(1)

Tá roinnt leasuithe le déanamh ar Rialachán (CE) Uimh. 199/2008 ón gComhairle (4). Ar mhaithe le soiléireacht, ba cheart an Rialachán sin a athmhúnlú.

(2)

Rinneadh athchóiriú ar an gComhbheartas Iascaigh le Rialachán (AE) Uimh. 1380/2013 ó Pharlaimint na hEorpa agus ón gComhairle (5). Tá cuspóirí an Chomhbheartais Iascaigh agus na ceanglais i dtaca le bailiú sonraí in earnáil an iascaigh leagtha amach in Airteagal 2 agus in Airteagal 25 den Rialachán sin. Thairis sin, rinneadh athchoiriú ar struchtúr na tacaíochta airgeadais a thugtar do ghníomhaíochtaí bailithe sonraí iascaigh na mBallstát le Rialachán (AE) Uimh. 508/2014 ó Pharlaimint na hEorpa agus ón gComhairle (6).

(3)

I gcomhréir le cuspóirí an Chomhbheartais Iascaigh maidir le caomhnú, bainistiú agus saothrú beo-acmhainní uisceacha in uiscí nach uiscí an Aontais iad, ní mór don Aontas a bheith rannpháirteach sna hiarrachtaí a dhéantar chun acmhainní iascaigh a chaomhnú, go háirithe i gcomhréir leis na forálacha arna nglacadh le comhaontuithe comhpháirtíochta iascaigh inbhuanaithe nó ag eagraíochtaí réigiúnacha bainistíochta iascaigh.

(4)

Is é is aidhm don Rialachán seo rialacha a bhunú maidir le sonraí bitheolaíocha, comhshaoil, teicniúla agus socheacnamaíocha a bhaineann le hearnáil an iascaigh a bhailiú, a bhainistiú agus a úsáid.

(5)

Ba cheart go rannchuideodh an creat um bailiú sonraí le cuspóirí an Chomhbheartais Iascaigh a bhaint amach, lena n-áirítear cosaint na muirthimpeallachta, bainistiú inbhuanaithe na speiceas uile a ndéantar saothrú tráchtála orthu, agus go háirithe dea-stádas comhshaoil sa mhuirthimpeallacht a bhaint amach faoi 2020, mar a leagtar amach in Airteagal 1(1) de Threoir 2008/56/CE ó Pharlaimint na hEorpa agus ón gComhairle (7).

(6)

Na rialacha a leagtar síos sa Rialachán seo a mhéid a bhaineann le sonraí bitheolaíocha, comhshaoil, teicniúla agus socheacnamaíocha a bhailiú, a bhainistiú agus a úsáid, ba cheart dóibh feidhm a bheith acu freisin maidir le sonraí a bhaineann le hearnáil an iascaigh, a bhfuil gá lena mbailiú faoi ghníomhartha dlí eile de chuid an Aontais, lena n-áirítear, Rialacháin (CE) Uimh. 1921/2006 (8), (CE) Uimh. 295/2008 (9),(CE), Uimh. 762/2008 (10), (CE) Uimh. 216/2009 (11),(CE), Uimh. 217/2009 (12), Rialachán (CE) Uimh. 218/2009 (13), (AE) Uimh. 1236/2010 (14), (AE) Uimh. 1343/2011 (15) agus (AE) 2016/2336 ó Pharlaimint na hEorpa agus ón gComhairle (16), Treoracha 2000/60/CE (17), 2008/56/CE agus 2009/147/CE (18) ó Pharlaimint na hEorpa agus ón gComhairle, Rialachán (CE) Uimh. 2347/2002 ón gComhairle (19), (CE) Uimh. 812/2004 (20), (CE) Uimh. 1967/2006 (21), (CE) Uimh. 1100/2007 (22), agus (CE) Uimh. 1006/2008 (23), Treoir 92/43/CEE ón gComhairle (24), Cinneadh 2010/717/AE ón gComhairle (25) agus Rialachán Cur Chun Feidhme (AE) 2017/218 (26).

