CINNEADH (CBES) 2025/963 ÓN gCOMHAIRLE

an 20 Bealtaine 2025

lena leasaítear Cinneadh (CBES) 2024/2643 a bhaineann le bearta sriantacha i bhfianaise ghníomhaíochtaí díchobhsaitheacha na Rúise

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 29 de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)	An 8 Deireadh Fómhair 2024, ghlac an Chomhairle Cinneadh (CBES) 2024/2643 (1).

(2)

Sna conclúidí uaithi an 19 Nollaig 2024, cháin an Chomhairle Eorpach feachtas hibrideach na Rúise i gcoinne an Aontais Eorpaigh agus a Bhallstát, lena n-áirítear an sabaitéireacht, suaitheadh ar an mbonneagar criticiúil, cibirionsaithe, ionramháil agus cur isteach ar fhaisnéis, agus a hiarrachtaí chun an bonn a bhaint den daonlathas, lena n-áirítear an próiseas toghcháin. Dhearbhaigh an Chomhairle go leanfadh sí dá n-athléimneacht a neartú agus go mbainfeadh sí leas iomlán as gach dá bhfuil ar fáil di chun gníomhaíochtaí hibrideacha na Rúise a chosc, a dhíspreagadh agus a fhreagairt.

(3)	An 27 Eanáir 2025, thug Ardionadaí an Aontais do Ghnóthaí Eachtracha agus don Bheartas Slándála dá haire go bhfuil gníomhaíochtaí hibrideacha na Rúise ag éirí níos déine agus níos minice.

(4)

An 12 Márta 2025, ina rún maidir leis an bpáipéar bán i ndáil le todhchaí chosaint na hEorpa, chuir Parlaimint na hEorpa i bhfios go gcuireann cosaint theorainneacha talún, aeir agus muirí an Aontais le slándáil an Aontais ina iomláine, agus d’iarr sí go ndéanfaí bearta láithreach chun slándáil agus cosaint theorainn thoir thuaidh an Aontais leis an Rúis agus leis an mBealarúis a fheabhsú trí líne chosanta chuimsitheach athléimneach a bhunú ar chríocha talún, aeir agus muirí chun cur i gcoinne bagairtí míleata agus hibrideacha, lena n-áirítear ionstraimiú fuinnimh, sabaitéireacht bhonneagair agus ionstraimiú na himirce.

(5)

Is iomchuí, dá bhrí sin, toirmeasc a thabhairt isteach ar idirbhearta a bhaineann le sócmhainní inláimhsithe a bhfuil baint aici le gníomhaíochtaí díchobhsaitheacha na Rúise, lena n-áirítear soithí, aerárthaí, réadmhaoin agus gnéithe fisiceacha de líonraí digiteacha agus cumarsáide. Ar na sócmhainní inláimhsithe sin áirítear sócmhainní de chineál inchorraithe agus dochorraithe araon. Ba cheart a bheith in ann na sócmhainní inláimhsithe sin a aithint chun tacú le cur chun feidhme éifeachtach an toirmisc.

(6)

Is iomchuí freisin toirmeasc a thabhairt isteach ar idirbhearta institiúidí creidmheasa, eintiteas agus institiúidí airgeadais a sholáthraíonn seirbhísí cripteashócmhainní lena n-éascaítear, go díreach nó go hindíreach, gníomhaíochtaí a dhéanann daoine, eintitis nó comhlachtaí a mbíonn baint acu le gníomhaíochtaí díchobhsaitheacha na Rúise, nó a théann chun tairbhe dóibh ar bhealach eile.

(7)

Thug an Rúis faoi fheachtas córasach idirnáisiúnta ionramháil na meán agus saofa fíricí chun feabhas a chur ar a straitéis díchobhsaithe ar a tíortha comharsanachta agus ar an Aontas agus a Bhallstáit. Go háirithe, dhírigh an bholscaireacht agus an bhréagaisnéis ar pháirtithe polaitiúla Eorpacha arís agus arís eile agus ar bhonn leanúnach, go háirithe le linn tréimhsí toghcháin, agus chomh maith leis sin ar an tsochaí shibhialta, pobail mhionlacha, dídeanaithe, agus ar fheidhmiú na n-institiúidí daonlathacha san Aontas agus ina Bhallstáit.

