Is áis doiciméadúcháin amháin an téacs seo agus níl aon éifeacht dhlíthiúil aige. Ní ghabhann institiúidí an Aontais aon dliteanas orthu féin i leith inneachar an téacs. Is iad na leaganacha de na gníomhartha a foilsíodh in Iris Oifigiúil an Aontais Eorpaigh agus atá ar fáil ar an suíomh gréasáin EUR-Lex na leaganacha barántúla de na gníomhartha ábhartha, brollach an téacs san áireamh. Is féidir teacht ar na téacsanna oifigiúla sin ach na naisc atá leabaithe sa doiciméad seo a bhrú

RIALACHÁN TARMLIGTHE (AE) 2023/2465 ÓN gCOIMISIÚN

an 17 Lúnasa 2023

lena bhforlíontar Rialachán (AE) Uimh. 1308/2013 ó Pharlaimint na hEorpa agus ón gComhairle a mhéid a bhaineann le caighdeáin mhargaíochta le haghaidh uibheacha, agus lena n-aisghairtear Rialachán (CE) Uimh. 589/2008 ón gCoimisiún

Airteagal 1

Ábhar

Leis an Rialachán seo, forlíontar Rialachán (AE) Uimh. 1308/2013 le rialacha maidir le caighdeáin mhargaíochta le haghaidh uibheacha cearca den speiceas Gallus gallus, cé is moite d’uibheacha goir, go háirithe a mhéid a bhaineann leis an méid seo a leanas:

(a)

na critéir aicmithe;

(b)

an leasú agus an láimhseáil;

(c)

na ceanglais mharcála agus phacála;

(d)

téarmaí roghnacha forchoimeádta a úsáid;

(e)

na leibhéil lamháltais;

(f)

na coinníollacha maidir le hallmhairí agus onnmhairí.

Airteagal 2

Sainmhínithe

Chun críocha an Rialacháin seo agus Rialachán Cur Chun Feidhme (AE) 2023/2466, beidh feidhm ag na sainmhínithe in Airteagal 2(1) de Rialachán (CE) Uimh. 852/2004 agus ag pointí 5.2, 5.3, 5.4 agus 7.3 d’Iarscríbhinn I a ghabhann le Rialachán (CE) Uimh. 853/2004.

Ina theannta sin, beidh feidhm ag na sainmhínithe seo a leanas:

(a)

ciallaíonn ‘paca’ cumhdach ina bhfuil uibheacha Aicme A nó Aicme B, cé is moite de phacáistíocht iompair agus coimeádáin uibheacha chun críche tionsclaíochta;

(b)

ciallaíonn ‘díolachán uibheacha scaoilte’ uibheacha a thairiscint don tomhaltóir deiridh lena miondíol, seachas i bpacaí;

(c)

ciallaíonn ‘bailitheoir’ aon bhunaíocht atá cláraithe i gcomhréir le hAirteagal 6 de Rialachán (CE) Uimh. 852/2004 chun uibheacha a bhailiú ó tháirgeoir lena seachadadh ar ionad pacála uibheacha, ar mhargadh a dhíolann go heisiach le mórdhíoltóirí a bhfuil a ngnóthais formheasta mar ionaid pacála uibheacha, nó ar an tionscadal bia nó neamhbhia;

(d)

ciallaíonn ‘tionscal bia’ aon bhunaíocht ina dtáirgtear táirgí uibhe atá ceaptha lena gcaitheamh ag an duine, cé is moite d’oll-lónadóirí;

(e)

ciallaíonn ‘tionscal neamhbhia’ aon ghnólacht a tháirgeann táirgí ina bhfuil uibheacha nach bhfuil ceaptha lena gcaitheamh ag an duine;

(f)

ciallaíonn ‘oll-lónadóirí’ na bunaíochtaí dá dtagraítear in Airteagal 2(2), pointe (d), de Rialachán (AE) Uimh. 1169/2011;

(g)

ciallaíonn ‘uibheacha’ uibheacha i mblaosc — seachas uibheacha atá briste, gortha nó cócaráilte — a dtáirgeann cearca den speiceas Gallus gallus iad agus atá oiriúnach lena gcaitheamh go díreach ag an duine nó chun táirgí uibhe a ullmhú;

(h)

ciallaíonn ‘uibheacha briste’ uibheacha a bhfuil scoilteanna sa bhlaosc agus sna scannáin araon, rud a fhágann a bhfuil iontu gan chosaint;

(i)

ciallaíonn ‘uibheacha gortha’ uibheacha ó thráth a gcurtha isteach sa ghoradán ar aghaidh;

(j)

ciallaíonn ‘uibheacha chun críche tionsclaíochta’ uibheacha nach bhfuil ceaptha lena gcaitheamh ag an duine;

(k)

ciallaíonn ‘baisc’ na huibheacha i bpacaí nó scaoilte a thagann ón láithreán táirgthe nó ón ionad pacála uibheacha céanna atá suite in aon áit amháin, uibheacha ag a bhfuil an dáta breithe nó an dáta ar fearr roimhe nó an dáta pacála céanna, an modh feirmeoireachta céanna agus, i gcás uibheacha grádaithe, an grádú cáilíochta agus meáchain céanna;

(l)

ciallaíonn ‘athphacáil’ uibheacha a aistriú go fisiciúil go paca eile nó paca ina bhfuil uibheacha a athmharcáil;

