EUR-Lex Access to European Union law
This document is an excerpt from the EUR-Lex website
Document 52023PC0132
Recommendation for a COUNCIL DECISION authorising the opening of negotiations for an agreement between the European Union and the Federative Republic of Brazil on the exchange of personal data between the European Union Agency for Law Enforcement Cooperation (Europol) and the Brazilian authorities competent for fighting serious crime and terrorism
Moladh le haghaidh CINNEADH ÓN gCOMHAIRLE lena n-údaraítear tús a chur leis an gcaibidlíocht d’fhonn teacht ar chomhaontú idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
Moladh le haghaidh CINNEADH ÓN gCOMHAIRLE lena n-údaraítear tús a chur leis an gcaibidlíocht d’fhonn teacht ar chomhaontú idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
COM/2023/132 final
AN COIMISIÚN EORPACH
An Bhruiséil,9.3.2023
COM(2023) 132 final
Moladh le haghaidh
CINNEADH ÓN gCOMHAIRLE
lena n-údaraítear tús a chur leis an gcaibidlíocht d’fhonn teacht ar chomhaontú idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
MEABHRÁN MÍNIÚCHÁIN
1.CUSPÓIR
Ba cheart don Aontas tús a chur le caibidlíocht le Poblacht Chónaidhmitheach na Brasaíle chun Comhaontú a shíniú agus a thabhairt i gcrích lena gcumasófar malartú sonraí pearsanta idir Europol agus údaráis na Brasaíle atá freagrach as coireacht thromchúiseach agus sceimhlitheoireacht a chomhrac.
2.COMHTHÉACS AN MHOLTA
Sa saol domhandaithe ina bhfuil an choireacht thromchúiseach agus an sceimhlitheoireacht ag éirí níos trasnáisiúnta agus ilchineálaí, ba cheart údaráis forfheidhmithe dlí a bheith in ann comhoibriú go hiomlán le comhpháirtithe seachtracha chun slándáil a saoránach a áirithiú. I gcomhréir le Straitéis an Aontais Eorpaigh um an Aontas Slándála 1 , is féidir ról lárnach a bheith ag Europol maidir le comhar a mhéadú le tríú tíortha chun an choireacht agus an sceimhlitheoireacht a chomhrac i gcomhréir le beartais agus uirlisí seachtracha eile de chuid an Aontais. I Straitéis an Aontais Eorpaigh i mí Aibreáin 2021 chun dul i ngleic leis an gCoireacht Eagraithe, leagtar béim ar an ngá práinneach atá ann faisnéis Europol maidir le coireacht eagraithe thromchúiseach a fhorbairt tuilleadh agus feabhas a chur ar mhalartú faisnéise agus gníomhaíochtaí imscrúdaitheacha le tríú tíortha agus réigiúin (bhreise) atá ina mórmhoil le haghaidh coireacht eagraithe ardriosca a dhéanann difear do Bhallstáit an Aontais 2 .
I gcás Europol, tá comhar le tríú tíortha agus le heagraíochtaí idirnáisiúnta ríthábhachtach chun tacú leis na Ballstáit an choireacht thromchúiseach agus an sceimhlitheoireacht a chomhrac. Tá sé níos tábhachtaí fós an comhar le tríú tíortha a neartú i bhfianaise an Mheasúnaithe ar Bhagairt na Coireachta Tromchúisí Eagraithe 2021 a d’ullmhaigh Europol. Mar shampla, aithnítear i bpríomhthorthaí an mheasúnaithe bagartha sin go leanfaidh líonraí coiriúla i Meiriceá Laidineach de bheith ag comhoibriú le grúpaí coiriúla eagraithe atá bunaithe san Aontas Eorpach chun drugaí a gháinneáil.