(8)

Rinne an Rúis na gníomhaíochtaí hibrideacha sin a sheoladh trí roinnt eagraíochtaí meán atá faoi bhuanrialú díreach nó indíreach cheannaireacht na Rúise. Is bagairt shuntasach dhíreach iad na gníomhaíochtaí sin ar ord poiblí agus ar shlándáil an Aontais. Tá na heagraíochtaí meán sin, inter alia, fíor-riachtanach agus ríthábhachtach maidir le hionramháil faisnéise agus cur isteach ón Rúis i gcoinne an Aontais, nó i gcoinne a Bhallstát, eagraíochtaí idirnáisiúnta, nó tríú tíortha, a shaothrú.

(9)

I bhfianaise thromchúis na staide agus mar fhreagairt ar ghníomhaíochtaí díchobhsaitheacha na Rúise, is gá bearta sriantacha a thabhairt isteach chun ceadúnais chraolacháin eagraíochtaí meán Rúiseacha atá faoi bhuanrialú cheannaireacht na Rúise a chur ar fionraí san Aontas, agus toirmeasc a chur ar na heagraíochtaí sin a n-ábhar a chraoladh san Aontas, nó atá dírithe ar an Aontas. Ba cheart na bearta sin a choinneáil ar bun go dtí go gcuirfidh an Rúis agus na heagraíochtaí meán sin stop lena gcuid gníomhaíochtaí bolscaireachta i gcoinne an Aontais, i gcoinne ceann amháin nó níos mó dá Bhallstáit, in aghaidh eagraíocht idirnáisiúnta nó i gcoinne tríú tír.

(10)

Tá na bearta sin comhsheasmhach leis na cearta agus saoirsí bunúsacha a aithnítear i gCairt um Chearta Bunúsacha an Aontais Eorpaigh, go háirithe leis an gceart chun tuairimí a nochtadh agus faisnéis a fháil, leis an tsaoirse chun gnó a sheoladh agus leis an gceart chun maoine mar a aithnítear in Airteagail 11, 16 agus 17, faoi seach. Le tabhairt isteach na mbeart sin, ní chuirtear cosc ar na heagraíochtaí meán sin ná ar a mbaill foirne gníomhaíochtaí nach gníomhaíochtaí craolacháin iad a dhéanamh san Aontas, mar shampla taighde agus agallaimh. Go háirithe, leis na bearta sin, ní mhodhnaítear an oibleagáid atá ann na cearta, na saoirsí agus na prionsabail dá dtagraítear in Airteagal 6 den Chonradh ar an Aontas Eorpach a urramú, lena n-áirítear iad siúd atá sa Chairt um Chearta Bunúsacha an Aontais Eorpaigh, agus i mbunreachtanna na mBallstát, laistigh dá réimsí cur i bhfeidhm faoi seach.

(11)	Dá bhrí sin, ba cheart Cinneadh (CBES) 2024/2643 a leasú dá réir sin,

TAR ÉIS AN CINNEADH SEO A GHLACADH:

Airteagal 1

Leasaítear Cinneadh (CBES) 2024/2643 mar a leanas:

(1)

in Airteagal 1, cuirtear an méid seo a leanas in ionad mhír 1:

‘1. Déanfaidh na Ballstáit na bearta is gá chun teacht isteach ina gcríocha, nó chun idirthuras trína gcríocha, a chosc i leith na ndaoine nádúrtha seo a leanas a liostaítear in Iarscríbhinn I:

(a)

atá freagrach as gníomhaíochtaí nó beartais a chur chun feidhme, tacú leo, tairbhe a bhaint astu, a bheith rannpháirteach iontu nó iad a éascú, ar gníomhaíochtaí iad atá inchurtha i leith Rialtas Chónaidhm na Rúise lena mbaintear an bonn den daonlathas, den smacht reachta, den chobhsaíocht nó den tslándáil san Aontas, de cheann amháin nó de roinnt dá Bhallstáit, d’eagraíocht idirnáisiúnta nó de thríú tír, nó lena gcuirtear ceannasacht nó neamhspleáchas ceann amháin nó níos mó dá Bhallstáit nó tríú tír i mbaol, trí na gníomhaíochtaí seo a leanas:

(i)

bac a chur ar an bpróiseas polaitiúil daonlathach nó an t-ord poiblí agus sábháilteacht nó an bonn a bhaint díobh, nó an méid sin a phleanáil, a stiúradh, a bheith páirteach sa mhéid sin, go díreach nó go hindíreach, tacú leis, nó é a éascú ar shlí eile, lena n-áirítear trí bhac a chur ar reáchtáil toghchán nó an bonn a bhaint di sin, nó trí iarracht a dhéanamh an t-ord bunreachtúil a dhíchobhsú nó a threascairt;

(ii)	agóidí foréigneacha a phleanáil, a stiúradh, a bheith páirteach iontu, go díreach nó go hindíreach, tacú leo nó iad a éascú ar shlí eile;

(iii)

gníomhartha foréigin fisiceacha nó neamhfhisiceacha, lena n-áirítear gníomhaíochtaí chun daoine a cháineann gníomhaíochtaí nó beartais Chónaidhm na Rúise a chur ina dtost, a imeaglú, a chomhéigniú nó chun díoltas beacht a dhéanamh orthu, a phleanáil, a stiúradh, páirt a ghlacadh iontu, go díreach nó go hindíreach, tacú leo, nó iad a éascú ar bhealach éigin eile;

(iv)	úsáid ionramhála faisnéise agus cur isteach ar fhaisnéis a phleanáil, a stiúradh, páirt a ghlacadh inti, go díreach nó go hindíreach, tacú léi, nó í a éascú ar bhealach éigin eile;

(v)

aon ghníomhaíochtaí atá dírithe ar fheidhmiú institiúidí daonlathacha, gníomhaíochtaí eacnamaíocha nó seirbhísí leasa phoiblí, lena n-áirítear trí theacht isteach neamhúdaraithe i gcríoch Bhallstáit, lena n-áirítear a aerspás, é sin a phleanáil, a stiúradh, páirt a ghlacadh ann, go díreach nó go hindíreach, tacú leo, nó iad a éascú ar bhealach eile, nó aon ghníomhaíochtaí dar cuspóir cur isteach ar bhonneagar criticiúil, lena n-áirítear bonneagar fomhuirí, nó dochar a dhéanamh dó nó é a scriosadh, lena n-áirítear trí shabaitéireacht nó cibirghníomhaíochtaí mailíseacha mar chuid de ghníomhaíochtaí hibrideacha;

(vi)	ionstraimiú imirceach dá dtagraítear in Airteagal 1(4), pointe (b), de Rialachán (AE) 2024/1359 a phleanáil, a stiúradh, páirt a ghlacadh ann, go díreach nó go hindíreach, tacú leis, nó é a éascú ar bhealach eile;

(vii)

saothrú a dhéanamh ar choinbhleacht armtha, ar an éagobhsaíocht nó ar an neamhshlándáil, lena n-áirítear trí acmhainní nádúrtha agus fiadhúlra a thrádáil nó a shaothrú go haindleathach i dtríú tír;

(viii)

coinbhleacht fhoréigneach i dtríú tír a thionscnamh, tacú léi, nó í a éascú ar bhealach eile;

(b)	a bhfuil baint acu leis na daoine nádúrtha a liostaítear faoi phointí (a) agus (b);

(c)	a thugann tacaíocht do na daoine nádúrtha atá i mbun gníomhaíochtaí dá dtagraítear i bpointe (a).’

;

(2)

in Airteagal 2, cuirtear an méid seo a leanas in ionad mhír 1:

‘1. Na cistí agus na hacmhainní eacnamaíocha uile ar le daoine nádúrtha nó dlítheanacha, eintitis nó comhlachtaí iad, atá faoi úinéireacht, i seilbh nó faoi rialú na ndaoine nádúrtha nó dlítheanacha, na n-eintiteas nó na gcomhlachtaí sin:

(a)

(i)

bac a chur ar an bpróiseas polaitiúil daonlathach nó an t-ord poiblí agus sábháilteacht nó an bonn a bhaint díobh, nó an méid sin a phleanáil, a stiúradh, a bheith páirteach sa mhéid sin, go díreach nó go hindíreach, tacú leis, nó é a éascú ar shlí eile, lena n-áirítear trí bhac a chur ar reáchtáil toghchán nó an bonn a bhaint de sin, nó trí iarracht a dhéanamh an t-ord bunreachtúil a dhíchobhsú nó a threascairt;

(ii)	agóidí foréigneacha a phleanáil, a stiúradh nó a bheith páirteach iontu, go díreach nó go hindíreach, tacú leo, nó iad a éascú ar shlí eile;

(iii)

(iv)	úsáid ionramhála agus cur isteach ar fhaisnéis a phleanáil, a stiúradh, páirt a ghlacadh inti, go díreach nó go hindíreach, tacú léi, nó í a éascú ar bhealach éigin eile;

(v)

(vi)	ionstraimiú imirceach dá dtagraítear in Airteagal 1(4), pointe (b), de Rialachán (AE) 2024/1359 a phleanáil, a stiúradh, páirt a ghlacadh ann, go díreach nó go hindíreach, tacú leis, nó é a éascú ar bhealach eile;

(vii)

(viii)

coinbhleacht fhoréigneach i dtríú tír a thionscnamh, tacú léi, nó í a éascú ar bhealach eile;

(b)	a bhfuil baint acu leis na daoine nádúrtha nó dlítheanacha, na heintitis nó na comhlachtaí a liostaítear faoi phointí (a) agus (b);

(c)	a thugann tacaíocht do na daoine nádúrtha nó dlítheanacha, na heintitis nó na comhlachtaí atá i mbun gníomhaíochtaí dá dtagraítear i bpointí (a); mar a liostaítear in Iarscríbhinn I, déanfar iad a reo.’

