Choose the experimental features you want to try

This document is an excerpt from the EUR-Lex website

Document 52023XC0123(04)

Foilsiú an doiciméid aonair leasaithe i ndiaidh mionleasú a fhormheas de bhun an dara fomhír d’Airteagal 53(2) de Rialachán (AE) Uimh. 1151/2012 2023/C 23/07

C/2023/564

IO C 23, 23.1.2023, pp. 24–27 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

23.1.2023   

GA

Iris Oifigiúil an Aontais Eorpaigh

C 23/24


Foilsiú an doiciméid aonair leasaithe i ndiaidh mionleasú a fhormheas de bhun an dara fomhír d’Airteagal 53(2) de Rialachán (AE) Uimh. 1151/2012

(2023/C 23/07)

D’fhormheas an Coimisiún Eorpach an mionleasú seo i gcomhréir leis an tríú fomhír d’Airteagal 6(2) de Rialachán Tarmligthe (AE) Uimh. 664/2014 ón gCoimisiún (1)

Is féidir an t-iarratas ar fhormheas an mhionleasaithe sin a fheiceáil i mbunachar sonraí eAmbrosia an Choimisiúin

DOICIMÉAD AONAIR

“MANTECADAS DE ASTORGA”

Uimh. AE: PGI-ES-0311-AM01 – 19.2.2021

STFC ( ) TGFC (X)

1.   Ainm

“Mantecadas de Astorga”

2.   Ballstát nó tríú tír

An Spáinn

3.   Tuairisc ar an táirge talmhaíochta nó ar an táirge bia

3.1.    An cineál táirge

Aicme 2.3. Arán, pastaetha, cácaí, milseogra, brioscaí agus earraí eile báicéara

3.2.    Tuairisc ar an táirge lena mbaineann an t-ainm in (1)

Is táirge milseogra iad “Mantecadas de Astorga” a dhéantar trí mheascán na gcomhábhar bunúsach seo a leanas a bhácáil: plúr bán cruithneachta, uibheacha circe, im déirí, blonag agus siúcra.

Ní mór na saintréithe moirfeolaíocha, orgánaileipteacha agus fisiciceimiceacha seo a leanas a bheith acu:

a)

Moirfeolaíoch:

Déantar Mantecadas i gcónaí i gcásanna beaga, oscailte, craftpháipéir de ghrád bia i gcruth cearnóige le taobhanna fillte.

Agus é á bhácáil, ardaíonn an meascán chun cruth cruinn a fhoirmiú gan imill chrua agus téann sé thar maoil an cháis, ag foirmiú éifeacht silidh ar a dtugtar lágrima de la mantecada (deoir mantecada). Is féidir go mbeidh dath dúdhonn ar an gcuid sin den táirge ach ní bheidh sé dóite riamh.

Ní mór do bhun an cháis a bheith beagán donnaithe gan a bheith dóite.

Tar éis bácála, ní mór do gach mantecada a bheith idir 25 g agus 35 g ina chás.

b)

Orgánaileipteach:

Ní mór do bharr an táirge a bheith teann, órdhonn agus cruinn, agus gráinní siúcra le feiceáil ar an dromchla.

Ní mór a bheith in ann an cás a bhaint den cháca go héasca, b’fhéidir cúpla grabhróg dúdhonn greamaithe de a fhágáil, agus gan an chuma a bheith air go bhfuil sé ar maos i ngréisc.

Ní mór do thaobh istigh an cháca a bheith bog agus spúinseach.

Féadann dath na grabhróige athrú idir béas éadrom agus buí, ag brath ar dhath an ime agus na n-uibheacha a úsáidtear.

