(1)

Mar a aithnítear sa Bhrollach a ghabhann le Prótacal 2014 a ghabhann le Coinbhinsiún Uimh. 29 maidir le saothar éigeantais (Coinbhinsiún EIS Uimh. 29) den Eagraíocht Idirnáisiúnta Saothair (EIS), is sárú tromchúiseach ar dhínit an duine agus ar chearta bunúsacha an duine é saothar éigeantais, rannchuidíonn sé le buanú na bochtaineachta agus seasann sé sa bhealach ar obair chuibhiúil a bhaint amach do chách. Dhearbhaigh EIS go gcuirfí deireadh le gach cineál saothair éigeantais nó saothair éigeantaigh mar phrionsabal ceart bunúsach. Aicmíonn EIS Coinbhinsiún EIS Uimh. 29, lena n-áirítear Prótacal forlíontach 2014 a ghabhann le Coinbhinsiún Uimh. 29 agus Coinbhinsiún EIS Uimh. 105 maidir le saothar éigeantais a dhíothú (Coinbhinsiún EIS Uimh. 105) mar choinbhinsiúin bhunúsacha EIS agus eisíonn sé moltaí chun saothar éigeantais a chosc, a dhíothú agus a leigheas, amhail Moladh Uimh. 203 maidir le Saothar Éigeantais (Bearta Forlíontacha). Tá roinnt táscairí forbartha ag EIS a úsáidtear chun cásanna saothair éigeantais a shainaithint agus a léiriú, amhail bagairtí agus díobháil fhisiceach agus ghnéasach iarbhír, mí-úsáid leochaileachta, mí-úsáid dálaí oibre agus maireachtála agus ragobair iomarcach, dallamullóg, srianadh gluaiseachta nó gaibhniú san ionad oibre nó limistéar teoranta, leithlisiú, cuibhriú fiachais, pá a choinneáil siar nó laghdú iomarcach pá, pasanna agus doiciméid aitheantais a choinneáil nó bagairt séanta chuig na húdaráis i gcás ina bhfuil stádas inimirce neamhrialta ag an oibrí. Is minic a bhíonn baint ag saothar éigeantais leis an mbochtaineacht agus leis an idirdhealú. Tá ionramháil creidmheasa agus fiachais, bíodh sin ag fostóirí nó ag gníomhairí earcaíochta, fós ina heochairthoisc lena sáinnítear oibrithe leochaileacha i gcásanna saothair éigeantais. De réir chomhlachtaí maoirseachta EIS, níl saothar príosúin, lena n-áirítear i gcás ina ndéantar é do chuideachtaí príobháideacha, ina shaothar éigeantais, ar choinníoll go ndéantar é ar bhonn deonach, ar mhaithe leis an bpríosúnach agus go bhfuil sé inchomparáide leis na coinníollacha a bhaineann le caidreamh saothair dheonaigh. Ba cheart gur chun leasa an phobail i gcónaí a bheadh an obair phobail mar smachtbhanna pionósach malartach ar phríosúnacht agus níor cheart do stáit, in imthosca ar bith, mí-úsáid a bhaint aisti mar bhealach chun an duine ciontaithe a dhíghrádú nó a ndínit a bhaint den duine sin. I gcásanna ina bhforchuirtear obair nó seirbhís trí leas a bhaint as leochaileacht an oibrí faoi bhagairt pionóis, ní gá an bhagairt sin a bheith i bhfoirm smachtbhanna pionóis ach d’fhéadfadh sé gur caillteanas ceart nó sochar a bheadh ann.

(2)

Baintear úsáid as saothar éigeantais go forleathan ar fud an domhain. Meastar go raibh tuairim is 27,6 milliún duine i gcásanna saothair éigeantais in 2021. Tá grúpaí leochaileacha agus imeallaithe i sochaí thar a bheith soghabhálach ó thaobh brú a chur orthu tabhairt faoi shaothar éigeantais. Áirítear ar ghrúpaí den sórt sin mná, leanaí, mionlaigh eitneacha, daoine faoi mhíchumas, daoine ó shainaicmí níos ísle, pobail dhúchasacha agus threibheacha, agus imircigh, go háirithe imircigh gan doiciméid a bhfuil stádas forbhásach acu agus má oibríonn siad sa gheilleagar neamhfhoirmiúil. Fiú nuair nach bhfuil sé forchurtha ag an stát, is minic a bhíonn saothar éigeantais mar thoradh ar easpa dea-rialachais nó gan aon dea-rialachas maidir le hoibreoirí eacnamaíocha áirithe agus léiriú gur theip ar stát cearta sóisialta agus saothair a fhorfheidhmiú, go háirithe i gcás grúpaí leochaileacha agus imeallaithe. Is féidir le saothar éigeantais tarlú freisin mar thoradh ar thoiliú intuigthe na n-údarás. Tarlaíonn 86 % de chásanna uile an tsaothair éigeantais san earnáil phríobháideach, go háirithe trí dhúshaothrú saothair éigeantais 17,3 milliún duine. Ba cheart oibleagáidí na n-oibreoirí eacnamaíocha a leagtar amach sa Rialachán seo a bheith intuartha agus soiléir chun comhlíonadh iomlán agus éifeachtach a áirithiú agus chun rannchuidiú le deireadh a chur le saothar éigeantais.

(3)

Is tosaíocht ag an Aontas saothar éigeantais de gach cineál, lena n-áirítear saothar éigeantais arna fhorchur ag an stát, a dhíothú. Tá meas ar dhínit an duine agus ar uilíocht agus dodhealaitheacht chearta an duine cumhdaithe go daingean in Airteagal 21 den Chonradh ar an Aontas Eorpach (CAE). Chun Sprioc 8.7 de Spriocanna Forbartha Inbhuanaithe na Náisiún Aontaithe a bhaint amach, ba cheart don Aontas tacú lena luachanna agus iad a chur chun cinn agus cur le cosaint chearta an duine, go háirithe cearta an linbh. Le hAirteagal 5 de Chairt um Chearta Bunúsacha an Aontais Eorpaigh (an Chairt), cuirtear toirmeasc go sainráite ar an sclábhaíocht, ar dhaoirse, ar shaothar éigeantais agus éigeantach agus ar gháinneáil ar dhaoine, agus foráiltear le hAirteagal 4 den Choinbhinsiún Eorpach chun Cearta an Duine agus Saoirsí Bunúsacha a chosaint nach bhfuiltear le ceangal ar aon duine saothar éigeantais nó éigeantach a dhéanamh. Tá léirmhíniú déanta ag an gCúirt Eorpach um Chearta an Duine arís agus arís eile ar Airteagal 4 den Choinbhinsiún Eorpach chun Cearta an Duine agus Saoirsí Bunúsacha a Chosaint go gceanglaítear ar Bhallstáit pionós a ghearradh agus ionchúiseamh éifeachtach a dhéanamh ar aon ghníomh a choinníonn duine sna cásanna a leagtar amach san Airteagal sin. Is ceart daonna é an ceart chun leigheasanna éifeachtacha a fháil i leith sáruithe ar chearta bunúsacha, agus is gné bhunúsach é den phróiseas chun coireanna a ionchúiseamh go héifeachtach. Dearbhaítear le dlí reatha an Aontais, Prionsabail Threoracha na Náisiún Aontaithe um Ghnó agus Cearta an Duine (PTNAnna), moladh Chomhairle na hEorpa maidir le cearta an duine agus gnó agus Treoirlínte na hEagraíochta um Chomhar agus Forbairt Eacnamaíochta (ECFE), amhail na Treoirlínte d’Fhiontair Ilnáisiúnta maidir le hIompar Gnó Freagrach, go bhfuil an ceart ag íospartaigh chun leigheas éifeachtach a fháil ó thaobh sáruithe nó mí-úsáidí ar chearta an duine a bhaineann le gnó, lena n-áirítear saothar éigeantais.

(4)

Dhaingnigh na Ballstáit uile coinbhinsiúin bhunúsacha EIS i réimse an tsaothair éigeantais, eadhon Coinbhinsiún EIS Uimh. 29 agus Coinbhinsiún EIS Uimh. 105, agus Coinbhinsiún EIS Uimh 182 maidir leis na Cineálacha is measa Saothair Leanaí (Coinbhinsiún EIS Uimh 182). Dá bhrí sin tá oibleagáid orthu de réir an dlí úsáid saothair éigeantais a chosc agus a dhíothú agus tuairisciú go tráthrialta chuig EIS.

(5)

Féachann an tAontas le húsáid saothair éigeantais a dhíothú trína chuid beartas agus tionscnaimh reachtacha agus obair chuibhiúil agus cearta saothair a chur chun cinn ar fud an domhain. Cuireann an tAontas dícheall cuí chun cinn i gcomhréir le treoirlínte agus prionsabail idirnáisiúnta arna mbunú ag eagraíochtaí idirnáisiúnta, lena n-áirítear EIS, ECFE agus na Náisiúin Aontaithe chun a áirithiú nach mbeadh áit ag saothar éigeantais i slabhraí soláthair gnóthas atá bunaithe san Aontas.

(6)

Tacaíonn beartas trádála an Aontais leis an gcomhrac i gcoinne saothar éigeantais i gcaidreamh trádála aontaobhach agus déthaobhach araon. Sna caibidlí ar thrádáil agus ar fhorbairt inbhuanaithe de chomhaontuithe trádála an Aontais, tá gealltanas ann coinbhinsiúin bhunúsacha EIS, lena n-áirítear Coinbhinsiún EIS Uimh. 29 agus Coinbhinsiún EIS Uimh. 105, a dhaingniú agus a chur chun feidhme go héifeachtach, de bhrí go mbunaítear le forálacha trádála agus inscne lionsa inscne atá riachtanach do chumhachtú eacnamaíoch na mban chun saothar éigeantais inscne a chomhrac. Ina theannta sin, féadfar fabhair tharaife aontaobhacha faoi Scéim Ghinearálaithe um Fhabhair an Aontais a tharraingt siar i gcás sáruithe tromchúiseacha agus córasacha ar Choinbhinsiún EIS Uimh. 29 agus ar Choinbhinsiún EIS Uimh. 105.

(7)

Bíonn tionchar ar leith ag saothar éigeantais ar ghrúpaí leochaileacha agus imeallaithe, amhail leanaí, mná, imircigh, dídeanaithe nó pobail dhúchasacha, agus dá bhrí sin tá cur chuige atá íogair ó thaobh trasnaí agus inscne bunriachtanach chun saothar éigeantais a chomhrac go héifeachtach. Táthar ag súil, dá bhrí sin, go rannchuideoidh an Rialachán seo le cuspóirí na gcomhaontuithe agus na gcoinbhinsiún idirnáisiúnta ábhartha, amhail cuspóirí Choinbhinsiún EIS Uimh. 182, Choinbhinsiún Chomhairle na hEorpa maidir le Foréigean in aghaidh na mBan agus Foréigean Baile a Chosc agus a Chomhrac, Dearbhú Bhéising, Meán Fómhair 1995, an Comhshocrú Domhanda maidir leis an Imirce Shábháilte, Ordúil agus Rialta, Coinbhinsiún na Ginéive i dtaobh Stádas Dídeanaithe, Dearbhú na Náisiún Aontaithe maidir le Cearta na bPobal Dúchasach agus Coinbhinsiún EIS Uimh. 169 maidir le pobail dhúchasacha agus threibheacha.