A mhéid is gá chun a chuid cúraimí a chomhlíonadh, féadfaidh Europol caidreamh comhoibritheach a bhunú agus a choimeád le comhpháirtithe seachtracha trí shocruithe oibre agus riaracháin nach soláthraíonn féin bunús dlí, áfach, chun sonraí pearsanta a mhalartú. Murab ionann agus comhaontú idirnáisiúnta, tugann Europol na socruithe sin i gcrích agus níl siad ina gceangal ar an Aontas ná ar a Bhallstáit 3 .
Le Rialachán 2016/794 4 ó Pharlaimint na hEorpa agus ón gComhairle an 11 Bealtaine 2016, athraíodh an creat dlíthiúil le haghaidh malartú sonraí pearsanta idir Europol agus tríú tíortha. Ó tháinig an Rialachán sin i bhfeidhm an 1 Bealtaine 2017, aistríodh an inniúlacht chun comhaontuithe idirnáisiúnta a thabhairt i gcrích idir Europol agus tríú tíortha chuig an Aontas, ag gníomhú dó de bhun Airteagal 218 den Chonradh ar Fheidhmiú an Aontais Eorpaigh (CFAE) 5 . Tar éis togra ón gCoimisiún, tá naoi n‑údarú caibidlíochta glactha ag an gComhairle cheana féin le tríú tíortha 6 agus údarú chun comhaontú cuimsitheach a chaibidliú le Interpol lena gcumhdaítear malartú sonraí pearsanta le Europol freisin 7 . Síníodh an chéad Chomhaontú leis an Nua-Shéalainn le déanaí 8 .
Cé go mbaineann an Moladh seo go sonrach leis an gcaibidlíocht leis an mBrasaíl, ba cheart breathnú air mar chuid d’iarracht níos leithne chun feabhas a chur ar an gcomhar i bhforfheidhmiú an dlí idir an tAontas agus tíortha leasmhara Mheiriceá Laidinigh. I ndáil leis sin, molann an Coimisiún Eorpach tús a chur le caibidlíocht le haghaidh comhaontuithe idirnáisiúnta comhchosúla leis an mBolaiv, Eacuadór, Meicsiceo agus Peiriú an tráth céanna, agus an aidhm dheiridh leis sin feabhas a chur ar an gcomhrac i gcoinne na sceimhlitheoireachta agus na coireachta tromchúisí.
3.CUSPÓIRÍ AN MHOLTA
Is bagairt thromchúiseach iad grúpaí coireachta eagraithe Mheiriceá Laidinigh do shlándáil inmheánach an Aontais toisc go bhfuil a ngníomhaíochtaí nasctha níos mó agus níos mó le sraith coireanna laistigh den Aontas, go háirithe i réimse na gáinneála ar dhrugaí. I Measúnú 2021 an Aontais ar Bhagairt na Coireachta Tromchúisí Eagraithe (SOCTA), tugtar chun suntais go ndéantar gáinneáil ar chainníochtaí drugaí aindleathacha nach bhfacthas a leithéid riamh cheana ó Mheiriceá Laidineach, rud a ghineann brabúis ar fiú na billiúin euro iad, a úsáidtear chun réimse éagsúil eagraíochtaí coiriúla a mhaoiniú (ar bhonn idirnáisiúnta agus laistigh den Aontas) agus chun an smacht reachta san Aontas a lagú 9 .