(7)

Chun dúbláil a sheachaint, áfach, i gcás ina mbailítear agus ina mbainistítear na sonraí a bhaineann leis an iascach i gcomhréir leis na rialacha a leagtar síos i ngníomhartha dlí eile de chuid an Aontais, amhail Rialachán (CE) Uimh. 1224/2009 ón gComhairle (27) agus Rialachán (CE) Uimh. 223/2009 ó Pharlaimint na hEorpa agus ón gComhairle (28), ba cheart don Rialachán seo na rialacha maidir le húsáid agus le tarchur sonraí den sórt sin, agus na rialacha sin amháin, a leagan síos.

(8)

Ba cheart go mbeadh na hoibleagáidí a bhaineann le rochtain ar shonraí a chumhdaítear sa Rialachán seo gan dochar d’oibleagáidí na mBallstát faoi Threoir 2003/4/CE ó Pharlaimint na hEorpa agus ón gComhairle (29), mar aon le faoi Rialachán (CE) Uimh. 1367/2006 ó Pharlaimint na hEorpa agus ón gComhairle (30).

(9)

Ba cheart a áirithiú i gcónaí agus ar gach leibhéal, a mhéid a bhaineann le stóráil, próiseáil agus malartú sonraí, go ndéantar na hoibleagáidí maidir le cosaint sonraí pearsanta a leagtar síos i dTreoir 95/46/CE ó Pharlaimint na hEorpa agus ón gComhairle (31) agus faoi Rialachán (CE) Uimh. 45/2001 ó Pharlaimint na hEorpa agus ón gComhairle (32) a urramú.

(10)

Ar mhaithe le soiléireacht dhlíthiúil, ba cheart don Rialachán seo foráil a dhéanamh maidir le tacar sainmhínithe.

(11)

Ba cheart an sainmhíniú ar “réigiúin mhuirí” a bheith bunaithe ar chúinsí eolaíocha.

(12)

Ba cheart go gcuirfeadh an Rialachán seo ar chumas an Aontais agus a Bhallstát na cuspóirí agus na prionsabail a leagtar amach in Airteagal 2 agus Airteagal 25 de Rialachán (AE) Uimh. 1380/2013 a ghnóthú. Chuige sin, tá clár ilbhliantúil de chuid an Aontais de dhíth chun iarrachtaí na mBallstát uile maidir le bailiú sonraí a chomhordú. Is iomchuí na príomhcheanglais agus na príomhchritéir a leagan amach chun clár ilbhliantúil den sórt sin de chuid an Aontais a bhunú, mar aon leis na comhairliúcháin atá le reáchtáil sula nglacfar é.

(13)

Ba cheart riachtanais sonraí úsáideoirí deiridh sonraí eolaíocha a shainaithint agus ba cheart go sonrófaí cad iad na sonraí atá le bailiú faoin Rialachán seo. Ar na sonraí sin ba cheart go n-áireofaí sonraí éiceachórais a bhaineann le tionchar an iascaigh agus sonraí ar inbhuanaitheacht an dobharshaothraithe, mar aon le sonraí socheacnamaíocha faoin iascach agus faoi dhobharshaothrú.

(14)

Ar mhaithe le simpliú agus le cuíchóiriú, ba cheart na sonraí atá le bailiú a roghnú ar bhonn riachtanas a bhfuil bunús soiléir tugtha ag úsáideoirí deiridh sonraí eolaíocha dóibh, ag cur ábharthacht eolaíoch agus úsáideacht na sonraí sin san áireamh.

(15)

Ba cheart go bhfágfadh na sonraí a bhailítear gur féidir na spriocanna a bhfuil gá leo i gcomhair cur chun feidhme na bpleananna ilbhliantúla dá dtagraítear in Airteagal 9 de Rialachán (AE) Uimh. 1380/2013, amhail rátaí básmhaireachta san iascaireacht agus bhithmhais stoic sceite, a chinntiú. Ba cheart freisin go bhfágfaidís gur féidir na bearnaí i gcumhdach na sonraí a bhaineann le cabhlach iascaireachta a dhúnadh agus le líon na stoc atá easpach i sonraí i réigiúin áirithe a laghdú.