(8)

Le Treoir 2011/36/AE ó Pharlaimint na hEorpa agus ón gComhairle (3) déantar comhchuibhiú ar an sainmhíniú atá ar gháinneáil ar dhaoine, lena n-áirítear saothar nó seirbhísí éigeantais, agus bunaítear rialacha maidir le híosphionóis. Ba cheart aon rialacha a leagtar síos maidir le toirmeasc a chur ar tháirgí intíre nó táirgí allmhairithe arna ndéanamh le saothar éigeantais a chur ar mhargadh an Aontais agus a chur ar fáil ar mhargadh an Aontais, nó na táirgí sin a onnmhairiú, agus an oibleagáid lena áirithiú go dtarraingítear na táirgí sin siar ó mhargadh an Aontais (toirmeasc ar tháirgí arna ndéanamh le saothar éigeantais), a bheith gan dochar don Treoir sin, agus go háirithe d’inniúlacht na n-údarás forfheidhmithe dlí agus na n-údarás breithiúnach chun imscrúdú agus ionchúiseamh a dhéanamh ar chionta a bhaineann le gáinneáil ar dhaoine, lena n-áirítear dúshaothrú saothair.

(9)

Ceanglaítear le Rialachán (AE) 2017/821 ó Pharlaimint na hEorpa agus ón gComhairle (4) ar allmhaireoirí mianraí nó miotal ón Aontas a thagann faoi raon feidhme an Rialacháin sin oibleagáidí díchill chuí a chur i gcrích i gcomhréir le hIarscríbhinn II a ghabhann le Treoir ECFE um Dhícheall Cuí maidir le Slabhraí Soláthair Freagracha Mianraí ó Limistéir ina bhfuil Coinbhleacht agus Limistéir Ard-Riosca, agus leis na moltaí i dtaca le dícheall cuí atá leagtha amach iontu. I Rialachán (AE) 2023/1542 ó Pharlaimint na hEorpa agus ón gComhairle (5) tá oibleagáidí ar oibreoirí eacnamaíocha dícheall cuí a dhéanamh ina slabhraí soláthair, lena n-áirítear maidir le cearta saothair. Ceanglaítear le Rialachán (AE) 2023/1115 ó Pharlaimint na hEorpa agus ón gComhairle (6) go ndéanfaí dícheall cuí maidir le tráchtearraí agus táirgí áirithe a bhfuil baint acu le dífhoraoisiú agus le díghrádú foraoise, lena n-áirítear maidir le cearta an duine.

(10)

Le Treoir 2013/34/AE ó Pharlaimint na hEorpa agus ón gComhairle (7) ceanglaítear ar na Ballstáit a áirithiú go bhfoilseoidh oibreoirí eacnamaíocha áirithe ráitis neamhairgeadais gach bliain ina dtuairiscíonn siad ar thionchar a ngníomhaíochta ar nithe comhshaoil, sóisialta agus fostaithe agus ar urraim do chearta an duine, lena n-áirítear ar shaothar éigeantais, cúrsaí frith-éillithe agus breabaireachta. Thairis sin, le Treoir (AE) 2022/2464 ó Pharlaimint na hEorpa agus ón gComhairle (8) maidir le tuairisciú inbhuanaitheachta corparáideach leasaíodh an ceanglas sin trí cheanglais mhionsonraithe tuairiscithe a thabhairt isteach le haghaidh cuideachtaí a thagann faoi raon feidhme na Treorach sin maidir le hurraim do chearta an duine, lena n-áirítear i slabhraí soláthair domhanda. Ba cheart faisnéis faoi shaothar éigeantais ina slabhraí luacha a áireamh san fhaisnéis a nochtann gnóthais faoi chearta an duine, i gcás inarb ábhartha.

(11)

Mar chomhalta den Eagraíocht Dhomhanda Trádála (EDT), tá an tAontas tiomanta do chóras trádála oscailte iltaobhach atá bunaithe ar rialacha a chur chun cinn. Aon bhearta a thugann an tAontas isteach a dhéanann difear don trádáil, ba cheart dóibh a bheith comhlíontach le EDT.

(12)

I mí Iúil 2021, d’fhoilsigh an Coimisiún agus an tSeirbhís Eorpach Gníomhaíochta Seachtraí treoraíocht maidir le dícheall cuí do ghnólachtaí Aontais chun aghaidh a thabhairt ar riosca um shaothar éigeantais ina gcuid oibríochtaí agus ina slabhraí soláthair.

(13)

Mar a aithnítear sa teachtaireacht ón gCoimisiún an 23 Feabhra 2022 maidir le hobair chuibhiúil ar fud an domhain le haghaidh aistriú cóir agus téarnamh inbhuanaithe, d’ainneoin na mbeartas reatha agus an chreata reachtaigh, tá gá le tuilleadh gnímh chun na cuspóirí atá ann i dtaobh deireadh a chur le táirgí saothair éigeantais ar mhargadh an Aontais a bhaint amach agus, dá bhrí sin, rannchuidiú tuilleadh leis an gcomhrac in aghaidh an tsaothair éigeantais ar fud an domhain.

(14)

Áirítear ar phríomhthosaíochtaí an Aontais, mar a chumhdaítear i bPlean Gníomhaíochta an Aontais Eorpaigh maidir le Cearta an Duine agus leis an Daonlathas 2020-2024 iad, obair chuibhiúil agus todhchaí oibre atá dírithe ar an duine lena n-áiritheofaí urraim do phrionsabail bhunúsacha agus do chearta an duine a chur chun cinn, an t-idirphlé sóisialta a chur chun cinn mar aon le daingniú agus cur chun feidhme éifeachtach choinbhinsiúin agus phrótacail ábhartha EIS, bainistíocht fhreagrach a neartú i slabhraí soláthair domhanda agus rochtain ar an gcosaint shóisialta.

(15)

Ina rúin an 9 Meitheamh 2022 maidir le hionstraim trádála nua chun toirmeasc a chur ar tháirgí arna ndéanamh le saothar éigeantais (9), an 17 Nollaig 2020 maidir le saothar éigeantais agus staid na nUigiúrach i Réigiún Féinrialaitheach Xinjiang Uigiúrach (10) agus an 16 Nollaig 2021 maidir le saothar éigeantais i monarcha Linglong agus agóidí comhshaoil sa tSeirbia (11), cháin Parlaimint na hEorpa go láidir saothar éigeantais agus d’iarr sí go gcuirfí toirmeasc ar tháirgí arna ndéanamh le saothar éigeantais. Dá bhrí sin, is ábhar imní morálta don phobal é go bhféadfadh táirgí arna ndéanamh le saothar éigeantais a bheith ar fáil ar mhargadh an Aontais nó a bheith á n-onnmhairiú go tríú tíortha gan sásra éifeachtach a bheith ann chun táirgí den sórt sin a thoirmeasc nó a tharraingt siar.

(16)

Chun creat reachtach agus beartais an Aontais maidir le saothar éigeantais a chomhlánú, ba cheart toirmeasc a chur ar tháirgí arna ndéanamh le saothar éigeantais a chur ar mhargadh an Aontais nó a chur ar fáil ar mhargadh an Aontais, sin nó toirmeasc a chur ar onnmhairiú táirgí a táirgeadh sa chríoch bhaile nó táirgí allmhairithe arna ndéanamh le saothar éigeantais agus ba cheart a áirithiú go dtarraingítear siar na táirgí sin ó mhargadh an Aontais.

(17)

Faoi láthair níl aon dlí de chuid an Aontais ann lena gcumhachtaítear d’údaráis na mBallstát táirge a choinneáil go díreach, a urghabháil, nó a ordú go ndéanfaí é a tharraingt siar ar an mbonn go bhfuarthas amach go ndearnadh é, go hiomlán nó go páirteach, le saothar éigeantais.

(18)

Chun éifeachtacht an Rialacháin seo a áirithiú, ba cheart feidhm a bheith ag an toirmeasc ar tháirgí arna ndéanamh le saothar éigeantais maidir le táirgí ar úsáideadh saothair éigeantais ina leith ag aon chéim de tháirgeadh, de mhonarú, de bhaint nós d’eastóscadh na dtáirgí sin, lena n-áirítear in oibriú nó próiseáil a bhaineann le táirgí den sórt sin. Ba cheart feidhm a bheith ag an toirmeasc ar tháirgí arna ndéanamh le saothar éigeantais maidir le gach táirge, de chineál ar bith, lena n-áirítear a gcomhpháirteanna, agus ba cheart feidhm a bheith aige maidir le táirgí gan beann ar an earnáil, ar a dtionscnamh, cibé an táirgí intíre nó allmhairithe iad, nó a cuireadh ar fáil ar mhargadh an Aontais nó a onnmhairíodh. Níl feidhm ag an Rialachán seo maidir le soláthar seirbhísí iompair.

(19)

Ba cheart go rannchuideodh an toirmeasc ar tháirgí arna ndéanamh le saothair éigeantais leis na hiarrachtaí idirnáisiúnta deireadh a chur le saothar éigeantais. Dá bhrí sin, ba cheart an sainmhíniú ar ‘saothar éigeantais’ a ailíniú leis an sainmhíniú a leagtar síos i gCoinbhinsiún EIS Uimh. 29 ina luaitear go gciallaíonn saothar éigeantais nó éigeantach an obair nó an tseirbhís ar fad a éilítear ar aon duine faoi bhagairt aon phionóis agus nár thairg an duine sin é féin go deonach ina leith, cé is moite d’aon obair nó seirbhís a éilítear de bhua dlíthe seirbhíse míleata éigeantacha d’obair de chineál míleata amháin; d’aon obair nó seirbhís atá mar chuid de ghnáthoibleagáidí sibhialta saoránach tíre atá go hiomlán féinrialaitheach; d’aon obair nó seirbhís a éilítear ar aon duine mar thoradh ar chiontú i gcúirt dlí, ar choinníoll gur faoi mhaoirseacht agus faoi rialú údarás poiblí a dhéantar an obair nó an tseirbhís sin agus nach mbeidh an duine sin fruilithe ag daoine príobháideacha, cuideachtaí nó comhlachais phríobháideacha ná ar fáil dóibh; d’aon obair nó seirbhís a éilítear i gcásanna éigeandála, is é sin le rá, i gcás cogaidh nó tubaiste nó tubaiste bhagartha, amhail dóiteán, tuile, gorta, crith talún, géar-eipidéim nó galair eipeasótacha, ionradh ag lotnaidí ainmhithe, feithidí nó plandúla, agus go ginearálta aon imthoisc a chuirfeadh beatha nó leas an phobail uile nó cuid de i mbaol; de mhionseirbhísí comhchoiteanna de chineál a d’fhéadfaí a mheas dá bhrí sin, ar mhaithe le leas díreach an phobail sin, gur gnáthoibleagáidí sibhialta ar bhaill an phobail iad, ar choinníoll go mbeidh sé de cheart ag daoine den phobal nó ag a n-ionadaithe díreacha dul i gcomhairle leo maidir leis an ngá atá leis na seirbhísí sin.