Deimhnítear i dtuarascálacha a rinneadh le déanaí go bhfuil infhaighteacht cócaon san Eoraip ard i gcónaí agus go bhfuil an druga níos inacmhainne agus níos inrochtana do thomhaltóirí ná mar a bhí san am a chuaigh thart 10 . Iompraítear an chuid is mó den táirge a urghabhadh san Aontas ar muir, go príomha i gcoimeádáin loingseoireachta muirí 11 , agus seoltar go díreach chuig an Aontas é ó na tíortha táirgthe agus ó thíortha imeachta comharsanacha i Meiriceá Laidineach, lena n‑áirítear Poblacht Chónaidhmitheach na Brasaíle 12 . Is comhpháirtithe iad eagraíochtaí coireachta eagraithe na Brasaíle i líonraí coiriúla na Colóime agus cheannaigh siad cócaon a tháirgtear sa Bholaiv agus i bPeiriú. Chomh maith lena ngníomhaíochtaí gáinneála, is soláthraithe seirbhíse iad na líonraí sin le haghaidh líonraí coiriúla a fheidhmíonn ar fud an domhain agus a úsáideann calafoirt na Brasaíle chun gáinneáil a dhéanamh ar an gcócaon 13 . I bhfianaise na gcainníochtaí cócaoin a urghabhadh i gcalafoirt na hEorpa agus i gcalafoirt in áiteanna eile a bhí beartaithe le dul go Eoraip, bhí an Bhrasaíl (ina raibh urghabháil cócaon tuairim is 71 thona) ar cheann de na príomhphointí imeachta in 2020, mar a bhí sí le roinnt blianta anuas 14 . Deimhnítear i sonraí oifigiúla ón bPoblacht Chónaidhmitheach ón mBrasaíl gurb í an Eoraip an ceann scríbe is mó le haghaidh cócaon a sheoltar ón mBrasaíl 15 .
Tá eagraíochtaí coireachta eagraithe atá bunaithe ar an ilchríoch sin seanbhunaithe agus gníomhach freisin i réimsí eile coireachta a thagann faoi shainordú Europol, amhail an chibearchoireacht, an sciúradh airgid agus coireanna comhshaoil.
Chuir Europol in iúl ina Dhoiciméad Clársceidealaithe 2022-2024 go bhfuil bonn cirt, i measc nithe eile, leis an éileamh méadaitheach ar dhrugaí agus leis an méadú ar bhealaí gáinneála ar dhrugaí isteach san Aontas Eorpach, ar an ngá atá le comhar feabhsaithe le tíortha Mheiriceá Laidinigh 16 .
Cuireadh tús leis an gcomhar idir Europol agus Poblacht Chónaidhmitheach na Brasaíle nuair a síníodh Comhaontú maidir le Comhar Straitéiseach i mí Aibreáin 2017 17 . Mar thoradh ar na torthaí a baineadh amach tar éis an Comhaontú seo a chur chun feidhme agus Biúró Idirchaidrimh na Brasaíle a bhunú ag Europol, lena n-áirítear imscaradh Oifigeach Idirchaidrimh na Brasaíle ina dhiaidh sin chuig Europol i mí Mheán Fómhair 2020, cuireadh feabhas ar an gcomhar ar leibhéal oibríochtúil straitéiseach leis na Ballstáit agus le tríú páirtithe a ndéantar ionadaíocht orthu ag Europol.
Ó shin i leith, tá Póilíní Cónaidhme na Brasaíle ag comhoibriú agus ag obair go héifeachtach le Ballstáit an Aontais agus le Europol chun an choireacht eagraithe agus an sceimhlitheoireacht thrasnáisiúnta a chomhrac, rud a fhágann go bhfuil an Eoraip agus an chuid eile den domhan níos sábháilte. Baineadh amach go leor torthaí dearfacha cheana 18 , ón malartú laethúil faisnéise tríd an bhFeidhmchlár Líonra um Malartú Slán Faisnéise (SIENA) atá ag Europol go rannpháirtíocht i gcruinnithe an Ardáin Eorpaigh Ildisciplínigh i gCoinne Bagairtí Coiriúla, agus imscrúduithe comhpháirteacha leis na Ballstáit 19 .
Tá an Bhrasaíl rannpháirteach i Sásra Comhordúcháin agus Comhair maidir le Drugaí Chomhphobal Stáit Mhuir Chairib agus Mheiriceá Laidinigh. Thairis sin, tá Poblacht Chónaidhmitheach na Brasaíle ina ball de Chomhphobal Póilíneachta Chríocha Mheiriceá (Ameripol) agus tá sí tiomanta rannchuidiú le deireadh a chur le grúpaí coireachta eagraithe a bhfuil baint acu le táirgeadh agus gáinneáil drugaí. Go deimhin, sainaithníodh an Bhrasaíl mar phríomh-chomhpháirtí idirnáisiúnta chun an soláthar domhanda cócaoin ag an Lárionad Faireacháin Eorpach um Dhrugaí agus um Andúil i nDrugaí (EMCDDA) a laghdú 20 .
