Airteagal 1

Ábhar agus raon feidhme

Bunaítear leis an Rialachán seo rialacha sealadacha de chineál éigeandála chun dlús a chur leis an bpróiseas deonaithe ceadanna is infheidhme maidir le táirgeadh fuinnimh ó fhoinsí in-athnuaite fuinnimh, agus béim ar leith á leagan ar theicneolaíochtaí sonracha fuinnimh in-athnuaite nó ar chineálacha tionscadal lenar féidir dlús gearrthéarmach a chur le luas imscartha foinsí in-athnuaite fuinnimh san Aontas.

Tá feidhm ag an Rialachán seo maidir leis na próisis deonaithe ceadanna uile a bhfuil dáta tosaigh acu laistigh dá thréimhse cur i bhfeidhm agus tá sé gan dochar d’fhorálacha náisiúnta lena mbunaítear sprioc-amanna níos giorra ná na sprioc-amanna sin a leagtar síos in Airteagal 5(1).

▼B

Féadfaidh na Ballstáit an Rialachán seo a chur i bhfeidhm freisin maidir le próisis leanúnacha deonaithe ceadanna nach raibh cinneadh críochnaitheach mar thoradh orthu roimh an 30 Nollaig 2022, ar choinníoll go giorraítear leis sin an próiseas deonaithe ceadanna agus go gcaomhnaítear cearta dlíthiúla tríú páirtí atá ann cheana.

Airteagal 2

Sainmhínithe

Chun críocha an Rialacháin seo, beidh feidhm ag na sainmhínithe a leagtar amach in Airteagal 2 de Threoir (AE) 2018/2001/CE ó Pharlaimint na hEorpa agus ón gComhairle ( 1 ). Sa bhreis air sin, beidh feidhm ag na sainmhínithe seo a leanas:

(1)

ciallaíonn “próiseas deonaithe ceadanna” an próiseas:

(a)

ina gcuimsítear na ceadanna riaracháin ábhartha uile a eisítear maidir le gléasraí chun fuinneamh a tháirgeadh ó fhoinsí in-athnuaite a thógáil, a athchumhachtú agus a oibriú lena n-áirítear teaschaidéil, saoráidí comhshuite stórála fuinnimh agus na sócmhainní is gá lena gceangal leis an eangach, lena n-áirítear ceadanna maidir le ceangal leis an eangach agus measúnuithe tionchair comhshaoil i gcás inar gá iad sin; agus

(b)

ina gcuimsítear na céimeanna riaracháin uile a thosaíonn nuair a admhaítear go bhfuair an t-údarás ábhartha an t-iarratas iomlán agus a chríochnaíonn nuair a thugann an t-údarás ábhartha fógra faoin gcinneadh críochnaitheach maidir le toradh an phróisis;

(2)

ciallaíonn “trealamh grianfhuinnimh” trealamh a thiontaíonn fuinneamh ón ngrian go fuinneamh teirmeach nó leictreach, lena n-áirítear trealamh teirmeach gréine agus trealamh fótavoltach gréine.

Airteagal 3

Leas poiblí sáraitheach

Maidir le pleanáil, tógáil agus oibriú gléasraí agus suiteálacha le haghaidh táirgeadh fuinnimh ó fhoinsí in-athnuaite, agus a gceangal leis an eangach, an eangach ghaolmhar féin agus na sócmhainní stórála, measfar go bhfuil leas poiblí sáraitheach ag baint leo agus gur chun leas na sábháilteachta agus na sláinte poiblí atá siad agus leasanna dlíthiúla á gcothromú sa chás aonair, chun críocha Airteagal 6(4) agus Airteagal 16(1)(c) de Threoir 92/43/CEE ( 2 ) ón gComhairle, Airteagal 4(7) de Threoir 2000/60/CE ó Pharlaimint na hEorpa agus ón gComhairle ( 3 ) agus Airteagal 9(1)(a) de Threoir 2009/147/CE ó Pharlaimint na hEorpa agus ón gComhairle ( 4 ). Féadfaidh na Ballstáit cur i bhfeidhm na bhforálacha sin a theorannú do chodanna áirithe dá gcríoch agus do chineálacha áirithe teicneolaíochtaí nó do thionscadail lena mbaineann saintréithe teicniúla áirithe i gcomhréir leis na tosaíochtaí a leagtar amach ina bpleananna náisiúnta comhtháite fuinnimh agus aeráide.

