MEABHRÁN MÍNIÚCHÁIN
1.COMHTHÉACS AN GHNÍMH THARMLIGTHE
Le hAirteagal 62 de Rialachán (AE) Uimh. 1095/2010 ó Pharlaimint na hEorpa agus ón gComhairle an 24 Samhain 2010 lena mbunaítear Údarás Maoirseachta Eorpach (an tÚdarás Eorpach um Urrúis agus Margaí), foráiltear gurb é a bheidh in ioncam an Údaráis Eorpaigh um Urrúis agus Margaí (ÚEUM) táillí arna n‑íoc le ÚEUM sna cásanna a shonraítear i reachtaíocht an Aontais, mar aon le ranníocaíochtaí ó údaráis phoiblí náisiúnta, fóirdheontas ón Aontas chomh maith le haon ranníocaíocht dheonach ó Bhallstáit nó ó bhreathnadóirí agus táillí comhaontaithe a bhaineann le foilseacháin, oiliúint, agus aon seirbhís eile a sholáthraíonn ÚEUM arna hiarraidh sin go sonrach ag údarás inniúil amháin nó níos mó.
Is é ÚEUM an maoirseoir san Aontas ar stórtha trádála, arb iad na bonneagair atá freagrach as bailiú agus cothabháil na dtaifead de dhíorthaigh agus d’idirbhearta um maoiniú urrús. Dá réir sin, údaraíonn ÚEUM stórtha trádála agus déanann sé maoirseacht ar chomhlíonadh na gceanglas rialála ina leith. Íocann stórtha trádála táille clárúcháin aonuaire agus táille mhaoirseachta bhliantúil le ÚEUM.
Déantar táillí a íocann stórtha trádála le ÚEUM a ríomh agus úsáid á baint as modheolaíocht a bhunaítear in dhá Rialachán Tharmligthe, ceann amháin díobh le haghaidh a gcuid gníomhaíochta maidir le díorthaigh agus an ceann eile le haghaidh a gcuid gníomhaíochta maidir le hidirbhearta um maoiniú urrús. Ghlac an Coimisiún na Rialacháin Tharmligthe sin tar éis comhairle theicniúil a fháil ó ÚEUM agus bunaíodh iad ar na prionsabail in Airteagal 72 den Rialachán maidir le Bonneagar Margaidh Eorpach (EMIR), agus in Airteagal 11 den Rialachán maidir le hIdirbhearta Maoinithe Urrús:
–An caiteachas is gá de chuid ÚEUM a bhaineann le stórtha trádála a chlárú, a aithint agus maoirseacht a dhéanamh orthu, ní mór do na táillí a íocfar é a chumhdach go hiomlán; agus,
–Ní mór méid na táille a ghearrfar ar stór trádála a bheith comhréireach le láimhdeachas an stóir trádála lena mbaineann. Thairis sin, i gcás EMIR, chuimsigh na comhreachtóirí sna leasuithe a tugadh isteach le Rialachán 2019/834 (REFIT EMIR) nach mór go gclúdódh méid na táille a ghearrtar ar stór trádála na costais riaracháin réasúnta uile a thabhóidh ÚEUM i ndáil lena chlárú agus le gníomhaíocht mhaoirseachta ÚEUM.
Ó bhí an 1 Eanáir 2021 ann, tháinig athrú suntasach ar thimpeallacht stórtha trádála an Aontais. Maidir leis na ceithre stór trádála a bhí lonnaithe sa Ríocht Aontaithe roimh an 1 Eanáir 2021, níl ach dhá cheann díobh a d’aistrigh a gcuid gnó chuig an Aontas agus a leanann dá gcuid seirbhísí a chur ar fáil san Aontas. Chun é sin a dhéanamh, chruthaigh siad eintitis nua atá suite san Aontas.