(16)

Tá sé tábhachtach sonraí bitheolaíocha maidir le hiascaigh áineasa a bhailiú, i gcás ina bhfuil tionchar suntasach féideartha ar staid an stoic ann chun bainistiú atá bunaithe ar an éiceachóras agus caomhnú a chumasú de réir mar is gá chun an Comhbheartas Iascaigh a fheidhmiú, mar aon le feabhas a chur ar stocmheasúnú.

(17)

Chun bearta éigeandála agus bearta eile atá bunaithe ar phrionsabal an réamhchúraim a choinneáil, a choigeartú nó a tharraingt siar, bíonn gá le faisnéis bhreise de ghnáth. I gcás inar féidir é, ba cheart dá bhrí sin tosaíocht a thabhairt do bhailiú sonraí atá riachtanach chun measúnú a dhéanamh ar na bearta a fhorchuirtear ar bhonn phrionsabal an réamhchúraim.

(18)

I bhfianaise na forbartha atá tagtha ar stádas acmhainní an iascaigh thar thréimhse ama, ní mór amshraitheanna sonraí a thógáil agus a chothabháil chun go bhféadfar faireachán eolaíoch fadtéarmach agus éifeachtach ar na hacmhainní sin a dhéanamh.

(19)

Is modh tábhachtach iad suirbhéanna taighde ar muir chun sonraí bitheolaíocha a bhailiú. I bhfianaise a dtábhachta i réigiúin mhuirí ina roinntear stoic, is iomchuí go ndéanfaí líon dóthanach de shuirbhéanna taighde sainordaitheacha ar muir ar leibhéal an Aontais.

(20)

Ba cheart go gcuirfeadh na Ballstáit clár ilbhliantúil an Aontais chun feidhme ar an leibhéal náisiúnta trína bpríomhghníomhaíochtaí bailithe sonraí a leagan amach ina roinn den chlár oibríochtúil dá dtagraítear i bpointe (p) d’Airteagal 18(1) de Rialachán (AE) Uimh 508/2014, arna fhorlíonadh le plean oibre um bailiú sonraí i gcomhréir le hAirteagal 21 den Rialachán sin. Ba cheart ceanglais maidir le hinneachar phleananna oibre den sórt sin a leagan amach sa Rialachán seo.

(21)

Is iomchuí cur síos a thabhairt ar na bearta ba cheart do na Ballstáit a dhéanamh agus ar na gnéithe ba cheart dóibh a chur san áireamh agus na modheolaíochtaí do bhailiú sonraí á mbunú acu ina gcuid pleananna oibre náisiúnta. D’fhonn a áirithiú go gcuirfidh na Ballstáit an Rialachán seo chun feidhme go héifeachtach agus go haonchineálach, is gá freisin príomhcheanglais a leagan amach i ndáil le socruithe comhordúcháin náisiúnta, cearta na mbailitheoirí sonraí agus oibleagáidí atá ar mháistrí soithí iascaireachta.

(22)

De bhun Airteagal 19(1) agus Airteagal 21(2) de Rialachán (AE) Uimh. 508/2014 ceanglaítear ar an gCoimisiún cláir oibríochtúla agus pleananna oibre náisiúnta na mBallstát agus aon leasuithe orthu a fhormheas. I gcomhréir le hAirteagal 22 den Rialachán sin, féadfaidh an Coimisiún gníomhartha cur chun feidhme a ghlacadh lena leagtar síos rialacha maidir le nósanna imeachta, formáid agus tráthchláir a bhformheas.

(23)

Is iomchuí don Choimisiún measúnú a dhéanamh ar na pleananna oibre tar éis dul i gcomhairle leis an gCoiste Eolaíoch, Teicniúil agus Eacnamaíoch um Iascach (CETEI), chun a áirithiú go bhfuil na pleananna sin ag teacht leis na híoscheanglais arna leagan amach sa Rialachán seo.

