1.   Leis seo, cuirtear ar bun beart cúnaimh i bhfoirm clár ginearálta chun tacú leis an Aontas Afracach, atá le maoiniú faoin tSaoráid Eorpach Síochána (“an Beart Cúnaimh”). Leis an mBeart Cúnaimh, maoineofar gníomhaíochtaí arna bhformheas ag an gCoiste Polaitiúil agus Slándála faoin 31 Nollaig 2024.

2.   Is iad cuspóirí foriomlána an Bhirt Cúnaimh minicíocht, ré agus déine na gcoinbhleachtaí foréigneacha san Afraic a laghdú agus ról an Aontais Afracaigh maidir leis an tsíocháin agus leis an tslándáil ar mhór-roinn na hAfraice a neartú. Is é cuspóir sonrach an Bhirt Cúnaimh feabhas a chur ar bhainistiú coinbhleachta trí ghnéithe míleata d’oibríochtaí tacaíochta síochána a imscaradh ag Coimisiún an Aontais Afracaigh agus ag eagraíochtaí réigiúnacha san Afraic.

3.   Chun na cuspóirí a leagtar amach i mír 2 den Airteagal seo a bhaint amach, maoineofar leis an mBeart Cúnaimh gnéithe míleata na n-oibríochtaí tacaíochta síochána faoi stiúir na hAfraice atá sainordaithe nó údaraithe ag Comhairle Síochána agus Slándála an Aontais Afracaigh, lena n-áirítear na gníomhaíochtaí seo a leanas, ach gan bheith teoranta dóibh:

(a)

costais a chumhdach a bhaineann le pearsanra (le haghaidh 40 % táscach den mhéid tagartha airgeadais iomlán), amhail liúntais laethúla agus liúntais do phearsanra míleata, liúntas cothaithe misin d’oifigigh mhíleata sa cheanncheathrú misin, oibríochtaí aslonnaithe taismeach, cúiteamh báis agus míchumais, ciondálacha, costais iompair agus taistil, agus oiliúint do phearsanra míleata;

(b)

trealamh agus seachadadh seirbhísí a sholáthar agus a uasghrádú (le haghaidh 35 % táscach den mhéid tagartha airgeadais iomlán), amhail trealamh saighdiúirí aonair, tomhaltáin leighis, feithiclí, breosla agus cothabháil feithiclí, feistí agus seirbhísí cumarsáide, teicneolaíocht agus seirbhísí TF, bonneagar agus seirbhísí ceannais agus rialaithe, agus trealamh eile cé is moite den trealamh nó ardáin dá dtagraítear in Airteagal 5(3) de Chinneadh (CBES) 2021/509;

(c)	oibreacha a chur i gcrích (le haghaidh 25 % táscach den mhéid tagartha airgeadais iomlán), amhail tógáil agus athshlánú beairicí míleata, saoráidí oiliúna agus saoráidí leighis.

4.   Mairfidh ré an Bhirt Cúnaimh 72 mhí ón 1 Eanáir 2022.

1.   I gcomhréir le hAirteagal 59(7) de Chinneadh (CBES) 2021/509, sula dtabharfar tacaíocht le haghaidh aon ghníomhaíocht faoin mBeart Cúnaimh„ beidh iarraidh ann ó Choimisiún an Aontais Afracaigh mar thairbhí an Bhirt Cúnaimh (“an tairbhí”).

2.   Tar éis iarraidh dá dtagraítear i mír 1 den Airteagal seo a fháil, déanfaidh Ardionadaí an Aontais do Ghnóthaí Eachtracha agus don Bheartas Slándála (“an tArdionadaí”), tar éis dul i gcomhairle leis an riarthóir um bearta cúnaimh arna cheapadh faoi Chinneadh (CBES) 2021/509 (“an riarthóir um bearta cúnaimh”), a mhéid a bhaineann le cúrsaí cur chun feidhme airgeadais, moladh a thíolacadh maidir le scrúdú arna dhéanamh ag an gCoiste Polaitiúil agus Slándála, agus formheas uaidh, ina dtabharfar breac-chuntas ar an tacaíocht atá beartaithe, lena n-áirítear a bhuiséad agus an t-eintiteas nó na heintitis a roghnófar as measc na n-eintiteas a liostaítear in Airteagal 5(2) den Chinneadh seo atá chun an tacaíocht bheartaithe, agus breithnithe a bhaineann le hanailís ar íogaire agus rioscaí i ndáil le coinbhleachtaí a chur chun feidhme, mar aon le bearta maidir le faireachán agus rialú dá dtagraítear in Airteagal 6 den Chinneadh seo, de réir mar a cheanglaítear.

