—

ag féachaint don Chiste Eorpach Cosanta 2021-2027, a bhfuil buiséad tiomnaithe aige le haghaidh teicneolaíochtaí suaiteacha atá ag teacht chun cinn,

—

ag féachaint do theachtaireacht ón gCoimisiún an 15 Feabhra 2022 dar teideal ‘Treochlár maidir le teicneolaíochtaí criticiúla don tslándáil agus don chosaint’ (COM(2022)0061),

—

ag féachaint do dhoiciméad inmheánach oibre de chuid an Choimisiúin an 10 Samhain 2022 dar teideal ‘First progress report on the implementation of the Action Plan on synergies between civil, defence and space industries’ [An chéad tuarascáil ar dhul chun cinn maidir le cur chun feidhme an Phlean Gníomhaíochta maidir le sineirgí idir tionscail shibhialta, chosanta agus spáis] (SWD(2022)0362),

—

ag féachaint do rún uaithi an 7 Meitheamh 2022 maidir le Treochlár SEGS um Athrú Aeráide agus um Chosaint (1),

—

ag féachaint do thuairim ón gCoiste um Ghnóthaí Eachtracha,

—

ag féachaint do Riail 54 dá Rialacha Nós Imeachta,

—

ag féachaint don tuarascáil ón gCoiste um Thionsclaíocht, um Thaighde agus um Fhuinneamh (A9-0120/2023),

A.

de bhrí go bhfuil tionscal cosanta atá láidir, inbhuanaithe, ardfhorbartha ó thaobh na teicneolaíochta de agus iomaíoch ríthábhachtach do chumais slándála agus cosanta na hEorpa agus, dá bhrí sin, do rathúnas na hEorpa agus chun tacú lena chomhghuaillithe agus lena cairde;

B.

de bhrí gur léirigh cogadh foghach na Rúise i gcoinne na hÚcráine gur gá don Eoraip infheistíocht a dhéanamh go práinneach ina teicneolaíochtaí cosanta agus slándála, lena n-áirítear táirgeadh armlóin, ar scála lena léirítear riachtanais an chatha nua-aimseartha, le comhordú, soláthar agus infheistíocht chomhpháirteach i dtaighde agus i bhforbairt, lena n-áirítear cibearshlándáil, agus ar bhealach éifeachtúil agus comhoibríoch; de bhrí gur shocraigh na Ballstáit sprioc 35 % d’infheistíochtaí cosanta comhoibríocha, ach gur beag an toil pholaitiúil atá léirithe acu, agus fiú go bhfuil sí ag laghdú, chun an sprioc sin a bhaint amach, gan ach 11 % a bheith bainte amach in 2020 agus 8 % in 2021, an ráta is ísle riamh; de bhrí go raibh roinnt Ballstát i bhfad níos rannpháirtí maidir le tacaíocht a thabhairt don Úcráin ná a chéile, i dtéarmaí airgeadais agus míleata araon;

C.

de bhrí go bhfuil géarghá le fíormhargadh Eorpach um threalamh cosanta a bhunú, inter alia, trí acmhainneachtaí tionsclaíocha a chomhdhlúthú, dúbailt agus ilroinnt a laghdú agus bonn tionsclaíoch an mhargaidh, go háirithe a shlabhraí soláthair agus a lucht saothair oilte, a oiriúnú ag an am céanna don timpeallacht slándála nua san Eoraip, ina n-éilítear méadú tapa ar acmhainneachtaí táirgeachta;

D.

de bhrí go bhfuil soláthar seasta, inbhuanaithe agus cobhsaí amhábhar, teicneolaíochtaí agus comhpháirteanna criticiúla ríthábhachtach d’earnáil cosanta na hEorpa;

E.

de bhrí go bhfuil teicneolaíochtaí ceannródaíocha agus caipiteal daonna comhfhreagrach, go háirithe teicneolaíochtaí agus scileanna digiteacha atá ag athrú go tapa, ag éirí níos tábhachtaí chun tionscail slándála agus cosanta na hEorpa a chothú agus a neartú;

F.

de bhrí go bhfuil struchtúrú déanta an earnáil cosanta ar bhealach éagsúil i ngach Ballstát;

G.

de bhrí go bhfuil úsáid neamhéifeachtúil acmhainní eacnamaíocha agus cumais chosanta laghdaithe mar thoradh ar ilroinnt earnáil cosanta na hEorpa agus iarrachtaí dúblála i margadh cosanta na hEorpa agus gur cheart iad a sheachaint; de bhrí gurb ionann é sin agus caillteanais chomhchoiteanna idir EUR 25 agus 100 billiún, de réir an Choimisiúin;

H.

de bhrí gur san earnáil shibhialta a thionscnaíonn roinnt teicneolaíochtaí criticiúla a d’fhéadfadh a bheith ar fáil lena n-úsáid in earnáil na cosanta agus go bhféadfaidís a bheith cáilithe le haghaidh dé-úsáide dá mbainfí bacainní;

I.

de bhrí go bhfuil sé d’acmhainneacht ag taighde agus nuálaíocht oscailte a bhaineann leis an saol acadúil, leis an bhfiontar príobháideach agus leis an earnáil phoiblí dlús a chur le forbairt theicneolaíochtaí ceannródaíocha na hEorpa, lena bhféadfaí aghaidh a thabhairt ar ilroinnt an mhargaidh, ar choinníoll go n-áirithítear idir-inoibritheacht;

J.

de bhrí go gcuireann rannpháirtíocht mhéadaithe na bhfiontar beag agus meánmhéide (FBManna) feabhas ar iomaíochas na hearnála slándála agus cosanta;

K.

de bhrí gur cheart go gcuirfí i gcuntas sa ghá atá le tacaíocht struchtúrtha don nuálaíocht agus don dul chun cinn teicneolaíoch go mbaineann an nuálaíocht go bunúsach leis an iomaíocht agus le spiorad an taighde, ní trí phleanáil mhaorlathach;

L.

de bhrí, ó 2017 go 2020, gur thiomnaigh na Ballstáit atá rannpháirteach sa Ghníomhaireacht Eorpach um Chosaint (GEC) níos mó ná EUR 25 bhilliún ar thaighde agus forbairt T &D a bhaineann leis an gcosaint, nach ndearnadh ach sciar beag de a chaitheamh i gcomhar le chéile;

M.

de bhrí nár cheart rochtain ar mhaoiniú do na tionscail slándála agus cosanta a shrianadh trí rialacháin AE;

N.

de bhrí go bhfuil comhroinnt sonraí ríthábhachtach chun anailís a dhéanamh ar bhearnaí straitéiseacha agus chun acmhainneacht an dul chun cinn teicneolaíochta a bhaint amach, ach nach mór cosaint maoine intleachtúla agus sonraí íogaire gnó a ráthú;

O.

de bhrí go bhfuil comhar le comhpháirtithe straitéiseacha lasmuigh den Aontas, go háirithe comhghuaillithe ECAT, ach freisin comhpháirtithe domhanda comhlachaithe agus atá ar aon intinn, ríthábhachtach chun an nuálaíocht agus an dul chun cinn teicneolaíoch a fheabhsú