Bheadh comhar oibríochtúil méadaithe agus comhroinnt faisnéise ábhartha idir Europol agus Poblacht Chónaidhmitheach na Brasaíle tábhachtach chun cionta tromchúiseacha a chomhrac i gcuid mhór réimsí comhleasa coireachta, amhail gáinneáil ar dhrugaí agus coireanna comhshaoil, agus aird ar leith á tabhairt ar an ról tábhachtach atá ag líonraí coiriúla na Brasaíle i margadh domhanda na ndrugaí.
Mar gheall ar an easpa bunús dlí bailí faoi dhlí an Aontais, áfach, ní féidir le húdaráis forfheidhmithe dlí na Brasaíle atá freagrach as coireacht thromchúiseach agus sceimhlitheoireacht a chomhrac sonraí pearsanta ar bith a fháil ó Europol. Dá bhrí sin, is bac é sin ar thuilleadh forbartha a dhéanamh ar an gcomhar idir an dá pháirtí.
Ar na cúiseanna sin agus straitéis pholaitiúil an Aontais mar a leagtar amach i Straitéis an Aontais Eorpaigh um an Aontas Slándála 21 , Straitéis Drugaí an Eorpaigh 2021-2025 22 , agus Plean Gníomhaíochta an Aontais maidir le Drugaí 2021-2025 23 á cur san áireamh, measann an Coimisiún gur gá an Bhrasaíl a ainmniú ina tír thosaíochta chun tús a chur leis an gcaibidlíocht maidir le comhaontú lena gcumasófar malartú sonraí pearsanta idir Europol agus údaráis inniúla na Brasaíle sa ghearrthéarma.
4.EILIMINTÍ DLÍ
Le Rialachán (AE) 2016/794 maidir le Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol), leagtar amach creat dlíthiúil le haghaidh Europol, go háirithe a chuspóirí, a chúraimí, a raon feidhme inniúlachta, a choimircí cosanta sonraí agus na bealaí chun oibriú i gcomhar le comhpháirtithe seachtracha.
Tá an Moladh seo comhsheasmhach le forálacha Rialachán Europol.
Is é cuspóir an mholta seo údarú don Choimisiún a fháil ón gComhairle chun comhaontú idirnáisiúnta a chaibidliú thar ceann an Aontais. Is é Airteagal 218(3) agus (4) CFAE an bunús dlí don Chomhairle chun tús a chur leis an gcaibidlíocht.
I gcomhréir le hAirteagal 218 CFAE, údarófar don Choimisiún Comhaontú a chaibidliú thar ceann an Aontais le Poblacht Chónaidhmitheach na Brasaíle maidir le malartú sonraí pearsanta idir Europol agus údaráis inniúla na Brasaíle atá inniúil chun an choireacht agus an sceimhlitheoireacht thromchúiseach a chomhrac.
Tá an tAontas tar éis a inniúlacht a fheidhmiú sa réimse sin cheana féin agus tá rialacha bunaithe aige ina leith sin trí chreat rialacha a ghlacadh lena rialaítear gníomhaíochtaí Europol, lena n‑áirítear rialacha maidir le sonraí pearsanta a phróiseáil.
Moladh le haghaidh
CINNEADH ÓN gCOMHAIRLE
lena n-údaraítear tús a chur leis an gcaibidlíocht d’fhonn teacht ar chomhaontú idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh (CFAE), agus go háirithe Airteagal 218(3) agus (4) de,
Ag féachaint don mholadh ón gCoimisiún Eorpach,
De bharr an mhéid seo a leanas:
(1)Glacadh Rialachán (AE) 2016/794 ó Pharlaimint na hEorpa agus ón gComhairle an 11 Bealtaine 2016 agus tá sé infheidhme ón 1 Bealtaine 2017 ar aghaidh 24 . Leasaíodh é le Rialachán 2022/991 an 27 Meitheamh 2022 25 .
