—

i gcás ina mbeartaíonn an t-údarás cánach ceart a dhiúltú do dhuine inchánach cáin bhreisluacha ionchuir (CBL) a asbhaint ar an bhforas go raibh baint ag an duine inchánach le calaois rothlach CBL, cuirtear cosc ar an údarás cánach sin gan ach a shuíomh go bhfuil an t-idirbheart sin ina chuid de slabhra sonraiscthe ciorclach;

—

is faoin údarás cánach sin, ar an gcéad dul síos, tuairisc bheacht a thabhairt ar na gnéithe a chomhdhéanann an chalaois agus an t-iompar calaoiseach a chruthú agus, ar an dara dul síos, a shuí go raibh an duine inchánach rannpháirteach go gníomhach sa chalaois sin nó go raibh a fhios aige nó gur cheart go mbeadh a fhios aige go raibh baint ag an idirbheart a rabhthas ag brath air mar bhonn leis an gceart sin leis an gcalaois sin, rud a chiallaíonn nach gá go ndéanfaí na gníomhaithe go léir a bhfuil baint acu leis an gcalaois agus gníomhaíochtaí na bpáirtithe sin faoi seach a shainaithint.

—

i gcás ina ndeir an t-údarás cánach go raibh baint ghníomhach ag an duine inchánach le himghabháil cánach breisluacha d’fhonn an ceart asbhainte a dhiúltú, ní chuirtear cosc ar an údarás cánach sin an diúltú sin a bhunú, sa bhreis air sin nó mar mhalairt air sin, ar fhianaise nach bhfuil an rannpháirtíocht sin cruthaithe léi, ach go bhféadfadh a fhios a bheith ag an duine inchánach sin, trí gach dúthracht chuí a fheidhmiú, go raibh baint ag an idirbheart lena mbaineann leis an gcalaois sin;

—

ní leor an fhíric go raibh comhaltaí an tslabhra soláthair, a bhfuil an t-idirbheart sin mar chuid de, ar an eolas faoina chéile chun a shuí gur ghlac an duine inchánach páirt sa chalaois.

—

i gcás ina bhfuil tásca ann as a n-eascraíonn amhras faoi neamhrialtachtaí nó calaois, ní chuirtear cosc ar cheanglas a chur ar an duine inchánach níos mó dúthrachta a fheidhmiú chun a áirithiú nach mbeidh sé rannpháirteach i gcalaois mar gheall ar an idirbheart a dhéanann sé;

—

ní fhéadfar a cheangal air, áfach, seiceálacha casta críochnúla a dhéanamh, amhail na seiceálacha sin a fhéadfaidh na húdaráis chánach a dhéanamh;

—

is faoin gcúirt náisiúnta atá sé a chinneadh an bhfuil, i bhfianaise imthosca uile an cháis, dúthracht leordhóthanach léirithe ag an duine inchánach agus an bhfuil na bearta déanta aige a d’fhéadfadh a bheith ag teastáil uaidh le réasún sna himthosca sin.

—

cuirtear cosc ar an údarás cánach diúltú cead a thabhairt do dhuine inchánach an ceart a fheidhmiú cáin bhreisluacha (CBL) a asbhaint ar an bhforas amháin gur mhainnigh sé na hoibleagáidí a eascraíonn as forálacha náisiúnta nó dlí an Aontais a bhaineann le sábháilteacht an bhiashlabhra a chomhlíonadh;

—

d’fhéadfadh mainneachtain na hoibleagáidí sin a chomhlíonadh, áfach, a bheith ina toisc amháin, i measc tosca eile, a d’fhéadfadh an t-údarás cánach a chur san áireamh chun a shuíomh gurb ann do chalaois CBL agus rannpháirtíocht an duine inchánach sin sa chalaois sin, fiú in éagmais cinneadh roimh ré ón gcomhlacht riaracháin atá inniúil chun sárú den sórt sin a chinneadh.