(m)

ciallaíonn ‘margú’ uibheacha a choimeád chun iad a dhíol, lena n-áirítear iad a thairiscint lena ndíol, a stóráil, a phacáil, a lipéadú, a sheachadadh, nó aon fhoirm aistrithe eile, bíodh sin saor in aisce nó ná bíodh;

(n)

ciallaíonn ‘oibreoir’ táirgeoir agus aon duine nádúrtha nó dlítheanach eile a bhfuil baint aige le huibheacha a mhargú;

(o)

ciallaíonn ‘láithreán táirgthe’ bunaíocht ina gcoimeádtar béaróga, atá cláraithe i gcomhréir le Treoir 2002/4/CE ón gCoimisiún ( 1 );

(p)

ciallaíonn ‘ionad pacála uibheacha’ ionad pacála uibheacha de réir bhrí Rialachán (CE) Uimh. 853/2004 atá údaraithe i gcomhréir le hAirteagal 3(2) de Rialachán Cur Chun Feidhme (AE) 2023/2466 agus ina ndéantar uibheacha a ghrádú de réir cáilíochta agus meáchain;

(q)

ciallaíonn ‘tomhaltóir deiridh’ an tomhaltóir deiridh táirge bia nach n-úsáidfidh an bia mar chuid d’oibríocht gnólachta bia nó de ghníomhaíocht gnólachta bia ar bith;

(r)

ciallaíonn ‘cód táirgeora’ sainuimhir an láithreáin táirgthe de réir phointe 2 den Iarscríbhinn a ghabhann le Treoir 2002/4/CE.

Airteagal 3

Saintréithe cáilíochta na n-uibheacha

Beidh na saintréithe cáilíochta seo a leanas ag uibheacha Aicme A:

(a)

blaosc agus cúitineach: gnáthchruth, glan agus gan damáiste;

(b)

aerspás: airde nach mó ná 6 mm, ina stad; mar sin féin, chun uibheacha a mhargú mar uibheacha ‘rí-úr’, ní fhéadfaidh sé a bheith níos mó ná 4 mm;

(c)

buíocán: le feiceáil le linn an léasbhraite mar scáth amháin, gan imlíne inaitheanta shoiléir, beagáinín soghluaiste ar chasadh na huibhe, agus filleann sé ar shuíomh lárnach;

(d)

gealachán: geal, tréshoilseach;

(e)

ginidín: forbairt dhofheicthe;

(f)

ábhar eachtrach: ní cheadaítear é;

(g)

boladh eachtrach neamhbheartaithe: ní cheadaítear é.

Is éard a bheidh in uibheacha Aicme B uibheacha nach gcomhlíonann na saintréithe cáilíochta dá bhforáiltear i mír 1. Déanfar uibheacha Aicme A nach bhfuil na saintréithe sin acu a thuilleadh a íosghrádú go hAicme B. Is uibheacha Aicme B a bheidh in uibheacha nach marcáiltear laistigh de 10 lá tar éis a mbreithe.

Airteagal 4

Uibheacha a leasú agus a láimhseáil

Ní dhéanfar uibheacha Aicme A a ní ná a ghlanadh, roimh ghrádú ná ina dhiaidh, ach amháin mar a fhoráiltear i mír 3.

Ní dhéanfar uibheacha Aicme A a chóireáil lena leasú ná ní fhuarófar iad in áitribh nó i monarchana ina gcoimeádtar an teocht faoi bhun 5 °C go saorga. Mar sin féin, ní mheasfar go bhfuil uibheacha fuaraithe más ea gur coimeádadh iad ag teocht faoi bhun 5 °C le linn iompair ar feadh tréimhse nach faide ná 24 uair an chloig nó in áitribh mhiondíola nó i bhfortithe a ghabhann leo ar feadh tréimhse nach faide ná 72 uair an chloig.

Na Ballstáit a d’údaraigh, an 1 Meitheamh 2003, ionaid pacála uibheacha chun uibheacha a ní, féadfaidh siad leanúint d’ionaid pacála uibheacha a údarú chun uibheacha a ní, ar choinníoll go n-oibríonn na hionaid sin i gcomhréir leis na treoracha náisiúnta maidir le córais nite uibheacha. Ní fhéadfar uibheacha nite a mhargú ach amháin sna Ballstáit inar eisíodh údaruithe den sórt sin.

Spreagfaidh na Ballstáit dá dtagraítear i mír 3 forbairt treoracha náisiúnta dea-chleachtais le haghaidh córais nite uibheacha ag oibreoirí gnólachta bia, i gcomhréir le hAirteagal 8 de Rialachán (CE) Uimh. 852/2004.

Airteagal 5

Uibheacha Aicme A a ghrádú de réir meáchain

Déanfar uibheacha Aicme A a ghrádú de réir meáchain mar a leanas:

(a)

XL — an-mhór: meáchan ≥ 73 g;

(b)

L — mór: meáchan ≥ 63 g agus < 73 g;

(c)

M — meánach: meáchan ≥ 53 g agus < 63 g;

(d)

S — beag: meáchan < 53 g.

Léireofar an grádú meáchain leis na litreacha comhfhreagracha nó leis na téarmaí comhfhreagracha mar a shainmhínítear i mír 1 nó le meascán den dá rud, a fhéadfar a fhorlíonadh leis na raonta meáchain comhfhreagracha.

De mhaolú ar mhír 1, i gcás ina ndéantar uibheacha Aicme A de mhéideanna éagsúla a phacáil le chéile sa phaca céanna, tabharfar glanmheáchan íosta na n-uibheacha i ngraim agus beidh an tásc ‘Uibheacha de mhéideanna éagsúla’ nó téarmaí coibhéiseacha le feiceáil ar dhromchla seachtrach an phaca.