▼M1

Áiritheoidh na Ballstáit, i gcás tionscadail a aithnítear mar thionscadail a bhfuil leas poiblí sáraitheach ag baint leo, go dtabharfar, agus leasanna dlíthiúla á gcothromú sa chás aonair, tosaíocht sa phróiseas pleanála agus deonaithe ceadanna do thógáil agus d’oibriú gléasraí agus suiteálacha le haghaidh táirgeadh fuinnimh ó fhoinsí in-athnuaite agus d’fhorbairt an bhonneagair eangaí lena mbaineann.

Maidir le cosaint speiceas, ní bheidh feidhm ag an gcéad fhomhír ach amháin má dhéantar, agus a mhéid a dhéantar, bearta iomchuí caomhnaithe speiceas a chuidíonn le líon na speiceas a choinneáil ar bun nó a athbhunú ag stádas caomhantais fabhrach agus má chuirtear acmhainní leordhóthanacha airgeadais chomh maith le limistéir ar fáil chun na críche sin.

▼M1

Airteagal 3a

Easpa réiteach malartach nó sásúil

Agus measúnú á dhéanamh an bhfuil aon réiteach malartach sásúil ar thionscadal le haghaidh gléasra nó suiteáil ina dtáirgtear fuinneamh ó fhoinsí in-athnuaite agus é a nascadh leis an eangach chun críocha Airteagail 6(4) agus 16(1) de Threoir 92/43/CEE ón gComhairle, Airteagal 4(7) de Threoir 2000/60/CE agus Airteagal 9(1) de Threoir 2009/147/CE, féadfar a mheas go bhfuil an coinníoll sin comhlíonta mura bhfuil aon réiteach malartach sásúil ann a d’fhéadfadh cuspóir céanna an tionscadail atá i gceist a bhaint amach, go háirithe maidir leis an acmhainn fuinnimh in-athnuaite chéanna a fhorbairt tríd an teicneolaíocht fuinnimh chéanna laistigh den tráthchlár céanna nó laistigh de thráthchlár comhchosúil agus gan costais i bhfad níos airde a bheith mar thoradh air.

Agus measúnú á dhéanamh an bhfuil aon réiteach malartach sásúil ar thionscnamh bonneagair eangaí is gá chun foinsí fuinnimh inathnuaite a chomhtháthú sa chóras leictreachais, chun críocha Airteagail 6(4) agus 16(1) de Threoir 92/43/CEE ón gComhairle, Airteagal 4(7) de Threoir 2000/60/CE agus Airteagal 9(1) de Threoir 2009/147/CE, féadfar a mheas go bhfuil an coinníoll sin comhlíonta mura bhfuil aon réiteach malartach sásúil ann a d’fhéadfadh cuspóir céanna an tionscadail atá i gceist a bhaint amach, laistigh den tráthchlár céanna nó laistigh de thráthchlár comhchosúil agus gan costais i bhfad níos airde a bheith mar thoradh air.

Agus bearta cúiteacha á gcur chun feidhme maidir le tionscadal le haghaidh gléasra nó suiteáil ina dtáirgtear fuinneamh ó fhoinsí in-athnuaite, agus maidir leis an mbonneagar eangaí gaolmhar atá riachtanach chun foinsí in-athnuaite fuinnimh a chomhtháthú sa chóras leictreachais, chun críoch Airteagal 6(4) de Threoir 92/43/CEE ón gComhairle, féadfaidh na Ballstáit a cheadú go ndéanfar na bearta sin i gcomhthráth le cur chun feidhme an tionscadail, mura bhfuil fianaise shoiléir ann go ndéanfadh tionscadal sonrach difear do-athraithe do na próisis éiceolaíocha atá riachtanach chun struchtúr agus feidhmeanna an láithreáin a chothabháil agus go gcuirfeadh sé i mbaol comhleanúnachas foriomlán líonra Natura 2000 sula mbeadh an cúiteamh i bhfeidhm. Féadfaidh na Ballstáit a cheadú go ndéanfaí na bearta cúiteacha sin a oiriúnú le himeacht ama, ag brath ar cibé acu a mheastar nó nach meastar go dtiocfaidh na héifeachtaí diúltacha suntasacha chun cinn sa ghearrthéarma, sa mheántéarma nó san fhadtéarma.

