MEABHRÁN MÍNIÚCHÁIN

1.COMHTHÉACS AN GHNÍMH THARMLIGTHE

Le hAirteagal 1 de Rialachán (AE) 2019/1021 bunaítear mar chuspóir an Rialacháin sin sláinte an duine agus an comhshaol a chosaint ar thruailleáin orgánacha mharthanacha (‘POPanna’) trí shubstaintí atá faoi réir Choinbhinsiún Stócólm maidir le POPanna a thoirmeasc, a chéimniú amach a luaithe is féidir, nó srian a chur lena monarú, lena gcur ar an margadh agus lena n-úsáid.

Le Rialacháin Tarmligthe (AE) 2020/784 ón gCoimisiún, liostaítear aigéad sárfhluarochtánóch (PFOA), a shalainn agus a chomhdhúile PFOA-ghaolmhara faoi Iarscríbhinn I a ghabhann le Rialachán (AE) 2019/1021. Tráth a glacadh an gníomh sin, chuir an tionscal feistí leighis an Coimisiún ar an eolas faoi go bhfuil, i roinnt de na hearraí a mhonaraíonn siad agus a bhfuil PFOA agus a shalainn ina gcomhábhar iontu, go bhfuil an PFOA agus a shalainn i roinn de na hearraí sin os cionn na teorann 25 ppb (0,025 mg/kg, 0,0000025 % de réir meáchain) a shocraítear sa ghníomh tarmligthe ón gCoimisiúin. Ní de bhrí go n-úsáidtear PFOA d’aon turas agus na hearraí sin á dtáirgeadh atá sin amhlaidh, ach is dealraitheach go bhfuil sé amhlaidh de bhrí go mbíonn eisíontais de PFOA sna roghanna malartacha PFAS gearrshlabhra a úsáidtear chun na feistí leighis a mhonarú. Is feistí leighis do-ionchlannaithe neamhionracha iad agus, ós rud é nach bhfuil siad faoi réir díolúine, bheadh toirmeasc ar a dtáirgeadh tar éis an 3 Nollaig 2020. Chun go bhféadfar leanúint de na feistí leighis sin a tháirgeadh, molann an Coimisiún leasú a dhéanamh ar an iontráil maidir le PFOA, a shalainn agus a chomhdhúile PFOA-ghaolmhara in Iarscríbhinn I a ghabhann le Rialachán (AE) 2019/1021 trí leibhéal rian-éilleáin neamhbheartaithe (UTC) 2 csm (2 mg/kg, 0,0002 % de réir meáchain) a thabhairt isteach le haghaidh feistí leighis seachas feistí in-ionchlannaithe agus feistí ionracha, faoi réir athbhreithniú tar éis dhá bhliain.

Tar éis an gníomh tarmligthe a ghlacadh, chuir roinnt páirtithe leasmhara an Coimisiún ar an eolas freisin faoi go raibh na coinníollacha a bhaineann le UTC i gcás micreaphúdair pholaiteitreafluaireitiléine (PTFE) ró-shonrach nuair a luaigh siad gur gá an ionradaíocht ianúcháin sa phróiseas táirgthe a dhéanamh ag suas le 400 cileagrae. Ina theannta sin, meastar go bhfuil sé dodhéanta anois ag na húdaráis forfheidhmithe a chinneadh ar táirgeadh micreaphúdair PTFE trí bhíthin ionradaíocht suas le 400 cileagrae. Ar an gcúis sin, is iomchuí an tagairt do 400 cileagrae a scriosadh, fad is atáthar ag fanacht le toradh an mheasúnaithe atá ar siúl ag an nGníomhaireacht Eorpach Ceimiceán (ECHA) ar an UTC sin.

I gcomhréir leis an dara fomhír d'Airteagal 15(1) de Rialachán (AE) 2019/1021, ba cheart gníomh tarmligthe lena leasaítear Iarscríbhinn I a ghabhann le Rialachán (AE) 2019/1021 a ghlacadh chun na hathruithe sin a thabhairt isteach san iontráil maidir le PFOA.