(20)

Bunaithe ar an sainmhíniú ar shaothar éigeantais a shonraítear i gCoinbhinsiún EIS Uimh. 29 agus a úsáidtear sa Rialachán seo, leagtar amach le ‘Táscairí EIS maidir le saothar éigeantais’ agus leis na treoirlínte EIS dar teideal ‘Hard to See, Harder to Count’ [Deacair a fheiceáil, níos deacra a áireamh] na comharthaí is coitianta a léiríonn go bhféadfadh saothar éigeantais a bheith ann agus ba cheart iad a chur san áireamh agus an Rialachán seo á chur chun feidhme. D’fhéadfadh sé, áfach, nach mbeadh na táscairí sin leordhóthanach chun saothar éigeantais arna fhorchur ag údaráis stáit a shainaithint, ar saothar éigeantais é a bhíonn bunaithe ar bheartais chomhéigneacha agus shistéamacha dhomhanda a bhfuil táscairí breise atá deartha go sonrach ag teastáil ina leith.

(21)

Ba cheart an sainmhíniú ar ‘saothar éigeantais arna fhorchur ag údaráis stáit’ a ailíniú le Coinbhinsiún EIS Uimh. 105, lena gcuirtear toirmeasc go sonrach ar shaothar éigeantais nó saothar éigeantach a úsáid mar mhodh comhéigin pholaitiúil nó oideachais pholaitiúil nó mar phionós as tuairimí polaitiúla nó tuairimí a chur in iúl atá i gcoinne an chórais pholaitiúil, shóisialta nó eacnamaíoch atá bunaithe. Cuirtear toirmeasc leis freisin ar úsáid an tsaothair éigeantais mar mhodh chun é a shlógadh agus a úsáid chun críocha forbartha eacnamaíche, mar mhodh disciplín saothair, mar phionós as páirt a ghlacadh i stailceanna, nó mar mhodh idirdhealaithe chiníoch, shóisialta, náisiúnta nó reiligiúnaigh.

(22)

Ba cheart ciandíolacháin, lena n-áirítear díol ar líne, teacht faoi raon feidhme an Rialacháin seo freisin. I gcás táirge a tháirgtear lena dhíol ar líne nó trí mhodhanna eile ciandíolacháin, ba cheart a mheas go bhfuil an táirge le cur ar fáil ar an margadh má tá an tairiscint díolacháin dírithe ar úsáideoirí deiridh san Aontas. I gcomhréir le dlí an Aontais is infheidhme maidir leis an dlí idirnáisiúnta príobháideach, ba cheart anailís de réir an cháis a dhéanamh chun a shuí an bhfuil tairiscint dírithe ar úsáideoirí deiridh san Aontas. Ba cheart a mheas go bhfuil tairiscint díolacháin dírithe ar úsáideoirí deiridh san Aontas má dhíríonn an t-oibreoir eacnamaíoch ábhartha a chuid gníomhaíochtaí, ar aon bhealach, ar Bhallstát. Maidir leis na hanailísí de réir an cháis, ba cheart tosca ábhartha, amhail na limistéir gheografacha ar féidir seachadadh chucu, na teangacha atá ar fáil agus a úsáidtear don tairiscint nó don ordú, modhanna íocaíochta, úsáid airgeadra an Bhallstáit nó ainm fearainn atá cláraithe i gceann de na Ballstáit a chur san áireamh i ndáil leis sin. I gcás na ndíolachán ar líne, ní leor díreach go mbeadh comhéadan na n-oibreoirí eacnamaíocha nó comhéadan na soláthraithe margaí ar líne inrochtana sa Bhallstát ina bhfuil an t-úsáideoir deiridh bunaithe nó ina bhfuil sainchónaí air. Ó mheastar go bhfuil táirgí a thairgtear lena ndíol ar líne nó trí mhodhanna eile ciandíolacháin ar fáil ar mhargadh an Aontais má tá an tairiscint díola dírithe ar úsáideoirí deiridh san Aontas, tugtar de chumhacht do na húdaráis inniúla na bearta is gá a sheiceáil agus na gníomhaíochtaí is gá a dhéanamh i ndáil leis na táirgí sin de bhun an Rialacháin seo, cé nár cuireadh ar an margadh iad go hiarbhír tráth na tairisceana díola ar líne nó trí mhodhanna eile ciandíolacháin. Ní mór do na táirgí sin dlí ábhartha an Aontais atá i bhfeidhm tráth a chuirtear ar mhargadh an Aontais go hiarbhír iad a chomhlíonadh agus, i gcás táirgí a thagann isteach san Aontas, nuair a chuirtear faoin nós imeachta custaim ‘scaoileadh i saorchúrsaíocht’ iad. Cé go meastar go bhfuil an táirge a thairgtear lena dhíol ar líne nó trí mhodhanna eile ciandíolacháin ar fáil ar an margadh má tá an tairiscint díola dírithe ar úsáideoirí deiridh san Aontas, ba cheart an méid sin a bheith gan dochar do rialacha maidir le táirgí a thagann isteach i margadh an Aontais nó a fhágann margadh an Aontais.

(23)

Tá méadú tar éis teacht ar an úsáid a bhaintear as seirbhísí idirghabhálacha, go háirithe margaí ar líne, chun táirgí a dhíol. I ndáil leis sin, aon fhaisnéis a bhaineann le díol táirgí lena sáraítear an toirmeasc ar tháirgí arna ndéanamh le saothar éigeantais a bhunaítear sa Rialachán seo, ba cheart a mheas gur inneachar neamhdhleathach í de réir bhrí Airteagal 3, pointe (h), de Rialachán (AE) 2022/2065 ó Pharlaimint na hEorpa agus ón gComhairle (12) agus ba cheart í a bheith faoi réir na n-oibleagáidí agus na mbeart a leagtar amach sa Rialachán sin.

(24)

Ba cheart don Choimisiún agus d’údaráis inniúla na mBallstát sáruithe ar an toirmeasc ar tháirgí arna ndéanamh le saothar éigeantais a shainaithint. Nuair atá na húdaráis inniúla á n-ainmniú acu, ba cheart do na Ballstáit a áirithiú go bhfuil acmhainní leordhóthanacha daonna agus airgeadais ag na húdaráis sin agus go bhfuil na hinniúlachtaí agus an t-eolas is gá ag a bhfoirne, go háirithe maidir le cearta an duine, cearta saothair, comhionannas inscne, bainistiú slabhra soláthair agus próisis díchill chuí. Ba cheart d’údaráis inniúla dul i gcomhar go dlúth le húdaráis náisiúnta um chigireacht saothair agus le húdaráis bhreithiúnacha agus forfheidhmithe dlí, lena n-áirítear iadsan atá freagrach as gáinneáil ar dhaoine a chomhrac, ar bhealach nach gcuirfeadh imscrúduithe na n-údarás sin i mbaol.

(25)

Chun cur chun feidhme éifeachtach a chúraimí faoin Rialachán seo a áirithiú, go háirithe maidir le himscrúduithe a dhéanamh, ba cheart don Choimisiún a bheith in ann cúnamh a iarraidh ar chomhlachtaí, oifigí nó gníomhaireachtaí eile an Aontais a bhfuil sainordú iomchuí acu. D’fhéadfadh na cúraimí seo a leanas a bheith san áireamh leis na cúraimí sin: aighneachtaí faisnéise a phróiseáil, tacú le leithdháileadh imscrúduithe, réamh-imscrúduithe agus imscrúduithe a dhéanamh, comhar le húdaráis na mBallstát agus eatarthu a éascú, comhar idirnáisiúnta a éascú, tacú le huirlisí tacaíochta a fhorbairt agus, más iomchuí, tacú le cur chun feidhme ag údaráis chustaim agus tacú leis an gCoimisiún cinntí a ullmhú chun táirgí arna ndéanamh le saothar éigeantais a thoirmeasc. Tá an méid sin gan dochar do chúram an Choimisiúin, ina ról mar phríomhúdarás inniúil, chun cinntí a dhéanamh chun toirmeasc a chur ar tháirgí arna ndéanamh le saothar éigeantais a chur ar an margadh. Ba cheart don Choimisiún, ina ról mar phríomhúdarás inniúil, a chumhachtaí a fheidhmiú go neamhchlaonta, go trédhearcach agus le hurraim chuí d’oibleagáidí na rúndachta gairmiúla agus ba cheart an saineolas is gá a bheith aige. Ba cheart go mbeadh na hacmhainní ag an gCoimisiún chun an fhoireann is gá agus na costais ghaolmhara a mhaoiniú chun na cúraimí a chuirtear air faoin Rialachán seo a chur i gcrích agus chun an saineolas is gá a thógáil.

(26)

Ba cheart prionsabal na comhréireachta a bheith mar threoir ag na húdaráis inniúla agus ag an gCoimisiún agus an Rialachán seo á chur chun feidhme acu. Ba cheart do na húdaráis inniúla agus don Choimisiún a áirithiú, go háirithe, go bhfuil na bearta agus na gníomhaíochtaí uile a dhéantar le linn na réamhchéime den imscrúdú agus le linn an imscrúdaithe agus iad sin a leagtar amach sa chinneadh oiriúnach agus riachtanach chun an cuspóir inmhianaithe a bhaint amach agus nach gcuirfidh siad ualach iomarcach ar oibreoirí eacnamaíocha.

(27)

Chun comhar a áirithiú i measc an Choimisiúin agus na n-údarás inniúil arna n-ainmniú faoin Rialachán seo agus na n-údarás inniúil arna n-ainmniú faoi dhlí ábhartha eile de chuid an Aontais agus faoi dhlí ábhartha náisiúnta eile agus chun comhsheasmhacht a áirithiú ina mbearta agus ina gcinntí, ba cheart don Choimisiún agus d’údaráis inniúla arna n-ainmniú faoin Rialachán seo faisnéis a iarraidh ó údaráis ábhartha eile, nuair is gá sin, maidir le cibé acu atá oibreoirí eacnamaíocha faoi mheasúnú faoi réir dícheall cuí i ndáil le saothar éigeantais, nó a thugann siad faoi i gcomhréir le dlí an Aontais is infheidhme nó leis an dlí náisiúnta is infheidhme lena leagtar amach ceanglais díchill chuí agus trédhearcachta maidir le saothar éigeantais. Agus faisnéis á hiarraidh ó oibreoirí eacnamaíocha, ba cheart do na húdaráis inniúla prionsabal aonuaire an Choimisiúin a leanúint i gcás inar féidir, trí chomhar agus idirphlé méadaithe idir údaráis atá i mbun formhaoirseacht a dhéanamh ar rialáil táirgí. Chun na gcríoch céanna, agus i gcás inarb iomchuí, ba cheart do na húdaráis inniúla arna n-ainmniú faoin Rialachán seo na húdaráis ábhartha eile, amhail údaráis um fhaireachas margaidh, a chur ar an eolas faoina ngníomhaíochtaí agus faoina gcinntí.