▼B

Airteagal 4

Luas a chur leis an bpróiseas deonaithe ceadanna maidir le trealamh grianfhuinnimh a shuiteáil

Maidir leis an bpróiseas deonaithe ceadanna maidir le trealamh grianfhuinnimh agus sócmhainní stórála fuinnimh comhshuite a shuiteáil, lena n-áirítear suiteálacha gréine agus trealamh grianfhuinnimh dín atá comhtháite san fhoirgneamh, i struchtúir shaorga atá ann cheana nó a bheidh ann amach anseo, cé is moite de dhromchlaí uisce saorga, áiritheoidh na Ballstáit, nach mairfidh an próiseas sin níos faide ná 3 mhí, ar choinníoll nach é príomhaidhm na struchtúr sin grianfhuinneamh a tháirgeadh. De mhaolú ar Airteagal 4(2) de Threoir 2011/92/AE, agus ar Iarscríbhinn II, pointí 3(a) agus (b), arna léamh leis féin nó in éineacht le pointe 13(a) d’Iarscríbhinn II a ghabhann leis an Treoir sin, díolmhófar suiteálacha trealaimh grianfhuinnimh den sórt sin ón gceanglas, más infheidhme, a bheith faoi réir cinnidh an bhfuil nó nach bhfuil measúnú ar an tionchar ar an gcomhshaol ag teastáil don tionscadal nó ón gceanglas measúnú tiomanta a dhéanamh ar an tionchar ar an gcomhshaol.

Féadfaidh na Ballstáit limistéir nó struchtúir áirithe a eisiamh ó fhorálacha mhír 1, ar chúiseanna a bhaineann le cosaint oidhreachta cultúrtha nó stairiúla, nó ar chúiseanna a bhaineann le leasanna cosanta náisiúnta nó leis an sábháilteacht.

Maidir leis an bpróiseas deonaithe ceadanna i dtaca le trealamh grianfhuinnimh a shuiteálann, lena n-áirítear féintomhaltóirí fuinnimh in-athnuaite a bhfuil acmhainneacht 50 kW nó níos lú acu, measfar an cead a bheith deonaithe mura dtugann na húdaráis nó na heintitis ábhartha freagra laistigh d'aon mhí amháin tar éis an iarratais, ar choinníoll nach mó acmhainneacht an trealaimh grianfhuinnimh ná acmhainneacht an naisc atá ann cheana leis an eangach dáileacháin.

I gcás ina mbeidh ualach suntasach riaracháin nó srianta suntasacha ar oibriú na heangaí leictreachais mar thoradh ar chur i bhfeidhm na tairsí acmhainneachta dá dtagraítear i mír 3 den Airteagal seo, féadfaidh na Ballstáit tairseach níos ísle a chur i bhfeidhm ar choinníoll go bhfanfaidh sí sin os cionn 10.8 kW.

Gach cinneadh a eascróidh as na próisis deonaithe ceadanna dá dtagraítear i mír 1 den Airteagal seo, cuirfear ar fáil go poiblí é i gcomhréir leis na hoibleagáidí atá ann cheana.

Airteagal 5

Gléasraí cumhachta fuinnimh in-athnuaite a athchumhachtú

▼M1

Maidir leis an bpróiseas deonaithe ceadanna chun tionscadail fuinnimh in-athnuaite atá lonnaithe i limistéar tiomnaithe in-athnuaite nó eangaí dá dtagraítear in Airteagal 6 a athchumhachtú, lena n-áirítear na ceadanna a bhaineann le huasghrádú na sócmhainní is gá chun iad a nascadh leis an eangach i gcás ina dtiocfaidh méadú ar acmhainneacht mar thoradh ar an athchumhachtú, ní mhairfidh sé níos faide ná 6 mhí lena n-áirítear measúnuithe tionchair comhshaoil i gcás ina gceanglaítear sin leis an reachtaíocht ábhartha.

