(1)

Sheol an Coimisiún glao ar léirithe spéise chun cúnamh airgeadais a fháil faoin Ionstraim um Ghníomhaíocht Slándála don Eoraip (SAFE) trí Atreisiú an Tionscail Cosanta Eorpaigh (‘ionstraim SAFE’), inar iarradh ar na Ballstáit foráil a dhéanamh maidir le huasmhéid táscach iasachta agus íosmhéid táscach iasachta. Faoin 29 Lúnasa 2025, chuir 19 mBallstát in iúl gur spéis leo cúnamh airgeadais a fháil faoi Rialachán (AE) 2025/1106.

(2)

An 9 Meán Fómhair 2025, thug an Coimisiún fógra do na Ballstáit iarrthacha faoi leithdháileadh sealadach na méideanna iasachta in aghaidh an Bhallstáit.

(3)

An 28 Samhain 2025, chuir an Eastóin iarraidh isteach, i gcomhréir le hAirteagal 7(1) de Rialachán (AE) 2025/1106, ar chúnamh airgeadais (‘an iarraidh’) a raibh plean infheistíochta um an tionscal cosanta Eorpach (‘an plean’) ag gabháil léi.

(4)

Rinne an Coimisiún measúnú ar an iarraidh de réir na gcoinníollacha is infheidhme a leagtar síos i Rialachán (AE) 2025/1106.

(5)

I gcomhréir le hAirteagal 7 de Rialachán (AE) 2025/1106, bhí réasúnú agus bunús cuí leis an bplean agus leagadh amach ann tuairisc ar na táirgí cosanta agus ar na táirgí eile chun críoch cosanta agus, i gcás inarb ábhartha, tuairisc ar an rannpháirtíocht atá beartaithe don Úcráin sna gníomhaíochtaí, caiteachas agus bearta atá beartaithe, nó ar na gníomhaíochtaí atá beartaithe chun tairbhe na hÚcráine.

(6)

Chinn an Coimisiún go gcomhlíonann an iarraidh na coinníollacha a leagtar síos in Airteagal 4 de Rialachán (AE) 2025/1106 maidir le hionstraim SAFE a úsáid. Go sonrach, áirithítear léi go ndéanfar gníomhaíochtaí, caiteachas agus bearta a bhaineann le táirgí cosanta nó táirgí eile chun críoch cosanta trí sholáthairtí comhoibríocha nó soláthairtí aonair. Tá ceann amháin nó níos mó de na cuspóirí seo a leanas le bheith leis na gníomhaíochtaí, an caiteachas agus na bearta sin freisin: dlús a chur le coigeartú an tionscail cosanta i leith athruithe struchtúracha, feabhas a chur ar infhaighteacht thráthúil táirgí cosanta nó idir-inoibritheacht agus idirmhalartacht a áirithiú ar fud an Aontais.

(7)

Chinn an Coimisiún freisin go bhfuil tuairisc san iarraidh ar na bearta atá beartaithe arb é is aidhm dóibh comhlíonadh Airteagal 16 de Rialachán (AE) 2025/1106 agus na rialacha soláthair a leagtar amach sa Rialachán sin a áirithiú, lena n-áirítear tuairisc ar an gcaoi a bhfuil an comhlíonadh sin le háirithiú.

(8)

Mar thoradh air sin, i gcomhréir le hAirteagal 8(2) de Rialachán (AE) 2025/1106, chinn an Coimisiún go bhfuil na coinníollacha a leagtar síos sa Rialachán sin á gcomhlíonadh ag an iarraidh, go háirithe na coinníollacha sin dá bhforáiltear in Airteagal 4, Airteagal 7(2) agus Airteagal 16.

(9)

I gcomhréir le hAirteagal 8(5) de Rialachán (AE) 2025/1106, rinne an Coimisiún riachtanais mhaoiniúcháin reatha agus ionchasacha na hEastóine a mheas, mar aon leis na hiarrataí ar chúnamh airgeadais de bhun an Rialacháin sin atá curtha isteach cheana nó atá beartaithe ag Ballstáit eile a chur isteach, agus prionsabail na córa comhionainne, na dlúthpháirtíochta, na comhréireachta agus na trédhearcachta á gcur i bhfeidhm san am céanna.

(10)

Ba cheart an Cinneadh seo a bheith gan dochar do thoradh aon nós imeachta faoi Rialachán (AE) 2024/1263 ó Pharlaimint na hEorpa agus ón gComhairle (2) agus faoi Rialachán (CE) Uimh. 1467/97 ón gComhairle (3).

(11)

Ba cheart an Cinneadh seo a bheith gan dochar do na rialacha ábhartha arna nglacadh de bhun Airteagal 322 den Chonradh ar Fheidhmiú an Aontais Eorpaigh, go háirithe Rialacháin (AE, Euratom) 2024/2509 (4) agus (AE, Euratom) 2020/2092 (5) ó Pharlaimint na hEorpa agus ón gComhairle.

(12)

I gcomhréir le hAirteagal 10(2) de Rialachán (AE) 2025/1106, ba cheart na bearta iomchuí uile is gá chun leasanna airgeadais an Aontais a chosaint a leagan amach sa chomhaontú iasachta atá le tabhairt i gcrích leis an Eastóin,