(2)Le forálacha Rialachán (AE) 2016/794, go háirithe na forálacha sin a bhaineann le sonraí pearsanta a aistriú chuig údarás tríú tír ó Ghníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) chuig tríú tíortha agus chuig eagraíochtaí idirnáisiúnta, déantar foráil go bhféadfaidh Europol sonraí pearsanta a aistriú chuig údarás tríú tír inter alia ar bhonn comhaontú idirnáisiúnta arna thabhairt i gcrích idir an tAontas agus an tríú tír sin de bhun Airteagal 218 CFAE lena dtugtar coimircí leordhóthanacha i dtaobh príobháideachas agus cearta agus saoirsí bunúsacha daoine aonair a chosaint.
(3)Ba cheart tús a chur leis an gcaibidlíocht d’fhonn comhaontú a thabhairt i gcrích idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac (‘an Comhaontú’).
(4)Mar a mheabhraítear freisin in Aithris 35 de Rialachán (AE) 2016/794, ba cheart don Choimisiún a bheith in ann dul i gcomhairle leis an Maoirseoir Eorpach ar Chosaint Sonraí (MECS) freisin le linn chaibidlíocht an Chomhaontaithe agus, in aon chás, sula dtabharfar an Comhaontú i gcrích.
(5)Leis an gComhaontú, ba cheart na cearta bunúsacha a urramú agus cloí leis na prionsabail a aithnítear i gCairt um Chearta Bunúsacha an Aontais Eorpaigh, go háirithe an ceart chun saoil phríobháidigh agus chun saoil teaghlaigh, a aithnítear in Airteagal 7 den Chairt, an ceart go ndéanfar sonraí pearsanta a chosaint, a aithnítear in Airteagal 8 den Chairt agus an ceart chun leigheas éifeachtach agus triail chóir a fháil a aithnítear in Airteagal 47 den Chairt. Ba cheart an Comhaontú a chur i bhfeidhm i gcomhréir leis na cearta agus na prionsabail sin.
(6)Níor cheart difear a dhéanamh leis an gComhaontú d’aistriú sonraí pearsanta nó cineálacha eile comhair idir na húdaráis atá freagrach as an tslándáil náisiúnta a chosaint, agus ba cheart é a bheith gan dochar don aistriú sin.
TAR ÉIS AN CINNEADH SEO A GHLACADH:
Airteagal 1
Údaraítear leis seo don Choimisiún comhaontú a chaibidliú, thar ceann an Aontais, idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac.
Leagtar amach na treoracha caibidlíochta san Iarscríbhinn.
Airteagal 2
Déanfar an chaibidlíocht i gcomhar leis an [ainm an choiste speisialta le cur isteach ag an gComhairle] ábhartha.
Airteagal 3
Is chuig an gCoimisiún a dhírítear an Cinneadh seo.
Arna dhéanamh sa Bhruiséil
Thar ceann na Comhairle
An tUachtarán
AN COIMISIÚN EORPACH
An Bhruiséil,9.3.2023
COM(2023) 132 final
IARSCRÍBHINN
a ghabhann leis an
Moladh le haghaidh CINNEADH ÓN gCOMHAIRLE
lena n-údaraítear tús a chur leis an gcaibidlíocht d’fhonn teacht ar chomhaontú idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
IARSCRÍBHINN
Treoracha maidir le caibidliú comhaontaithe idir an tAontas Eorpach agus Poblacht Chónaidhmitheach na Brasaíle maidir le malartú sonraí pearsanta idir Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) agus údaráis na Brasaíle atá inniúil chun an choireacht thromchúiseach agus an sceimhlitheoireacht a chomhrac
Le linn na caibidlíochta, ba cheart é a bheith d’aidhm ag an gCoimisiún na cuspóirí a leagtar amach go mion thíos a bhaint amach.
