Comhar eolaíoch agus teicneolaíoch idir an AE agus Maracó

 

ACHOIMRE AR:

Comhaontú maidir le comhar eolaíoch agus teicniúil idir an Comhphobal Eorpach agus Ríocht Mharacó

Cinneadh 2004/126/CE — an comhaontú um chomhar eolaíoch agus teicneolaíoch idir an Comhphobal Eorpach agus Ríocht Mharacó a thabhairt chun críche

CAD IS AIDHM LEIS AN GCOMHAONTÚ AGUS LEIS AN GCINNEADH?

Leis an gcomhaontú bunaítear creat foirmiúil le haghaidh comhair, ina ndírítear ar ghníomhaíochtaí sna réimsí eolaíochta agus teicneolaíochta a spreagadh, a fhorbairt agus a éascú.

Lena cinneadh, d’fhaomh an Chomhairle tabhairt i gcrích an chomhaontaithe thar ceann an Chomhphobail Eorpaigh (AE anois).

PRÍOMHPHOINTÍ

Tá na gníomhaíochtaí a dhéantar faoin gcomhaontú bunaithe ar shraith prionsabal:

• sochaí eolasbhunaithe a chur chun cinn ar mhaithe le forbairt eacnamaíoch agus shóisialta na bpáirtithe;
• sochar frithpháirteach bunaithe ar chothromaíocht fhoriomlán buntáistí;
• rochtain chómhalartach do rannpháirtithe na gclár agus na dtionscadal taighde a rinne gach páirtí;
• malartú tráthúil faisnéise;
• cearta maoine intleachtúla a chosaint.

Comhar

Cumhdaítear faoin gcomhaontú raon gníomhaíochtaí comhoibríocha indíreacha idir eintitis dhlíthiúla* a bunaíodh i Maracó agus san Aontas Eorpach trí rannpháirtíocht eintiteas dlíthiúil Mharacó i gCreatchlár an Aontais Eorpaigh um Thaighde agus Nuálaíocht agus rannpháirtíocht chómhalartach eintiteas dlíthiúil arna mbunú san Aontas Eorpach i gcláir nó i dtionscadail taighde Mharacó faoi réir téarmaí agus coinníollacha arna mbunú ag nó dá dtagraítear in Iarscríbhinn I agus in Iarscríbhinn II den chomhaontú.

Féadfaidh comhar a bheith ar na foirmeacha agus na modhanna seo a leanas freisin:

• comhchruinnithe;
• plé rialta ar na treoirlínte agus na tosaíochtaí do bheartais agus pleanáil taighde i Maracó agus san Aontas Eorpach;
• malairt tuairimí agus comhairliúchán maidir le hionchais chomhair agus forbartha;
• comhroinnt thráthúil faisnéise maidir le cur chun feidhme agus torthaí na gcomhchlár taighde agus na dtionscadal taighde a rinneadh faoin gcomhaontú seo;
• cuairteanna agus malartuithe taighdeoirí, innealtóirí agus teicneoirí, lena n–áirítear chun críocha oiliúna taighde;
• malartuithe agus comhroinnt trealaimh agus ábhair eolaíochta;
• teagmhálacha rialta idir bainisteoirí cláir taighde nó tionscadail Mharacó agus an Aontais Eorpaigh;
• rannpháirtíocht saineolaithe ón dá pháirtí i seimineáir théamacha, i siompóisiam agus i gceardlanna;
• malartuithe faisnéise maidir le cleachtais, dlíthe, rialacháin agus cláir a bhaineann le comhar faoin gcomhaontú seo;
• rochtain chómhalartach ar fhaisnéis eolaíoch agus theicniúil a bhaineann leis an gcomhar seo;
• aon socrú eile arna ghlacadh ag an gComhchoiste um Chomhar Eolaíoch agus Teicniúil AE-Maracó.

DÁTA THEACHT I BHFEIDHM

Tháinig an comhaontú i bhfeidhm an 14 Márta 2005 ar feadh tréimhse éiginnte. Féadfaidh aon cheann de na páirtithe an comhaontú a fhoirceannadh am ar bith le fógra scríofa 6 mhí.

CÚLRA

Tá an caidreamh idir an tAontas Eorpach agus Maracó á rialú go príomha ag an gComhaontú Eora-Meánmhara lena mbunaítear comhlachas idir na Comhphobail Eorpacha (an tAontas Eorpach anois) agus a mBallstáit, de pháirt, agus Ríocht Mharacó, den pháirt eile (féach achoimre anseo).

Le haghaidh tuilleadh faisnéise, féach:

• Maracó agus an tAontas Eorpach (An tSeirbhís Eorpach Gníomhaíochta Seachtraí).

Le haghaidh tuilleadh faisnéise faoi chomhar Taighde agus Nuálaíochta (T&N) le Maracó, féach:

• Comhar idirnáisiúnta T&N le Maracó (An Coimisiún Eorpach).
• Treochlár le haghaidh comhar T&N idir AE agus Comharsanacht an Deiscirt (An Coimisiún Eorpach).

PRÍOMHTHÉARMAÍ

PRÍOMHDHOICIMÉID

Comhaontú maidir le comhar eolaíoch agus teicniúil idir an Comhphobal Eorpach agus Ríocht Mharacó (IO L 37, 10.2.2004, lgh. 9-15)

Cinneadh 2004/126/CE ón gComhairle an 22 Nollaig 2003 maidir leis an gComhaontú maidir le comhar eolaíoch agus teicneolaíoch idir an Comhphobal Eorpach agus Ríocht Mharacó a thabhairt chun críche (IO L 37, 10.2.2004, lch. 8)

DOICIMÉID GHAOLMHARA

Comhaontú Eora-Meánmhara lena mbunaítear comhlachas idir na Comhphobail Eorpacha agus a mBallstáit, de pháirt, agus Ríocht Mharacó, den chuid eile — Prótacal 1 maidir leis na socruithe a bhfuil feidhm acu maidir le táirgí talmhaíochta de thionscnamh Maracó a allmhairiú isteach sa Chomhphobal — Prótacal 2 maidir leis na socruithe a bhfuil feidhm acu maidir le táirgí iascaigh de thionscnamh Mharacó a allmhairiú isteach sa Chomhphobal — Prótacal 3 maidir leis na socruithe a bhfuil feidhm acu maidir le hallmhairí isteach i Maracó táirgí talmhaíochta de thionscnamh an Chomhphobail — Prótacal 4 maidir le táirgí tionscnaimh agus modhanna comhair riaracháin a shainiú — Prótacal 5 maidir le cúnamh frithpháirteach i gcúrsaí custaim idir na húdaráis riaracháin — An tAcht Deiridh — Dearbhuithe Comhpháirteacha — Comhaontuithe i bhfoirm Malartú Litreacha — Dearbhú ón gComhphobal — Dearbhuithe ó Mharacó (IO L 70, 18.3.2000, lgh. 2-204)

Rinneadh leasuithe comhleanúnacha ar an gcomhaontú a chorprú sa bhundoiciméad. Is de luach doiciméadach amháin é an leagan comhdhlúite seo.

Nuashonraithe 25.10.2019