1.

A dhearbhú gur mhainnigh an Íoslainn a hoibleagáidí a chomhlíonadh faoi Airteagal 7 de Chomhaontú LEE, toisc nach ndearna sí cuid dá dlíchóras inmheánach den Ghníomh dá dtagraítear ag pointe 56z d’Iarscríbhinn XIII a ghabhann le Comhaontú LEE (Rialachán 2017/352 ó Pharlaimint na hEorpa agus ón gComhairle an 15 Feabhra 2017 lena mbunaítear creat chun seirbhísí calafoirt a sholáthar agus rialacha comhchoiteanna maidir le trédhearcacht airgeadais calafort), arna oiriúnú le Prótacal 1 a ghabhann le Comhaontú LEE, agus

2.

Ordú a thabhairt don Íoslainn costais na n-imeachtaí sin a iompar.

—

Leis an iarratas seo, iarrann Údarás Faireacháin CSTE ar an gCúirt a dhearbhú gur mhainnigh an Íoslainn na bearta is gá a ghlacadh chun cuid dá dlíchóras inmheánach a dhéanamh den Ghníomh dá dtagraítear ag pointe 56z de Chaibidil V d’Iarscríbhinn XIII a ghabhann le Comhaontú LEE, arna oiriúnú le Prótacal 1 a ghabhann leis an gComhaontú sin, mar a cheanglaítear le hAirteagal 7 LEE.

—

I bhfreagra dar dáta an 25 Meán Fómhair 2023 ar litir fógra fhoirmiúil ó Údarás Faireacháin CSTE an 4 Iúil 2023, chuir an Íoslainn Údarás Faireacháin CSTE ar an eolas nach raibh na bearta is gá déanta aici go fóill chun an Gníomh a chur chun feidhme.

—

Thug Údarás Faireacháin CSTE a thuairim réasúnaithe uaidh an 22 Samhain 2023 agus é fós den tuairim nach ndearnadh cuid de dhlíchóras inmheánach na hÍoslainne den Ghníomh. Níor thug an Íoslainn freagra ar an tuairim réasúnaithe.

—

Faoin tráth a chuaigh an spriocdháta a leagadh síos sa tuairim réasúnaithe in éag, ní raibh Údarás Faireacháin CSTE curtha ar an eolas ag an Íoslainn faoi aon bheart a ghlac sí chun cuid dá dlíchóras inmheánach a dhéanamh den Ghníomh, ná ní raibh aon fhaisnéis eile ag Údarás Faireacháin CSTE a thug le fios go ndearnadh cuid de dhlíchóras inmheánach na hÍoslainne den Ghníomh.

—

Tugann Údarás Faireacháin CSTE dá aire, agus an t-iarratas seo á thaisceadh, nach ndearna an Íoslainn cuid dá dlíchóras inmheánach den Ghníomh, agus nár chuir sí Údarás Faireacháin CSTE ar an eolas faoi.