Go héifeachtach, chuir na stórtha trádála nua sin tús lena ngníomhaíocht san Aontas i mí Eanáir 2021. Chun a áirithiú go n‑íocfaidh siad táille mhaoirseachta atá i gcomhréir lena láimhdeachas iarbhír san Aontas le haghaidh na bliana sin, tá sé beartaithe ag an gCoimisiún airteagal nua a chur isteach sa dá rialachán tharmligthe araon maidir le táillí a íocfaidh stórtha trádála le ÚEUM, i.e. Rialachán Tarmligthe 1003/2013 agus Rialachán Tarmligthe 2019/360. Leis an airteagal nua seo ba cheart tréimhse thagartha shonrach a chur ar fáil chun an láimhdeachas is infheidhme a ríomh maidir le táillí bliantúla arna n‑íoc ag stórtha trádála le ÚEUM in 2021 chun léiriú níos fearr a thabhairt ar na hathruithe ar a bhfuil aghaidh á tabhairt i dtimpeallacht stórtha trádála an Aontais.
2.COMHAIRLIÚCHÁIN ROIMH GHLACADH AN GHNÍMH
Gnéithe nós imeachta
I mí na Samhna 2020, d’iarr ÚEUM ar an gCoimisiún modhnú a dhéanamh ar an modheolaíocht maidir le ríomh na dtáillí bliantúla a íocfaidh stórtha trádála le ÚEUM in 2021. Bheartaigh ÚEUM an tréimhse thagartha chun an láimhdeachas is infheidhme maidir le stórtha trádála a ríomh a athrú ó 2020 go dtí an tréimhse ó mhí Eanáir go mí an Mheithimh 2021.
Idir an 22 Nollaig 2020 agus an 11 Eanáir 2021, chuaigh an Coimisiún i gcomhairle i scríbhinn le Sainghrúpa an Choiste Eorpaigh um Urrúis (EGESC). Is éard atá in EGESC ionadaithe ó na Ballstáit, ón mBanc Ceannais Eorpach, ó Rúnaíocht an Choiste um Ghnóthaí Eacnamaíochta agus Airgeadaíochta i bParlaimint na hEorpa, agus ó ÚEUM. D’aontaigh comhaltaí EGESC, tríd is tríd, leis an gcur chuige a bhí beartaithe agus ní dhearnadh aon agóid mhór, cé gur mhol roinnt Ballstát smaointe malartacha chun aghaidh a thabhairt ar an gcás. Léirigh Ballstát amháin imní maidir le huainiú an athraithe ar an modheolaíocht, ar cheart dó teacht i bhfeidhm in 2021, an bhliain chéanna ina mbeidh feidhm aige. Mar sin féin, de bharr na n‑iarmhairtí a bheadh ann mura dtabharfaí na hathruithe atá beartaithe isteach, tugtar údar leis an ngá le hathrú práinneach a dhéanamh ar an modheolaíocht maidir le ríomh na dtáillí bliantúla atá le híoc ag stórtha trádála in 2021.
Thairis sin, foilsíodh an Gníomh Tarmligthe seo le haghaidh aiseolas ón bpobal de réir na dTreoirlínte maidir le Rialú Níos Fearr ón 9 Feabhra 2021 go dtí an 9 Márta 2021. Ní bhfuair an Coimisiún aon aiseolas maidir leis an Dréacht-Ghníomh Tarmligthe a mhol sé.
3.EILIMINTÍ DLÍ AN GHNÍMH THARMLIGTHE
Le hAirteagal 1 bunaítear an táille mhaoirseachta bhliantúil le haghaidh 2021 a bheidh le híoc ag stórtha trádála as a ngníomhaíocht i dtaobh EMIR.
Le hAirteagal 2 bunaítear an táille mhaoirseachta bhliantúil le haghaidh 2021 a bheidh le híoc ag stórtha trádála as a ngníomhaíocht i dtaobh an Rialacháin maidir le hIdirbhearta Maoinithe Urrús.
Le hAirteagal 3 tugtar dáta theacht i bhfeidhm an Ghnímh.