1.   EUR 600 000 000 a bheidh sa mhéid tagartha airgeadais a bheartaítear chun an caiteachas a bhaineann leis an mBeart Cúnaimh a chumhdach.

2.   Déanfar an caiteachas go léir a bhainistiú i gcomhréir le Cinneadh (CBES) 2021/509 agus leis na rialacha maidir le hioncam agus caiteachas arna maoiniú faoin tSaoráid Eorpach Síochána a chur chun feidhme.

1.   Déanfaidh an tArdionadaí na socruithe is gá leis an tairbhí chun a áirithiú go gcomhlíonann sé na ceanglais agus na coinníollacha arna mbunú leis an gCinneadh seo agus ag an gCoiste Polaitiúil agus Slándála, i gcomhthéacs fhormheas na tacaíochta do gníomhaíochtaí faoin mBeart Cúnaimh, mar choinníoll chun tacaíocht a sholáthar faoin mBeart Cúnaimh.

2.   Áireofar sna socruithe dá dtagraítear i mír 1 forálacha lena gcuirtear d’oibleagáid ar an tairbhí an méid seo a leanas a áirithiú:

(a)	comhlíonadh an dlí idirnáisiúnta ábhartha, go háirithe cearta idirnáisiúnta an duine agus an dlí daonnúil idirnáisiúnta;

(b)	úsáid chuí agus éifeachtúil a bhaint as aon sócmhainní a chuirtear ar fáil faoin mBeart Cúnaimh chun na gcríoch dár soláthraíodh iad;

(c)	cothabháil leordhóthanach a dhéanamh ar aon sócmhainní a chuirtear ar fáil faoin mBeart Cúnaimh chun a áirithiú go mbeidh siad inúsáidte agus go mbeidh siad ar fáil go hoibríochtúil le linn a saolré;

(d)	nach gcaillfear aon sócmhainní a chuirfear ar fáil faoin mBeart Cúnaimh, ná nach n-aistreofar iad gan toiliú ó Choiste na Saoráide arna bhunú faoi Chinneadh (CBES) 2021/509 chuig aon duine nó eintiteas seachas chucu siúd a shainaithnítear sna socruithe sin, ag deireadh a saolré.

3.   Áireofar sna socruithe dá dtagraítear i mír 1 forálacha maidir le tacaíocht a fhionraí agus a fhoirceannadh faoin mBeart Cúnaimh i gcás ina bhfaighfear go bhfuil na hoibleagáidí dá dtagraítear i mír 2 á sárú ag an tairbhí.

1.   Beidh an tArdionadaí freagrach as a áirithiú go gcuirfear an Cinneadh seo chun feidhme i gcomhréir le Cinneadh (CBES) 2021/509, agus leis na rialacha le haghaidh an ioncam agus an caiteachas faoin tSaoráid Eorpach Síochána a chur chun feidhme, agus ar bhealach atá comhsheasmhach leis an gCreat Modheolaíochta Comhtháite chun na bearta agus na rialuithe atá riachtanach le haghaidh bearta cúnaimh faoin tSaoráid Eorpach Síochána a mheasúnú agus a shainaithint.

2.   Féadfaidh aon cheann de na heintitis seo a leanas gníomhaíochtaí faoin mBeart Cúnaimh dá dtagraítear in Airteagal 2 a chur chun feidhme, ina n-iomláine nó i bpáirt, mar ghníomhaithe cur chun feidhme nó trí dheontais a fhéadfar a dhámhachtain gan glao ar thograí:

(a)	Coimisiún an Aontais Afracaigh;

(b)	Aontas na Magraibe Arabaí;

(c)	Comhphobal na Stát Saiheile agus Sahárach;

(d)	An Cómhargadh d’Oirthear agus Deisceart na hAfraice;

(e)	Comhphobal Oirthear na hAfraice;

(f)	Fórsa Fuireachais Oirthear na hAfraice;

(g)	Comhphobal Eacnamaíoch Stáit Lár na hAfraice;

(h)	Comhphobal Eacnamaíoch Stáit na hAfraice Thiar;

(i)	an tÚdarás Idir-rialtasach Forbartha;

(j)	Cumas Réigiúnach na hAfraice Thuaidh;

(k)	Comhphobal Forbartha Dheisceart na hAfraice;

(l)	G5 na Saiheile;

(m)	an Coimisiún um Imchuach Loch Shead;

(n)	Oifig Ard-Choimisinéir um Chearta an Duine na Náisiún Aontaithe;

(o)	Rúnaíocht na Náisiún Aontaithe;

(p)	Oifig na Náisiún Aontaithe le haghaidh Seirbhísí Tionscadail;

(q)	Oifig Tacaíochta na Náisiún Aontaithe sa tSomáil;

(r)

cibé aireachtaí, ranna rialtais, nó comhlachtaí agus gníomhaireachtaí eile dlí phoiblí de chuid na mBallstát, nó comhlachtaí arna rialú ag an dlí príobháideach a bhfuil misean seirbhíse poiblí acu, mar a leagtar amach san Iarscríbhinn iad, a mhéid a thugtar ráthaíochtaí airgeadais leordhóthanacha dóibh.