(1)Is é cuspóir an Chomhaontaithe an bunús dlí a sholáthar chun sonraí pearsanta a aistriú idir Europol agus údaráis inniúla Phoblacht Chónaidhmitheach na Brasaíle faoi seach, chun tacú le gníomhaíocht údaráis inniúla na tíre sin agus na mBallstát agus iad a neartú chomh maith lena gcomhar frithpháirteach maidir leis an gcoireacht thromchúiseach thrasnáisiúnta agus sceimhlitheoireacht a chosc agus a chomhrac, agus coimircí iomchuí á n‑áirithiú an tráth céanna i ndáil le príobháideachas, sonraí pearsanta agus cearta agus saoirsí bunúsacha daoine aonair a chosaint.
(2)Chun teorannú de réir cuspóra a ráthú, ní bheidh baint ag comhar agus malartú sonraí faoin gComhaontú ach maidir le coireanna agus cionta coiriúla gaolmhara a thagann faoi inniúlacht Europol i gcomhréir le hAirteagal 3 de Rialachán 2016/794 (ar a dtugtar ‘cionta coiriúla’ le chéile). Go háirithe, ba cheart an comhar a bheith dírithe ar an sceimhlitheoireacht a chosc agus a chomhrac agus ar chur isteach ar an gcoireacht eagraithe, chomh maith leis an ngáinneáil ar dhrugaí agus an chibearchoireacht a chomhrac. Sonrófar sa Chomhaontú a raon feidhme agus na socruithe a bhféadfaidh Europol sonraí a aistriú ina leith chuig údaráis inniúla Phoblacht Chónaidhmitheach na Brasaíle.
(3)Leagfar amach go soiléir beacht sa Chomhaontú na coimircí agus na rialuithe is gá maidir le cosaint sonraí pearsanta, cearta bunúsacha agus saoirsí daoine aonair, gan beann ar a náisiúntacht agus a n‑áit chónaithe, sa mhalartú sonraí pearsanta idir Europol agus údaráis inniúla na Brasaíle. I dteannta na gcoimircí a leagtar amach thíos, áireofar orthu sin a cheangal go mbeidh aistriú sonraí pearsanta faoi réir oibleagáidí rúndachta agus nach n‑úsáidfear na sonraí pearsanta chun pionós báis nó aon chineál íde atá cruálach agus mídhaonna a iarraidh, a thabhairt nó a fhorghníomhú, gan dochar do choimircí breise a d’fhéadfadh a bheith ag teastáil.
Go háirithe:
(a)Beidh sainmhínithe sa Chomhaontú ar théarmaí tábhachtacha atá i gcomhréir le hAirteagal 3(1) de Threoir (AE) 2016/680.
(b)Urramóidh an Comhaontú prionsabal na sainiúlachta, lena n‑áiritheofar nach ndéanfar na sonraí a phróiseáil chun críoch eile seachas chun críocha an aistrithe. Chuige sin, beidh cuspóirí na próiseála sonraí pearsanta ag na Páirtithe i gcomhthéacs an Chomhaontaithe soiléir agus beacht, agus ní bheidh siad níos leithne ná mar is gá i gcásanna aonair chun an sceimhlitheoireacht agus na cionta coiriúla dá dtagraítear sa Chomhaontú a chosc agus a chomhrac.