(28)

Ní féidir forfheidhmiú aonfhoirmeach a dhéanamh ar an toirmeasc ar tháirgí arna ndéanamh le saothar éigeantais a thagann isteach i margadh an Aontais nó a fhágann margadh an Aontais, ach amháin trí mhalartú faisnéise agus comhar córasach idir na húdaráis inniúla, na húdaráis chustaim agus an Coimisiún. Ba cheart don Choimisiún tacú le malartú faisnéise agus le comhar den sórt sin.

(29)

Chun faisnéis a bhailiú, a phróiseáil agus a stóráil, i bhfoirm struchtúrtha, maidir le saincheisteanna a bhaineann le himscrúduithe, leis an bpróiseas cinnteoireachta agus le forfheidhmiú an toirmisc ar tháirgí arna ndéanamh le saothar éigeantais, ba cheart do na húdaráis inniúla an córas faisnéise agus cumarsáide maidir le faireachas margaidh dá dtagraítear in Airteagal 34 de Rialachán (AE) 2019/2020 ó Pharlaimint na hEorpa agus ón gComhairle (13) a úsáid, i gcomhréir leis an ngníomh cur chun feidhme ar cheart a thabhairt de chumhacht don Choimisiún é a ghlacadh faoin Rialachán seo (an ‘ICSMS’). Ba cheart rochtain a bheith ag an gCoimisiún, ag na húdaráis inniúla agus ag na húdaráis chustaim ar an gcóras sin chun tabhairt faoina ndualgais faoi seach faoin Rialachán seo. Is féidir leis na húdaráis inniúla freisin córais chumarsáide eile atá ann cheana a úsáid chun cumarsáid a dhéanamh le húdaráis eile laistigh dá mBallstát féin, a fhad is nach ndéanann sé sin difear don oibleagáid ICSMS a úsáid chun an Rialachán seo a chur chun feidhme.

(30)

Chun an leas is fearr a bhaint as an bpróiseas rialaithe a bhaineann le táirgí a thagann isteach i margadh an Aontais nó a fhágann margadh an Aontais agus an t-ualach a bhaint de, is gá aistriú uathoibrithe sonraí a cheadú idir ICSMS agus córais custam. Ba cheart idirdhealú a dhéanamh idir trí chineál aistrithe sonraí éagsúla i bhfianaise a gcuspóirí faoi seach. Ar an gcéad dul síos, ba cheart cinntí lena mbunaítear sárú ar an toirmeasc ar tháirgí arna ndéanamh le saothar éigeantais a chur in iúl ón ICSMS chuig an gCóras Bainistíochta Riosca Custam leictreonach dá dtagraítear in Airteagal 36 de Rialachán Cur Chun Feidhme (AE) 2015/2447 (14), ón gCoimisiún, gan dochar d’aon athrú ar an timpeallacht bainistíochta riosca custam amach anseo, le húsáid ag údaráis chustaim chun táirgí a d’fhéadfadh freagairt do chinneadh den sórt sin a shainaithint. Ba cheart na comhéadain atá ar fáil sa timpeallacht custam a úsáid do na chéad aistrithe sonraí sin. Ar an dara dul síos, i gcás ina sainaithneoidh údaráis chustaim táirge den sórt sin, beidh gá le cásbhainistiú, inter alia, chun an fógra faoin bhfionraí, conclúid na n-údarás inniúil agus toradh na mbeart a rinne údaráis chustaim a aistriú. Ba cheart go dtacódh Timpeallacht Fhuinneog Aonair an Aontais do Chustaim leis an dara haistriú sonraí sin idir ICSMS agus córais náisiúnta chustaim. Ar an tríú dul síos, tá faisnéis i gcórais custam maidir le táirgí a thagann isteach i margadh an Aontais agus a fhágann margadh an Aontais a bheadh ábhartha d’údaráis inniúla chun a gcuid dualgas a chomhlíonadh ach nach bhfuil rochtain acu orthu. Ba cheart, dá bhrí sin, an fhaisnéis ábhartha a bhaint amach agus a tharchur chuig ICSMS. Ba cheart na trí idirnasc a bheith fíor-uathoibrithe agus éasca le húsáid, chun teorainn a chur le haon ualach breise ar na húdaráis chustaim. Ba cheart an chumhacht a thabhairt don Choimisiún, i gcomhar le húdaráis chustaim agus le húdaráis inniúla, na gníomhartha cur chun feidhme is gá a ghlacadh chun na rialacha nós imeachta, na socruithe praiticiúla agus na heilimintí sonraí a bheidh le haistriú idir ICSMS agus córais custam a chinneadh chomh maith le haon cheanglas coimhdeach eile.

(31)

Ba cheart don Choimisiún bunachar sonraí táscach agus neamh-uileghabhálach de rioscaí saothair éigeantais a bhunú chun tacú le hobair na n-údarás inniúil measúnú a dhéanamh ar sháruithe féideartha ar an toirmeasc ar tháirgí arna ndéanamh le saothar éigeantais agus cuidiú le hoibreoirí eacnamaíocha rioscaí féideartha saothair éigeantais ina slabhraí soláthair a shainaithint. Ba cheart don Choimisiún a bheith in ann dul i muinín an tsaineolais sheachtraigh chun an bunachar sonraí a fhorbairt. Leis an mbunachar sonraí, ba cheart rioscaí maidir le saothar éigeantais a shainaithint i limistéir gheografacha shonracha nó i ndáil le táirgí sonracha nó grúpaí táirgí sonracha, agus ba cheart díriú go háirithe ar rioscaí forleathana agus tromchúiseacha saothair éigeantais, bunaithe ar fhaisnéis iontaofa agus infhíoraithe ó institiúidí idirnáisiúnta, institiúidí amhail EIS agus na Náisiúin Aontaithe, agus institiúidí taighde nó acadúla. Ba cheart an bunachar sonraí sin a chur ar fáil go poiblí tríd an Tairseach Aonair Saothair Éigeantais. I gcás ina bhfuil fianaise iontaofa agus infhíoraithe ann go bhfuil riosca mór ag baint le táirgí a tháirgeann earnálacha eacnamaíocha sonracha i limistéir gheografacha shonracha go ndearnadh le saothar éigeantais arna fhorchur ag údaráis stáit iad, ba cheart na hearnálacha sin sna limistéir sin a shainaithint sa bhunachar sonraí arna bhunú de bhun an Rialacháin seo.

(32)

D’fhéadfadh acmhainní agus cumas teoranta a bheith ag micrifhiontair, fiontair bheaga agus mheánmhéide (FBManna) lena áirithiú go bhfuil na táirgí a chuireann siad ar mhargadh an Aontais nó a chuireann siad ar fáil ar mhargadh an Aontais saor ó shaothar éigeantais. Dá bhrí sin, ba cheart don Choimisiún treoirlínte a eisiúint maidir le dícheall cuí i ndáil le saothar éigeantais, inar cheart go gcuirfí san áireamh freisin méid agus acmhainní eacnamaíocha oibreoirí eacnamaíocha. Chomh maith leis sin, ba cheart don Choimisiún treoirlínte a eisiúint i ndáil le táscairí riosca saothair éigeantais, lena n-áirítear conas iad a shainaithint, ar cheart iad a bheith bunaithe ar fhaisnéis neamhspleách infhíoraithe, lena n-áirítear tuarascálacha ó eagraíochtaí idirnáisiúnta, go háirithe EIS.

(33)

Ba cheart don Choimisiún cosc a chur ar ualach riaracháin ar FBManna nach bhfuil gá leis. Ina theannta sin, ba cheart don Choimisiún bearta tionlacain a fhorbairt chun tacú le hiarrachtaí oibreoirí eacnamaíocha agus a gcomhpháirtithe gnó sa slabhra soláthair céanna, go háirithe FBManna. Ba cheart do na Ballstáit pointí teagmhála a ainmniú do FBManna chun críocha an Rialacháin seo a d’fhéadfadh a bheith ina ndeasca cabhrach um ghnó agus cearta an duine nó ina bpointí teagmhála díchill chuí atá ann cheana. Ba cheart do FBManna a bheith ábalta teagmháil a dhéanamh le húdarás inniúil an Bhallstáit ina bhfuil siad bunaithe, agus úsáid á baint acu as an bhfaisnéis a sholáthraítear ar an Tairseach Aonair Saothair Éigeantais. Ba cheart dóibh a bheith ábalta, go háirithe, idirchaidreamh a bheith acu le húdarás inniúil chun tacú leo ar feadh imscrúdaithe. Ba cheart acmhainní tacaíochta leordhóthanacha a chur ar fáil ar líne freisin ar shlí shoiléir agus intuigthe do FBManna.

(34)

Ba cheart don Choimisiún treoirlínte a eisiúint maidir le conas dul i mbun idirphlé leis na húdaráis inniúla chun cuidiú le hoibreoirí eacnamaíocha, agus go háirithe FBManna, chomh maith le geallsealbhóirí eile, chun an toirmeasc ar tháirgí arna ndéanamh le saothar éigeantais a chomhlíonadh. Ina theannta sin, ba cheart don Choimisiún treoirlínte a eisiúint freisin chun cuidiú le haon duine nó comhlachas faisnéis a chur isteach.

(35)

Agus an éagsúlacht de dhlí an Aontais a bhaineann le saincheisteanna saothair éigeantais á cur san áireamh, ba cheart don Choimisiún treoraíocht a chur ar fáil d’oibreoirí eacnamaíocha, go háirithe FBManna, maidir le conas na hoibleagáidí éagsúla a eascraíonn as dlí an Aontais a chur i bhfeidhm.