3.   Daingneoidh an riarthóir um bearta cúnaimh acmhainneacht eintitis ar leith gníomhaíocht nó cuid de ghníomhaíocht a chur chun feidhme sula bhformheasfaidh an Coiste Polaitiúil agus Slándála tacaíocht don ghníomhaíocht.

1.   Bunófar bearta chun faireachán, meastóireacht agus rialú a dhéanamh ar ghníomhaíochtaí faoin mBeart Cúnaimh i gcomhréir leis an gCreat Modheolaíochta Comhtháite chun na bearta agus na rialuithe atá riachtanach le haghaidh bearta cúnaimh faoin tSaoráid Eorpach Síochána a mheasúnú agus a shainaithint.

2.   Leis na bearta dá dtagraítear i mír 1, áiritheofar go háirithe go gcomhlíonfaidh an tairbhí agus aon eintiteas eile a bhaineann tairbhe dhíreach as tacaíocht faoin mBeart Cúnaimh an dlí idirnáisiúnta um chearta an duine agus an dlí daonnúil idirnáisiúnta, agus go gcomhlíonfaidh an tairbhí aon ghealltanais agus oibleagáidí eile arna mbunú faoi na socruithe dá dtagraítear in Airteagal 4.

3.   Ag brath ar an tacaíocht fhormheasta le haghaidh gníomhaíocht faoin mBeart Cúnaimh, d’fhéadfaí a áireamh ar na bearta dá dtagraítear i mír 1 faireachán ar dhul chun cinn i ndáil le coinníollacha agus tagarmharcanna arna gcomhaontú leis an tairbhí, creataí um chomhlíonadh an dlí idirnáisiúnta um chearta an duine agus an dlí dhaonnúil idirnáisiúnta agus ceanglais an díchill chuí a bhunú agus faireachán a dhéanamh orthu, rialú iarlastála sócmhainní chun úsáid iomchuí a áirithiú agus atreorú a sheachaint, agus straitéisí díscoir agus scoir a shainaithint.

1.   I gcomhréir le hAirteagal 64 de Chinneadh (CBES) 2021/509, féadfaidh an Coiste Polaitiúil agus Slándála a chinneadh tacaíocht le haghaidh gníomhaíochtaí faoin mBeart Cúnaimh seo a chur ar fionraí nó a fhoirceannadh, nó an Beart Cúnaimh iomlán a chur ar fionraí, arna iarraidh sin do Bhallstát nó don Ardionadaí, sna cásanna seo a leanas:

(a)	má tá a oibleagáidí faoin dlí idirnáisiúnta á sárú ag an tairbhí, go háirithe an dlí um chearta an duine agus an dlí daonnúil idirnáisiúnta, nó mura gcomhlíonann sé na gealltanais a tugadh faoi na socruithe dá dtagraítear in Airteagal 4;

(b)	má cuireadh an conradh le gníomhaí cur chun feidhme ar fionraí nó má foirceannadh é tar éis sárú ar a oibleagáidí faoin gconradh;

(c)	mura gceadófar a thuilleadh, de bharr na staide sa limistéar geografach lena mbaineann, an beart a chur chun feidhme agus, ag an am céanna, a áirithiú go bhfuil ráthaíochtaí leordhóthanacha ag gabháil leis;

(d)	mura bhfreastalóidh saothrú an bhirt ar a chuspóirí a thuilleadh nó mura mbeidh an saothrú sin chun leas an Aontais a thuilleadh.

I gcásanna práinneacha agus eisceachtúla, féadfaidh an tArdionadaí cur chun feidhme an Bhirt Cúnaimh a chur ar fionraí ina iomláine nó i bpáirt ar bhonn sealadach go dtí go ndéanfaidh an Coiste Polaitiúil agus Slándála cinneadh ina leith.

2.   Féadfaidh an Coiste Polaitiúil agus Slándála a mholadh don Chomhairle an Beart Cúnaimh a fhoirceannadh.