(1)

Le hAirteagal 4(1) de Threoir 2011/65/AE ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir leis na feidhmeanna a liostaítear in Iarscríbhinní III agus IV a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaintí iad caidmiam agus luaidhe a bhfuil srian orthu a liostaítear in Iarscríbhinn II a ghabhann le Treoir 2011/65/AE. Tá teorainn le luaidhe ag a bhfuil uasluach tiúchana 0,1 % agus le caidmiam ag a bhfuil uasluach tiúchana 0,01 % de réir meáchain in ábhair aonchineálacha.

(4)

An 14 Nollaig 2015, fuair an Coimisiún iarratas a rinneadh i gcomhréir le hAirteagal 5(3) de Threoir 2011/65/AE maidir le díolúine a dheonú do chaidmiam agus luaidhe i bhfuinneoga agus doirse leictreacha agus leictreonacha ina bhfuil clóiríd pholaivinile (PVC) aisghafa (‘an díolúine a iarradh’).

(5)

Rinneadh staidéar measúnaithe theicniúil eolaíoch (2) chun meastóireacht a dhéanamh ar an díolúine a iarradh. Mar chuid den mheastóireacht, rinneadh comhairliúcháin le páirtithe leasmhara mar a cheanglaítear le hAirteagal 5(7) de Threoir 2011/65/AE.

(6)

Úsáidtear caidmiam agus luaidhe in ábhar fráma PVC aisghafa do thacair fuinneog agus doirse chun críche cobhsaithe polaiméire na bpróifílí PVC.

(7)

Tagann an trealamh leictreach agus leictreonach a dtugtar tuairisc air sa díolúine a iarradh faoi chatagóir 11 d’Iarscríbhinn I a ghabhann le Treoir 2011/65/AE.

(8)

Cé go bhfuil PVC íon saor ó luaidhe agus caidmiam ar fáil ar an margadh, teastaíonn méideanna níos ísle fuinnimh agus acmhainní nádúrtha (amhail uisce, peitriliam agus salann nádúrtha) chun PVC aisghafa a úsáid ná mar a theastódh chun PVC íon a úsáid. Dá bhrí sin, is dócha gur mó na tionchair dhiúltacha iomlána don chomhshaol, don tsláinte agus do shábháilteacht an tomhaltóra a bheadh ann mar thoradh an ionadaithe ná na tairbhí don chomhshaol, don tsláinte agus do shábháilteacht an tomhaltóra. Dá bhrí sin, comhlíonann an díolúine a iarradh ceann amháin ar a laghad de na coinníollacha ábhartha a shonraítear in Airteagal 5(1), pointe (a), de Threoir 2011/65/AE.

(9)

Ní lagaíonn an díolúine an chosaint don chomhshaol agus don tsláinte a thugtar le Rialachán (CE) Uimh. 1907/2006 ó Pharlaimint na hEorpa agus ón gComhairle (3). Tá raon feidhme na díolúine teoranta do na hiontrálacha srianta reatha maidir le caidmiam agus luaidhe faoin Rialachán sin. Go sonrach, rinneadh raon feidhme na díolúine a ailíniú leis an maolú ar luaidhe in PVC aisghafa a leagtar amach i Rialachán (AE) 2023/923 ón gCoimisiún (4).

(10)

Dá bhrí sin, is iomchuí an díolúine a dheonú trí na feidhmeanna a chumhdaítear leis an díolúine sin in Iarscríbhinn III a ghabhann le Treoir 2011/65/AE a áireamh i dtaca le trealamh leictreach agus leictreonach i gcatagóir 11 d’Iarscríbhinn I a ghabhann le Treoir 2011/65/AE.

(11)

Ba cheart dáta éaga na díolúine a theorannú don 28 Bealtaine 2028, faoina ndéanfar athbhreithniú ar iontráil srianta 63, pointe 18, d’Iarscríbhinn XVII a ghabhann le Rialachán (CE) Uimh. 1907/2006. Tá an dáta éaga i gcomhréir leis an gcéad fhomhír d’Airteagal 5(2) de Threoir 2011/65/AE.

(12)

Ba cheart, dá bhrí sin, Treoir 2011/65/AE a leasú dá réir sin,