(36)

Ba cheart don Choimisiún treoirlínte a eisiúint chun cur chun feidhme an Rialacháin seo a éascú ag oibreoirí eacnamaíocha agus ag údaráis inniúla. Sna treoirlínte d’oibreoirí eacnamaíocha, ba cheart treoraíocht a áireamh maidir le dícheall cuí i ndáil le saothar éigeantais, lena n-áirítear le haghaidh cineálacha éagsúla soláthróirí agus earnálacha gníomhaíochta, maidir le dea-chleachtais chun deireadh a chur le saothar éigeantais agus é a leigheas agus maidir le díscor freagrach. Tuigtear gurb ionann leigheas agus aiseag an duine nó na ndaoine nó na bpobal dá ndéantar difear i staid atá coibhéiseach leis an staid ina mbeidís murar tharla saothar éigeantais, nó chomh gar agus is féidir di, i gcomhréir le rannpháirtíocht na cuideachta leis an saothar éigeantais, lena n-áirítear cúiteamh airgeadais nó neamhairgeadais arna sholáthar ag an gcuideachta do dhuine nó do dhaoine a ndéanann saothar éigeantais difear dóibh agus, i gcás inarb infheidhme, aisíocaíocht na gcostas arna dtabhú ag údaráis phoiblí as aon bhearta feabhais is gá. Ba cheart, sa treoraíocht d’údaráis inniúla, díriú ar fhaisnéis atá ábhartha do chur chun feidhme praiticiúil an Rialacháin seo. Ba cheart go gcuirfeadh an treoraíocht maidir le dícheall cuí i ndáil le saothar éigeantais leis an Treoraíocht maidir le dícheall cuí do ghnólachtaí an Aontais chun aghaidh a thabhairt ar an riosca um shaothar éigeantais ina gcuid oibríochtaí agus slabhraí soláthair arna foilsiú ag an gCoimisiún agus ag an tSeirbhís Eorpach Gníomhaíochta Seachtraí i mí Iúil 2021. Ba cheart na treoirlínte a bheith i gcomhréir le treoirlínte eile an Choimisiúin ina leith sin agus le treoirlínte ábhartha eagraíochtaí idirnáisiúnta. Ba cheart na treoirlínte a fhorbairt i gcomhairle leis na geallsealbhóirí ábhartha agus ba cheart iad a bheith ag brath ar thaithí agus ar dhea-chleachtais ó údaráis ábhartha na mBallstát. Ba cheart na tuarascálacha ó eagraíochtaí idirnáisiúnta, go háirithe EIS, chomh maith le foinsí faisnéise neamhspleácha agus infhíoraithe eile a bhreithniú chun táscairí riosca a shainaithint.

(37)

Ós rud é gur fadhb é saothar éigeantais atá ar fud an domhain agus i bhfianaise idirnaisc na slabhraí soláthair domhanda, ní mór comhar idirnáisiúnta i gcoinne saothar éigeantais a chur chun cinn, rud a chuirfeadh feabhas freisin ar éifeachtúlacht chur chun feidhme an Rialacháin seo. Ba cheart don Choimisiún, de réir mar is iomchuí, comhoibriú le húdaráis tríú tíortha, le heagraíochtaí idirnáisiúnta agus le geallsealbhóirí ábhartha eile agus faisnéis a mhalartú leo chun cur chun feidhme éifeachtach an Rialacháin seo a fheabhsú. Ba cheart comhar idirnáisiúnta le húdaráis tríú tíortha, lena n-áirítear le tíortha a bhfuil reachtaíocht chomhchosúil i bhfeidhm acu, a dhéanamh ar bhealach struchtúrtha mar chuid de na struchtúir idirphlé atá ann cheana leis na tíortha sin, nó, más gá, le struchtúir idirphlé shonracha a chruthófar ar bhonn ad hoc. Ba cheart a bheith in ann a áireamh sa chomhar sin malartuithe faisnéise maidir le rioscaí saothair éigeantais, amhail rioscaí a shainaithnítear sa bhunachar sonraí, agus maidir le cinntí chun táirgí a thoirmeasc, ach níor cheart faisnéis faoi imscrúduithe leanúnacha a áireamh ann. Is féidir le toscaireachtaí an Aontais rannchuidiú le faisnéis faoin Rialachán seo a scaipeadh agus le cur isteach faisnéise ag geallsealbhóirí ábhartha a éascú maidir le rioscaí saothair éigeantais. Féadfar a áireamh sa chomhar idirnáisiúnta freisin forbairt tionscnamh comhair agus beart tionlacain chun tacú le geallsealbhóirí ábhartha ina n-iarrachtaí saothar éigeantais a dhíothú ó shlabhraí soláthair domhanda, chomh maith le timpeallachtaí cumasúcháin a chruthú i dtríú tíortha chun cearta an duine a chur chun cinn agus a chosaint.

(38)

Ba cheart a cheadú d’aon duine nádúrtha nó dlítheanach, nó d’aon chomhlachas nach bhfuil pearsantacht dhlítheanach aige nó aici, faisnéis a chur faoi bhráid na n-údarás inniúil nuair a mheasann sé nó sí go gcuirtear táirgí arna ndéanamh le saothar éigeantais ar mhargadh an Aontais agus ar fáil ar mhargadh an Aontais agus ba cheart iad a chur ar an eolas faoi thoradh an mheasúnaithe ar a n-aighneacht faisnéise. Ba cheart aighneachtaí faisnéise faoi sháruithe líomhnaithe a chur isteach trí phointe aonair chun faisnéis a chur isteach arna chur ar bun ag an gCoimisiún agus arna chur ar fáil ar an Tairseach Aonair Saothair Éigeantais. Chun a áirithiú go mbeidh sé éasca úsáid a bhaint as aighneachtaí faisnéise agus an fhaisnéis a sholáthraítear a chaighdeánú, ba cheart don Choimisiún treoraíocht a eisiúint maidir leis an bpointe aonair chun faisnéis a chur isteach a úsáid agus ba cheart dó a bheith in ann gníomhartha cur chun feidhme a ghlacadh chun rialacha nós imeachta, teimpléid agus mionsonraí na n-aighneachtaí faisnéise a shonrú. Ba cheart fáil réidh le haighneachtaí faisnéise atá go follasach neamhiomlán, gan bhunús nó a dhéantar de mheon mímhacánta. Ba cheart bearta leordhóthanacha a chur i bhfeidhm chun cosaint aon duine a bhfuil baint aige leis an aighneacht nó leis an bhfaisnéis atá ann a áirithiú, lena n-áirítear ó fhrithbheartaíocht.

(39)

Is féidir le sceithirí faisnéis nua a chur faoi bhráid na n-údarás inniúil chun cabhrú leo sáruithe ar an Rialachán seo a bhrath agus a chur ar a gcumas gníomhaíocht a dhéanamh. Chun go mbeidh socruithe leordhóthanacha i bhfeidhm chun sceithirí a chumasú na húdaráis inniúla a chur ar an eolas maidir le sáruithe iarbhír nó féideartha ar an Rialachán seo agus na sceithirí a chosaint ar fhrithbhearta, Ba cheart foráil a dhéanamh sa Rialachán seo go bhfuil Treoir (AE) 2019/1937 ó Pharlaimint na hEorpa agus ón gComhairle (15) infheidhme maidir le sáruithe ar an Rialachán seo a thuairisciú agus maidir le cosaint daoine a thuairiscíonn na sáruithe sin, a mhéid a thagann siad faoi raon feidhme pearsanta na Treorach sin.

(40)

Chun deimhneacht dhlíthiúil a fheabhsú, ba cheart infheidhmeacht Threoir (AE) 2019/1937 maidir le sáruithe ar an Rialachán seo a thuairisciú agus cosaint daoine a thuairiscíonn sáruithe, de bhun an Rialacháin seo, a léiriú sa Treoir sin. Ba cheart, dá réir sin, an Iarscríbhinn a ghabhann le Treoir (AE) 2019/1937 a leasú. Is faoi na Ballstáit atá sé a áirithiú, ó dháta chur i bhfeidhm an Rialacháin seo, go léireofar an leasú sin sna bearta trasuite arna nglacadh i gcomhréir leis an Treoir sin. Níl glacadh na mbeart trasuite náisiúnta mar choinníoll, áfach, i dtaca le hinfheidhmeacht na Treorach sin i ndáil le sáruithe ar an Rialachán seo a thuairisciú ná cosaint na ndaoine a dhéanann an tuairisciú.

(41)

Chun rochtain éasca ar fhaisnéis ábhartha maidir leis an Rialachán seo a áirithiú, ba cheart don Choimisiún tairseach gréasáin aonair a chur ar bun ar leibhéal an Aontais, a bheadh ar fáil don phobal i dteangacha oifigiúla uile institiúidí an Aontais.

(42)

Nuair atá sáruithe féideartha ar an toirmeasc ar tháirgí arna ndéanamh le saothar éigeantais á sainaithint, ba cheart don Choimisiún nó do na húdaráis inniúla cur chuige rioscabhunaithe a leanúint agus an fhaisnéis uile atá ar fáil dóibh a mheasúnú. Chun an cur chuige rioscabhunaithe a chur chun feidhme agus tosaíocht á tabhairt dá n-imscrúduithe, ba cheart don Choimisiún agus do na húdaráis inniúla an sciar den chuid den táirge a bhfuil amhras faoi go ndearnadh é le saothar éigeantais sa táirge deiridh, cainníocht agus méid na dtáirgí lena mbaineann, agus scála agus déine an tsaothair éigeantais amhrasta a chur san áireamh, lena n-áirítear an bhféadfadh saothar éigeantais arna fhorchur ag údaráis stáit a bheith ina ábhar imní. Ba cheart don Choimisiún agus do na húdaráis inniúla méid agus acmhainní eacnamaíocha na n-oibreoirí eacnamaíocha agus castacht an tslabhra soláthair a chur san áireamh freisin, agus ba cheart dóibh díriú a mhéid is féidir ar na hoibreoirí eacnamaíocha agus, i gcás inarb ábhartha, ar sholáthróirí táirgí atá níos cóngaraí do riosca an tsaothair éigeantais agus a bhfuil an acmhainn is mó acu chun úsáid saothair éigeantais a chosc, a mhaolú agus deireadh a chur leis.

(43)

Sula dtionscnaítear imscrúdú, ba cheart don phríomhúdarás inniúil a bheith ábalta faisnéis a iarraidh ar oibreoirí eacnamaíocha faoi mheasúnú agus freisin ar gheallsealbhóirí ábhartha eile, lena n-áirítear na daoine nó na comhlachais a bhfuil faisnéis ábhartha curtha faoi bhráid na n-údarás inniúil acu. Ba cheart don phríomhúdarás inniúil a bheith ábalta a roghnú gan faisnéis bhreise a iarraidh ar oibreoirí eacnamaíocha má mheasann sé go bhféadfadh sé sin a bheith ina chúis le hiarracht ag na hoibreoirí eacnamaíocha sin staid saothair éigeantais a cheilt agus, ar an gcaoi sin, an t-imscrúdú a chur i mbaol. Ba cheart don phríomhúdarás inniúil imscrúdú a thionscnamh i gcás ina suíonn sé, bunaithe ar a mheasúnú ar an bhfaisnéis uile atá ar fáil, nó ar bhonn aon fhíorais eile a bhí ar fáil i gcás nárbh fhéidir faisnéis agus fianaise a bhailiú le linn réamhchéim an imscrúdaithe, go bhfuil ábhar imní ann a bhfuil bunús leis maidir le sárú ar an toirmeasc ar tháirgí arna ndéanamh le saothar éigeantais.

(44)

Chun éifeachtacht an toirmisc ar tháirgí arna ndéanamh le saothar éigeantais a mhéadú, ba cheart do na húdaráis inniúla am réasúnach a thabhairt d’oibreoirí eacnamaíocha chun riosca an tsaothair éigeantais a shainaithint, a mhaolú, a chosc agus deireadh a chur leis, agus castacht an phróisis agus líon na ngeallsealbhóirí lena mbaineann, inter alia, á gcur san áireamh.