▼B

I gcás nach dtiocfaidh méadú thar 15 % ar acmhainneacht an ghléasra fuinnimh in-athnuaite mar thoradh ar an athchumhachtú, agus gan dochar don ghá measúnú a dhéanamh ar aon tionchar comhshaoil a d’fhéadfadh a bheith ann de bhun mhír 3 den Airteagal seo, ceadófar naisc eangaí leis an eangach tarchuir nó dáileacháin laistigh de 3 mhí tar éis iarratas a dhéanamh chuig an eintiteas ábhartha mura bhfuil údar imní dea-bhunaithe maidir le sábháilteacht ann nó mura bhfuil neamh-chomhoiriúnacht theicniúil idir comhpháirteanna an chórais ann.

I gcás ina mbeidh athchumhachtú gléasra fuinnimh in-athnuaite, nó uasghrádú bonneagair eangaí lena mbaineann is gá chun foinsí fuinnimh in-athnuaite a chomhtháthú sa chóras leictreachais faoi réir cinnidh an bhfuil nó nach bhfuil nós imeachta um measúnú tionchair ar an gcomhshaol nó measúnú ar an tionchar ar an gcomhshaol de bhun Airteagal 4 de Threoir 2011/92/AE ag teastáil don tionscadal, beidh réamhchinneadh agus/nó an measúnú tionchair comhshaoil den sórt sin teoranta do na tionchair shuntasacha a d’fhéadfadh teacht as an athrú nó as an síneadh i gcomparáid leis an mbuntionscadal.

I gcás nach mbeidh úsáid spáis bhreise i gceist le hathchumhachtú suiteálacha gréine agus i gcás ina gcomhlíonfar na bearta maolaithe comhshaoil is infheidhme arna mbunú le haghaidh na bunsuiteála, díolmhófar an tionscadal ón gceanglas, más infheidhme, a bheith faoi réir cinnidh an bhfuil nó nach bhfuil measúnú ar an tionchar ar an gcomhshaol de bhun Airteagal 4 de Threoir 2011/92/AE ag teastáil don tionscadal.

Gach cinneadh a eascróidh as na próisis deonaithe ceadanna dá dtagraítear i míreanna 1 agus 2 den Airteagal seo, cuirfear ar fáil go poiblí é i gcomhréir leis na hoibleagáidí atá ann cheana.

Airteagal 6

Dlús a chur le próiseas deonaithe ceadanna na dtionscadal fuinnimh in-athnuaite agus do bhonneagar eangaí lena mbaineann atá riachtanach chun foinsí in-athnuaite a chomhtháthú sa chóras

Féadfaidh na Ballstáit tionscadail fuinnimh in-athnuaite, chomh maith le tionscadail stórála fuinnimh agus tionscadail eangaí leictreachais atá riachtanach chun fuinneamh in-athnuaite a chomhtháthú sa chóras leictreachais a dhíolmhú ón measúnú tionchair ar an gcomhshaol faoi Airteagal 2(1) de Threoir 2011/92/AE agus ó na measúnuithe ar chosaint speiceas faoi Airteagal 12(1) de Threoir 92/43/CEE agus faoi Airteagal 5 de Threoir 2009/147/CE, ar choinníoll go bhfuil an tionscadal le bheith lonnaithe i limistéar tiomnaithe in-athnuaite nó eangaí do bhonneagar eangaí lena mbaineann atá riachtanach chun fuinneamh in-athnuaite a chomhtháthú sa chóras leictreachais, má tá limistéar in-athuaite nó eangaí bunaithe ag na Ballstáit, agus go raibh an limistéar faoi réir measúnú straitéiseach comhshaoil i gcomhréir le Treoir 2001/42/CE ó Pharlaimint na hEorpa agus ón gComhairle ( 5 ). Áiritheoidh an t-údarás inniúil, ar bhonn na sonraí atá ann cheana, go gcuirfear bearta maolaithe iomchuí comhréireacha i bhfeidhm chun a áirithiú go gcomhlíonfar Airteagal 12(1) de Threoir 92/43/CE agus Airteagal 5 de Threoir 2009/147/CÉ. I gcás nach mbeidh na bearta sin ar fáil, áirithóidh an t-údarás inniúil go n-íocfaidh an t-oibreoir cúiteamh airgeadaíochta as cláir chosanta speiceas, chun go gcosnófar nó gcuirfear feabhas ar stádas caomhnaithe an speicis a ndéantar difear dó.