2.COMHAIRLIÚCHÁIN ROIMH GHLACADH AN GHNÍMH

Rinneadh comhairliúcháin le grúpa saineolaithe (an cruinniú de chuid na n-údarás inniúil maidir le truailleáin orgánacha mharthanacha - an cruinniú ‘POP CA’) maidir leis an dréachtleasú an 9 Meitheamh 2020 agus cuireadh na barúlacha san áireamh. Tá an grúpa comhdhéanta de na páirtithe leasmhara ábhartha uile - ionadaithe ó na Ballstáit, ón nGníomhaireacht Eorpach Ceimiceán, ó thionscal na gceimiceán agus ón tsochaí shibhialta.

Rinneadh comhairliúchán poiblí maidir leis an dréachtghníomh ón 1 Meán Fómhair 2020 go dtí an 29 Meán Fómhair 2020. Bhí na tuairimí uile a fuarthas ag tacú leis an leasú. I roinnt barúlacha, iarradh leasuithe breise a chur isteach san iontráil maidir le PFOA, a shalainn agus a chomhdhúile PFOA-ghaolmhara in Iarscríbhinn I a ghabhann le Rialachán (AE) 2019/1021 nó i roinnt barúlacha rinneadh tagairt do na próisis reachtacha atá ar siúl maidir le substaint eile. Ní mheastar barúlacha den chineál sin a bheith ábhartha.

3.EILIMINTÍ DLÍ AN GHNÍMH THARMLIGTHE

Leis an ngníomh tarmligthe, modhnaítear an iontráil atá ann cheana maidir le PFOA, a shalainn agus a chomhdhúile PFOA-ghaolmhara in Iarscríbhinn I a ghabhann le Rialachán (AE) 2019/1021 chun í a oiriúnú don dul chun cinn eolaíoch agus teicniúil. Is é Airteagal 15(1) de Rialachán (AE) 2019/1021 atá ina bhunús dlí leis an ngníomh tarmligthe atá beartaithe.

RIALACHÁN TARMLIGTHE (AE) …/... ÓN gCOIMISIÚN

an 27.11.2020

lena leasaítear Iarscríbhinn I a ghabhann le Rialachán (AE) 2019/1021 ó Pharlaimint na hEorpa agus ón gComhairle a mhéid a bhaineann le haigéad sárfhluarochtánóch (PFOA), a shalainn agus a chomhdhúile PFOA-ghaolmhara

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2019/1021 ó Pharlaimint na hEorpa agus ón gComhairle an 20 Meitheamh 2019 maidir le truailleáin orgánacha mharthanacha 1 , agus go háirithe Airteagal 15(1) de,

De bharr an mhéid seo a leanas:

(1)Le Rialachán (AE) 2019/1021, cuirtear chun feidhme gealltanais an Aontais faoi Choinbhinsiún Stócólm maidir le Truailleáin Orgánacha Mharthanacha 2 (‘an Coinbhinsiún’) agus faoin bPrótacal a ghabhann le Coinbhinsiún 1979 ar Thruailliú Aeir Trasteorann Fadraoin maidir le Truailleáin Orgánacha Mharthanacha 3 .

(2)In Iarscríbhinn A a ghabhann leis an gCoinbhinsiún (‘Díchur’) tá liosta ceimiceán a gceanglaítear ar gach Páirtí sa Choinbhinsiún na bearta dlí agus riaracháin is gá a thoirmeasc agus/nó a dhéanamh chun deireadh a chur lena dtáirgeadh, lena n-úsáid, lena n-allmhairiú agus lena n-onnmhairiú, agus na díolúintí sonracha is infheidhme a leagtar síos san Iarscríbhinn sin á gcur san áireamh.