Airteagal 6

Teorainn ama chun uibheacha a ghrádú, a mharcáil agus a phacáil agus chun pacaí a mharcáil

Déanfar uibheacha Aicme A a ghrádú, a mharcáil agus a phacáil laistigh de 10 lá ó lá a mbreithe.

Déanfar uibheacha a mhargaítear i gcomhréir le hAirteagal 12 a ghrádú, a mharcáil agus a phacáil laistigh de 4 lá ó lá a mbreithe.

Déanfar an dáta ar fearr roimhe dá dtagraítear in Airteagal 11(1), pointe (d), den Rialachán seo a mharcáil tráth na pacála i gcomhréir le pointe 1 d’Iarscríbhinn X a ghabhann le Rialachán (AE) Uimh. 1169/2011.

Airteagal 7

Faisnéis a thaispeántar ar phacáistíocht iompair

Gan dochar d’Airteagal 18 de Rialachán (CE) Uimh. 178/2002, déanfaidh an táirgeoir gach pacáistíocht iompair ina bhfuil uibheacha a shainaithint ag an láithreán táirgthe leis na nithe seo a leanas:

(a)

ainm agus seoladh an táirgeora;

(b)

an cód táirgeora;

(c)

líon na n-uibheacha agus/nó a meáchan;

(d)

an dáta nó an tréimhse bhreithe;

(e)

an dáta seolta.

I gcás ionaid pacála uibheacha a soláthraítear uibheacha neamhphacáilte dóibh óna n-aonaid táirgthe féin atá suite ar an láithreán céanna, féadfar an tsainaithint ar an bpacáistíocht iompair a dhéanamh ag an ionad pacála uibheacha.

Cuirfear an fhaisnéis dá dtagraítear i mír 1 ar an bpacáistíocht iompair agus beidh sí le fáil ar na doiciméid tionlacain. Coimeádfaidh aon oibreoir idirghabhála ar a seachadtar na huibheacha cóip de na doiciméid sin. Coimeádfaidh an t-ionad pacála uibheacha a ghrádóidh na huibheacha bunchóipeanna na ndoiciméad tionlacain.

I gcás ina ndéanfar baisceanna a gheobhaidh bailitheoir a fhoroinnt lena seachadadh ar níos mó ná oibreoir amháin, féadfar lipéid iomchuí coimeádán iompair a chur in ionad na ndoiciméad tionlacain, ar choinníoll go mbeidh an fhaisnéis dá dtagraítear i mír 1 le fáil ar na lipéid sin.

An fhaisnéis dá dtagraítear i mír 1 a chuirfear ar an bpacáistíocht iompair, ní dhéanfar í a mhodhnú agus fanfaidh sí ar an bpacáistíocht iompair go dtí go mbainfear na huibheacha chun aon cheann de na nithe seo a leanas a dhéanamh láithreach: iad a ghrádú, a mharcáil, a phacáil nó a phróiseáil a thuilleadh.

Airteagal 8

Uibheacha a mharcáil chun iad a sheachadadh thar theorainneacha

Maidir le huibheacha a sheachadfar ó láithreán táirgthe ar bhailitheoir, ionad pacála uibheacha, tionscal bia nó neamhbhia atá suite i mBallstát eile, déanfar iad a mharcáil leis an gcód táirgeora sula bhfágfaidh siad an láithreán táirgthe.

Féadfaidh Ballstát a bhfuil an láithreán táirgthe suite ar a chríoch díolúine a dheonú ón gceanglas dá bhforáiltear i mír 1, i gcás ina mbeidh conradh seachadta sínithe ag táirgeoir le hionad pacála uibheacha i mBallstát eile ina gceanglaítear an mharcáil i gcomhréir leis an Rialachán seo. Ní fhéadfar díolúine den sórt sin a dheonú ach amháin arna iarraidh sin do na hoibreoirí lena mbaineann agus le comhaontú i scríbhinn roimh ré an Bhallstáit ina bhfuil an t-ionad pacála uibheacha suite. I gcásanna den sórt sin, gabhfaidh cóip den chonradh seachadta leis an gcoinsíneacht.

Ní fhéadfaidh tréimhse íosta na gconarthaí seachadta dá dtagraítear i mír 2 a bheith níos lú ná aon mhí amháin.

Na seirbhísí cigireachta, dá dtagraítear in Airteagal 9 de Rialachán Cur Chun Feidhme (AE) 2023/2466, is é sin seirbhísí cigireachta na mBallstát lena mbaineann agus seirbhísí cigireachta aon Bhallstáit idirthurais, cuirfear ar an eolas iad sula ndeonófar díolúine i gcomhréir le mír 2 den Airteagal seo.

Uibheacha Aicme B a mhargaítear i mBallstát eile atá marcáilte i gcomhréir le Cuid VI, Pointe III(1), an dara fomhír, d’Iarscríbhinn VII a ghabhann le Rialachán (AE) Uimh. 1308/2013, beidh tásc orthu, i gcás inarb iomchuí, i gcomhréir le hAirteagal 9 den Rialachán seo chun a áirithiú gurb éasca an t-idirdhealú a dhéanamh idir iad agus uibheacha d’Aicme A.