4.MEASÚNÚ TIONCHAIR
Is é is cuspóir do na hathruithe atá beartaithe táillí a leithdháileadh ar stórtha trádála ar leith sa chaoi is go n‑áiritheofar prionsabal na comhréireachta arna chumhdach in EMIR agus sa Rialachán maidir le hIdirbhearta Maoinithe Urrús fad a ligfear do ÚEUM a áirithiú go ndéanfar na costais ar fad dá chuid a bhaineann le maoirseacht a dhéanamh ar stórtha trádála a ghnóthú. Measadh gur réitigh fhéideartha iad na trí rogha mhalartacha seo a leanas:
(1)An láimhdeachas is infheidhme arna ghiniúint ag stórtha trádála nua an Aontais a chur leis an láimhdeachas is infheidhme i stórtha trádála atá bunaithe sa Ríocht Aontaithe laistigh de na grúpaí céanna;
(2)Tréimhse thagartha an láimhdeachais is infheidhme a athrú ó mhí Eanáir go mí na Nollag 2020 go dtí mí Eanáir go mí an Mheithimh 2021;
(3)Gan aon leasú a dhéanamh ar na rialacha atá ann cheana le bheith ag brath ar Airteagal 3(2) de Rialachán Tarmligthe 1003/2013 agus ar Airteagal 2(4) de Rialachán Tarmligthe 2019/360 lena gceadaítear do ÚEUM an láimhdeachas is infheidhme bunaithe ar na luachanna arna ríomh i leith líon na míonna ar lena linn a d’oibrigh an stór trádála sa bhliain (n-1) a eachtarshuí go dtí an bhliain iomlán (n-1), i gcás nach raibh an stór trádála ag feidhmiú i rith na bliana iomláine.
Tá dúshláin ag baint leis an gcéad rogha toisc nach léiríonn sí i gceart prionsabal na comhréireachta i gcásanna nach n‑aistrítear ach cuid de ghníomhaíocht stór trádála na Ríochta Aontaithe nó nach n‑aistrítear aon chuid di chuig an Aontas fad is a fhanann gníomhaíocht eile sa Ríocht Aontaithe. Go deimhin, dá gcuirfí sonraí stórtha trádála an Aontais leis na sonraí óna bhfochuideachtaí sa Ríocht Aontaithe, d’fhéadfadh méideanna níos airde a bheith i gceist ná fíorghníomhaíocht stórtha trádála nua an Aontais. Thairis sin, d’fhéadfadh stórtha trádála an Aontais ábhair imní a tharraingt anuas maidir le faisnéis a chur ar fáil do ÚEUM, mar údarás maoirseachta Eorpach, faoi ioncam a bhfochuideachtaí sa Ríocht Aontaithe atá lonnaithe i dtríú tír ón 1 Eanáir 2021 i leith. Ní léir ach oiread an mbeadh an cur chuige seo go hiomlán comhsheasmhach le foclaíocht na bhforálacha atá ann faoi láthair. De bharr na saincheisteanna sin, ní sholáthródh an rogha sin comhréireacht leordhóthanach agus dá bhrí sin diúltaíodh di.
Tá dúshláin ag baint leis an tríú rogha freisin maidir le prionsabal na comhréireachta. Más rud é nach ndearnadh gnó a aistriú ó stórtha trádála na Ríochta Aontaithe chuig stórtha trádála nuachláraithe an Aontais ach an 1 Eanáir 2021, ní thabharfaidh eachtarshuíomh bunaithe ar láimhdeachas (neamhláithreach nó íseal) 2020 meastachán iomchuí ar ghníomhaíocht le haghaidh 2021. Sa chás a bhfuil tuairisc air, chun táillí maoirseachta ÚEUM a ghnóthú ina n‑iomláine, chaithfí stórtha trádála an Aontais a bhí gníomhach san Aontas roimh an 1 Eanáir 2021 a mhuirearú ar bhealach neamh-chomhréireach agus ar deireadh d’íocfaidís nach mór an táille iomlán bhliantúil mhaoirseachta in 2021, cé go mb’fhéidir nárbh iad ba chúis le hiomlán chostais mhaoirseachta ÚEUM in 2021. Go praiticiúil, agus dréachtbhuiséad ÚEUM le haghaidh 2021 á chur san áireamh, mar a léirítear táille mheasta ó stórtha trádála ar mó ná EUR 3.6 milliún í, d’uireasa aon leasú ar Rialacháin Tharmligthe 1003/2013 agus 2019/360, d’íocfadh an dá stór trádála nua táille bhliantúil iomlán de EUR 60 000 an ceann (lena n‑áirítear a ndíorthaigh agus a ngníomhaíocht maidir le hidirbhearta um maoiniú urrús); bheadh ar an dá stór trádála de chuid an Aontais a bhí gníomhach roimh an 1 Eanáir 2021 an t‑iarmhéid ar fiú EUR 3.5 milliún é a íoc. Mura ndéanfaí sin, ba ghá laghdú suntasach a dhéanamh ar bhuiséad measta ÚEUM maidir le maoirseacht a dhéanamh ar stórtha trádála, rud ar dócha go mbeadh tionchar níos fadtéarmaí aige tar éis 2021 agus bheadh an baol ann mar gheall air go ndéanfaí maoirseacht neamhleor de bharr easpa acmhainní maoirseachta.