(45)

Sula dtionscnaítear imscrúdú, ba cheart don phríomhúdarás inniúil a iarraidh ar na hoibreoirí eacnamaíocha faoi mheasúnú faisnéis a sholáthar maidir le bearta a dhéantar chun rioscaí um shaothar éigeantais ina n-oibríochtaí agus ina slabhraí luacha a mhaolú, a chosc, a thabhairt chun deiridh nó chun cásanna saothair éigeantais a leigheas ina n-oibríochtaí agus ina slabhraí soláthair i ndáil leis na táirgí faoi mheasúnú. Ba cheart don dícheall cuí i ndáil le saothar éigeantais cuidiú leis an oibreoir eacnamaíoch a bheith i mbaol níos lú go mbeadh saothar éigeantais ina chuid oibríochtaí agus slabhraí soláthair. Le dícheall cuí iomchuí i gcomhréir le dlí ábhartha an Aontais agus le caighdeáin idirnáisiúnta ábhartha, is féidir cuidiú chun saothar éigeantais sa slabhra soláthair a shainaithint agus aghaidh a thabhairt air. Tugann sé sin le fios nár cheart aon imscrúdú a thionscnamh i gcás ina measann an príomhúdarás inniúil nach bhfuil aon ábhar imní a bhfuil bunús leis faoi shárú an toirmisc ar tháirgí arna ndéanamh le saothar éigeantais, nó gur cuireadh deireadh leis na cúiseanna ba chúis le hábhar imní a bhfuil bunús leis a bheith ann, mar shampla mar gheall ar an reachtaíocht, na treoirlínte, na moltaí is infheidhme nó aon dícheall cuí eile i ndáil le saothar éigeantais a bheith á gcur i bhfeidhm, ach gan a bheith teoranta dóibh, ar bhealach lena maolaítear, lena gcoisctear agus lena gcuirtear deireadh le riosca an tsaothair éigeantais.

(46)

Ba cheart don phríomhúdarás inniúil, agus faisnéis á hiarraidh aige le linn an imscrúdaithe, tosaíocht a thabhairt, a mhéid is féidir agus i gcomhréir le seoladh éifeachtach an imscrúdaithe, do na hoibreoirí eacnamaíocha faoi imscrúdú agus a bhfuil baint acu le céimeanna an tslabhra soláthair chomh gar agus is féidir don áit ar dócha a dtarlaíonn an riosca um shaothar éigeantais agus a chur san áireamh méid agus acmhainní eacnamaíocha na n-oibreoirí eacnamaíocha agus cainníocht na dtáirgí lena mbaineann, chomh maith le scála an tsaothair éigeantais amhrasta.

(47)

Ba cheart gur ar an bpríomhúdarás inniúil a bheadh an t-ualach a shuí, ar bhonn na faisnéise agus na fianaise uile a bailíodh le linn an imscrúdaithe, lena n-áirítear réamhchéim an imscrúdaithe, ar úsáideadh saothar éigeantais ag aon chéim de tháirgeadh, de mhonarú, de bhuaint nó d’eastóscadh táirge a cuireadh ar an margadh nó a cuireadh ar fáil ar an margadh nó le honnmhairiú, lena n-áirítear in oibriú nó próiseáil a bhaineann leis an táirge. Chun a gceart ar phróiseas cuí a áirithiú, ba cheart an deis a bheith ag oibreoirí eacnamaíocha faisnéis chun iad féin a chosaint a sholáthar do na húdaráis inniúla le linn an imscrúdaithe. Más rud é, mar fhreagairt ar iarraidh ar fhaisnéis ó phríomhúdarás inniúil, go ndiúltaíonn nó go mainníonn oibreoir eacnamaíoch nó údarás poiblí, gan údar bailí, an fhaisnéis a iarrtar a sholáthar, go ndéanann siad faisnéis neamhiomlán nó mhícheart a sholáthar a bhfuil sé mar chuspóir leis an imscrúdú a bhlocáil, faisnéis mhíthreorach a sholáthar nó bac a chur ar an imscrúdú ar bhealach eile, lena n-áirítear nuair a shainaithnítear riosca saothair éigeantais arna fhorchur ag údaráis stáit, ba cheart don phríomhúdarás inniúil a bheith in ann a shuí gur sáraíodh an toirmeasc ar tháirgí arna ndéanamh le saothar éigeantais ar bhonn aon fhaisnéis ábhartha agus infhíoraithe eile a bailíodh le linn réamhchéim an imscrúdaithe nó le linn an imscrúdaithe. Ba cheart don phríomhúdarás inniúil na tosca sin a chur san áireamh freisin agus athbhreithniú á dhéanamh aige ar chinneadh a rinneadh ar an mbonn sin.

(48)

I gcás ina suíonn an príomhúdarás inniúil gur sháraigh oibreoirí eacnamaíocha an toirmeasc ar tháirgí arna ndéanamh le saothar éigeantais, ba cheart dó toirmeasc a chur gan aon mhoill ar na táirgí sin a chur ar mhargadh an Aontais nó a chur ar fáil ar mhargadh an Aontais agus a onnmhairiú ón Aontas, agus a cheangal ar na hoibreoirí eacnamaíocha a ndearnadh imscrúdú orthu na táirgí lena mbaineann atá curtha ar fáil cheana ó mhargadh an Aontais a tharraingt siar agus táirgí meatacha a dheonú do chúiseanna carthanúla nó leasa phoiblí. I gcás táirgí nach bhfuil meatach, ba cheart d’oibreoirí eacnamaíocha táirgí den sórt sin a athchúrsáil, agus mura bhfuil sé sin indéanta, ba cheart an táirge a scriosadh, a chur as feidhm, nó a dhiúscairt ar shlí eile i gcomhréir leis an dlí náisiúnta lena gcomhlíontar dlí an Aontais, lena n-áirítear dlí an Aontais maidir le bainistiú dramhaíola. Mar sin féin, ba cheart aird ar leith a thabhairt ar shuaitheadh slabhraí soláthair, a bhfuil tábhacht straitéiseach nó chriticiúil leo don Aontas, a chosc agus, i ndáil leis sin, ar tháirgí a n-athródh a ndiúscairt feidhmiú cuí an mhargaidh inmheánaigh agus na slabhraí soláthair sin. Sna cásanna sin, de mhaolú ar an oibleagáid ordú a fhorchur an táirge lena mbaineann a dhiúscairt, ba cheart don phríomhúdarás inniúil, i gcás inarb iomchuí, a bheith in ann a ordú an táirge lena mbaineann a choinneáil siar ar feadh tréimhse shainithe, ar chostas na n-oibreoirí eacnamaíocha. Agus measúnú á dhéanamh ar an tábhacht straitéiseach nó chriticiúil a bhaineann le táirge don Aontas, ba cheart don phríomhúdarás inniúil, go háirithe, liosta na n-earnálacha a chur san áireamh a bunaíodh i Rialachán (AE) 2024/1735 ó Pharlaimint na hEorpa agus ón gComhairle (16) agus i Moladh (AE) 2023/2113 (17) ón gCoimisiún chomh maith leis na táirgí a liostaítear i Rialachán (AE) 2024/1252 ó Pharlaimint na hEorpa agus ón gComhairle (18). Agus measúnú á dhéanamh acu an iomchuí é an maolú ón oibleagáid ordú diúscartha a fhorchur, ba cheart don phríomhúdarás inniúil aird a thabhairt ar an dóchúlacht go gcomhlíonfadh na hoibreoirí eacnamaíocha lena mbaineann coinníollacha an athbhreithnithe ar an gcinneadh lena mbunaítear sárú ar an toirmeasc ar tháirgí arna ndéanamh le saothar éigeantais laistigh den tréimhse arna sainmhíniú ag an bpríomhúdarás inniúil. Leis an tréimhse arna socrú ag an bpríomhúdarás inniúil, lamhálfaí do na hoibreoirí eacnamaíocha lena mbaineann a léiriú gur dhíothaigh siad saothar éigeantais maidir leis an táirge lena mbaineann, trí dheireadh a chur leis laistigh dá slabhra soláthair. Ní féidir athrú ar shlabhra soláthair, is é sin le rá, brath ar sholáthróirí eile, a mheas mar mhodh chun an saothar éigeantais a dhíothú maidir leis an táirge a bhaineann leis an gcinneadh sin, ós rud é go mbeadh táirge difriúil mar thoradh air. Má sholáthraíonn na hoibreoirí eacnamaíocha lena mbaineann an fhianaise lena léirítear go bhfuil an saothar éigeantais díothaithe acu maidir leis an táirge lena mbaineann, ba cheart don phríomhúdarás inniúil athbhreithniú a dhéanamh ar a chinneadh lena dtoirmisctear táirgí den sórt sin a chur ar mhargadh an Aontais agus a chur ar fáil ar mhargadh an Aontais, as a dtiocfaidh tarraingt siar an chinnidh agus, dá bhrí sin, lena gcuirtear deireadh le coinneáil siar na dtáirgí lena mbaineann. Mura soláthraíonn na hoibreoirí eacnamaíocha lena mbaineann an fhianaise sin, i dtaca leis an ordú maidir leis na táirgí lena mbaineann a dhiúscairt, ba cheart dóibh é a chomhlíonadh tar éis don tréimhse a áirítear sa chinneadh lena dtoirmisctear na táirgí sin a chur ar mhargadh an Aontais agus a chur ar fáil ar mhargadh an Aontais dul in éag, ar cinneadh é ina bhfuil an t-ordú na táirgí a choinneáil siar ar feadh tréimhse shainithe.

(49)

I gcinneadh lena suitear sárú ar an toirmeasc ar tháirgí arna ndéanamh le saothar éigeantais, ba cheart don phríomhúdarás inniúil torthaí an imscrúdaithe, agus an fhaisnéis is bonn leis na torthaí, a lua agus teorainn ama réasúnta a leagan síos ar laistigh di ba cheart do na hoibreoirí eacnamaíocha an cinneadh sin a chomhlíonadh, chomh maith le faisnéis lena sainaithnítear an táirge a bhfuil feidhm ag an gcinneadh maidir leis. Ba cheart an chumhacht a thabhairt don Choimisiún na gníomhartha cur chun feidhme riachtanacha a ghlacadh chun mionsonraí na faisnéise a bheidh i gcinntí den sórt sin a shonrú. Ba cheart cinntí an phríomhúdaráis inniúil a chur ar fáil go poiblí.

(50)

Agus teorainn réasúnta ama á socrú chun na horduithe arna leagan amach i gcinneadh lena suitear sárú ar an toirmeasc ar tháirgí arna ndéanamh le saothar éigeantais a chomhlíonadh, ba cheart don phríomhúdarás inniúil méid agus acmhainní eacnamaíocha na n-oibreoirí eacnamaíocha lena mbaineann a chur san áireamh.

(51)

Chun forfheidhmiú éifeachtach a áirithiú, maidir le cinntí arna ndéanamh ag príomhúdarás inniúil i mBallstát amháin, ba cheart d’údaráis inniúla sna Ballstáit eile iad a aithint agus a fhorfheidhmiú maidir le táirgí a bhfuil an fhaisnéis sainaitheantais chéanna acu ón slabhra soláthair céanna a bhfuarthas saothar éigeantais ina leith.