Airteagal 7

Dlús a chur le himscaradh teaschaidéal

Ní mhairfidh an próiseas deonaithe ceadanna maidir le teaschaidéil faoi bhun 50 MW a shuiteáil níos faide ná aon mhí amháin, agus ní mhairfidh an próiseas níos faide ná 3 mhí i gcás teaschaidéil fhoinse na talún.

Ach amháin i gcás go bhfuil údar imní dea-bhunaithe maidir le sábháilteacht ann, go bhfuil tuilleadh oibreacha de dhíth le haghaidh naisc eangaí nó go bhfuil neamhoiriúnacht theicniúil idir comhpháirteanna an chórais ann, déanfar na naisc leis an eangach tharchurtha nó dháileacháin a cheadú tar éis fógra a thabhairt don eintiteas ábhartha maidir leis na nithe seo a leanas:

(a)

teaschaidéil a bhfuil acmhainneacht leictreach suas le 12 kW acu; agus

(b)

teaschaidéil a bhfuil acmhainneacht leictreach suas le 50 kW acu arna suiteáil ag féintomhaltóir fuinnimh in-athnuaite, ar choinníoll go bhfuil acmhainneacht shuiteáil giniúna leictreachais in-athnuaite an fhéintomhaltóra fuinnimh in-athnuaite cothrom le 60 % ar a laghad d’acmhainneacht an teaschaidéil.

Féadfaidh na Ballstáit limistéir nó struchtúir áirithe a eisiamh ó fhorálacha an Airteagail seo, mar gheall ar chúiseanna a bhaineann le cosaint oidhreachta cultúrtha nó stairiúla, nó ar chúiseanna a bhaineann le leasanna cosanta náisiúnta nó leis an sábháilteacht.

▼M1

Airteagal 8

Tráthlínte don phróiseas deonaithe ceadanna chun gléasraí cumhachta fuinnimh in-athnuaite a athchumhachtú i limistéir thiomnaithe in-athnuaite nó eangaí dá dtagraítear in Airteagal 6

Agus na sprioc-amanna dá dtagraítear in Airteagal 5(1) á gcur i bhfeidhm, ní chomhairfear an t-am seo a leanas mar am a thagann laistigh de na sprioc-amanna sin ach amháin i gcás ina mbeidh sé i gcomhthráth le céimeanna riaracháin eile den phróiseas deonaithe ceadanna:

(a)

an t-am a bhfuil na gléasraí, a naisc eangaí agus, d’fhonn cobhsaíocht, iontaofacht agus sábháilteacht eangaí a áirithiú, an bonneagar eangaí riachtanach lena mbaineann á dtógáil nó á n-athchumhachtú lena linn; agus

(b)

an t-am le haghaidh na gcéimeanna riaracháin atá riachtanach le haghaidh uasghráduithe suntasacha ar an eangach is gá chun cobhsaíocht, iontaofacht agus sábháilteacht eangaí a áirithiú.

▼B

Airteagal 9

Athbhreithniú

Faoin 31 Nollaig 2023 ar a dhéanaí, déanfaidh an Coimisiún athbhreithniú ar an Rialachán seo i bhfianaise fhorbairt shlándáil an tsoláthair agus praghsanna fuinnimh agus i bhfianaise an ghá dlús breise a chur le himscaradh fuinnimh in-athnuaite. Cuirfidh sé tuarascáil maidir le príomhthorthaí an athbhreithnithe sin faoi bhráid na Comhairle. Féadfaidh an Coimisiún, bunaithe ar an tuarascáil sin, a mholadh go gcuirfí síneadh le bailíocht an Rialacháin seo.

Airteagal 10

Teacht i bhfeidhm agus cur i bhfeidhm

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ar feadh tréimhse 18 mí óna theacht i bhfeidhm.

▼M1

Mar sin féin, beidh feidhm ag Airteagal 1, Airteagal 2, pointe 1, Airteagal 3(2), Airteagal 3a, Airteagal 5(1), Airteagal 6 agus Airteagal 8 go dtí an 30 Meitheamh 2025.

▼B

		Iris Oifigiúil
		Uimh	Leathanach	Dáta
►M1	RIALACHÁN (AE) 2024/223 ÓN gCOMHAIRLE an 22 Nollaig 2023	L 223	1	10.1.2024