Dá bhrí sin, baineann easnaimh shuntasacha leis an rogha sin maidir leis an gcás a bhfuil tuairisc air i dtéarmaí comhréireachta agus maoirseacht iomchuí a dhéanamh ar stórtha trádála.
Ar deireadh, ní bhaineann na míbhuntáistí céanna leis an dara rogha agus a bhaineann le roghanna 1 agus 3. Roghnaíodh í ar na cúiseanna seo a leanas:
(i) Braitheann sí ar shonraí na bliana reatha ina léirítear an fíorchion margaidh tar éis Brexit;
(ii) Léiríonn sí dáileadh nua na gcliant tar éis Brexit i gcás ina bhféadfadh sé nach mbeadh comharba san Aontas ag stórtha trádála agus go mbeidh ar a gcliaint dul ar imirce chuig stórtha trádála eile de chuid an Aontais;
(iii) Úsáideadh an cur chuige maidir le brath ar na sonraí ó mhí Eanáir go mí an Mheithimh i gcórais na stórtha trádála faoi EMIR agus an Rialachán maidir le hIdirbhearta Maoinithe Urrús nuair a tháinig siad i bhfeidhm den chéad uair agus, dá bhrí sin, ní raibh aon sonraí ó bhliain (n-1) a bhféadfaí meastacháin a bhunú orthu (2014 le haghaidh EMIR, 2020 le haghaidh an Rialacháin maidir le hIdirbhearta Maoinithe Urrús). Mar sin, tá fasach ag gabháil leis an réasúnaíocht leis an gcur chuige seo.
5.IMPLEACHTAÍ BUISÉADACHA AN GHNÍMH THARMLIGTHE
De réir Airteagal 62 de Rialachán ÚEUM, Airteagal 72 de EMIR agus Airteagal 11 den Rialachán maidir le hIdirbhearta Maoinithe Urrús, is cuid de bhuiséad ÚEUM iad na táillí a íocann stórtha trádála an Aontais le ÚEUM agus ba cheart iad a shocrú ar leibhéal lena ligfí do ÚEUM an caiteachas riachtanach dá chuid a bhaineann le clárú stórtha trádála agus maoirseacht a dhéanamh orthu a chumhdach go hiomlán.
Níor cheart, áfach, go mbeadh aon impleacht bhuiséadach ag na leasuithe atá beartaithe ar Rialacháin Tharmligthe 1003/2013 agus 2019/360 le haghaidh ÚEUM ná níor cheart go mbeadh aon éifeacht mhíchuí acu ar stórtha trádála. Mar a mhínítear thuas, ceadóidh na leasuithe sin táillí a dháileadh ar stórtha trádála an Aontais ar bhealach atá comhréireach lena láimhdeachas.
Ní bheidh tionchar ag na leasuithe atá beartaithe ar an bhfóirdheontas ón Aontas, arna chur isteach i mBuiséad Ginearálta an Aontais Eorpaigh (Roinn an Choimisiúin), a fhaigheann ÚEUM mar chuid dá ioncam i gcomhréir le hAirteagal 62(1)(b) de Rialachán (AE) Uimh. 1095/2010.