Airteagal 9

Tásca ar uibheacha Aicme B

Is éard a bheidh sa tásc dá dtagraítear i gCuid VI, Pointe III(1), an dara fomhír, d’Iarscríbhinn VII a ghabhann le Rialachán (AE) Uimh. 1308/2013 ciorcal ar trastomhas 12 mm ar a laghad thart timpeall ar an litir ‘B’ atá 5 mm ar airde ar a laghad, nó spota datha ar trastomhas 5 mm ar a laghad atá sofheicthe gan dua.

Airteagal 10

Marcáil uibheacha a sheachadtar go díreach ar an tionscal bia

Ach amháin mar a fhoráiltear a mhalairt leis an reachtaíocht sláintíochta, féadfaidh na Ballstáit oibreoirí a dhíolmhú, arna iarraidh sin dóibh, ó na hoibleagáidí marcála dá bhforáiltear i gCuid VI, Pointe III(1) d’Iarscríbhinn VII a ghabhann le Rialachán (AE) Uimh. 1308/2013 i gcás ina seachadfar uibheacha go díreach ar an tionscal bia ón láithreán táirgthe. Beidh an seachadadh faoi fhreagracht iomlán an oibreora tionscail bia, a gheallann, dá réir sin, nach n-úsáidfidh sé na huibheacha ach amháin lena bpróiseáil.

Sna cásanna dá dtagraítear i mír 1 ina seachadfar uibheacha ó láithreán táirgthe i mBallstát amháin ar an tionscal bia i mBallstát eile, cuirfidh an Ballstát ina bhfuil an láithreán táirgthe bunaithe údaráis inniúla an Bhallstáit eile ar an eolas go hiomchuí faoi dheonú an mhaolaithe marcála sula ndéanfar an chéad seachadadh.

Féadfaidh na Ballstáit uibheacha a allmhaireofar ó thríú tír agus a sheachadfar go díreach ar an tionscal bia a dhíolmhú óna marcáil ar choinníoll go ndéanfaidh údaráis inniúla an Bhallstáit a gceann scríbe deiridh chun críoch próiseála a sheiceáil.

Airteagal 11

Pacaí a mharcáil

Beidh an méid seo a leanas le feiceáil i gcló sofheicthe soléite ar dhromchla seachtrach pacaí ina bhfuil uibheacha Aicme A:

(a)

cóid na n-ionad pacála uibheacha ina ndearnadh uibheacha a phacáil agus, i gcás inarb iomchuí, a athphacáil;

(b)

an grádú cáilíochta; déanfar pacaí a shainaithint leis na focail ‘Aicme A’ nó leis an litir ‘A’, bíodh an méid sin leis féin nó i dteannta na bhfocal ‘úr’ nó ‘uibheacha úra’;

(c)

an grádú meáchain i gcomhréir le hAirteagal 5;

(d)

an dáta ar fearr roimhe i gcomhréir le hAirteagal 9(1), pointe (f), de Rialachán (AE) Uimh. 1169/2011;

(e)

an fhoclaíocht ‘uibheacha nite’ i gcás uibheacha a níodh i gcomhréir le hAirteagal 4 den Rialachán seo;

(f)

mar choinníoll speisialta stórála i gcomhréir le hAirteagal 9(1), pointe (g), de Rialachán (AE) Uimh. 1169/2011, tásc lena gcuirtear comhairle ar thomhaltóirí uibheacha a choimeád fuaraithe tar éis iad a cheannach.

Sa bhreis ar na ceanglais a leagtar síos i mír 1, beidh an modh feirmeoireachta le feiceáil i gcló sofheicthe soléite ar dhromchla seachtrach pacaí ina bhfuil uibheacha Aicme A.

Chun an modh feirmeoireachta a shainaithint, ní úsáidfear ach na téarmaí seo a leanas:

(a)

i gcás na feirmeoireachta traidisiúnta, na téarmaí a leagtar amach in Iarscríbhinn I a ghabhann leis an Rialachán seo;

(b)

i gcás an táirgthe orgánaigh, na téarmaí a leagtar amach in Airteagal 30(1) de Rialachán (AE) 2018/848 ó Pharlaimint na hEorpa agus ón gComhairle ( 2 ).

Míneofar brí an chóid táirgeora ar an bpaca nó laistigh de.

Beidh feidhm ag mír 2 gan dochar do bhearta teicniúla náisiúnta a théann thar na ceanglais íosta le haghaidh córais táirgthe i gcás na modhanna éagsúla feirmeoireachta uibheacha a leagtar síos in Iarscríbhinn II, nach bhféadfaidh feidhm a bheith acu ach amháin maidir le táirgeoirí de chuid an Bhallstáit lena mbaineann agus ar choinníoll go bhfuil siad ag luí le dlí an Aontais.

Beidh an méid seo a leanas le feiceáil i gcló sofheicthe soléite ar dhromchla seachtrach pacaí ina bhfuil uibheacha Aicme B:

(a)

cód an ionaid pacála uibheacha;

(b)

an grádú cáilíochta; déanfar pacaí a shainaithint leis na focail ‘Aicme B’ nó leis an litir ‘B’;

(c)

an dáta pacála.

Féadfaidh na Ballstáit a cheangal, i gcás pacaí uibheacha a tháirgfear ar a gcríoch, go ngreamófar na lipéid ar bhealach ina mbrisfear iad agus na pacaí á n-oscailt.

Airteagal 12

Téarmaí roghnacha forchoimeádta a bhaineann le cáilíocht

Féadfar an focal ‘rí-úr’ a úsáid mar thásc cáilíochta breise ar phacaí ina bhfuil uibheacha Aicme A go dtí an 9ú lá tar éis bhreith na n-uibheacha.