;

(3)

cuirtear na hairteagail seo a leanas isteach:

‘Airteagal 2a

1. Toirmeascfar gabháil, go díreach nó go hindíreach, d’aon idirbheart a bhaineann le haon sócmhainn inláimhsithe, mar shampla soithí, aerárthaí, réadmhaoin, calafoirt, aerfoirt, agus gnéithe fisiceacha de líonraí digiteacha agus cumarsáide, mar a liostaítear in Iarscríbhinn II.

2. Áireofar ar an liosta in Iarscríbhinn II sócmhainní inláimhsithe:

(a)	a úsáidtear i ngníomhaíochtaí de chineál díchobhsaitheach lena gcuirtear bonneagar criticiúil, lena n-áirítear bonneagar fomhuirí, i mbaol nó lena ndéantar damáiste dó agus ar gníomhaíochtaí iad atá inchurtha i leith Rialtas Chónaidhm na Rúise nó a théann chun tairbhe dó;

(b)	a úsáidtear i gcomhthéacs gníomhaíochtaí de chineál díchobhsaitheach a sháraíonn rialacháin náisiúnta nó idirnáisiúnta nó rialacháin de chuid an Aontais maidir le haer, trácht muirí nó trácht talún, agus atá inchurtha i leith Rialtas Chónaidhm na Rúise nó a théann chun tairbhe dó;

(c)

a úsáidtear i ngníomhaíochtaí de chineál díchobhsaitheach, lena n-áirítear spiaireacht agus faireachas, iompar arm nó trealaimh mhíleata agus pearsanra mhíleata, ionramháil agus cur isteach ar fhaisnéis, agus atá inchurtha i leith Rialtas Chónaidhm na Rúise nó a théann chun tairbhe do Rialtas Chónaidhm na Rúise;

(d)	atá faoi úinéireacht, nó atá á gcairtfhostú nó á n-oibriú ag daoine nádúrtha nó dlítheanacha, eintitis nó comhlachtaí a liostaítear in Iarscríbhinn I, nó a úsáidtear ar bhealach eile in ainm na ndaoine sin, thar a gceann, i ndáil leo nó chun tairbhe na ndaoine sin.

3. Ní bheidh feidhm ag an toirmeasc i mír 1 maidir le hidirbhearta arna ndéanamh ar chúiseanna sábháilteachta muirí nó eitlíochta, nó atá riachtanach chun críoch daonnúil, nó chun teagmhas a chosc nó a mhaolú go práinneach, teagmhas ar dócha tionchar tromchúiseach mór a bheith aige ar shláinte agus ar shábháilteacht an duine nó ar an gcomhshaol, nó mar fhreagairt ar thubaistí nádúrtha.

4. Ní bheidh feidhm ag an toirmeasc i mír 1 maidir le hidirbhearta a eascraíonn as breithiúnas nó dámhachtain eadrána arna dtabhairt i mBallstát a aithint nó a fhorfheidhmiú, nó maidir le hidirbhearta arna ndéanamh chun críoch imscrúdaithe ar sháruithe ar an gCinneadh seo nó chun críoch imscrúdaithe ar ghníomhaíocht aindleathach eile.

5. De mhaolú ar mhír 1, féadfaidh údaráis inniúla Bhallstáit idirbhearta a bhaineann le sócmhainní inláimhsithe a liostaítear in Iarscríbhinn II a údarú faoi cibé coinníollacha a mheasann siad a bheith iomchuí, tar éis dóibh a chinneadh, ar bhonn cás ar chás, go bhfuil gá leis an idirbheart chun aon chríche atá comhsheasmhach le cuspóirí an Chinnidh seo.

Cuirfidh an Ballstát lena mbaineann na Ballstáit eile agus an Coimisiún ar an eolas faoi aon údarú den sórt sin a dheonaítear laistigh de 2 sheachtain ón údarú.