RIALACHÁN TARMLIGTHE (AE) …/... ÓN gCOIMISIÚN
an 24.3.2021
lena leasaítear Rialacháin Tharmligthe (AE) Uimh. 1003/2013 agus (AE) 2019/360 a mhéid a bhaineann leis na táillí maoirseachta bliantúla a ghearrann an tÚdarás Eorpach um Urrúis agus Margaí ar stórtha trádála le haghaidh 2021
(Téacs atá ábhartha maidir le LEE)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) Uimh. 648/2012 ó Pharlaimint na hEorpa agus ón gComhairle an 4 Iúil 2012 maidir le díorthaigh thar an gcuntar, contrapháirtithe lárnacha agus stórtha trádála, agus go háirithe Airteagal 72(3) de,
Ag féachaint do Rialachán (AE) 2015/2365 ó Pharlaimint na hEorpa agus ón gComhairle an 25 Samhain 2015 maidir le trédhearcacht idirbheart maoinithe urrús agus athúsáide agus lena leasaítear Rialachán (AE) Uimh. 648/2012, agus go háirithe Airteagal 11(2) de,
De bharr an mhéid seo a leanas:
(1)Déantar na táillí a íocann stórtha trádála le ÚEUM a ríomh trí úsáid a bhaint as modheolaíocht a bhunaítear i Rialacháin Tharmligthe (AE) Uimh. 1003/2013 agus (AE) 2019/360. Is í an tréimhse thagartha don láimhdeachas is infheidhme sna Rialacháin Tharmligthe sin an bhliain roimh an mbliain ina n‑íoctar an t‑ioncam.
(2)An 1 Feabhra 2020, tharraing an Ríocht Aontaithe siar as an Aontas Eorpach agus as an gComhphobal Eorpach do Fhuinneamh Adamhach. I gcomhréir leis an idirthréimhse a leagtar amach in Airteagal 126 den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach, scoir dlí an Aontais d’fheidhm a bheith aige maidir leis an Ríocht Aontaithe agus sa Ríocht Aontaithe ón 31 Nollaig 2020.
(3)D’aistrigh dhá stór trádála atá bunaithe sa Ríocht Aontaithe cuid dá seirbhísí agus dá ngníomhaíochtaí chuig an Aontas chun go mbeidís in ann leanúint dá seirbhísí agus dá ngníomhaíochtaí a sholáthar do chontrapháirtithe atá bunaithe san Aontas. Dá bharr sin, tháinig athrú suntasach ar líon na stórtha trádála atá gníomhach san Aontas.
(4)Go héifeachtach, chuir stórtha trádála nua an Aontais tús lena ngníomhaíocht san Aontas i mí Eanáir 2021, óir bhí an leibhéal gníomhaíochta a bhí acu in 2020 chomh híseal gur bheag nárbh ann dó. Dá bharr sin, bheadh a dtáille mhaoirseachta bhliantúil le haghaidh 2021 diomaibhseach cé gur dócha go mbeidh a gcuid gníomhaíochtaí suntasach. Chun a áirithiú go n‑íocfaidh siad táille i gcomhréir lena láimhdeachas iarbhír san Aontas, ba cheart a dtáille mhaoirseachta bhliantúil le haghaidh 2021 a ríomh ar bhonn a láimhdeachas is infheidhme le linn an chéad leath de 2021.
(5)Chun é a chur ar a chumas do ÚEUM táillí a ghearradh ar stórtha trádála in 2021 ar bhealach comhréireach agus an costas ar fad a bhaineann lena maoirseacht á chumhdach, is gá an tréimhse thagartha a athrú chun táillí bliantúla a ríomh arna n‑íoc ag stórtha trádála le ÚEUM in 2021. Toisc go bhfuil na stórtha trádála ábhartha cláraithe le ÚEUM faoi Rialacháin (AE) Uimh. 648/2012 agus (AE) 2015/2365 araon, ba cheart na leasuithe ar an tréimhse thagartha sin a dhéanamh ag an am céanna.
(6)Dá bhrí sin, ba cheart Rialacháin Tharmligthe (AE) Uimh. 1003/2013 agus (AE) 2019/360 a leasú dá réir.