(3)Le Rialachán Tarmligthe (AE) 2020/784 4 ón gCoimisiún, leasaíodh Iarscríbhinn I a ghabhann le Rialachán (AE) 2019/1021 chun aigéad sárfhluarochtánóch (PFOA), a shalainn agus a chomhdhúile PFOA-ghaolmhara a áireamh.

(4)Le hAirteagal 15(1) de Rialachán (AE) 2019/1021 tugtar de chumhacht don Choimisiún gníomhartha tarmligthe a ghlacadh chun iontrálacha atá in Iarscríbhinn I cheana a mhodhnú chun iad a oiriúnú don dul chun cinn eolaíoch agus teicniúil.

(5)Tar éis Rialachán Tarmligthe (AE) 2020/784 a ghlacadh, cuireadh an Coimisiún ar an eolas faoi go raibh eisíontais neamhbheartaithe de PFOAnna agus dá shalainn, os cionn na teorann 0,025 mg/kg (0,0000025 % de réir meáchain) a leagadh síos sa Rialachán sin, i bhfeistí leighis áirithe seachas feistí in-ionchlannaithe agus feistí ionracha.

(6)Chun nach mbeadh toirmeasc ar mhonarú feistí leighis den sórt sin tar éis an 3 Nollaig 2020 agus chun go leor ama a thabhairt do mhonaróirí chun leibhéal na n-eisíontas a laghdú, ba cheart teorainn 2 mg/kg (0,0002 % de réir meáchain) a shocrú maidir le rian-éilleáin neamhbheartaithe (UTC) i gcás PFOA, a shalann agus a chomhdhúile PFOA-ghaolmhara, faoi réir athbhreithniú.

(7)Le Rialachán Tarmligthe (AE) 2020/784 tugadh isteach teorainn UTC le haghaidh PFOA agus a shalann i micreaphúdair pholaiteitreafluaireitiléine (PTFE) arna dtáirgeadh trí bhíthin ionradaíocht ianúcháin suas le 400 cileagrae.

(8)Tar éis Rialachán Tarmligthe (AE) 2020/784 a ghlacadh, cuireadh an Coimisiún ar an eolas faoi go raibh an ceanglas a leagadh síos maidir le hionradaíocht ianúcháin suas le 400 cileagrae a dhéanamh sa phróiseas táirgthe, go raibh sé ró-shonrach chun a chomhlíonta ag na hoibreoirí agus ró-shonrach a mhéid a bhaineann le seiceáil ag na húdaráis ar an gcomhlíonadh. Dá bhrí sin, ba cheart an tagairt do 400 cileagrae a scriosadh.

(9)Le Rialachán Tarmligthe (AE) 2020/784 tugadh isteach teorainn UTC le haghaidh comhdhúile PFOA-ghaolmhara i gcás ina mbíonn siad ina gcomhábhar i substaint a bhfuiltear lena húsáid mar idirmheánach aonraithe iompartha chun fluaraiceimiceáin a tháirgeadh arb é 6 adamh nó níos lú ná sin fad an tslabhra carbóin iontu.

(10)Is éard a bhí i gceist le teorainn UTC ná idirmheánaigh a chumhdach a úsáidtear chun roghanna malartacha PFOA a tháirgeadh ina bhfuil 6 cinn nó níos lú d'adaimh charbóin lánfhluairínithe. Ar mhaithe le soiléireacht, ba cheart an focal “carbóin” a cháiliú le “sárfhluara-”, is é sin “slabhra sárfhluaracarbóin” a chur in ionad “slabhra carbóin”.

(11)Ba cheart, dá bhrí sin, Rialachán Tarmligthe (AE) Uimh. 2019/1021 a leasú dá réir sin,

TAR ÉIS AN RIALACHÁN SEO A GHLACADH:

Airteagal 1

Leasaítear Iarscríbhinn I a ghabhann le Rialachán Tarmligthe (AE) 2019/1021 i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 27.11.2020

(1)    IO L 169, 25.6.2019, lch. 45.