(52)

Ba cheart d’oibreoirí eacnamaíocha a bheith ábalta athbhreithniú ar chinntí na bpríomhúdarás inniúil a iarraidh de bhun an Rialacháin seo, tar éis dóibh faisnéis shubstaintiúil nua a sholáthar lena léirítear go gcomhlíonann na táirgí a chuirtear ar mhargadh an Aontais nó a chuirtear ar fáil ar mhargadh an Aontais nó atá le honnmhairiú ó mhargadh an Aontais an toirmeasc ar tháirgí arna ndéanamh le saothar éigeantais. Ba cheart don phríomhúdaráis inniúil a chinneadh don todhchaí a tharraingt siar i gcás ina léireoidh na hoibreoirí eacnamaíocha gur chomhlíon siad an cinneadh sin agus gur dhíothaigh siad saothar éigeantais ina n-oibríochtaí nó ina slabhraí soláthair le haghaidh na dtáirgí lena mbaineann. Na cinntí ó na príomhúdaráis inniúla de bhun an Rialacháin seo, ba cheart iad a bheith faoi réir athbhreithniú breithiúnach i gcomhréir le dlí an Aontais agus leis an dlí náisiúnta is infheidhme.

(53)

Má theipeann ar na hoibreoirí eacnamaíocha cinneadh an phríomhúdaráis inniúil a chomhlíonadh faoi dheireadh na tréimhse ama atá leagtha síos, ba cheart do na húdaráis inniúla a áirithiú go gcuirfear toirmeasc ar na táirgí lena mbaineann a chur ar mhargadh an Aontais nó a chur ar fáil ar mhargadh an Aontais, nó ar a n-onnmhairiú nó go ndéantar iad a tharraingt siar ó mhargadh an Aontais agus go ndéanfar aon táirgí meatacha a fhanann leis na hoibreoirí eacnamaíocha ábhartha a dheonú do chúiseanna carthanúla nó leasa phoiblí. Ba cheart d’údaráis inniúla a áirithiú go ndéantar táirgí nach bhfuil meatach a athchúrsáil nó, mura féidir sin a dhéanamh, go ndéantar iad a scriosadh, a chur as feidhm, nó a dhiúscairt ar shlí eile i gcomhréir leis an dlí náisiúnta i gcomhlíonadh dhlí an Aontais, lena n-áirítear dlí an Aontais maidir le bainistiú dramhaíola agus le héicidhearthóireacht le haghaidh táirgí inbhuanaithe ar chostas na n-oibreoirí eacnamaíocha. I gcás inar féidir, ba cheart do na húdaráis inniúla a áirithiú go mbeidh an tionchar is lú is féidir ar an gcomhshaol ag an modh diúscartha nó scriosta arna roghnú as na roghanna uile atá ar fáil. Ba cheart d’údaráis inniúla na mBallstát a bheith freagrach as na cinntí a fhorfheidhmiú ina gcríoch féin, lena n-áirítear cinntí arna nglacadh ag an gCoimisiún. Tar éis dóib cinneadh a chur in iúl trí ICSMS, na húdaráis inniúla uile a bhfuil baint acu leis an gcinneadh sin ba cheart dóibh dul ar aghaidh leis na gníomhaíochtaí forfheidhmiúcháin ábhartha dá bhforáiltear sa Rialachán seo.

(54)

Ba cheart an éifeacht ar leas ainmhithe a bhreithniú agus an toirmeasc ar chur ar an margadh agus ar chur ar fáil ar an margadh nó onnmhairiú táirgí arna ndéanamh le saothar éigeantais á fhorfheidhmiú chun pian, anacair nó fulaingt inseachanta a spáráil ar na hainmhithe lena mbaineann. Ina theannta sin, ba cheart an Rialachán seo a bheith gan dochar do dhlí an Aontais maidir le leas ainmhithe, amhail Rialachán (CE) Uimh. 1/2005 ón gComhairle (19) agus Rialachán (CE) Uimh. 1099/2009 ón gComhairle (20).

(55)

Ba cheart cinntí na bpríomhúdarás inniúil lena suitear sárú ar an toirmeasc ar tháirgí arna ndéanamh le saothar éigeantais a chur in iúl d’údaráis chustaim, agus ba cheart é a bheith d’aidhm acu an táirge lena mbaineann a shainaithint i measc na dtáirgí atá dearbhaithe le scaoileadh i saorchúrsaíocht nó lena n-onnmhairiú. Ba cheart d’údaráis inniúla na mBallstát a bheith freagrach as forfheidhmiú foriomlán an toirmisc ar tháirgí arna ndéanamh le saothar éigeantais i margadh an Aontais chomh maith le táirgí a thagann isteach sa mhargadh sin nó a fhágann é. Ós rud é gur cuid den phróiseas monaraíochta é saothar éigeantais agus nach bhfágann sé aon rian ar an táirge, agus nach gclúdaíonn Rialachán (AE) 2019/1020 ach táirgí monaraithe agus go bhfuil a raon feidhme teoranta do scaoileadh i saorchúrsaíocht, ní bheadh na húdaráis chustaim in ann gníomhú go huathrialach faoi Rialachán (AE) 2019/1020 chun an toirmeasc ar tháirgí arna ndéanamh le saothar éigeantais a chur i bhfeidhm agus a fhorfheidhmiú. Ba cheart eagrú sonrach na rialuithe ag gach Ballstát a bheith gan dochar do Rialachán (AE) Uimh. 952/2013 ó Pharlaimint na hEorpa agus ón gComhairle (21) agus dá fhorálacha ginearálta maidir le cumhachtaí rialaithe agus maoirseachta na n-údarás custaim.

(56)

Is faisnéis ghinearálta amháin faoi na táirgí atá san fhaisnéis a sholáthraíonn oibreoirí eacnamaíocha nó a chuireann siad ar fáil d’údaráis chustaim faoi láthair agus tá easpa faisnéise inti faoin monaróir nó faoin táirgeoir nó faoi sholáthraithe an táirge chomh maith le faisnéis shonrach faoi tháirgí. Chun go mbeidh údaráis chustaim in ann táirgí a thagann isteach i margadh an Aontais nó a fhágann é a dhéanann sárú ar an Rialachán seo a shainaithint agus ar cheart iad a stopadh dá réir ag teorainneacha seachtracha an Aontais, ba cheart d’oibreoirí eacnamaíocha faisnéis a chur faoi bhráid na n-údarás custaim a fhágann gur féidir táirgí a bhfuil baint ag cinneadh ón bpríomhúdarás inniúil leo a shainaithint. Ba cheart a chuimsiú leis sin faisnéis faoin monaróir nó faoin táirgeoir agus faoi sholáthraithe an táirge chomh maith le haon fhaisnéis eile faoin táirge féin. Chuige sin, ba cheart an chumhacht a thabhairt don Choimisiún gníomhartha tarmligthe a ghlacadh lena sainaithnítear na táirgí ar cheart an fhaisnéis sin a sholáthar ina leith agus úsáid á baint, inter alia, as an mbunachar sonraí a bhunaítear faoin Rialachán sin mar aon le faisnéis agus cinntí na bpríomhúdarás inniúil a ionchódaítear in ICSMS, an córas. Ina theannta sin, ba cheart an chumhacht a thabhairt don Choimisiún gníomhartha cur chun feidhme riachtanacha a ghlacadh chun mionsonraí na faisnéise a bheidh le soláthar nó le cur ar fáil ag oibreoirí eacnamaíocha d’údaráis chustaim a shonrú. Ba cheart a áireamh i bhfaisnéis den sórt sin tuairisc, ainm nó branda an táirge, ceanglais shonracha faoi dhlí an Aontais maidir le sainaithint an táirge, amhail cineál, tagairt, samhail, baisc nó sraithuimhir a ghreamaítear den táirge, nó a chuirtear ar fáil ar an bpacáistíocht nó i ndoiciméad a ghabhann leis an táirge, nó in aitheantóir uathúil phas an táirge dhigitigh, chomh maith le sonraí maidir leis an monaróir nó an táirgeoir agus soláthraithe an táirge, lena n-áirítear i ndáil le gach ceann díobh a n-ainm, a dtrádainm nó a dtrádmharc cláraithe, a sonraí teagmhála, a n-uimhir aitheantais sa tír ina bhfuil siad bunaithe agus, nuair a bhíonn sí ar fáil, a n-uimhir Chláraithe agus Aitheantais Oibreoirí Eacnamaíocha. Breithneofar san athbhreithniú ar Chód Custaim an Aontais an fhaisnéis is gá d’oibreoirí eacnamaíocha a sholáthar nó a chur ar fáil d’údaráis chustaim a thabhairt isteach sa reachtaíocht chustaim chun an Rialachán seo a fhorfheidhmiú agus, ar bhonn níos leithne, chun trédhearcacht an tslabhra soláthair a threisiú. Ba cheart don Choimisiún treoraíocht a eisiúint chuig oibreoirí eacnamaíocha, go háirithe FBManna, agus tacaíocht a thabhairt dóibh maidir le conas an fhaisnéis is gá a bhailiú.

(57)

Ba cheart d’údaráis chustaim a shainaithníonn táirge a d’fhéadfadh a bheith ag teacht faoi chinneadh arna chur in iúl ag an bpríomhúdarás inniúil lena suitear sárú ar an toirmeasc ar tháirgí arna ndéanamh le saothar éigeantais scaoileadh an táirge sin a chur ar fionraí agus fógra a thabhairt do na húdaráis inniúla láithreach. Ba cheart d’údaráis inniúla teacht ar chonclúid laistigh de thréimhse ama réasúnach maidir leis an gcás a dtugann na húdaráis chustaim fógra ina leith, trína dheimhniú nó a shéanadh go bhfuil an táirge lena mbaineann ag teacht faoi chinneadh. I gcás inar gá agus ina bhfuil údar cuí leis, ba cheart do na húdaráis inniúla a údarú chun fionraíocht ar scaoileadh an táirge lena mbaineann a choinneáil, agus an damáiste a d’fhéadfadh a bheith ann don oibreoir eacnamaíoch á chur san áireamh. In éagmais chonclúid ó na húdaráis inniúla laistigh den teorainn ama shonraithe, ba cheart do na húdaráis chustaim na táirgí a scaoileadh má chomhlíontar na ceanglais agus na foirmiúlachtaí eile uile is infheidhme. Go ginearálta, níor cheart a mheas gurb ionann táirge a scaoileadh i saorchúrsaíocht nó lena onnmhairiú agus cruthúnas ar chomhlíonadh dhlí an Aontais, toisc nach gá go n-áirítear measúnú iomlán ar chomhlíontacht leis an scaoileadh sin.