(24)

Ar mhaithe le cur chun feidhme na ngníomhaíochtaí bailithe sonraí arna ndéanamh ag na mBallstáit a fhíorú, ní mór do na Ballstáit an tuairisciú don Choimisiún a dhéanamh i bhformáid chaighdeánaithe atá sainithe go soiléir agus a laghdaíonn an t-ualach riaracháin.

(25)

Is den riachtanas é go gcomhoibreoidh na Ballstáit le chéile, agus freisin le tríú tíortha, agus go gcomhordóidh siad a bpleananna oibre i ndáil le bailiú sonraí a bhaineann leis an réigiún muirí céanna agus i ndáil le réigiúin a chumhdaíonn uiscí ábhartha intíre.

(26)

I bhfianaise chuspóir an Chomhbheartais Iascaigh tuilleadh freagrachta a thabhairt do na Ballstáit agus rannpháirtíocht úsáideoirí deiridh sonraí eolaíocha sa bhailiú sonraí a mhéadú, ba cheart an comhordú réigiúnach a neartú agus a mhéadú ó aon chruinniú amháin go próiseas leanúnach arna chomhardú ag grúpaí um chomhordú réigiúnach do gach réigiún muirí. Sa chreat seo, ba cheart do Bhallstáit go mbeadh sé mar aidhm acu comhoibriú leis na páirtithe leasmhara ábhartha, lena n-áirítear tríú tíortha.

(27)

Ba cheart an cúram a chur ar na grúpaí um chomhordú réigiúnach sin nósanna imeachta, modhanna, dearbhú cáilíochta agus rialú cáilíochta do bhailiú agus do phróiseáil sonraí a fhorbairt agus a chur chun feidhme, d’fhonn tuilleadh feabhais ar iontaofacht na comhairle eolaíche a chumasú.

(28)

Ba cheart freisin go mbeadh sé mar aidhm ag na grúpaí um chomhordú réigiúnach bunachair sonraí réigiúnacha a fhorbairt agus a chur chun feidhme, agus ba cheart dóibh tús a chur leis na céimeanna ullmhúcháin a bhfuil gá leo chun an sprioc sin a ghnóthú.

(29)

Tá sé tábhachtach go mbainfí leas iomlán as sonraí do bhainistiú inbhuanaithe iascaigh agus do mheasúnú agus faireachán stoc agus éiceachóras, lena n-áirítear sonraí a bhaineann leis an oibleagáid gabhálacha a thabhairt i dtír.

(30)

Ba cheart do na Ballstáit an chaoi a mbaileoidh siad sonraí a chinneadh, ach chun a bheith in ann sonraí ar leibhéal réigiúnach a chur le chéile ar bhealach ciallmhar, ba cheart do na Ballstáit íoscheanglais maidir le cáilíocht, cumhdach agus comhoiriúnacht sonraí a chomhaontú ar an leibhéal réigiúnach, á chur san áireamh dóibh go mbainistítear imchuacha go comhpháirteach le tríú tíortha i roinnt réigiún. Nuair a bheidh comhaontú ginearálta ann maidir leis na modhanna ar an leibhéal réigiúnach, ba cheart do na grúpaí um chomhordú réigiúnach, ar bhonn an chomhaontaithe sin, dréachtphlean oibre réigiúnach a chur faoi bhráid an Choimisiúin lena fhormheas.

(31)

Níor cheart go mbeadh mionsonraí na modheolaíochtaí atá le cur i bhfeidhm i mbailiú sonraí á chinneadh a thuilleadh le reachtaíocht Aontais. Dá bhrí sin, ba cheart tuairisc ar an bpróiseas lena gcinntear modhanna ar leith bailithe sonraí a chur in ionad forálacha maidir leis na modhanna ar leith sin. Ba cheart, go bunúsach, go mbeadh comhar idir na Ballstáit agus úsáideoirí sonraí sna grúpaí um chomhordú réigiúnach ina chuid den phróiseas sin, agus ba cheart go ndéanfadh an Coimisiún bailíochtú mar chuid den phróiseas freisin, trí fhormheas na bpleananna oibre a chuireann na Ballstáit isteach.