I gcás ina n-úsáidfear tásca dá dtagraítear i mír 1, taispeánfar an dáta breithe agus an teorainn ama 9 lá ar an bpaca ar bhealach sofheicthe soléite.

Airteagal 13

Téarmaí roghnacha forchoimeádta a bhaineann le beatha

I gcás ina n-úsáidfear tásc maidir leis an mbealach a bheathaítear na béaróga, beidh feidhm ag na ceanglais íosta seo a leanas:

(a)

ní fhéadfar tagairt a dhéanamh do ghránaigh mar chomhábhar beatha ach amháin i gcás inar 60 % de réir meáchain ar a laghad den fhoirmle bheatha a thabharfar iad, nach bhféadfaidh seachtháirgí gránach a bheith níos mó ná 15 % di;

(b)

gan dochar don mhéid íosta 60 % dá dtagraítear i bpointe (a), i gcás ina ndéanfar tagairt do ghránach sonrach, is 30 % ar a laghad den fhoirmle bheatha a úsáidfear a bheidh ann. I gcás ina ndéanfar tagairt shonrach do níos mó ná gránach amháin, is 5 % ar a laghad den fhoirmle bheatha a úsáidfear a bheidh i ngach ceann acu.

Airteagal 14

Faisnéis atá le taispeáint i gcás díolachán uibheacha scaoilte

I gcás díolachán uibheacha scaoilte, tabharfar an fhaisnéis seo a leanas ar chaoi ina mbeidh an tomhaltóir in ann í a fheiceáil agus a léamh gan dua:

(a)

an grádú cáilíochta;

(b)

an grádú meáchain i gcomhréir le hAirteagal 5;

(c)

tásc maidir leis an modh feirmeoireachta mar a leagtar síos in Airteagal 11(2);

(d)

míniú ar bhrí an chóid táirgeora;

(e)

an dáta ar fearr roimhe.

Airteagal 15

Cáilíocht na bpacaí

Gan dochar do na ceanglais maidir le cumhdach agus pacáistiú táirgí bia a leagtar síos i gCaibidil X d’Iarscríbhinn II a ghabhann le Rialachán (CE) Uimh. 852/2004, beidh pacaí turraingfhriotaíoch tirim glan, beidh dea-bhail orthu agus déanfar iad as ábhair a chosnaíonn na huibheacha ar bholadh coimhthíoch agus an riosca go dtiocfaidh meath ar an gcáilíocht.

Airteagal 16

Uibheacha chun críche tionsclaíochta a phacáil

Déanfar uibheacha chun críche tionsclaíochta a mhargú i gcoimeádáin phacáistíochta ar a mbeidh banda dearg nó lipéad dearg.

Taispeánfar an méid seo a leanas ar na bandaí agus na lipéid sin:

(a)

ainm agus seoladh an oibreora dá mbeartaítear na huibheacha;

(b)

ainm agus seoladh an oibreora a sheol na huibheacha;

(c)

na focail ‘uibheacha chun críche tionsclaíochta’ i gceannlitreacha atá 2 cm ar airde, agus na focail ‘neamhoiriúnach lena gcaitheamh ag an duine’ i litreacha atá 8 mm ar airde ar a laghad.

Airteagal 17

Athphacáil

Maidir le huibheacha Aicme A pacáilte, ní fhéadfaidh ach ionaid pacála uibheacha iad a athphacáil. Ní bheidh ach uibheacha de bhaisce amháin i ngach paca.

Airteagal 18

Lamháltas le haghaidh lochtanna cáilíochta

Ceadófar na lamháltais seo a leanas agus baisceanna uibheacha Aicme A á seiceáil:

(a)

ag an ionad pacála uibheacha, díreach roimh a seolta: lochtanna cáilíochta ar 5 % d’uibheacha;

(b)

le linn na gcéimeanna margaíochta eile: lochtanna cáilíochta ar 7 % d’uibheacha.

I gcás uibheacha a mhargaítear mar uibheacha ‘rí-úra’, ní cheadófar aon lamháltas le haghaidh airde an aerspáis tráth a bpacála ná a n-allmhairithe.

I gcás ina mbeidh níos lú ná 180 ubh sa bhaisc a sheiceálfar, déanfar na céatadáin dá dtagraítear i mír 1 a dhúbailt.

Airteagal 19

Lamháltas le haghaidh mheáchan na n-uibheacha

Ach amháin sa chás dá bhforáiltear in Airteagal 5(3) maidir le baisceanna uibheacha Aicme A a sheiceáil, ceadófar lamháltas a mhéid a bhaineann leis an meáchan in aghaidh na huibhe. Ní fhéadfaidh uibheacha a mbaineann gráduithe de réir meáchain atá in aice leis an ngrádú atá marcáilte ar an bpaca a bheith i gceist le níos mó ná 10 % de na baisceanna sin, ach ní fhéadfaidh uibheacha den chéad ghrádú de réir meáchain eile is ísle a bheith i gceist le níos mó ná 5 % díobh.

I gcás ina mbeidh níos lú ná 180 ubh sa bhaisc a sheiceálfar, déanfar na céatadáin dá dtagraítear i mír 1 a dhúbailt.

Airteagal 20

Lamháltas maidir le huibheacha a mharcáil

Ceadófar lamháltas ar dá réir a bheidh marcanna doléite ar 20 % de na huibheacha agus baisceanna agus pacaí á seiceáil.

