COMHAIRLE DON LÉITHEOIR

Is éard atá san fhoilseachán seo na leaganacha comhdhlúite den Chonradh ar an Aontas Eorpach agus den Chonradh ar Fheidhmiú an Aontais Eorpaigh, mar atá siad tar éis na leasuithe a tugadh isteach le Conradh Liospóin arna shíniú an 13 Nollaig 2007 i Liospóin. Tá na dearbhuithe ann freisin a cuireadh i gceangal le hIonstraim Chríochnaitheach na Comhdhála Idir-Rialtasaí a ghlac Conradh Liospóin.

Tá Conradh Liospóin fós á dhaingniú ag na Ballstáit i gcomhréir lena rialacha bunreachtúla faoi seach. Tiocfaidh an Conradh i bhfeidhm, mar a fhoráiltear le hAirteagal 6 de, an 1 Eanáir 2009, má bhíonn na hionstraimí daingniúcháin uile taiscthe roimh an lá sin, agus mura mbeidh, tiocfaidh sé i bhfeidhm an chéad lá den mhí tar éis thaisceadh na hionstraime daingniúcháin deireanaí.

Is foilseachán sealadach é an foilseachán seo. As seo go dtí go dtiocfaidh Conradh Liospóin i bhfeidhm, d'fhéadfadh sé go ndéanfaí ceartúcháin ar leagan amháin nó ar leagan eile den téacs, d'fhonn botúin a d'fhéadfadh a bheith ann a cheartú a dtiocfaí orthu i gConradh Liospóin nó sna Conarthaí atá ann cheana.

Is áis dhoiciméadach é an téacs seo nach gcuireann aon dliteanas ar institiúidí an Aontais Eorpaigh.