(7)Chun gníomhaíocht mhaoirseachta agus forfheidhmithe éifeachtach éifeachtúil a éascú láithreach, ba cheart don Rialachán seo teacht i bhfeidhm mar ábhar práinne,
TAR ÉIS AN RIALACHÁN SEO A GHLACADH:
Airteagal 1
Leasú ar Rialachán Tarmligthe (AE) Uimh. 1003/2013
Cuirtear Airteagal 15a isteach i Rialachán Tarmligthe (AE) Uimh. 1003/2013 mar a leanas:
‘Airteagal 15a
Táille mhaoirseachta bhliantúil le haghaidh 2021 maidir le stórtha trádála atá cláraithe amhail ón 31 Nollaig 2020
1.Gearrfar táille mhaoirseachta bhliantúil le haghaidh 2021 ar stórtha trádála a bhí cláraithe cheana féin le ÚEUM amhail ón 31 Nollaig 2020, táille a ríomhfar i gcomhréir le hAirteagal 7. Chun críocha Airteagal 7(2)(c), áfach, déanfar láimhdeachas na stórtha trádála is infheidhme a ríomh i gcomhréir le mír 2.
2.Chun críocha mhír 1, is éard a bheidh i láimhdeachas an stóir thrádála is infheidhme suim aon trian amháin de gach ceann díobh seo a leanas:
(a)an t‑ioncam a ghintear ó na feidhmeanna lárnacha arb iad taifid dhíorthaigh an stóir thrádála a bhailiú agus a chothabháil go lárnach le linn na tréimhse ón 1 Eanáir 2021 go dtí an 30 Meitheamh 2021, arna roinnt ar an ioncam iomlán a ghintear ó na feidhmeanna lárnacha arb iad taifid dhíorthaigh na stórtha trádála cláraithe uile a bhailiú agus a chothabháil go lárnach le linn na tréimhse ón 1 Eanáir 2021 go dtí an 30 Meitheamh 2021;
(b)líon na dtrádálacha a thuairiscítear don stór trádála le linn na tréimhse ón 1 Eanáir 2021 go dtí an 30 Meitheamh 2021, arna roinnt ar líon iomlán na dtrádálacha a thuairiscítear do na stórtha trádála cláraithe uile le linn na tréimhse ón 1 Eanáir 2021 go dtí an 30 Meitheamh 2021;
(c)líon na dtrádálacha gan íoc arna dtaifeadadh an 30 Meitheamh 2021, arna roinnt ar líon iomlán na dtrádálacha gan íoc arna dtaifeadadh an 30 Meitheamh 2021 sna stórtha trádála cláraithe uile.
3.Bainfear méid ar bith a d’íoc an stór trádála cheana de bhun Airteagal 11(1) roimh [PO please insert the date of the entry into force of this Regulation] de mhéid na táille maoirseachta bliantúla dá dtagraítear i mír 1.
I gcás ina bhfuil an méid a d’íoc stór trádála cheana de bhun Airteagal 11(1) roimh [PO please insert the date of the entry into force of this Regulation] níos airde ná an táille mhaoirseachta bhliantúil arna ríomh i gcomhréir le mír 1, aisíocfaidh ÚEUM an méid sin sa bhreis leis an stór trádála.
4.De mhaolú ar Airteagal 11(1), beidh an táille mhaoirseachta bhliantúil le haghaidh 2021 a bhaineann leis na stórtha trádála dá dtagraítear i mír 1 le híoc an 31 Deireadh Fómhair 2021.
5.Seolfaidh ÚEUM sonrasc na táille maoirseachta bliantúla le haghaidh 2021 chuig na stórtha trádála dá dtagraítear i mír 1 30 lá ar a laghad roimh an dáta íocaíochta.
6.Nuair a bheidh fáil ar na cuntais iniúchta le haghaidh 2021, tuairisceoidh na stórtha trádála dá dtagraítear i mír 1 na táscairí dá dtagraítear in Airteagal 3(1) le haghaidh 2021 do ÚEUM.
Aon difríocht idir an táille mhaoirseachta bhliantúil a íocadh go hiarbhír le haghaidh 2021 agus an táille mhaoirseachta bhliantúil a bheadh le híoc le haghaidh 2021 dá mbeadh ríomh an láimhdeachais is infheidhme bunaithe ar na táscairí a tuairiscíodh de bhun na chéad fhomhíre, gearrfar ar stórtha trádála í.
Seolfaidh ÚEUM sonrasc aon íocaíochta breise de bhun an dara fomhír 30 lá ar a laghad roimh an dáta íocaíochta sonrach.’