Airteagal 21

Uibheacha atá le honnmhairiú go tríú tíortha

Féadfar a cheangal maidir le huibheacha a phacálfar agus a bheartófar lena n-onnmhairiú chuig tríú tíortha go gcomhlíonfaidh siad ceanglais atá éagsúil leis na ceanglais a leagtar síos i gCuid VI d’Iarscríbhinn VII a ghabhann le Rialachán (AE) Uimh. 1308/2013 agus sa Rialachán seo a mhéid a bhaineann le cáilíocht, marcáil agus lipéadú, nó ceanglais bhreise.

Airteagal 22

Uibheacha allmhairithe

Déanfaidh an Coimisiún meastóireacht ar chaighdeáin mhargaíochta le haghaidh uibheacha is infheidhme i dtríú tíortha is onnmhaireoirí arna iarraidh sin don tír lena mbaineann. Cumhdófar sa mheastóireacht sin na rialacha maidir le marcáil agus lipéadú, modhanna feirmeoireachta agus seiceálacha chomh maith lena gcur chun feidhme. Má fhaightear amach inti go dtugann na rialacha i bhfeidhm ráthaíochtaí leordhóthanacha maidir lena gcoibhéis le reachtaíocht an Aontais, marcálfar uibheacha a allmhaireofar ón tír lena mbaineann le sainuimhir a bheidh coibhéiseach leis an gcód táirgeora.

Áireofar in aon mheastóireacht ar choibhéis na rialacha dá dtagraítear i mír 1 measúnú i dtaobh an bhfuil na ceanglais atá sa Rialachán seo á gcomhlíonadh go héifeachtach ag oibreoirí sa tríú tír lena mbaineann. Déanfar í a thabhairt cothrom le dáta go tráthrialta. Foilseoidh an Coimisiún toradh na meastóireachta in Iris Oifigiúil an Aontais Eorpaigh.

Déanfar cód tíre ISO 3166 na tíre tionscnaimh a mharcáil ar uibheacha a allmhaireofar ó thríú tíortha, agus déanfar sin sa tír thionscnaimh ar bhealach soiléir soléite.

I gcás nach mbeidh ráthaíocht leordhóthanach ann maidir le coibhéis na rialacha dá dtagraítear i mír 1, beidh an méid seo a leanas le feiceáil i gcló sofheicthe soléite ar dhromchla seachtrach pacaí ina bhfuil uibheacha a allmhaireofar ón tríú tír lena mbaineann:

(a)

an tír thionscnaimh;

(b)

an modh feirmeoireachta: ‘caighdeán neamh-AE’.

Airteagal 23

Eisceachtaí le haghaidh na rann Francacha thar lear

De mhaolú ar Airteagal 4(2), uibheacha atá ceaptha lena dtrádáil ar bhonn miondíola sna ranna Francacha thar lear, féadfar iad a sheoladh — agus iad fuaraithe — chuig na ranna sin.

Sa chás dá dtagraítear i mír 1 den Airteagal seo, sa bhreis ar na ceanglais dá bhforáiltear in Airteagail 11 agus 14, beidh an fhoclaíocht ‘uibheacha fuaraithe’ le feiceáil agus taispeánfar sonraí maidir le cuisniú ar dhromchla seachtrach an phaca. Is é a bheidh sa mharc idirdhealaithe i gcás ‘uibheacha fuaraithe’ triantán comhshleasach atá 10 mm ar a laghad feadh na dtaobhanna.

Airteagal 24

Eisceachtaí le haghaidh réigiúin áirithe de chuid na Fionlainne

Uibheacha a dhíolfaidh an táirgeoir go díreach le hasraonta miondíola sna réigiúin a liostaítear in Iarscríbhinn III, déanfar iad a dhíolmhú ó cheanglais Chuid VI d’Iarscríbhinn VII a ghabhann le Rialachán (AE) Uimh. 1308/2013 agus ó cheanglais an Rialacháin seo. Mar sin féin, ní mór an modh feirmeoireachta a shainaithint go cuí i gcomhréir le hAirteagal 11(2) agus le hAirteagal 14, pointe (c), den Rialachán seo.

Airteagal 25

Aisghairm

Aisghairtear Rialachán (CE) Uimh. 589/2008.

Léireofar tagairtí don Rialachán aisghairthe mar thagairtí don Rialachán seo agus do Rialachán Cur Chun Feidhme (AE) 2023/2466 agus léifear iad i gcomhréir leis an tábla comhghaoil in Iarscríbhinn IV a ghabhann leis an Rialachán seo.

Airteagal 26

Teacht i bhfeidhm

Tiocfaidh an Rialachán seo i bhfeidhm an 20ú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach sna Ballstáit i gcomhréir leis na Conarthaí.

