CINNEADH CUR CHUN FEIDHME (AE) …/… ÓN gCOIMISIÚN
an 16.5.2025
lena leasaítear Cinneadh Cur Chun Feidhme (AE) 2016/413 a mhéid a bhaineann le suíomh bhonneagar ar talamh an chórais arna bhunú faoi chlár Galileo
(Téacs atá ábhartha maidir le LEE)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2021/696 ó Pharlaimint na hEorpa agus ón gComhairle an 28 Aibreán 2021 lena mbunaítear Clár Spáis an Aontais agus Gníomhaireacht an Aontais Eorpaigh um an gClár Spáis agus lena n‑aisghairtear Rialacháin (AE) Uimh. 912/2010, (AE) Uimh. 1285/2013 agus (AE) Uimh. 377/2014 agus Cinneadh 541/2014/AE 1 , agus go háirithe Airteagail 47 de
De bharr an mhéid seo a leanas:
(1)Foráiltear in Airteagal 47 de Rialachán (AE) 2021/696 go mbeidh freagracht fhoriomlán ag an gCoimisiún as clár Galileo agus tugtar cumhachtaí cur chun feidhme leis don Choimisiún chun suíomh bhonneagar ar talamh an chórais a a chinneadh faoin gclár sin agus áirithítear leis go bhfeidhmíonn sé. Cuimsíonn an bonneagar sin ionaid ar talamh agus stáisiúin ar talamh.
(2)Soláthraítear san Iarscríbhinn a ghabhann le Cinneadh Cur Chun Feidhme (AE) 2016/413 2 ón gCoimisiún liosta uileghabhálach d’ionaid ar talamh agus cianshuíomhanna; Stáisiúin Braiteora Galileo (‘GSS’), Stáisiúin Uasnaisc (‘ULS’). Teiliméadracht agus Teileachumarsáid (‘TTC’), Cuardach agus Tarrtháil (‘SAR’) agus Lárionad Seirbhíse GNSS (GSC).
(3)In 2017, imlonnaíodh stáisiún TTC in Papeete (Polainéis na Fraince).
(4) Chun oibriú feabhsaithe an chórais a éascú, ba cheart stáisiúin GSS bhreise a bhunú.
(5)Bhí an roghnúchán suímh chun stáisiún GSS Ascension a ionadú faoi réir próiseas oscailte trédhearcach. Ar an gcéad dul síos, de bharr réamh-shainaithint suíomhanna oiriúnacha roghnaíodh iarratais ón bhFrainc agus ón Ísiltír. Ina dhiaidh sin, chun cinneadh a dhéanamh idir an dá iarratas sin, iarradh ar an dá Bhallstát tograí mionsonraithe a chur isteach. Ar deireadh, tar éis do choiste d’ionadaithe de chuid an Choimisiúin, na Gníomhaireachta Eorpaí Spáis agus Ghníomhaireacht Eorpach GNSS meastóireacht a dhéanamh ar na tograí sin de réir critéir a bhaineann leis an tsábháilteacht, le rioscaí, le huainiú agus le costais, fuarthas amach gurb é togra na hÍsiltíre an togra is oiriúnaí toisc gur barrfheabhsaíodh go hiomlán ailtireacht agus dearadh an fhoirgnimh ar shuíomh Bonaire chun cúrsaí lóistíochta an chórais faoi Chlár Galileo a áirithiú. Tá an lárionad le bunú i ráithe dheiridh 2024 agus ba cheart é a bheith faoi réir comhaontú leis an Ísiltír.
(6)In 2020, de bharr gur sainaithníodh go raibh gá le ar a laghad 6 TTC oibríochtúla chun tacú leis an mbuíon ó thaobh forbairtí atá beartaithe a dhéanfar amach anseo, cinneadh an nós imeachta a sheoladh ina n‑iarrfar ar na Ballstáit a dtograí a sholáthar trí bhíthin léirithe spéise maidir le suíomh a sholáthar ina bhféadfaí stáisiún TTC breise a shuiteáil. Bhí an roghnúchán faoi réir próiseas oscailte trédhearcach i 4 chéim: léiriú spéise ó na Ballstáit, seoladh cuiridh chun tairisceana, nós imeachta boird roghnúcháin, síniú conartha. Mar thoradh ar an nós imeachta roghnaíodh togra na hIodáile chun stáisiún TTC breise a suiteáil in Fucino.
(7)In 2020, imlonnaíodh stáisiún GSS in Wallis (Wallis agus Futuna).
(8)In 2021, tugadh imlonnú stáisiún SAR MEOLUT in La Réunion chun críche.
(9)In 2022, sainaithníodh an gá le Lárionad Seirbhíse iomarcach Galileo agus le Lárionad Seirbhíse iomarcach SAR agus sannadh an lárionad seirbhíse SAR in Toulouse (an Fhrainc) agus an Lárionad Seirbhísí GNSS i Maidrid (an Spáinn), a roghnaíodh cheana féin, chun an cúltaca fhrithpháirteach is gá a sholáthar d’fhonn stóinseacht na seirbhísí a áirithiú.
(10)In 2023, imlonnaíodh rabhchán tagartha SAR sa Ghraonlainn (an Danmhairg) chun Faireachán SAR i gciumhaiseanna an limistéir cumhdaigh a daingniú agus chun iomarcaíocht a sholáthar don chóras atá ann cheana féin.
(11)In 2025 aistreofar úinéireacht Aeróg TTC in Redu (an Bheilg), lenar tacaíodh le clár Galileo mar sheirbhís go dtí seo, ón nGníomhaireacht Eorpach Spáis go dtí an tAontas.