(58)

I gcás ina dtiocfaidh na húdaráis inniúla ar an gconclúid go gcomhfhreagraíonn táirge do chinneadh lena suitear sárú ar an toirmeasc ar tháirgí arna ndéanamh le saothar éigeantais, ba cheart dóibh na húdaráis chustaim a chur ar an eolas láithreach, ar cheart dóibhsean diúltú é a scaoileadh i saorchúrsaíocht nó a onnmhairiú. Ba cheart do na húdaráis chustaim a bheith in ann, i gcás ina n-iarrann údarás inniúil amhlaidh agus thar ceann agus faoi fhreagracht an údaráis inniúil sin, an táirge sin a urghabháil de rogha air sin agus é a chur ar fáil don údarás inniúil sin agus faoi údarás an údaráis inniúil sin. Sna cásanna sin, ba cheart don údarás inniúil ábhartha na bearta uile is gá a dhéanamh chun a áirithiú go ndéanfar an táirge lena mbaineann a dhiúscairt go hiomchuí, lena n-áirítear trí bhíthin é a dheonú do chúiseanna carthanúla nó leasa phoiblí, a athchúrsáil nó a dhiúscairt ar shlí eile i gcomhréir leis an dlí náisiúnta atá comhsheasmhach le dlí an Aontais ar chostas an oibreora eacnamaíoch ábhartha.

(59)

Ba cheart don phríomhúdarás inniúil aird chuí a thabhairt ar an riosca a bhaineann le díscor ag oibreoirí eacnamaíocha a bhfuil baint acu le táirgí nó réigiúin sa bhunachar sonraí, nó ar baineadh a dtáirge de mhargadh an Aontais, chomh maith leis na hiarmhairtí ar oibrithe lena mbaineann. Dá bhrí sin, ba cheart don phríomhúdarás inniúil, i gcás inarb iomchuí, tacú le hoibreoirí eacnamaíocha bearta oiriúnacha éifeachtacha a ghlacadh agus a chur i gcrích chun deireadh a chur le saothar éigeantais. Áirítear le díscor freagrach comhaontuithe comhchoiteanna a chomhlíonadh agus bearta méadúcháin a chur in iúl.

(60)

Na coinníollacha is infheidhme maidir le táirgí le linn iad a bheith ar fionraí óna scaoileadh i saorchúrsaíocht nó óna n-onnmhairiú, lena n-áirítear a stóráil nó a scriosadh agus a ndiúscairt i gcás ina ndiúltaítear táirgí den sórt sin a scaoileadh i saorchúrsaíocht, ba cheart do na húdaráis inniúla iad a chinneadh, i gcás inarb infheidhme, de bhun Rialachán (AE) Uimh. 952/2013 ón gComhairle. I gcás inar gá tuilleadh próiseála a dhéanamh ar tháirgí a thagann isteach i margadh an Aontais, tá siad le cur faoin nós imeachta custam iomchuí lena gceadaítear próiseáil den sórt sin i gcomhréir le hAirteagail 220, 254, 256, 257 agus 258 de Rialachán (AE) Uimh. 952/2013.

(61)

I gcás inar gá sonraí pearsanta a phróiseáil de bhun an Rialacháin seo chun éifeacht a thabhairt don toirmeasc ar tháirgí arna ndéanamh le saothar éigeantais, ba cheart an phróiseáil sin a dhéanamh i gcomhréir le dlí an Aontais maidir le cosaint sonraí pearsanta. Ba cheart aon phróiseáil a dhéantar ar shonraí pearsanta faoin toirmeasc ar tháirgí arna ndéanamh le saothar éigeantais a bheith faoi réir Rialachán (AE) 2016/679 (22) agus (AE) 2018/1725 (23) ó Pharlaimint na hEorpa agus ón gComhairle.

(62)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún a mhéid a bhaineann leis na rialacha nós imeachta agus mionsonraí na socruithe le haghaidh úsáid a bhaint as ICSMS, an córas; na rialacha nós imeachta, na teimpléid agus na sonraí chun faisnéis a chur isteach faoi sháruithe líomhnaithe ar an toirmeasc ar tháirgí arna ndéanamh le saothar éigeantais a chur ar mhargadh an Aontais, a chur ar fáil ar mhargadh an Aontais nó iad a onnmhairiú; na cinntí arna nglacadh ag an gCoimisiún lena suitear gur sáraíodh an toirmeasc ar tháirgí arna ndéanamh le saothar éigeantais a chur ar mhargadh an Aontais, a chur ar fáil ar mhargadh an Aontais nó iad a onnmhairiú; na cinntí sin a tharraingt siar; mionsonraí inneachar na gcinntí sin agus na gcinntí coibhéiseacha arna nglacadh ag na príomhúdaráis inniúla; na socruithe agus na mionsonraí maidir le faisnéis áirithe faoi tháirgí sonracha nó faoi ghrúpaí táirgí sonracha a sholáthar do na húdaráis chustaim nó a chur ar fáil dóibh. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (24).

(63)

Ba cheart don Choimisiún gníomhartha cur chun feidhme atá infheidhme láithreach a ghlacadh más rud é, i gcásanna a bhfuil údar cuí leo agus a bhaineann le tarraingt siar na gcinntí lena suitear gur sáraíodh an toirmeasc ar tháirgí arna ndéanamh le saothar éigeantais a chur ar an margadh, a chur ar fáil nó a onnmhairiú, go n-éilítear amhlaidh ar mhórchúiseanna práinne.

(64)

Chun eilimintí áirithe neamhriachtanacha den Rialachán seo a fhorlíonadh nó a leasú, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid obair ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (25). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(65)

Chun a áirithiú go mbeidh na húdaráis chustaim ábalta gníomhú go héifeachtach, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i leith na faisnéise breise lena sainaithnítear an táirge lena mbaineann a shonrú tuilleadh, ar faisnéis í ar cheart d’oibreoirí eacnamaíocha a chur ar fáil nó a sholáthar do na húdaráis chustaim maidir le táirgí a thagann isteach i margadh an Aontais nó a fhágann margadh an Aontais. Ba cheart an fhaisnéis sin a bheith mar fhaisnéis lena sainaithnítear an táirge lena mbaineann, faisnéis faoin monaróir nó faoin táirgeoir agus faisnéis faoi sholáthraithe an táirge. Ní mór a chur ar chumas na n-údarás custaim faisnéis a fháil go tapa ar tháirgí sonracha arna sainaithint i gcinntí na bpríomhúdarás inniúil chun gníomhaíochtaí agus bearta a dhéanamh go héifeachtach agus go tapa. I gcásanna den sórt sin, ba cheart gníomhartha tarmligthe a ghlacadh de bhun nós imeachta práinne.

(66)

Ba cheart do na Ballstáit an chumhacht a thabhairt dá n-údaráis inniúla pionóis éifeachtacha, chomhréireacha agus athchomhairleacha a fhorchur agus a chur chun feidhme i gcásanna nach mbeidh an t-oibreoir eacnamaíoch tar éis cinneadh a chomhlíonadh lena dtoirmisctear táirgí arna ndéanamh le saothar éigeantais a chur ar an margadh. Ba cheart do na Ballstáit na rialacha maidir leis na pionóis is infheidhme i gcás nach gcomhlíontar cinneadh a bhunú, agus aird chuí á tabhairt ar ghnéithe amhail tromchúis agus fad an tsáraithe, sáruithe a rinne an t-oibreoir eacnamaíoch roimhe sin, an méid comhair leis na húdaráis inniúla agus aon toisc mhaolaitheach nó ghéaraitheach eile is infheidhme maidir le himthosca an cháis ar leith. Ba cheart don Choimisiún treoraíocht a eisiúint do na Ballstáit maidir leis an modh chun pionóis airgeadais a ríomh agus na tairseacha is infheidhme agus ba cheart do Líonra an Aontais i gcoinne Táirgí Saothair Éigeantais dea-chleachtais a chur chun cinn i gcur i bhfeidhm na bpionós sin.

(67)

Ba cheart don Choimisiún meastóireacht a dhéanamh ar chur chun feidhme agus forfheidhmiú an Rialacháin seo agus tuarascáil ina leith a chur faoi bhráid Pharlaimint na hEorpa, na Comhairle agus Choiste Eacnamaíoch agus Sóisialta na hEorpa. Ba cheart measúnú a dhéanamh sa tuarascáil ar rannchuidiú an Rialacháin seo le táirgí arna ndéanamh le saothar éigeantais a dhíothú ó mhargadh an Aontais agus leis an gcomhrac i gcoinne an tsaothair éigeantais chomh maith leis an gcomhar idir na húdaráis inniúla agus comhar idirnáisiúnta chun saothar éigeantais a dhíothú. Ba cheart measúnú a dhéanamh sa tuarascáil freisin ar thionchar an Rialacháin seo, ar ghnólachtaí, go háirithe ar FBManna, agus ar íospartaigh, chomh maith le costais agus tairbhí foriomlána an toirmisc ar tháirgí arna ndéanamh le saothar éigeantais. Ba cheart measúnú breise a dhéanamh sa tuarascáil ar ailíniú an Rialacháin seo le dlí ábhartha eile de chuid an Aontais.

(68)

Urramaítear leis an Rialachán seo an ceart chun dea-riaracháin, a chumhdaítear in Airteagal 41 den Chairt, lena n-áirítear, inter alia, an ceart atá ag gach duine éisteacht a fháil sula ndéanfar aon bheart aonair a dhéanfadh difear díobhálach dó nó di. Maidir leis sin, ba cheart don phríomhúdarás inniúil a dhéanann an t-imscrúdú na hoibreoirí eacnamaíocha lena mbaineann a chur ar an eolas faoi thionscnamh an imscrúdaithe agus faoi na hiarmhairtí féideartha air. Chun a gceart ar phróiseas cuí a áirithiú, ba cheart an deis a bheith ag oibreoirí eacnamaíocha faisnéis chun iad féin a chosaint a sholáthar do na húdaráis inniúla arna iarraidh sin dóibh le linn an imscrúdaithe. Ba cheart an deis a bheith ag na hoibreoirí eacnamaíocha a iarraidh ar an bpríomhúdarás inniúil athbhreithniú a dhéanamh ar an gcinneadh lena ndéantar difear dóibh, trí fhaisnéis shubstaintiúil nua a sholáthar. Ba cheart na cinntí a ghlacann údaráis inniúla na mBallstát a bheith faoi réir athbhreithniú breithiúnach dá bhforáiltear sa dlí náisiúnta is infheidhme. Tá na cinntí a ghlacann an Coimisiún faoin Rialachán seo faoi réir athbhreithniú ag an gCúirt Bhreithiúnais an Aontais Eorpaigh i gcomhréir le hAirteagal 263 CFAE.

(69)

Ós rud é nach féidir leis na Ballstáit cuspóir an Rialacháin seo, eadhon an toirmeasc ar tháirgí arna ndéanamh le saothar éigeantais a chur ar mhargadh an Aontais, iad a chur ar fáil ar mhargadh an Aontais nó iad a onnmhairiú ó mhargadh an Aontais, chun feidhmiú an mhargaidh inmheánaigh a fheabhsú, agus rannchuidiú leis an gcomhrac i gcoinne an tsaothair éigeantais an tráth céanna, a ghnóthú go leordhóthanach agus, de bharr a fhairsinge agus a éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(70)

Ionas go bhféadfar na bearta dá bhforáiltear sa Rialachán seo a chur i bhfeidhm go pras, ba cheart don Rialachán seo teacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh,