deisiú a dhéanamh de bhun mhír 1 bunaithe lasmuigh den Aontas, comhlíonfaidh a ionadaí údaraithe san Aontas oibleagáid an mhonaróra. I gcás nach bhfuil aon ionadaí údaraithe ag an monaróir san Aontas, comhlíonfaidh allmhaireoir an earra lena mbaineann oibleagáid an mhonaróra. I gcás nach bhfuil aon allmhaireoir ann, comhlíonfaidh dáileoir an earra lena mbaineann oibleagáid an mhonaróra. Féadfaidh an t-ionadaí údaraithe, an t-allmhaireoir agus an dáileoir deisiú a ligean ar fochonradh chun a oibleagáid maidir le deisiú a chomhlíonadh.

Monaróirí a chuireann páirteanna spártha agus uirlisí ar fáil d’earraí a chumhdaítear le gníomhartha dlí an Aontais a liostaítear in Iarscríbhinn II, tairgfidh siad na páirteanna spártha agus na huirlisí sin ar phraghas réasúnta nach ndíspreagann deisiú.

Monaróirí, nó, i gcás inarb infheidhme, ionadaithe údaraithe, allmhaireoirí nó dáileoirí a bhfuil oibleagáid orthu maidir le deisiú de bhun an Airteagail seo, áiritheoidh siad gur féidir le tomhaltóirí rochtain a fháil, trí shuíomh gréasáin ar a bhfuil rochtain saor in aisce, ar fhaisnéis maidir leis na praghsanna táscacha a ghearrtar ar ghnáthdheisiú na n-earraí a chumhdaítear le gníomhartha dlí an Aontais a liostaítear in Iarscríbhinn II.

Ní úsáidfidh monaróirí aon chlásail chonarthacha ná, teicnící crua-earraí nó bogearraí a chuireann bac ar dheisiú earraí a chumhdaítear le gníomhartha dlí an Aontais a liostaítear in Iarscríbhinn II ach amháin má tá údar maith leo de bharr tosca dlisteanacha oibiachtúla, lena n-áirítear cearta maoine intleachtúla a chosaint faoi dhlí an Aontais agus faoin dlí náisiúnta. Ní chuirfidh monaróirí bac, go háirithe, ar pháirteanna spártha bunaidh nó athláimhe, páirteanna spártha comhoiriúnacha agus páirteanna spártha arna n-eisiúint ó phriontáil 3T, a bheith á n-úsáid ag deisitheoirí neamhspleácha i gcás ina bhfuil na páirteanna spártha sin i gcomhréir leis na ceanglais faoi dhlí an Aontais nó faoin dlí náisiúnta, mar shampla, ceanglais maidir le sábháilteacht táirgí nó maidir le comhlíontacht ó thaobh maoin intleachtúil de. Tá an mhír seo gan dochar do cheanglais shonracha ghníomhartha dlí an Aontais a liostaítear in Iarscríbhinn II agus gan dochar do dhlí an Aontais ná don dlí náisiúnta lena bhforáiltear do chosaint na gceart maoine intleachtúla.

Ní dhiúltóidh monaróirí earraí a chumhdaítear le gníomhartha dlí an Aontais a liostaítear in Iarscríbhinn II a dheisiú ar an aon chúis amháin go ndearna deisitheoirí eile nó daoine eile deisiú orthu roimhe sin.

Gan dochar don oibleagáid maidir le deisiú faoin Airteagal seo, féadfaidh tomhaltóirí a iarraidh ar aon deisitheoir dá rogha féin deisiú a dhéanamh.

Glacfaidh an Coimisiún gníomhartha tarmligthe i gcomhréir le hAirteagal 20 chun Iarscríbhinn II a leasú tríd an liosta de ghníomhartha dlí an Aontais lena leagtar síos ceanglais indeisitheachta a thabhairt cothrom le dáta i bhfianaise forbairtí rialála. Glacfaidh an Coimisiún na gníomhartha tarmligthe sin gan moill mhíchuí tar éis fhoilsiú ghníomh dlí ábhartha an Aontais, agus ar a dhéanaí 12 mhí tar éis an fhoilsithe sin.

Airteagal 6

Faisnéis maidir leis an oibleagáid maidir le deisiú

Áiritheoidh na Ballstáit go gcuirfidh an monaróir nó, i gcás inarb infheidhme, an t-ionadaí údaraithe, an t-allmhaireoir nó an dáileoir ar fáil saor in aisce, ar feadh ré iomlán a n-oibleagáide maidir le deisiú ar a laghad de bhun Airteagal 5, faisnéis faoina seirbhísí deisiúcháin ar bhealach sorochtana, soiléir agus sothuigthe.

Airteagal 7

Ardán Eorpach deisiúcháin ar líne

Bunófar ardán Eorpach deisiúcháin ar líne (“an t-ardán Eorpach ar líne”) chun go mbeidh tomhaltóirí in ann deisitheoirí agus, i gcás inarb infheidhme, díoltóirí earraí athchóirithe, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail a aimsiú. Is éard a bheidh san ardán Eorpach ar líne na ranna náisiúnta a úsáideann an comhéadan coiteann ar líne agus áireofar air naisc chuig na hardáin náisiúnta deisiúcháin ar líne dá dtagraítear i mír 3 (“na hardáin náisiúnta ar líne”).

Faoin 31 Iúil 2027, ceapfaidh an Coimisiún an comhéadan coiteann ar líne le haghaidh an ardáin Eorpaigh ar líne. Comhlíonfaidh an comhéadan coiteann ar líne sin na ceanglais a leagtar amach i mír 6 agus beidh sé ar fáil i dteangacha oifigiúla uile an Aontais. Ina dhiaidh sin, áiritheoidh an Coimisiún cothabháil theicniúil an chomhéadain choitinn ar líne.

Úsáidfidh na Ballstáit an comhéadan coiteann ar líne dá dtagraítear i mír 2 dá ranna náisiúnta. Mar sin féin, níl sé d’oibleagáid ar na Ballstáit a bhfuil ardán náisiúnta ar líne amháin ar a laghad acu, bíodh sé poiblí nó príobháideach, a chumhdaíonn a gcríoch iomlán agus a chomhlíonann na forálacha a leagtar amach i mír 6, roinn náisiúnta a bhunú ar an ardán Eorpach ar líne. Ina ionad sin, áireofar ar an ardán Eorpach ar líne naisc chuig na hardáin náisiúnta ar líne sin. Áiritheoidh na Ballstáit go mbeidh a n-ardáin náisiúnta ar líne oibríochtúil faoin 31 Iúil 2027.

Féadfaidh na Ballstáit raon feidhme a roinne náisiúnta ar an ardán Eorpach ar líne nó, i gcás inarb infheidhme, ar a n-ardán náisiúnta ar líne a leathnú chun, ní hamháin deisitheoirí, ach díoltóirí earraí a ndearnadh athchóiriú orthu, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail a chumhdach freisin.

Beidh úsáid ranna náisiúnta agus ardán náisiúnta ar líne ar an ardán Eorpach ar líne saor in aisce do thomhaltóirí. Beidh deisitheoirí agus, i gcás inarb infheidhme, díoltóirí earraí a ndearnadh athchóiriú orthu agus ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail in ann clárú go deonach.

Déanfaidh na ranna náisiúnta a úsáideann an comhéadan coiteann ar líne agus na hardáin náisiúnta ar líne an méid seo a leanas:

(a)

feidhmeanna cuardaigh maidir le hearraí, suíomh na seirbhísí deisiúcháin a áireamh, lena n-áirítear feidhm atá bunaithe ar léarscáil, soláthar trasteorann seirbhísí, coinníollacha deisiúcháin, lena n-áirítear an t-am is gá chun an deisiú a chur i gcrích, infhaighteacht earraí athsholáthair sealadacha agus an áit a dtugann an tomhaltóir na hearraí ar láimh le haghaidh deisiú, infhaighteacht agus coinníollacha seirbhísí coimhdeacha, lena n-áirítear baint, suiteáil agus iompar, a thairgeann deisitheoirí, agus na caighdeáin cháilíochta Eorpacha nó náisiúnta deisiúcháin is infheidhme;

(b)

i gcás inarb infheidhme, feidhm chuardaigh a áireamh chun díoltóirí earraí a ndearnadh athchóiriú orthu, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail a aimsiú;

(c)

a chur ar a gcumas do thomhaltóirí an Fhoirm Eorpach um Fhaisnéis faoin Deisiúchán a iarraidh ó dheisitheoirí atá á tairiscint;

(d)

a chur ar a gcumas do dheisitheoirí faisnéis agus seirbhísí teagmhála a thabhairt cothrom le dáta go rialta ar an ardán;

(e)

a chur ar a gcumas do dheisitheoirí a léiriú go gcloíonn siad leis na caighdeáin cháilíochta Aontais nó náisiúnta is infheidhme;

(f)

inrochtaineacht a chumasú trí shuíomhanna gréasáin náisiúnta atá nasctha leis an bpointe rochtana aonair digiteach a bhunaítear le Rialachán (AE) 2018/1724 ó Pharlaimint na hEorpa agus ón gComhairle ( 3 );

(g)

inrochtaineacht a áirithiú do dhaoine faoi mhíchumas; agus

(h)

foirmeacha teagmhála a sholáthar d’úsáideoirí chun saincheisteanna teicniúla a bhaineann le feidhmiú an ardáin Eorpaigh ar líne a thuairisciú, chomh maith le sonraí míchruinne maidir leis an bhfaisnéis arna soláthar ag deisitheoirí, agus, i gcás inarb infheidhme, ag díoltóirí earraí a ndearnadh athchóiriú orthu, ceannaitheoirí earraí lochtacha lena n-athchóiriú nó tionscnaimh deisiúcháin faoi stiúir an phobail.

Cumasóidh an t-ardán Eorpach ar líne bailiú sonraí neamhphearsanta maidir le feidhmiú na ranna náisiúnta.

Déanfaidh na Ballstáit agus an Coimisiún bearta iomchuí chun tomhaltóirí, oibreoirí eacnamaíocha ábhartha agus díoltóirí a chur ar an eolas faoi infhaighteacht an ardáin Eorpaigh ar líne.