▼C1

IARSCRÍBHINN I

Téarmaí dá dtagraítear in Airteagal 11(2), an dara fomhír, pointe (a)

Cód teanga	1	2	3
BG	‘Яйца от кокошки – свободно отглеждане на открито’	‘Яйца от кокошки – подово отглеждане’	‘Яйца от кокошки - оглеждани в уголемени клетки’
ES	‘Huevos de gallinas camperas’	‘Huevos de gallinas sueltas en el gallinero’	‘Huevos de gallinas criadas en jaulas acondicionadas’
CZ	‘Vejce nosnic ve volném výběhu’	‘Vejce nosnic v halách’	‘Vejce nosnic v klecích/obohacené klece’
DA	‘Frilandsæg’	‘Skrabeæg’	‘Æg fra stimulusberigede bure’
DE	‘Eier aus Freilandhaltung’	‘Eier aus Bodenhaltung’	‘Eier aus ausgestalteter Käfighaltung’
ET	‘Vabalt peetavate kanade munad’	‘Õrrekanade munad’	‘Täiustatud puuris peetavate kanade munad’
EL	‘Αυγά ελεύθερης βοσκής’	‘Αυγά αχυρώνα ή αυγά στρωμνής’	‘Αυγά αναβαθμισμένων/διευθετημένων κλωβών’
EN	‘Free range eggs’	‘Barn eggs’	‘Eggs from enriched cages hens’
FR	‘Œufs de poules élevées en plein air’	‘Œufs de poules élevées au sol’	‘Œufs de poules élevées en cages aménagées’
HR	‘Jaja iz slobodnog uzgoja’	‘Jaja iz štalskog (podnog) uzgoja’	‘Jaja iz obogaćenih kaveza’
GA	‘Uibheacha saor-raoin’	‘Uibheacha sciobóil’	‘Uibheacha ó chearca a choinnítear i gcásanna cúbarnaí feabhsaithe’
IT	‘Uova da allevamento all’aperto’	‘Uova da allevamento a terra’	‘Uova da allevamento in gabbie attrezzate’
LV	‘Brīvās turēšanas apstākļos dētās olas’	‘Kūtī dētas olas’	‘Uzlabotos sprostos dētas olas’
LT	‘Laisvai laikomų vištų kiaušiniai’	‘Ant kraiko laikomų vištų kiaušiniai’	‘Pagerintuose narveliuose laikomų vištų kiaušiniai’
▼C2
HU	‘Szabad tartásban termelt tojás’	‘Alternatív tartásban termelt tojás’	‘Berendezett ketrecben termelt tojás’
▼C1
MT	‘Bajd tat-tiġieg imrobbija barra’	‘Bajd tat-tiġieġ imrobbija ma’ l-art	‘Bajd tat-tiġieġ imrobbija f’gaġeġ arrikkiti‘
NL	‘Eieren van hennen met vrije uitloop’	‘Scharreleieren’	‘Verrijkte kooi-eieren’
PL	‘Jaja z chowu na wolnym wybiegu’	‘Jaja z chowu ściółkowego’	‘Jaja z chowu w ulepszonych klatkach’
PT	‘Ovos de galinhas criadas ao ar livre’	‘Ovos de galinhas criadas no solo’	‘Ovos de galinhas criadas em gaiolas melhoradas’
RO	‘Ouă de găini crescute în aer liber’	‘Ouă de găini crescute în hale la sol’	‘Ouă de găini crescute în baterii îmbunătățite’
SK	‘Vajcia z chovu na voľnom výbehu’	‘Vajcia z podstielkového chovu’	‘Vajcia z chovu v obohatených klietkach’
SL	‘Jajca iz proste reje’	‘Jajca iz hlevske reje’	‘Jajca iz reje v obogatenih kletkah’
FI	‘Ulkokanojen munia’	‘Lattiakanojen munia’	‘Virikehäkkikanojen munia’
SV	‘Ägg från utehöns’	‘Ägg från frigående höns inomhus’	‘Ägg från höns i inredda burar’

▼B

IARSCRÍBHINN II

Ceanglais íosta le haghaidh córais táirgthe i gcás na modhanna éagsúla feirmeoireachta uibheacha dá dtagraítear in Airteagal 11(3)

1. Ní mór ‘uibheacha saor-raoin’ a tháirgeadh i gcórais táirgthe a chomhlíonann na coinníollacha a leagtar síos in Airteagal 4 de Threoir 1999/74/CE ar a laghad.

Ní mór na coinníollacha seo a leanas a chomhlíonadh, go háirithe:

(a)

ní mór rochtain leanúnach a bheith ag cearca ar chlóis faoin aer i rith an lae. Mar sin féin, ní chuireann an ceanglas sin cosc ar tháirgeoir srian a chur leis an rochtain sin ar feadh tréimhse teoranta le linn uaireanta na maidine i gcomhréir le gnáth-dhea-chleachtas na feirmeoireachta, lena n-áirítear dea-chleachtas na feirmeoireachta ainmhithe. I gcás inar forchuireadh srianta sealadacha ar bhonn reachtaíocht an Aontais, féadfar uibheacha a mhargú mar ‘uibheacha saor-raoin’ d’ainneoin an tsriain sin;

(b)

ní mór clóis faoin aer a bhfuil rochtain ag cearca orthu a bheith cumhdaithe le fásra den chuid is mó agus ní mór gan iad a úsáid chun críocha eile cé is moite d’úlloird, coillearnach agus innilt beostoic. Féadfaidh na húdaráis inniúla úsáid na gclós faoin aer chun críocha eile a údarú, go háirithe suiteáil painéil gréine, nach bhfuil ag teacht salach ar na coinníollacha leasa ainmhithe a leagtar síos i dTreoir 1999/74/CE agus nach gcuireann teorainn le soghluaisteacht na gcearc;