Tá an blas milis go príomha, le blas láidir agus boladh breá ime agus uibheacha; ní mór a bheith in ann an siúcra ar an dromchla a thabhairt faoi deara agus é á ithe. Cruthaíonn comhpháirt shailleach mantecada taise áirithe sa bhéal, a chuireann an chuma air go bhfuil sé níos éadroime fiú. Tá taobh istigh an cháca bog and mín ar an gcarball.

c)

Fisiciceimiceach:

—

cion taise: 13 % ar a laghad agus nach mó ná 19 %

—

próitéiní: 69 % ar a laghad

—

saill: 20 % ar a laghad agus nach mó ná 27 %

—

carbaihiodráití (glúcós): 45 % ar a laghad

—

luaith: nach mó ná 1.70 %

—

gníomhaíocht an uisce (aw): 0.7 ar a laghad agus nach mó ná 0.9

3.3.    Beatha (maidir le táirgí de thionscnamh ainmhíoch amháin) agus amhábhair (maidir le táirgí próiseáilte amháin)

Déantar “Mantecadas de Astorga” go heisiach ó na comhábhair seo a leanas sna toisí luaite: plúr bán a bhfuil láidreacht idir 100 agus 150 eirg agus cóimheas P/L idir 0.28 agus 0.60 (30 % [+/- 4 %]) aige, uibheacha circe sa bhlaosc nó paistéartha (23 % [+/- 3 %]), saill (23 % [+/- 3 %]) i bhfoirm ime déirí agus blonag (6 %-7.8 %) agus siúcra i bhfoirm siúcra bháin (20 % [+/- 4 %]). Tá an rogha ann freisin comhábhair bheaga eile a chur isteach, amhail mil, síoróip ghlúcóis, deastrós, siúcra inbhéartaithe nó cineálacha siúcra eile (nach mó ná 3 % den mhéid siúcra iomlán); chomh maith leis sin, blastán ime, taisleáin, oibreáin ardaithe, eiblitheoirí agus leasaithigh cheadaithe.

3.4.    Céimeanna sonracha sa táirgeadh nach mór a dhéanamh sa limistéar geografach sainithe

Tarlaíonn gach céim sa táirgeadh, is é sin aer a thabhairt don saill, na huibheacha agus an siúcra a bhualadh, an meascán a ullmhú, píobú, siúcra a chroitheadh ar an dromchla agus bácáil, tarlaíonn siad sa limistéar geografach sainithe i bpointe 4.

3.5.    Rialacha sonracha maidir le slisniú, grátáil, pacáistiú, etc. an táirge dá dtagraíonn an t-ainm cláraithe

Ní mór don táirge a bheith pacáistithe sa mhonarcha (cláraithe) chéanna ina dtáirgtear é, i gcliathbhoscaí adhmaid, boscaí stáin nó cairtchláir, réamhphacáistithe nó pacáistithe i mbulc i málaí plaisteacha. Is féidir an phacáistíocht a dhúnadh ar roinnt bealaí éagsúla.

3.6.    Rialacha sonracha maidir le lipéadú an táirge dá dtagraíonn an t-ainm cláraithe

Ní mór d’aon phacáistíocht ina seachadtar an táirge le hithe lipéad deimhniúcháin uimhrithe a bheith uirthi nach mór agus siombail TGFC an Aontais a bheith san áireamh agus an t-ainm “Mantecadas de Astorga”, in éineacht le lógó an TGFC féin.

Ní mór na lipéid a ghreamú orthu ag an monarcha phacáistithe, ar bhealach nach féidir iad a athúsáid.

Is ionann lógó an TGFC féin agus:

Image 1

4.   Sainmhíniú achomair ar an limistéar geografach

Táirgtear agus pacáistítear an táirge cumhdaithe ag an tásc geografach faoi chosaint “Mantecadas de Astorga” sna bardais seo a leanas i gcúige León:

Astorga, Brazuelo, San Justo de la Vega agus Valderrey.

5.   Nasc leis an limistéar geografach

Lorgaíodh cosaint do “Mantecadas de Astorga” mar gheall ar a gcáil bunaithe ar mhodh táirgthe áirithe agus an t-oideas traidisiúnta, a bhaineann go sonrach leis an limistéar geografach sainithe agus atá in úsáid fós sa lá atá inniu ann.