(32)

Ba cheart na sonraí dá dtagraítear sa Rialachán seo a chur isteach i mbunachair sonraí náisiúnta ríomhairithe sa chaoi go mbeidh rochtain ag an gCoimisiún orthu agus go bhféadfar iad a chur ar fáil d’úsáideoirí deiridh sonraí eolaíocha agus do pháirtithe leasmhara eile. Ba cheart sonraí nach féidir daoine aonair a aithint leo, a bheith ar fáil gan srianta d’aon pháirtí a bhfuil leas acu in anailís a dhéanamh orthu, lena n-áirítear gnéithe comhshaoil den bhainistiú iascaigh. Chun na críocha sin, ba cheart a mheas go n-áirítear ar pháirtithe leasmhara seachas úsáideoirí deiridh sonraí eolaíocha aon duine aonair nó comhlacht a léiríonn go bhfuil leas den sórt sin acu.

(33)

Chun comhairle eolaíoch a thabhairt do lucht bainistíochta acmhainní iascaigh is gá próiseáil a dhéanamh ar shonraí mionsonraithe, chun dul i ngleic le riachtanais na mbainisteoirí iascaigh. Sa chomhthéacs sin, ba cheart do na Ballstáit sonraí a chur ar fáil, ar sonraí iad atá de dhíth chun anailís eolaíoch a dhéanamh agus ba cheart dóibh a áirithiú go mbeidh an cumas teicniúil acu chun é sin a dhéanamh.

(34)

I gcomhréir le pointe (e) d’Airteagal 25(2) de Rialachán (AE) Uimh. 1380/2013, is gá a áirithiú go mbeidh fáil thráthúil ar na sonraí ábhartha agus ar na modheolaíochtaí faoi seach ag na comhlachtaí a bhfuil leas taighde nó bainistithe acu san anailís eolaíoch a dhéantar ar shonraí san earnáil iascaigh agus ag aon pháirtithe leasmhara, seachas in imthosca ina n-éilítear cosaint agus rúndacht faoi dhlí infheidhme an Aontais.

(35)

Chun éifeacht iomlán a thabhairt do phointe (e) d’Airteagal 25(2) de Rialachán (AE) Uimh. 1380/2013, ba cheart do na Ballstáit próisis agus teicneolaíochtaí leictreonacha leordhóthanacha a bhunú chun a áirithiú go mbeidh sonraí ar fáil agus ba cheart dóibh comhoibriú le Ballstáit eile, leis an gCoimisiún agus le húsáideoirí deiridh sonraí eolaíocha chun córais chomhoiriúnacha stórála agus malartaithe sonraí a fhorbairt, agus Treoir 2007/2/CE ó Pharlaimint na hEorpa agus ón gComhairle (33) á gcur san áireamh. Ba cheart scaipeadh breise faisnéise a áirithiú freisin ar an leibhéal náisiúnta agus ar an leibhéal Aontais araon. I ngach cás, ba cheart coimircí oiriúnacha amhail leibhéal níos airde comhiomlánaithe nó anaithnidiú sonraí a chur i bhfeidhm i gcás ina bhfuil faisnéis sna sonraí a bhaineann le daoine nádúrtha sainaitheanta nó in-sainaitheanta, ag cur san áireamh chuspóirí na próiseála, chineál na sonraí agus na rioscaí féideartha a bhaineann le próiseáil sonraí pearsanta.

(36)

Is gá a áirithiú go ndéanfar na sonraí a sholáthar d’úsáideoirí deiridh sonraí eolaíocha go tráthúil agus i bhformáid chaighdeánaithe, le córais chódaíochta shoiléire, toisc gur gá dóibh comhairle thráthúil a sholáthair chun iascaigh a bheith inbhuanaithe a chumasú. Ba cheart a áirithiú go bhfaighidh páirtithe leasmhara eile sonraí laistigh de spriocdháta áirithe freisin.

(37)

Chun feabhas a chur ar iontaofacht na comhairle eolaíche atá de dhíth chun an Comhbheartas Iascaigh a sheoladh, ba cheart do na Ballstáit agus don Choimisiún dul i mbun comhordú agus comhair le chéile sna comhlachtaí idirnáisiúnta eolaíocha ábhartha.

(38)

Ba cheart dul i gcomhairle le pobal na heolaíochta agus ba cheart iad siúd atá ag obair i dtionscal na hiascaireachta agus grúpaí leasa eile a choimeád ar an eolas faoi chur chun feidhme na bhforálacha maidir le bailiú sonraí. Is iad na comhlachtaí iomchuí chun na tuairimí atá de dhíth a fháil uathu ná CETEI agus na Comhairlí Comhairleacha arna mbunú de bhun Airteagal 43 de Rialachán (AE) Uimh. 1380/2013.

(39)

Chun gnéithe neamhriachtanacha áirithe den Rialachán seo a fhorlíonadh, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i dtaca le liosta mionsonraithe de cheanglais sonraí a bhunú chun críocha an Rialacháin seo laistigh de chreat chlár ilbhliantúil an Aontais. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (34). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(40)

Chun coinníollacha aonfhoirmeacha a áirithiú maidir leis an Rialachán seo, ba cheart cumhachtaí cur chun feidhme a thabhairt don Choimisiún i dtaca le formheas dhréacht-phleananna oibre réigiúnacha arna gcur isteach ag grúpaí um chomhordú réigiúnach, agus i dtaca le nósanna imeachta, socruithe ó thaobh roinnt an chostais le haghaidh na rannpháirtíochta sna suirbhéanna taighde ar muir, limistéar an réigiúin mhuirí chun críche an bhailithe sonraí, agus formáid agus tráthchláir maidir le pleananna oibre réigiúnacha den sórt sin a chur faoina bhráid agus a fhormheas. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (35).

(41)

Chun coinníollacha aonfhoirmeacha do chur chun feidhme an Rialacháin seo a áirithiú, ba cheart cumhachtaí cur chun feidhme a thabhairt don Choimisiún chun liosta a bhunú, laistigh de chreat chlár ilbhliantúil an Aontais, de shuirbhéanna taighde sainordaitheacha ar muir agus tairseacha a bhunú nach bhfuil sé sainordaitheach sonraí a bhailiú nó suirbhéanna taighde ar muir a dhéanamh faoi bhun na dtairseach sin. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(42)

Chun coinníollacha aonfhoirmeacha a áirithiú maidir le forálacha an Rialacháin seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil leis na rialacha maidir le nósanna imeachta, le formáidí agus amchláir maidir le tuarascálacha bliantúla a chur faoina bhráid agus a fhormheas ó Bhallstáit don Choimisiún a leagan amach. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(43)

Chun coinníollacha aonfhoirmeacha a áirithiú maidir le forálacha an Rialacháin seo a chur chun feidhme, ba cheart cumhachtaí cur chun feidhme a thabhairt don Choimisiún i ndáil leis na rialacha nós imeachta, formáidí, cóid agus amchláir a bheidh le húsáid chun comhoiriúnacht na gcóras stórála agus malartaithe sonraí a áirithiú, agus chun coimircí a bhunú, i gcás inarb iomchuí, sa chás go mbeadh faisnéis san áireamh sna córais stórála a bhaineann le daoine nádúrtha sainaitheanta nó insainaitheanta. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(44)

Ós rud é nach féidir leis na Ballstáit cuspóir an Rialacháin seo, eadhon creat Aontais a bhunú do bhailiú, bainistiú agus úsáid sonraí in earnáil an iascaigh, a ghnóthú go leordhóthanach agus de bharr fhairsinge nó éifeachtaí na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(45)

Ba cheart Rialachán (CE) Uimh. 199/2008 a aisghairm. Ba cheart foráil a dhéanamh, áfach, do bhearta idirthréimhseacha maidir le cláir náisiúnta atá formheasta cheana agus maidir le clár ilbhliantúil an Aontais atá i bhfeidhm i láthair na huaire,