(c)

maidir le dlús stocála uasta na gclós faoin aer, ní mór nach mó é ná 2 500 cearc in aghaidh an heicteáir talún atá ar fáil do na cearca nó ná cearc amháin in aghaidh an 4 m2 i gcónaí. Mar sin féin, i gcás ina bhfuil 10 m2 ar a laghad in aghaidh na circe ar fáil agus i gcás ina ndéantar uainíocht agus ina dtugtar rochtain chothrom ar an limistéar iomlán do na cearca ar feadh shaol na healta, ní mór a áirithiú go bhfuil 2,5 m2 in aghaidh na circe ar a laghad ar fáil i ngach banrach a úsáidtear tráth ar bith;

(d)

ní mór nach dtéann clóis faoin aer níos faide ná 150 m ón gcomhla is gaire den fhoirgneamh. Mar sin féin, is ceadmhach síneadh suas le 350 m ón gcomhla is gaire den fhoirgneamh ar choinníoll go bhfuil líon leordhóthanach foscadán dá dtagraítear in Airteagal 4(1), pointe 3(b)(ii), de Threoir 1999/74/CE scaipthe go cothrom ar fud an chlóis faoin aer go léir agus go bhfuil ceithre fhoscadán ar a laghad in aghaidh an heicteáir ann.

2. Ní mór ‘uibheacha sciobóil’ a tháirgeadh i gcórais táirgthe a chomhlíonann na coinníollacha a leagtar síos in Airteagal 4 de Threoir 1999/74/CE ar a laghad.

3. Ní mór uibheacha ó ‘chásanna saibhrithe’ a tháirgeadh i gcórais táirgthe a chomhlíonann na coinníollacha a leagtar síos in Airteagal 6 de Threoir 1999/74/CE ar a laghad.

4. Féadfaidh na Ballstáit maoluithe ar phointí 1 agus 2 den Iarscríbhinn seo a údarú i gcás bunaíochtaí a bhfuil níos lú ná 350 béaróg acu nó a bhfuil béaróga goir á dtógáil acu a mhéid a bhaineann leis na hoibleagáidí dá dtagraítear in Airteagal 4(1), pointe 1(d), pointe 1(e), pointe 2, pointe 3(a)(i) agus pointe 3(b)(i), de Threoir 1999/74/CE.

IARSCRÍBHINN III

Réigiúin de chuid na Fionlainne dá dtagraítear in Airteagal 24

—

Lappi

—

Pohjois-Pohjanmaa

—

Kainuu

—

Pohjois-Karjala

—

Pohjois-Savo

—

Ahvenanmaa

IARSCRÍBHINN IV

Tábla comhghaoil

Rialachán (CE) Uimh. 589/2008	An Rialachán seo	Rialachán Cur Chun Feidhme (AE) 2023/2466
Airteagal 1	Airteagal 2	Airteagal 2
Airteagal 2(1)	Airteagal 3(1)
Airteagal 2(2) agus (3)	Airteagal 4(1) agus (2)
Airteagal 2(4)	Airteagal 3(2)
Airteagal 3	Airteagal 4(3) agus (4)
Airteagal 4	Airteagal 5
Airteagal 5		Airteagal 3
Airteagal 6	Airteagal 6
Airteagal 7	Airteagal 7
Airteagal 8	Airteagal 8
Airteagal 9		Airteagal 4
Airteagal 10	Airteagal 9
Airteagal 11	Airteagal 10
Airteagal 12	Airteagal 11
Airteagal 13	—	—
Airteagal 14	Airteagal 12
Airteagal 15	Airteagal 13
Airteagal 16	Airteagal 14
Airteagal 17	Airteagal 15
Airteagal 18	Airteagal 16
Airteagal 19	Airteagal 17
Airteagal 20		Airteagal 5
Airteagal 21		Airteagal 6
Airteagal 22		Airteagal 7
Airteagal 23		Airteagal 8
Airteagal 24		Airteagal 9
Airteagal 25		Airteagal 10
Airteagal 26	Airteagal 18
Airteagal 27	Airteagal 19
Airteagal 28	Airteagal 20
Airteagal 29	Airteagal 21
Airteagal 30	Airteagal 22
Airteagal 32		Airteagal 11
Airteagal 33	Airteagal 23
Airteagal 34	Airteagal 24
Airteagal 35	—	—
Airteagal 36	—	—
Airteagal 37	—	Airteagal 12
Iarscríbhinn I	Iarscríbhinn I
Iarscríbhinn II	Iarscríbhinn II
Iarscríbhinn III	Iarscríbhinn III

( 1 ) Treoir 2002/4/CE ón gCoimisiún an 30 Eanáir 2002 maidir le clárú bunaíochtaí ina gcoimeádtar béaróga, a chumhdaítear le Treoir 1999/74/CE ón gComhairle (IO L 30, 31.1.2002, lch. 44).

( 2 ) Rialachán (AE) 2018/848 ó Pharlaimint na hEorpa agus ón gComhairle an 30 Bealtaine 2018 maidir le táirgeadh orgánach agus lipéadú táirgí orgánacha agus lena n-aisghairtear Rialachán (CE) Uimh. 834/2007 ón gComhairle (IO L 150, 14.6.2018, lch. 1).

		Iris Oifigiúil
		Uimh	Leathanach	Dáta
M1	RIALACHÁN TARMLIGTHE (AE) 2024/2506 ÓN gCOIMISIÚN an 3 Iúil 2024	L 2506	1	24.9.2024

►C1	Ceartúchán, IO L 90278, 3.5.2024, lch. 1 ((AE) 2023/24652023/2465)
►C2	Ceartúchán, IO L 90097, 3.2.2025, lch. 1 (Tarmligthe (AE) 2023/2465L, 2023/2465)