Chuir tosca daonna den chuid is mó, obair na cajilleras (déantóirí cásanna) go háirithe, leis an tóir a bhí orthu. Rinne na mná sin cajillas, na cásanna páipéir inar bácáladh na mantecadas go hiondúil. Léirítear iad i múrphictiúr i seanchathair mhúrtha Astorga, a rinneadh in 2016 agus is cóip de ghrianghraf a glacadh in 1927 é, agus stadann gach cuairteoir chun grianghraf a ghlacadh de. Is fianaise é den dlúthcheangal idir mantecadas agus an baile.

Is é tionscnamh geografach an táirge is saintréith dó freisin, i dtéarmaí eolas sonrach áitiúil, a chiallaíonn go n-úsáidtear an t-oideas traidisiúnta fós sa lá atá inniu ann. Is í an ghné is sainiúla de tháirgeadh mantecada an úsáid ime agus is é an rud a dhealaíonn mantecadas ó chineálacha cáca spúinse Spáinneacha eile (bollos, bizcochos agus magdalenas), a dhéantar le saillte agus/nó olaí eile, agus tugann sé a ndath buí agus a mboladh ime sainiúil dóibh.

Tá an t-oideas tábhachtach freisin, oideas a bhíonn éagsúil ag brath ar cé acu is mó uibheacha nó im atá ann, agus eolas speisialta gach báicéara maidir leis an gcomhdhéanamh agus an modh foirfe a úsáid, a tugadh ar aghaidh ó ghlúin go glúin go dtí an lá inniu.

Is í an saintréith uathúil dheiridh píobú an mheascáin isteach i gcásanna agus iad a bhácáil ag teocht mheasartha chun a áirithiú go gcuireann sé thar maoil chun an “deoir mantecada” a fhoirmiú.

Léiríonn tagairtí le gairid cáil “Mantecadas de Astorga” lena n-áirítear:

Bhí tuarascáil san áireamh ar mantecadas i gclár España Directo ar RTVE (Radiotelevisión Española) an 15 Iúil 2021 (34 nóim, 30 soic), inar tugadh tuairisc orthu mar mhilseog a thug cáil idirnáisiúnta do chathair Astorga in León agus ag taispeáint conas a dhéantar iad le hoideas atá níos mó ná 200 bliain d’aois agus a úsáidtear fós sa lá atá inniu ann (https://www.rtve.es)/.

Tarraingítear aird ar cháil mantecadas León freisin in alt in Condé Nast Traveler dar teideal “Por qué León debería ser Capital Gastronómica 2018”, a foilsíodh an 13 Deireadh Fómhair 2017, ag áitiú ar son León: “mar gheall ar a botillo del Bierzo, a cecina de León, a lechazo, a ternera del Bierzo, a mantecadas de Astorga, (...)”.

Ba cheart a thabhairt faoi deara go liostaítear an táirge i gcatalóga oifigiúla éagsúla maidir le táirgí bia ar ardchaighdeán, amhail an Inventario Español de Productos Tradicionales [Fardal Táirge Traidisiúnta na Spáinne], arna foilsiú ag an Aireacht um Thalmhaíocht, Iascach agus Bia in 1996, agus an Inventario de Productos Agroalimentarios de Calidad de Castilla y León [Fardal táirgí agraibhia ar ardchaighdeán de chuid na Caistíle agus León], arna foilsiú ag Rialtas Phobal Féinrialaitheach na Caistíle agus León (2001).

D’eisigh Correos, soláthraí uilíoch sheirbhís phoist na Spáinne, postmharc in 2006 chun cuimhneachán an dara bliain ó deonaíodh stádas TGFC ar “Mantecadas de Astorga” a chomóradh, ar a raibh a lógó agus a shiombail féin.

Tá go leor tagairtí stairiúla do “Mantecadas de Astorga” ann chomh maith:

Is sa 18ú haois a rinneadh an chéad tagairt bhibleagrafaíochta agus léirítear léi gur féidir gur foinse oideas “Mantecadas de Astorga” é Juan de la Mata, “milsíneoir na Cúirte, as Matalavilla é, i mbardas Sil de Arriba, Montañas agus Ríocht León agus Deoise Oviedo”, a bhfuil an t-oideas ina leabhar Arte de Repostería [Ealaíon an Mhilseogra], arna foilsiú ag António Martín i Maidrid in 1747. D’fhoilsigh La Olmeda, Burgos, eagrán níos déanaí in 1992.

Tagraíonn na taifid le haghaidh 1805 a choimeádtar i gcartlanna dheoise Astorga do “Mantecadas de Astorga” mar mhilseog a itear um Nollaig, a rinne na milsíneoirí Máximo Matheo agus Francisco Calbo.

Tá go leor tagairtí ann ina léirítear gur tháinig an t-oideas ó bhean rialta ó Chlochar Sancti Spiritus in Astorga, a d’fhág an clochar níos déanaí agus a scaip an táirge. De réir roinnt leaganacha, is féidir gurbh í Maria Josefa Gonzáles Prieto í, a phós Tomás Rubio an 9 Samhain 1851.

Tá oideas le haghaidh “Mantecadas de Astorga” sa Diccionario Doméstico. Tesoro de las familias o Repertorio Universal de Conocimientos útiles [Foclóir Baile, Teasáras Teaghlaigh agus Coimre Eolais Úsáidigh] le Don Balbino Cortés y Morales (1876), ag déanamh tagairt dóibh mar mhilseog cháiliúil.

In Almanag Bailly-Bailliere 1891, ina ndéantar tagairt do chathair Astorga ar leathanach 1495, pléitear 12 mhonarcha mantecada ansin.

Déantar tagairt do 11 mhonarcha mantecada ar leathanach 1167 den Almanag Riera 1901.

Tagraíonn Almanag Bailly-Bailliere 1916 nua ar leathanach 3179 do naoi dtáirgeoir mantecada in Astorga agus tá fógraí le haghaidh dhá cheann acu san áireamh fiú. Maidir le Astorga deirtear ann go bhfuil “cáil ar an gcathair as seacláidí agus mantecadas a dhéanamh”.

De réir Chomhlachas Tráchtála na cathrach, b’ionann an méid “Mantecadas de Astorga” a d’iompair iarnróid na Spáinne in 1930 (cuideachta iarnróid Thuaisceart agus Iarthar na Spáinne) agus 188 710 kg.

Luann Benito Pérez Galdós (1843-1920), i gceann de na húrscéalta is ionadaíche uaidh, Fortunata y Jacinta (1886-87), Mantecadas de Astorga agus La Maragatería:

 

“ (...) Ón taobh amuigh Jacinta féadadh bairillí olóige i bpirimidí aon stór ar airde, altóirí déanta as boscaí prásóige, trófaithe rísíní agus áirsí an bhua maisithe le cnuasaigh de dhátaí a fheiceáil. (...) Níos faide ar shiúl bhí mantecadas ó Astorga beannaithe ag a Naofacht Pius IX. (...)”

 

“ (…) Don Pedro Manuel de Jáuregui (…). De bhunadh cúige León, fuair sé cliathbhoscaí uibheacha agus táirgí éanlaithe clóis eile. (...) Le linn shéasúr na Nollag, fuair Jáuregui lastais mantecadas ó Astorga chomh maith, agus théadh na gníomhairí díolacháin uile ó La Maragatería a bhí i Maidrid go dtí a theach le haghaidh orduithe agus íocaíochtaí. (…)”

Tagairt d’fhoilsiú na sonraíochta táirge

https://www.itacyl.es/documents/20143/342640/1_%2830-09-20%29+3+-+Pliego+Mant++Modif.pdf/4cf68d91-ad5e-f535-f31f-1a901b22ee85?t=1603287920636


(1)  IO L 179, 19.6.2014, lch. 17.


Top