Airteagal 2b

1. Toirmeascfar gabháil, go díreach nó go hindíreach, d’aon idirbheart le:

(a)

duine dlítheanach, eintiteas nó comhlacht atá bunaithe lasmuigh den Aontas ar institiúid creidmheasa nó airgeadais é nó ar eintiteas é a sholáthraíonn seirbhísí cripteashócmhainní, a bhfuil baint aige le hidirbhearta lena n-éascaítear, go díreach nó go hindíreach, gníomhaíochtaí dá dtagraítear in Airteagal 1(1) ó Airteagal 2(1), nó a théann chun tairbhe ar bhealach eile do dhaoine, eintitis nó comhlachtaí atá ag gabháil do ghníomhaíochtaí dá dtagraítear in Airteagal 1(1) nó Airteagal 2(1); nó;

(b)

duine dlítheanach, eintiteas nó comhlacht a sholáthraíonn cúnamh teicniúil nó oibríochtúil do dhaoine nádúrtha nó dlítheanacha, d’eintitis nó do chomhlachtaí atá i mbun gníomhaíochtaí dá dtagraítear in Airteagal 1(1) nó Airteagal 2(1), mar a liostaítear in Iarscríbhinn III a ghabhann leis an gCinneadh seo iad.

2. Ní bheidh feidhm ag an toirmeasc i mír 1 maidir leis na hidirbhearta seo a leanas:

(a)	a bhfuil gá leo chun táirgí cógaisíochta, míochaine nó talmhaíochta agus bia, lena n-áirítear cruithneacht agus leasacháin, a onnmhairiú, a dhíol, a sholáthar, a aistriú nó a iompar;

(b)

a bhfuil géarghá leo chun rochtain ar imeachtaí breithiúnacha, riaracháin nó eadrána i mBallstát a áirithiú, agus chun aitheantas a thabhairt nó forfheidhmiú a dhéanamh maidir le breithiúnas nó dámhachtain eadrána arna soláthar i mBallstát ach na hidirbhearta sin a bheith comhsheasmhach le cuspóirí an Chinnidh seo agus le cuspóirí Rialachán (AE) 2024/2642 ón gComhairle (*1); nó

(c)	a bhfuil gá leo chun críoch daonnúil, ar nós cúnamh a sheachadadh nó an seachadadh sin a éascú, lena n-áirítear soláthairtí leighis, bia, nó oibrithe daonnúla agus cúnamh gaolmhar a aistriú, nó le haghaidh aslonnuithe.

Airteagal 2c

1. Toirmeascfar ar oibreoirí aon ábhar ó na daoine dlítheanacha, eintitis nó comhlachtaí a liostaítear in Iarscríbhinn IV a chraoladh, nó craoladh a chumasú, a éascú nó rannchuidiú leis an gcraoladh ar bhealach eile, lena n-áirítear trí tharchur nó trí dháileadh ar aon bhealach, mar shampla cábla, satailít, teilifís trí Phrótacal Idirlín (IP-TV), soláthraithe seirbhísí idirlín, ardáin nó feidhmchláir comhroinnte físeán idirlín, bíodh siad nua nó réamhshuiteáilte.

2. Cuirfear ar fionraí aon cheadúnas nó údarú craolacháin, agus aon socrú tarchuir nó dáileacháin, leis na daoine dlítheanacha, na heintitis nó na comhlachtaí a liostaítear in Iarscríbhinn IV.

3. Cuirfear toirmeasc ar fhógraíocht a dhéanamh ar tháirgí nó ar sheirbhísí in aon ábhar arna léiriú nó arna chraoladh ag na daoine dlítheanacha, na heintitis nó na comhlachtaí a liostaítear in Iarscríbhinn IV, lena n-áirítear trí tharchur nó trí dháileadh ar aon mhodh dá dtagraítear i mír 1 den airteagal seo

(*1) Rialachán (CBES) 2024/2642 ón gComhairle an 8 Deireadh Fómhair 2024 maidir le bearta sriantacha i bhfianaise ghníomhaíochtaí díchobhsaitheacha na Rúise (IO L, 2024/2642, 9.10.2024, ELI: http://data.europa.eu/eli/reg/2024/2642/oj).’;"

(4)	leasaítear an Iarscríbhinn a ghabhann le Cinneadh (CBES) 2024/2643 i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 20 Bealtaine 2025.

Thar ceann na Comhairle

An tUachtarán

K. KALLAS

(1) Cinneadh (CBES) 2024/2643 ón gComhairle an 8 Deireadh Fómhair 2024 a bhaineann le bearta sriantacha i bhfianaise ghníomhaíochtaí díchobhsaitheacha na Rúise (IO L, 2024/2643, 9.10.2024, ELI: http://data.europa.eu/eli/dec/2024/2643/oj).