(2)    IO L 209, 31.7.2006, lch. 3.

(3)    IO L 81, 19.3.2004, lch. 37.

(4)    Rialachán Tarmligthe (AE) 2020/784 ón gCoimisiún an 8 Aibreán 2020 lena leasaítear Iarscríbhinn I a ghabhann le Rialachán (AE) 2019/1021 ó Pharlaimint na hEorpa agus ón gComhairle a mhéid a bhaineann le haigéad sárfhluarochtánóch (PFOA), a shalainn agus a chomhdhúile PFOA-ghaolmhara a liostú (IO L 188 I, 15.6.2020, lch. 1).

IARSCRÍBHINN

I gCuid A d'Iarscríbhinn I a ghabhann le Rialachán (AE) 2019/1021, sa tábla, leasaítear mar a leanas an ceathrú colún (‘Díolúine shonrach maidir le húsáid idirmheánach nó sonraíocht eile’) den iontráil maidir le haigéad sárfhluarochtánóch (PFOA), a shalainn agus a chomhdhúile PFOA-ghaolmhara mar a leanas:

(1)    cuirtear an méid seo a leanas in ionad na chéad abairte de phointe 3:

‘3. Chun críocha na hiontrála seo, beidh feidhm ag pointe (b) d'Airteagal 4(1) maidir le tiúcháin de chomhdhúile PFOA-ghaolmhara atá cothrom le 20 mg/kg (0,002 % de réir meáchain) nó faoina bhun sin i gcás ina bhfuil siad ina gcomhábhar i substaint a bhfuiltear lena húsáid mar idirmheánach aonraithe iompartha de réir bhrí phointe 15(c) d'Airteagal 3 de Rialachán (CE) Uimh. 1907/2006 agus ina gcomhlíontar na coinníollacha dianrialaithe a leagtar amach in Airteagal 18(4)(a) go hAirteagal 18(4)(f) den Rialachán sin i dtaca le táirgeadh fluaraiceimicéan ina bhfuil slabhra sárfhluaracarbóin atá 6 adamh ar fad nó níos giorra ná sin.’;

(2)    cuirtear an méid seo a leanas in ionad na chéad abairte de phointe 4:

‘4. Chun críocha na hiontrála seo, beidh feidhm ag pointe (b) d'Airteagal 4(1) maidir le tiúcháin de PFOA agus a shalainn atá cothrom le 1 mg/kg (0,0001 % de réir meáchain) nó faoina bhun sin i gcás ina bhfuil siad ina gcomhábhar i micreaphúdair pholaiteitreafluaireitiléine (PTFE) arna dtáirgeadh trí bhíthin ionradaíocht ianúcháin nó trí bhíthin díghrádú teirmeach agus, freisin, i gcás ina bhfuil siad ina gcomhábhar i meascáin agus earraí, ina bhfuil micreaphúdair PTFE, a bhfuiltear lena n-úsáid go tionsclaíoch nó go gairmiúil.’;

(3)    cuirtear an pointe (10) seo a leanas isteach:

‘10. Chun críocha na hiontrála seo, beidh feidhm ag pointe (b) d'Airteagal 4(1) maidir le tiúcháin PFOA agus a shalainn agus/nó a chomhdhúile PFOA-ghaolmhara atá cothrom le 2 mg/kg (0,0002 % de réir meáchain) nó faoina bhun sin i gcás ina bhfuil siad ina gcomhábhar i bhfeistí leighis cé is moite d'fheistí ionracha agus d'fheistí in-ionchlannaithe. Déanfaidh an Coimisiún athbhreithniú agus measúnú ar an díolúine sin tráth nach déanaí ná [IO: cuir isteach an dáta: dhá bhliain tar éis theacht i bhfeidhm an Rialacháin leasaithigh seo]’.