Airteagal 8

Grúpa Saineolaithe

Bunóidh an Coimisiún grúpa saineolaithe a bheidh comhdhéanta d’ionadaithe ó na Ballstáit uile agus a bheidh faoi chathaoirleacht ionadaí ón gCoimisiún. Beidh sé de chúram ar an ngrúpa saineolaithe comhairle a chur ar an gCoimisiún maidir le dearadh agus feidhmiú an ardáin Eorpaigh ar líne agus a ranna náisiúnta.

Airteagal 9

Pointí teagmhála náisiúnta

Faoin 31 Iúil 2026, cuirfidh na Ballstáit an Coimisiún ar an eolas faoin méid seo a leanas:

(a)

an pointe teagmhála náisiúnta atá ainmnithe acu don ardán Eorpach ar líne; nó

(b)

na hardáin náisiúnta ar líne a bhunaigh siad nó a bhunóidh siad i gcomhréir le hAirteagal 7(3).

Faoin 31 Iúil 2026, féadfaidh na Ballstáit a úsáideann na ranna náisiúnta den ardán Eorpach ar líne coinníollacha a ghlacadh, i gcomhréir le dlí an Aontais, maidir le rochtain ar a roinn náisiúnta le haghaidh clárú do dheisitheoirí agus, i gcás inarb infheidhme, díoltóirí earraí a ndearnadh athchóiriú orthu, ceannaitheoirí earraí lochtacha lena n-athchóiriú agus tionscnaimh deisiúcháin faoi stiúir an phobail. Féadfar foráil a dhéanamh leis na coinníollacha sin, go háirithe, d’fhormheas roimh ré maidir leis an gclárú ar an roinn náisiúnta, rud a thabharfaidh an pointe teagmhála náisiúnta, nó do cheanglais maidir le cáilíochtaí gairmiúla. Cuirfidh na Ballstáit sin an Coimisiún ar an eolas faoin dáta sin faoi aon choinníollacha rochtana arna nglacadh.

Na Ballstáit a úsáideann ranna náisiúnta an ardáin Eorpaigh ar líne agus a chuireann na coinníollacha dá dtagraítear i mír 2 den Airteagal seo i bhfeidhm, áiritheoidh siad go mbeidh a roinn náisiúnta oibríochtúil laistigh de 6 mhí ón dáta a chuireann an Coimisiún an comhéadan coiteann ar líne dá bhforáiltear in Airteagal 7(2) ar fáil.

Beidh an pointe teagmhála náisiúnta freagrach as na cúraimí seo a leanas:

(a)

rochtain ar a roinn náisiúnta a sholáthar le haghaidh clárú do dheisitheoirí agus, i gcás inarb infheidhme, díoltóirí earraí a ndearnadh athchóiriú orthu, ceannaitheoirí earraí lochtacha lena n-athchóiriú agus tionscnaimh deisiúcháin faoi stiúir an phobail;

(b)

a áirithiú go gcomhlíonfar aon choinníollacha rochtana arna leagan síos ag na Ballstáit de bhun mhír 2; agus

(c)

cúnamh a thabhairt don Choimisiún maidir le hoibriú ranna náisiúnta an ardáin Eorpaigh ar líne.

Airteagal 10

Bearta do Mhicrifhiontair agus Fiontair Bheaga agus Mheánmhéide

I gcás inarb iomchuí, glacfaidh an Coimisiún treoirlínte chun tacú go háirithe le micrifhiontair agus le fiontair bheaga agus mheánmhéide na ceanglais agus na hoibleagáidí a leagtar amach sa Treoir seo a chomhlíonadh.

Airteagal 11

Forfheidhmiú

Áiritheoidh na Ballstáit gur ann do mhodhanna leordhóthanacha agus éifeachtacha chun a áirithiú go gcomhlíonfar an Treoir seo.

Áireofar leis na modhanna dá dtagraítear i mír 1, forálacha trína bhféadfaidh ceann amháin nó níos mó de na comhlachtaí seo a leanas, de réir mar a chinnfear leis an dlí náisiúnta, caingean a thabhairt faoin dlí náisiúnta os comhair chúirteanna nó údaráis inniúil riaracháin an Bhallstáit chun a áirithiú go gcuirfear i bhfeidhm na forálacha náisiúnta lena ndéantar an Treoir seo a thrasuí:

(a)

comhlachtaí poiblí nó a n-ionadaithe;

(b)

eagraíochtaí a bhfuil leas dlisteanach acu i gcosaint tomhaltóirí nó an chomhshaoil;

(c)

eagraíochtaí gairmiúla a bhfuil leas dlisteanach acu i gcaingean a thabhairt.

Airteagal 12

Faisnéis do thomhaltóirí

Déanfaidh na Ballstáit bearta iomchuí chun a áirithiú go mbeidh faisnéis faoi chearta tomhaltóirí faoin Treoir seo, agus faoi na modhanna chun na cearta sin a fhorfheidhmiú, ar fáil do thomhaltóirí, lena n-áirítear ar shuíomhanna gréasáin náisiúnta atá nasctha leis an bpointe rochtana aonair digiteach a bhunaítear le Rialachán (AE) 2018/1724.

Airteagal 13

Bearta na mBallstát lena gcuirtear deisiú chun cinn

Déanfaidh na Ballstáit beart amháin ar a laghad chun deisiú a chur chun cinn.

Faoin 31 Iúil 2029, tabharfaidh na Ballstáit fógra don Choimisiún faoi cheann amháin nó níos mó de na bearta arna ndéanamh faoi mhír 1. Cuirfidh an Coimisiún faisnéis maidir leis na bearta ar thug na Ballstáit fógra fúthu ar fáil go poiblí.

Airteagal 14

Cineál sainordaitheach

Mura bhforáiltear dá mhalairt sa Treoir seo, aon chomhaontú conarthach lena ndéantar, chun aimhleasa an tomhaltóra, cur i bhfeidhm beart náisiúnta lena dtrasuitear an Treoir seo a eisiamh nó lena maolaítear ar na bearta sin a mhaolú nó lena n-athraítear a n-éifeacht, ní bheidh sé ceangailteach ar an tomhaltóir.

Ní chuirfear leis an Treoir seo cosc ar an deisitheoir socruithe conarthacha a théann thar na cosaintí dá bhforáiltear sa Treoir seo a thairiscint don tomhaltóir.

Airteagal 15

Pionóis

Déanfaidh na Ballstáit na rialacha a bhaineann leis na pionóis is infheidhme maidir le sáruithe ar fhorálacha náisiúnta arna nglacadh de bhun Airteagail 4, 5 agus 6 a leagan síos agus glacfaidh siad gach beart is gá lena áirithiú go gcuirfear chun feidhme iad. Beidh na pionóis dá bhforáiltear éifeachtach, comhréireach agus athchomhairleach. Tabharfaidh na Ballstáit fógra don Choimisiún faoi na rialacha agus na bearta sin faoin 31 Iúil 2026 agus tabharfaidh siad fógra dó, gan mhoill, faoi aon leasú ina dhiaidh sin a dhéanfaidh difear dóibh.

Airteagal 16

Leasú ar Threoir (AE) 2019/771

Leasaítear Treoir (AE) 2019/771 mar a leanas:

(1)

In Airteagal 7(1), cuirtear an méid seo a leanas in ionad phointe (d):

“(d)

beidh an chainníocht agus na cáilíochtaí agus gnéithe eile acu, lena n-áirítear maidir le marthanacht, indeisitheacht, feidhmiúlacht, comhoiriúnacht agus slándáil, a fhaightear de ghnáth i gcomhair earraí den chineál céanna agus a bhféadfadh an tomhaltóir a bheith ag súil leo le réasún, ag féachaint do chineál na n-earraí agus i bhfianaise aon ráitis phoiblí arna dhéanamh ag an díoltóir nó ag daoine eile thar ceann an díoltóra, nó ag daoine eile i naisc roimhe seo de shlabhra na n-idirbheart, lena n-áirítear an táirgeoir, go háirithe san fhógraíocht nó ar lipéadú.”

;

(2)

Leasaítear Airteagal 10 mar a leanas:

(a)

cuirtear an mhír seo a leanas isteach:

“2a.

I gcás ina ndéantar deisiú, i gcomhréir le hAirteagal 13(2), mar leigheas chun na hearraí a thabhairt chun comhréireachta, cuirfear síneadh 12 mhí aon uair amháin leis an tréimhse dhliteanais.”

;

(b)

cuirtear an méid seo a leanas in ionad mhír 3:

“3.

Féadfaidh na Ballstáit na tréimhsí dá dtagraítear i míreanna 1, 2 agus 2a a choinneáil nó tréimhsí ama níos faide a thabhairt isteach.”

;

(c)

cuirtear an mhír seo a leanas isteach:

“5a.

Maidir leis na Ballstáit nach ndéanann foráil, i gcomhréir le mír 3 nó mír 5, do theorainneacha ama socraithe le haghaidh dhliteanas an díoltóra nó nach bhforálann ach do thréimhse theorann le haghaidh na leigheasanna, féadfaidh siad maolú ar mhír 2a ar choinníoll go n-áiritheoidh siad go mbeidh dliteanas an díoltóra nó an tréimhse theorann le haghaidh leigheasanna coibhéiseach le 3 bliana ar a laghad i gcás deisiú.”

;

(3)

In Airteagal 13, cuirtear isteach an mhír seo a leanas:

“2a.

Sula soláthróidh an díoltóir an leigheas chun na hearraí a thabhairt chun comhréireachta, cuirfidh an díoltóir an tomhaltóir ar an eolas faoi cheart an tomhaltóra rogha a dhéanamh idir deisiú agus athsholáthar, chomh maith leis an síneadh a d’fhéadfaí a chur leis an tréimhse dhliteanais, dá bhforáiltear in Airteagal 10(2a).”

;

(4)

Cuirtear an méid seo a leanas in ionad Airteagal 14, mír (1):

“1.

Déanfar deisithe nó athsholáthar a chur i gcrích:

(a)

saor in aisce;

(b)

laistigh de thréimhse réasúnta ama ón tráth a mbeidh an díoltóir curtha ar an eolas ag an tomhaltóir faoin easpa comhréireachta;

(c)

gan míchaoithiúlacht shuntasach don tomhaltóir, agus cineál na n-earraí agus an chríoch ar chuici a bhí na hearraí ag teastáil ón tomhaltóir á gcur san áireamh.

Le linn an deisiúcháin, ag brath ar shainiúlachtaí na catagóire earraí ábhartha, go háirithe ar an ngá atá ag an tomhaltóir na hearraí sin a bheith ar fáil go buan, féadfaidh an díoltóir earra athsholáthair a sholáthar don tomhaltóir saor in aisce, lena n-áirítear earra athchóirithe, ar iasacht.

Féadfaidh an díoltóir earra athchóirithe a sholáthar, arna iarraidh sin go sainráite don tomhaltóir, chun a oibleagáid a chomhlíonadh maidir leis an earra a athsholáthar.”.

Airteagal 17

Leasú ar Threoir (AE) 2020/1828

In Iarscríbhinn I a ghabhann le Treoir (AE) 2020/1828, cuirtear an pointe seo a leanas léi:

▼C1

“(70) Treoir (AE) 2024/1799 ó Pharlaimint na hEorpa agus ón gComhairle an 13 Meitheamh 2024 maidir le rialacha comhchoiteanna lena gcuirtear deisiú earraí chun cinn agus lena leasaítear Rialachán (AE) 2017/2394 agus Treoracha (AE) 2019/771 agus (AE) 2020/1828 (IO L, 2024/1799, 10.7.2024, ELI: http://data.europa.eu/eli/dir/2024/1799/oj).”

▼B

Airteagal 18

Leasú ar Rialachán (AE) 2017/2394

San Iarscríbhinn a ghabhann le Rialachán (AE) 2017/2394, cuirtear an pointe seo a leanas léi:

“29. Treoir (AE) 2024/1799 ó Pharlaimint na hEorpa agus ón gComhairle an 13 Meitheamh 2024 maidir le rialacha comhchoiteanna lena gcuirtear deisiú earraí chun cinn agus lena leasaítear Rialachán (AE) 2017/2394 agus Treoracha (AE) 2019/771 agus (AE) 2020/1828 (IO L, 2024/1799, 10.7.2024, ELI: http://data.europa.eu/eli/dir/2024/1799/oj).”.

Airteagal 19

Tuairisciú ag an gCoimisiún agus athbhreithniú

Faoin 31 Iúil 2031, tíolacfaidh an Coimisiún tuarascáil maidir le cur i bhfeidhm na Treorach seo. Déanfar measúnú sa tuarascáil ar rannchuidiú na Treorach seo, agus go háirithe rannchuidiú Airteagail 5 agus 16, le deisiú a chur chun cinn sa mhargadh inmheánach, lena n-áirítear deisiú earraí atá faoi réir ceanglais indeisitheachta lasmuigh den ráthaíocht dhlíthiúil agus rogha na dtomhaltóirí maidir le deisiú laistigh den ráthaíocht dhlíthiúil chomh maith lena tionchar ar ghnólachtaí agus ar thomhaltóirí.

Déanfar measúnú sa tuarascáil freisin ar éifeachtacht na ndreasachtaí chun deisiú a roghnú, lena n-áirítear síneadh a chur leis an ráthaíocht dhlíthiúil, agus ar an ngá atá le ráthaíochtaí tráchtála a chur chun cinn maidir le seirbhísí deisiúcháin agus rialacha a ghlacadh maidir le dliteanas deisitheoirí le haghaidh deisiú.

Maidir le hAirteagal 7, déanfar measúnú sa tuarascáil freisin ar éifeachtacht an ardáin Eorpaigh ar líne bunaithe ar fhaisnéis faoi líon na soláthraithe seirbhísí deisiúcháin gníomhacha agus ar líon na dtomhaltóirí a chuaigh isteach san ardán Eorpach ar líne.

Cuirfidh an Coimisiún an tuarascáil faoi bhráid Pharlaimint na hEorpa, na Comhairle, Choiste Eacnamaíoch agus Sóisialta na hEorpa agus Choiste na Réigiún í. Cuirfidh na Ballstáit an fhaisnéis is gá ar fáil don Choimisiún chun an tuarascáil sin a ullmhú. Beidh togra reachtach ag gabháil leis an tuarascáil sin, i gcás inarb iomchuí.

Déanfar measúnú ar an leibhéal comhchuibhithe is gá chun cothrom iomaíochta a áirithiú do chuideachtaí sa mhargadh inmheánach lena n-áirítear cóineasú agus éagsúlacht idir dlíthe náisiúnta na mBallstát lena dtrasuitear an Treoir seo, go háirithe maidir leis na tréimhsí dliteanais, i gcomhthéacs an athbhreithnithe dá bhforáiltear in Airteagal 25 de Threoir (AE) 2019/771.

Airteagal 20

An tarmligean a fheidhmiú

Is faoi réir na gcoinníollacha a leagtar síos san Airteagal seo a thugtar an chumhacht don Choimisiún chun gníomhartha tarmligthe a ghlacadh.

Déanfar an chumhacht chun gníomhartha tarmligthe a ghlacadh dá dtagraítear in Airteagal 5(9) a thabhairt don Choimisiún go ceann tréimhse 6 bliana amhail ón 31 Lúnasa 2024. Déanfaidh an Coimisiún, tráth nach déanaí ná 9 mí roimh dheireadh na tréimhse 6 bliana, tuarascáil a tharraingt suas maidir le tarmligean na cumhachta. Déanfar tarmligean na cumhachta a fhadú go hintuigthe go ceann tréimhsí comhfhaid, mura rud é go gcuireann Parlaimint na hEorpa nó an Chomhairle in aghaidh an fhadaithe sin tráth nach déanaí ná 3 mhí roimh dheireadh gach tréimhse.

Féadfaidh Parlaimint na hEorpa nó an Chomhairle tarmligean na cumhachta dá dtagraítear in Airteagal 5(9) a chúlghairm aon tráth. Le cinneadh chun cúlghairm a dhéanamh, cuirfear deireadh le tarmligean na cumhachta a shonrófar sa chinneadh sin. Gabhfaidh éifeacht leis an lá tar éis fhoilsiú an chinnidh in Iris Oifigiúil an Aontais Eorpaigh nó ar dháta is déanaí a shonrófar sa chinneadh. Ní dhéanfaidh sé difear do bhailíocht aon ghnímh tharmligthe atá i bhfeidhm cheana.

Sula nglacfaidh sé gníomh tarmligthe, rachaidh an Coimisiún i mbun comhairliúchán le saineolaithe arna n-ainmniú ag gach Ballstát i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr.

A luaithe a ghlacfaidh sé gníomh tarmligthe, tabharfaidh an Coimisiún fógra, an tráth céanna, do Pharlaimint na hEorpa agus don Chomhairle faoi.

Ní thiocfaidh gníomh tarmligthe a ghlactar de bhun Airteagal 5(9) i bhfeidhm ach amháin mura mbeidh aon agóid curtha in iúl ag Parlaimint na hEorpa nó ag an gComhairle laistigh de thréimhse 2 mhí tar éis fógra faoin ngníomh sin a thabhairt do Pharlaimint na hEorpa agus don Chomhairle nó más rud é, roimh dhul in éag na tréimhse sin, go mbeidh Parlaimint na hEorpa agus an Chomhairle araon tar éis a chur in iúl don Choimisiún nach ndéanfaidh siad aon agóid. Déanfar an tréimhse sin a fhadú 2 mhí ar thionscnamh Pharlaimint na hEorpa nó na Comhairle.

Airteagal 21

Forálacha idirthréimhseacha

Ní bheidh feidhm ag Airteagal 16 den Treoir seo maidir le conarthaí díolacháin arna dtabhairt i gcrích roimh an 31 Iúil 2026.

Airteagal 22

Trasuí

Na forálacha reachtaíochta, rialúcháin agus riaracháin is gá chun an Treoir seo a chomhlíonadh, déanfaidh na Ballstáit iad a thabhairt i bhfeidhm faoi 31 Iúil 2026 ar a dhéanaí. Cuirfidh siad an Coimisiún ar an eolas faoin méid sin láithreach.

Nuair a ghlacfaidh na Ballstáit na forálacha sin, beidh tagairt iontu don Treoir seo nó beidh tagairt den sórt sin ag gabháil leo tráth a bhfoilsithe oifigiúil. Leagfaidh na Ballstáit síos an bealach a ndéanfar tagairtí den sórt sin.

Cuirfidh na Ballstáit na forálacha sin i bhfeidhm ón 31 Iúil 2026.

Déanfaidh na Ballstáit téacs phríomhfhorálacha an dlí náisiúnta a ghlacfaidh siad sa réimse a chumhdaítear leis an Treoir seo a chur in iúl don Choimisiún.

Airteagal 23

Teacht i bhfeidhm

Tiocfaidh an Treoir seo i bhfeidhm an fichiú lá tar éis lá a foilsithe in Iris Oifigiúil an Aontais Eorpaigh.

Airteagal 24

Seolaithe

Is chuig na Ballstáit a dhírítear an Treoir seo.

IARSCRÍBHINN I

FOIRM EORPACH UM FHAISNÉIS FAOIN DEISIÚCHÁN

Cuid I

Céannacht agus sonraí teagmhála an deisitheora a sholáthraíonn an tseirbhís deisiúcháin

Deisitheoir	[Céannacht]
Seoladh	[Seoladh geografach atá le húsáid ag an tomhaltóir]
Uimhir theileafóin
Seoladh ríomhphoist
Má sholáthraíonn an deisitheoir iad, modhanna eile cumarsáide ar líne, lenar féidir leis an tomhaltóir dul i dteagmháil leis an deisitheoir agus cumarsáid a dhéanamh leis go tapa agus go héifeachtúil

Cuid II

Faisnéis faoin tseirbhís deisiúcháin

An t-earra atá le deisiú	[An t-earra a shainaithint]
Cineál an lochta	[Tuairisc ar an locht]
An cineál deisiúcháin atá molta	[Cén cineál beart a dhéanfar chun an locht a dheisiú]
Praghas le haghaidh an deisiúcháin nó, mura féidir é a ríomh, an modh ríofa is infheidhme agus an t-uasphraghas le haghaidh an deisiúcháin	[Ciallaíonn sé sin an méid iomlán nó, mura féidir é sin a ríomh, an modh ríofa agus an uasteorainn le haghaidh na seirbhíse deisiúcháin, in EUR nó san airgeadra náisiúnta]
An t-am chun an deisiúchán a chur i gcrích	[An t-am i laethanta faoina ngeallann an deisitheoir an tseirbhís a dhéanamh]
Infhaighteacht earraí athsholáthair sealadacha	[Ciallaíonn earra athsholáthair sealadach go bhfaighidh an tomhaltóir earra coibhéiseach lena úsáid le linn thréimhse an deisithe, ní mór don deisitheoir “Tá” nó “Níl” a chur in iúl]
Má tá, sonraigh na costais chomhfhreagracha, más ann dóibh:	[In EUR nó san airgeadra náisiúnta]
Áit chun na hearraí a thabhairt ar láimh	[An áit a dtugann an tomhaltóir na hearraí ar láimh chun iad a dheisiú]
Más infheidhme, infhaighteacht seirbhísí coimhdeacha	[Tabhair le fios má tháirgtear, agus a mhéid a thairgtear, seirbhísí coimhdeacha mar shampla baint, suiteáil agus iompar, nó roghnaigh “Níl aon seirbhís choimhdeach ann” mura dtairgtear aon seirbhís choimhdeach le haghaidh an deisiúcháin lena mbaineann]
Má thairgtear, sonraigh na costais chomhfhreagracha, más ann dóibh:	[In EUR nó san airgeadra náisiúnta, in aghaidh na seirbhíse a thairgtear]
Tréimhse bhailíochta na Foirme Eorpaí um Fhaisnéis faoin Deisiúchán	[Tréimhse bhailíochta 30 lá ar a laghad]
Más infheidhme, faisnéis bhreise

Tugtar mínithe don deisitheoir leis na léirithe atá idir lúibíní cearnacha agus ní mór an fhaisnéis chomhfhreagrach a chur ina n-ionad.

IARSCRÍBHINN II

LIOSTA DE GHNÍOMHARTHA DLÍ DE CHUID AN AONTAIS LENA LEAGTAR SÍOS CEANGLAIS INDEISITHEACHTA

1. Le haghaidh meaisíní níocháin tí agus meaisíní niteoir-triomadóir tí, Rialachán (AE) 2019/2023 ón gCoimisiún ( 4 )

2. Le haghaidh miasniteoirí tí, Rialachán (AE) 2019/2022 ón gCoimisiún ( 5 )

3. Le haghaidh fearais chuisniúcháin, Rialachán (AE) 2019/2019 ón gCoimisiún ( 6 )

4. Le haghaidh taispeáintí leictreonacha, Rialachán (AE) 2019/2021 ón gCoimisiún ( 7 )

5. Le haghaidh trealamh táthúcháin, Rialachán (AE) 2019/1784 ón gCoimisiún ( 8 )

6. Le haghaidh folúsghlantóirí, Rialachán (AE) Uimh. 666/2013 ón gCoimisiún ( 9 )

7. Le haghaidh freastalaithe agus táirgí stórála sonraí, Rialachán (AE) 2019/424 ón gCoimisiún ( 10 )

8. Le haghaidh fóin phóca, fóin siúil agus ríomhairí táibléid, Rialachán (AE) 2023/1670 ón gCoimisiún ( 11 )

9. Le haghaidh triomadóirí rothlaim tí, Rialachán (AE) 2023/2533 ón gCoimisiún ( 12 )

10. Le haghaidh earraí ina bhfuil ceallraí do mhodhanna éadroma iompair, Rialachán (AE) 2023/1542 ó Pharlaimint na hEorpa agus ón gComhairle ( 13 )

▼M1

11. Le haghaidh téitheoirí spáis áitiúla tí, Rialachán (AE) 2024/1103 ón gCoimisiúno ( 14 ).

( ) Treoir 2006/123/CE ó Pharlaimint na hEorpa agus ón gComhairle an 12 Nollaig 2006 maidir le seirbhísí sa mhargadh inmheánach (IO L 376, 27.12.2006, lch. 36).

( ) Treoir 2000/31/CE ó Pharlaimint na hEorpa agus ón gComhairle an 8 Meitheamh 2000 maidir le gnéithe áirithe dlí de sheirbhísí na sochaí faisnéise, an trádáil leictreonach go háirithe, sa Mhargadh Inmheánach (“an Treoir maidir le trádáil leictreonach”) (IO L 178, 17.7.2000, lch. 1).

( ) Rialachán (AE) 2018/1724 ó Pharlaimint na hEorpa agus ón gComhairle an 2 Deireadh Fómhair 2018 maidir le pointe rochtana aonair digiteach a bhunú chun rochtain ar fhaisnéis, nósanna imeachta agus seirbhísí cúnaimh agus réitigh fadhbanna a sholáthar agus lena leasaítear Rialachán (AE) Uimh. 1024/2012 (IO L 295, 21.11.2018, lch. 1).

( ) Rialachán (AE) 2019/2023 ón gCoimisiún an 1 Deireadh Fómhair 2019 lena leagtar síos ceanglais éicidhearthóireachta le haghaidh meaisíní níocháin tí agus meaisíní triomadóir-niteoir tí de bhun Threoir 2009/125/CE ó Pharlaimint na hEorpa agus ón gComhairle, lena leasaítear Rialachán (CE) Uimh. 1275/2008 ón gCoimisiún agus lena n-aisghairtear Rialachán (AE) Uimh. 1015/2010 ón gCoimisiún (IO L 315, 5.12.2019, lch. 285).

( ) Rialachán (AE) 2019/2022 ón gCoimisiún an 1 Deireadh Fómhair 2019 lena leagtar síos ceanglais éicidhearthóireachta le haghaidh miasniteoirí tí de bhun Threoir 2009/125/CE ó Pharlaimint na hEorpa agus ón gComhairle lena leasaítear Rialachán (CE) Uimh. 1275/2008 ón gCoimisiún agus lena n-aisghairtear Rialachán (AE) Uimh. 1016/2010 ón gCoimisiún (IO L 315, 5.12.2019, lch. 267).

( ) Rialachán (AE) 2019/2019 ón gCoimisiún an 1 Deireadh Fómhair 2019 lena leagtar síos ceanglais éicidhearthóireachta maidir le fearais chuisniúcháin de bhun Threoir 2009/125/CE ó Pharlaimint na hEorpa agus ón gComhairle agus lena leasaítear Rialachán (CE) Uimh. 643/2009 ón gCoimisiún (IO L 315, 5.12.2019, lch. 187).

( ) Rialachán (AE) 2019/2021 ón gCoimisiún an 1 Deireadh Fómhair 2019 lena leagtar síos ceanglais éicidhearthóireachta maidir le taispeáintí leictreonacha de bhun Threoir 2009/125/CE ó Pharlaimint na hEorpa agus ón gComhairle agus lena leasaítear Rialachán (CE) Uimh. 1275/2008 ón gCoimisiún agus lena n-aisghairtear Rialachán (CE) Uimh. 642/2009 ón gCoimisiún (IO L 315, 5.12.2019, lch. 241).

( ) Rialachán (AE) 2019/1784 ón gCoimisiún an 1 Deireadh Fómhair 2019 lena leagtar síos ceanglais éicidhearthóireachta maidir le trealamh táthúcháin de bhun Threoir 2009/125/CE ó Pharlaimint na hEorpa agus ón gComhairle (IO L 272, 25.10.2019, lch. 121).

( ) Rialachán (AE) Uimh. 666/2013 ón gCoimisiún an 8 Iúil 2013 lena gcuirtear chun feidhme Treoir 2009/125/CE ó Pharlaimint na hEorpa agus ón gComhairle maidir le ceanglais éicidhearthóireachta le haghaidh folúsghlantóirí (IO L 192, 13.7.2013, lch. 24).

( ) Rialachán (AE) 2019/424 ón gCoimisiún an 15 Márta 2019 lena leagtar síos ceanglais éicidhearthóireachta maidir le freastalaithe agus táirgí stórála sonraí de bhun Threoir 2009/125/CE ó Pharlaimint na hEorpa agus ón gComhairle agus lena leasaítear Rialachán (AE) Uimh. 617/2013 ón gCoimisiún (IO L 74, 18.3.2019, lch. 46).

( ) Rialachán (AE) 2023/1670 ón gCoimisiún an 16 Meitheamh 2023 lena leagtar síos ceanglais maidir le héicidhearthóireacht i dtaca le fóin chliste, fóin phóca nach fóin chliste iad, fóin shiúil agus ríomhairí táibléid de bhun Threoir 2009/125/CE ó Pharlaimint na hEorpa agus ón gComhairle agus lena leasaítear Rialachán (AE) 2023/826 ón gCoimisiún (IO L 214, 31.8.2023, lch. 47).

( ) Rialachán (AE) 2023/2533 ón gCoimisiún an 17 Samhain 2023 lena gcuirtear chun feidhme Treoir 2009/125/CE ó Pharlaimint na hEorpa agus ón gComhairle maidir le ceanglais éicidhearthóireachta le haghaidh triomadóirí rothlaim tí, lena leasaítear Rialachán (AE) 2023/826 ón gCoimisiún, agus lena n-aisghairtear Rialachán (AE) Uimh. 932/2012 ón gCoimisiún (IO L, 2023/2533, 22.11.2023, ELI: http://data.europa.eu/eli/reg/2023/2533/oj).

( ) Rialachán (AE) 2023/1542 ó Pharlaimint na hEorpa agus ón gComhairle an 12 Iúil 2023 maidir le ceallraí agus ceallraí dramhaíola, lena leasaítear Treoir 2008/98/CE agus Rialachán (AE) 2019/1020 agus lena n-aisghairtear Treoir 2006/66/CE (IO L 191, 28.7.2023, lch. 1).

( 1 ) Rialachán (AE) 2024/1103 ón gCoimisiún an 18 Aibreán 2024 lena gcuirtear chun feidhme Treoir 2009/125/CE ó Pharlaimint na hEorpa agus ón gComhairle a mhéid a bhaineann le ceanglais éicidhearthóireachta le haghaidh téitheoirí spáis áitiúla agus na rialtáin ghaolmhara ar leithligh agus lena n-aisghairtear Rialachán (AE) 2015/1188 ón gCoimisiún (IO L, 2024/1103, 19.4.2024, ELI: http://data.europa.eu/eli/reg/2024/1103/oj).

		Iris Oifigiúil
		Uimh	Leathanach	Dáta
►M1	TREOIR TARMLIGTHE (AE) 2026/74 ÓN gCOIMISIÚN an 12 Eanáir 2026	L 74	1	20.4.2026