(c)Déanfar sonraí pearsanta a aistríonn Europol i gcomhréir leis an gComhaontú a phróiseáil go cothrom, ar bhonn dlisteanach agus chun na gcríoch dár aistríodh iad, agus chun na gcríoch sin amháin. Leis an gComhaontú, cuirfear d’oibleagáid ar Europol, tráth aistrithe na sonraí, aon srian ar rochtain nó ar úsáid a léiriú, lena n‑áirítear a mhéid a bhaineann lena n‑aistriú, lena léirscriosadh nó lena scriosadh nó lena bpróiseáil tuilleadh. Leis an gComhaontú, cuirfear d’oibleagáid ar údaráis inniúla Phoblacht Chónaidhmitheach na Brasaíle na srianta sin a urramú agus sonrófar ann conas a fhorfheidhmeofar comhlíonadh na srianta sin sa chleachtas. Beidh sonraí pearsanta leordhóthanach, ábhartha agus teoranta don mhéid is gá i ndáil leis an gcuspóir sin. Beidh siad cruinn agus coimeádfar cothrom le dáta iad. Ní choinneofar sonraí ar feadh níos faide ná mar is gá chun na gcríoch dár aistríodh iad. Beidh iarscríbhinn ag gabháil leis an gComhaontú ina mbeidh liosta uileghabhálach de na húdaráis inniúla i bPoblacht Chónaidhmitheach na Brasaíle a bhféadfaidh Europol sonraí pearsanta a aistriú chucu chomh maith le tuairisc ghearr ar a n‑inniúlachtaí.
(d)Ní cheadófar aistriú sonraí pearsanta lena nochtar bunadh ciníoch nó eitneach, tuairimí polaitiúla, creideamh reiligiúnach nó fealsúnach, ballraíocht i gceardchumann, sonraí géiniteacha, sonraí bithmhéadracha chun duine nádúrtha a shainaithint go huathúil, agus sonraí a bhaineann le sláinte duine, ná sonraí a bhaineann le saol gnéis nó gnéaschlaonadh duine nádúrtha ag Europol ach amháin i gcás ina bhfuil géarghá leis agus má tá sé réasúnta agus comhréireach i gcásanna aonair chun cion coiriúil a chosc nó a chomhrac, agus más rud é go gcuireann na sonraí sin, seachas sonraí bithmhéadracha, le sonraí pearsanta eile. Ba cheart coimircí sonracha a bheith sa Chomhaontú freisin a bhaineann le haistriú sonraí pearsanta maidir le híospartaigh ciona choiriúil, finnéithe nó daoine eile ar féidir leo faisnéis a sholáthar maidir le cionta coiriúla, chomh maith le mionaoisigh.
(e)Áiritheofar leis an gComhaontú cearta in-fhorfheidhmithe daoine aonair a ndéantar a sonraí pearsanta a phróiseáil trí rialacha a leagan síos maidir leis an gceart rochtana, ceartaithe agus scriosta, lena n‑áirítear na forais shonracha a d’fhéadfadh aon srian riachtanach agus comhréireach a cheadú. Áiritheofar leis an gComhaontú freisin cearta in-fhorfheidhmithe maidir le leigheas riaracháin agus breithiúnach d’aon duine a bpróiseáiltear a chuid sonraí faoin gcomhaontú agus áiritheofar freisin go ráthófar leigheasanna éifeachtacha.
(f)Leagfar síos leis an gComhaontú na rialacha maidir le sonraí pearsanta a stóráil, a athbhreithniú, a cheartú agus a scriosadh agus maidir le taifid a choimeád chun críoch logála agus doiciméadaithe chomh maith le faisnéis atá le cur ar fáil do dhaoine aonair. Ba cheart foráil a dhéanamh ann freisin maidir le coimircí i ndáil le próiseáil uathoibrithe sonraí pearsanta.
(g)Sonrófar sa Chomhaontú na critéir ar ar a mbonn a léireofar iontaofacht na foinse agus chruinneas na sonraí.
(h)Áireofar sa Chomhaontú an oibleagáid slándáil sonraí pearsanta a áirithiú trí bhearta teicniúla agus eagraíochtúla iomchuí, lena n‑áirítear trí chead a thabhairt do dhaoine údaraithe amháin rochtain a bheith acu ar shonraí pearsanta. Áireofar sa Chomhaontú freisin an oibleagáid fógra a thabhairt i gcás sárú i ndáil le sonraí pearsanta, ar sárú é a dhéanann difear do na sonraí a aistrítear faoin gComhaontú.