Airteagal 2
Leasú ar Rialachán Tarmligthe (AE) 2019/360
Cuirtear Airteagal 15a isteach i Rialachán Tarmligthe (AE) 2019/360 mar a leanas:
‘Airteagal 15a
Táille mhaoirseachta bhliantúil le haghaidh 2021 maidir le stórtha trádála atá cláraithe amhail ón 31 Nollaig 2020
1.Gearrfar táille mhaoirseachta bhliantúil le haghaidh 2021 ar stórtha trádála a bhí cláraithe cheana féin le ÚEUM amhail ón 31 Nollaig 2020, táille a ríomhfar i gcomhréir le hAirteagal 6. Chun críocha Airteagal 6(2)(b), áfach, déanfar láimhdeachas na stórtha trádála is infheidhme a ríomh i gcomhréir le mír 2.
2.Chun críocha mhír 1, is éard a bheidh i láimhdeachas an stóir thrádála is infheidhme suim na nithe seo a leanas:
–an t‑ioncam a ghintear ó na feidhmeanna lárnacha arb iad taifid idirbheart um maoiniú urrús a bhailiú agus a chothabháil go lárnach le linn na tréimhse ón 1 Eanáir 2021 go dtí an 30 Meitheamh 2021 agus
–an t‑ioncam is infheidhme ó sheirbhísí coimhdeacha an stóir thrádála i gcomhréir le míreanna 1 agus 2 d’Airteagal 2 le linn na tréimhse ón 1 Eanáir 2021 go dtí an 30 Meitheamh 2021
arna roinnt ar shuim na nithe seo a leanas:
–an t‑ioncam a ghintear ó na feidhmeanna lárnacha arb iad taifid idirbheart um maoiniú urrús a bhailiú agus a chothabháil go lárnach le linn na tréimhse ón 1 Eanáir 2021 go dtí an 30 Meitheamh 2021 ó na stórtha trádála cláraithe uile agus
–an t‑ioncam is infheidhme ó sheirbhísí coimhdeacha i gcomhréir le míreanna 1 agus 2 d’Airteagal 2 le linn na tréimhse ón 1 Eanáir 2021 go dtí an 30 Meitheamh 2021 ó na stórtha trádála cláraithe uile.
3.Bainfear méid ar bith a d’íoc an stór trádála cheana de bhun Airteagal 10(1) roimh [PO please insert the date of the entry into force of this Regulation] de mhéid na táille maoirseachta bliantúla dá dtagraítear i mír 1.
I gcás ina bhfuil an méid a d’íoc stór trádála cheana de bhun Airteagal 10(1) roimh [PO please insert the date of the entry into force of this Regulation] níos airde ná an táille mhaoirseachta bhliantúil arna ríomh i gcomhréir le mír 1, aisíocfaidh ÚEUM an méid sin sa bhreis leis an stór trádála.
4.De mhaolú ar Airteagal 10(1), beidh an táille mhaoirseachta bhliantúil le haghaidh 2021 a bhaineann leis na stórtha trádála dá dtagraítear i mír 1 le híoc an 31 Deireadh Fómhair 2021.
5.Seolfaidh ÚEUM sonrasc na táille maoirseachta bliantúla le haghaidh 2021 chuig na stórtha trádála dá dtagraítear i mír 1 30 lá ar a laghad roimh an dáta íocaíochta.
6.Nuair a bheidh fáil ar na cuntais iniúchta le haghaidh 2021, tuairisceoidh na stórtha trádála dá dtagraítear i mír 1 na táscairí dá dtagraítear in Airteagal 2(3) le haghaidh 2021 do ÚEUM.
Aon difríocht idir an táille mhaoirseachta bhliantúil a íocadh go hiarbhír le haghaidh 2021 agus an táille mhaoirseachta bhliantúil a bheadh le híoc le haghaidh 2021 dá mbeadh ríomh an láimhdeachais is infheidhme bunaithe ar na táscairí a tuairiscíodh de bhun na chéad fhomhíre, gearrfar ar stórtha trádála í.
Seolfaidh ÚEUM sonrasc aon íocaíochta breise de bhun an dara fomhír 30 lá ar a laghad roimh an dáta íocaíochta sonrach.’
Airteagal 3
Teacht i bhfeidhm
Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, 24.3.2021
Thar ceann an Choimisiúin
An tUachtarán
Ursula VON DER LEYEN