(i)Ní cheadófar faisnéis a aistriú ar aghaidh ó údaráis inniúla Phoblacht Chónaidhmitheach na Brasaíle chuig údaráis eile sa Bhrasaíl, lena n‑áirítear lena n‑úsáid in imeachtaí breithiúnacha, ach amháin faoi réir coinníollacha agus coimircí iomchuí, lena n‑áirítear réamhúdarú ó Europol.
(j)Beidh feidhm ag na coinníollacha céanna faoi (i) maidir le faisnéis a aistriú ar aghaidh ó údaráis inniúla Phoblacht Chónaidhmitheach na Brasaíle chuig údaráis i dtríú tír, agus an ceanglas breise ann nach gceadófar aistrithe ar aghaidh den sórt sin ach amháin i ndáil le tríú tíortha a bhfuil Europol i dteideal sonraí pearsanta a aistriú chucu ar bhonn Airteagal 25(1) de Rialachán (AE) 2016/794.
(k)Áiritheofar leis an gComhaontú córas formhaoirseachta ag údarás poiblí neamhspleách amháin nó níos mó atá freagrach as cosaint sonraí ag a bhfuil cumhachtaí éifeachtacha imscrúdaithe agus idirghabhála chun formhaoirseacht a dhéanamh ar na húdaráis phoiblí sin i bPoblacht Chónaidhmitheach na Brasaíle a úsáideann sonraí pearsanta/faisnéis mhalartaithe, agus chun imeachtaí dlíthiúla a thionscnamh. Go háirithe, beidh cumhachtaí ag na húdaráis neamhspleácha gearáin a éisteacht ó dhaoine aonair maidir le húsáid a sonraí pearsanta. Beidh na húdaráis phoiblí a úsáideann sonraí pearsanta cuntasach as na rialacha maidir le cosaint sonraí pearsanta faoin gComhaontú a chomhlíonadh.
(4)Déanfar foráil sa Chomhaontú maidir le sásra éifeachtach um réiteach díospóidí i ndáil lena léirmhíniú agus lena chur i bhfeidhm chun a áirithiú go gcomhlíonfaidh na páirtithe rialacha arna gcomhaontú go frithpháirteach.
(5)Áireofar sa Chomhaontú forálacha maidir le faireachán agus meastóireacht thréimhsiúil a dhéanamh ar an gComhaontú.
(6)Áireofar sa Chomhaontú foráil maidir le teacht i bhfeidhm agus cur i bhfeidhm agus foráil lena bhféadfaidh Páirtí é a fhoirceannadh nó a chur ar fionraí, go háirithe i gcás nach n‑áirithíonn an tríú tír go héifeachtach an leibhéal cosanta do chearta agus saoirsí bunúsacha a cheanglaítear faoin gComhaontú seo a thuilleadh. Sonrófar sa Chomhaontú freisin an bhféadfar leanúint de phróiseáil a dhéanamh ar shonraí pearsanta a thagann faoina raon feidhme agus a aistríodh sula ndearnadh é a chur ar fionraí nó a fhoirceannadh. Beidh próiseáil leanúnach sonraí pearsanta, má cheadaítear sin, i gcomhréir le forálacha an Chomhaontaithe tráth na fionraí nó an fhoirceanta ar aon chuma.
(7)Beidh comhúdarás ag an gComhaontú sa Bhéarla, sa Bhulgáiris, sa Chróitis, sa Danmhairgis, san Eastóinis, san Fhionlainnis, sa Fhraincis, sa Ghaeilge, sa Ghearmáinis, sa Ghréigis, san Iodáilis, sa Laitvis, sa Liotuáinis, sa Mháltais, san Ollainnis, sa Pholainnis, sa Phortaingéilis, sa Rómáinis, sa tSeicis, sa tSlóivéinis, sa tSlóvaicis, sa Spáinnis, sa tSualainnis agus san Ungáiris, agus áireofar clásal teanga ann chuige sin.
